خلف جداره تختبىء انثى

الفصل السادس

رواية / خلف جداره تختبىء انثى

الفصل السادس
الكاتبة Jawhara
_______________

جود يمشي ورى أبوه ويسأل / اريد ماما

اخذه بحظنه  وباس خده / عدها شغل بالمدرسة شوي وتجي

جود بإصرار / ما  ، ما ، اليدها يلا لوح جيبها من ملسة ( مدرسة )

صاح أخته تا تقنعه / صفية تعاي هينة ، صفييية

صفية دخلت للهول سألته من شافت جود بحظنه / خير يخوي  ؟!!

عبد العزيز / قنعي الذيب هذا يدور امو

صفية بحب اخذت جود وطلعت وهي تبوس بي / تعال يروح وگلب عمتك تعال تا ندحج عالدجاج والغنم تا تشوفهن شكثر حلوات

جود يسأل / اخد خلوف الي ويسوي مييع مييع

صفية بضحكة / ههههه اي يسوي مييع

،،،،،،،

عبد العزيز يحجي وية أبوه بموضوعه

عبد العزيز  / يبة انت ردت  تشوف ابني وهذا جود  عندك

حجي حوم ماعجبه وفهم تصرف عزيز أنه يستغفله  ، طك باكورته بالكاع ونتر بي /

حجي حوم  / شايفني مدمغ يول تضحج علية  بجلمتين تا اقتنع  ، مرتك وينها عليش ما اجت ، تعوف ضناها  شلون ام هاي ؟!!!

عزيز يداخله مهموم لأن يعرف تيماء مقهورة من السواه لكن رضا ابوه افرض ومصيرها تقتنع وتجي من تشتاق لجود لأن مستحيل يرجعه ولو هو من الصبح يدور أمه وكاعد يتحايل عليه تا ينسى شوية ، اخر شي انطاه لأخته صفية وطلع

عبد العزيز / محشوم يبة محشوم وإن شاء الله تصل هالايام هي عدها دوام بالمدرسة تضبط وضعها إن شاء الله ، لا يكون خاطرك الا طيب

حجي حوم  / اييه دام هيج السالفة عجل جهز غرفتك  تا تكعد بيها المرة

عبد العزيز  / ماتحتاج  غرفتي لتعديل

حجي حوم  / شوف اخيتك وينها اريد احجي وياها بشغيلة

عبد العزيز / ملتهية وية جود خل اكوم  أصيحها

،،
صفية دخلت ورى اخوها الي أخذ جود وكعده بحظنه  ويسولف عالدجاج والغنم اللي بالحضيرة

صفية / شلونك يبة

حجي حوم بحب ابوي خالص لبنته / هلا بنيتي تعاي هينة بسدي

كعدت وعينها على جود الي يبين سكت وكعد يلعب بسبحه أبوه

ومن سألها ابوها بقت صافنه متعرف شتكول

حجي حوم  / ابو صكر يريد يعقد  الخميس تحضري يبوي تا تروحين للمحكمة والعرس يريدو نهاية الشهر

رد ابو غياث من شافها ساكتة ..

عبد العزيز / يبة خلها براحتها عليش مستعجل ابو صكر