خلف جداره تختبىء انثى

الفصل السادس عشر

روايه / خلف جداره تختبىء انثى

الفصل السادس عشر
الكاتبة Jawhara

__________________

سبحان الله وبحمده عدد خلقه ورضا نفسه وزنه عرشه وعدد مداد كلماته
__________________

صفية ..
حياتي ابيت حيان  تختلف عن بيت اهلي صارت مسؤليتي  اكبر  بحكم وليداته  موجودين لزوم اداريهم واهتم بكلشي يخصهم وفوكاهم ابوهم حيان ، من عزمنا ابوي حجى وياي وصاني چثير عليهم أنا بحكم تربيتي لغياث متعودة مو شي صعب علية والحمدلله يبين متقبلين وجودي بحياتهم من اول يوم دخلت البيت ، أنا أحاول بالاكدر عليه اكون رحيمة بيهم ماريد أحد يقلل من تصرفي ويكول مرة اب احاول احتويهم وخاصة صكر الجبير يدور اهتمام وحسيته يراقبني من اتعامل وية اخوه حوم وعلى هالاساس بديت احاوطه باهتمامي ، الولد  يفتهم وذكي ماشاء الله عمره عشر سنوات  ،

ذبيت القلم من ايدي وتنهدت ، مسحت وجهي بقله حيلة وركزت نظراتي على حوم ..

صفية /  ثالث مرة اقراها وانت تردد وراية عجل امت تحفظها ؟!!!

يگليبي نزل راسو مستحي ، قهرني لن عيونو غوركت  بدموع سحبتو بحظني وحبيت راسو ..

صفية بحنية /  يلا شنهو الي ورانا اقرا لما تحفظ ، رح العب شوية وارجع بعد ربع ساعة بينما احفظ صكر درس الإسلامية

حوم بفرحة وهو يمسح وجهه /  عجل رايح عند ابوي وخل صكر يندهني

طلع حوم وانا رحت اشوف شنهو عندي تا اسوي ، الوكت العصر بعد عالعشا طلعت برا يم عمتي كاعدة وعلى بساط مادته بالحديقة وجدامها صينية چاي

حجية حشمة / تعاي اكعدي

صفية /  بوحدج كاعدة وين البنوات ( قصدت الجناين الباقيات لأن بيوت ولدها قريبين على البيت الجبير )

حجية حشمة / مرية قيس جانت هينة وراحت تغير لوليدها كب الجاي عليه زين ما احترك

كعدت بسدها ومدتلي استكان جاي أخذته بسرعة ..

صفية  / يوه يعمة أنا اصب لروحي تسلم يدج

حجية حشمة / وايدج  بنيتي ، اكول خوما عذبج حوم ؟

صفية / فكرو  عند  أبوه واخيه صكر كلتله رح ربع ساعة وارجع وماصدك  أنهزم

حجية حشمة / ما يفاركون ابوهم هو علمهم عليه ماتشوفينهم  يطير نوعهم  من يطلع لمكان 

صفية / الله يحفظهم

حجية حشمة / امين ويرزقج الضنى تا نفرح بيج

صفية استحت وردت / يوه يعمة يمكن ما احبل وانا عمري داخل عالست وثلاثين

حجية حشمة /   يصير لا تقنطو من رحمة الله ربنا يرزق بغير حساب بعدج شابة