خلف جداره تختبىء انثى

الفصل الثالث عشر

رواية / خلف جداره تختبىء انثى

الفصل الثالث عشر
الكاتبة Jawhara

_____________

( لا إلَهَ إلَّا اللَّهُ العَظِيمُ الحَلِيمُ، لا إلَهَ إلَّا اللَّهُ رَبُّ العَرْشِ العَظِيمِ، لا إلَهَ إلَّا اللَّهُ رَبُّ السَّمَوَاتِ ورَبُّ الأرْضِ، ورَبُّ العَرْشِ الكَرِيمِ)

_____________

تيماء ..
كعدت الصبح  مالي نفس لكولشي  حتى مابية اكوم من الفراش بس مجبورة لأن البيت يحتاج شغل وهسة كلها تكعد فالريوك يكون جاهز  مثلما متعودين ، نزلت من فراشي عزيز نايم  ، تطمنت على جود وطلعت من الغرفة  رحت توضيت وكملت صلاة وبديت اسوي الريوك ، سمعت حركة باوعت بالصالة يبين عمو  الحجي كعد هو وغياث الي دوامه الصبح  كملت وخليت الصينية عالزولية  وصحت غياث الي دخل صبح علية

غياث  / صباحج خير

تيماء /  صباح النور ، يلا عيوني تريك د تروح للمدرسة

باوع  بالصينية وعكد حاجبه سبحان الله نفس  تصرفات عزيز  وطريقته إذا ما عجبه شي ..

غياث /  ماكو بيض ؟!

ماحبيت اكسر خاطره رغم ماحب ريحته للبيض من الصبح ، ابقى اتقيأ هاي من صرت حامل أحوالي كولش متخربطة

تيماء  / دقيقة ، اكعد بينما اجهزلك تريد طرك لو اسلكها

غياث /  طرك وضيفي عليها حبة سودا

بسرعه رحت طلعت بيضتين وخفقتهم وسويت مثلما يريد وخليت الماعون كدامه
واني كاتمه نفسي طلعت بسرعه فتت للحمام ذبيت من راسي حسيت روحي طلعت غسلت ومن طلعت لكيت عمي حوم واكف ساند جسمه على عوجيته  يم الدرج صبحت عليه بصوت مخنوك  رد علية ..

حجي حوم / الله يصبحج بالخير ، عسى ماشر  يبوي

تيماء وعيونها مدمعه /  تقيأت من ريحة البيض ماتحملتها

حجي حوم / خل ابو غياث ياخذج للطبيبة تعاينج

تيماء / مايحتاج هاي حالتي من اصير حامل تخلص الثلاث اشهر وارتاح

رجعت للمطبخ حضرت حليب وصبيتله بالكوب خليته بالصينية ، كعد وهو يسولف وية غياث يسأله  عالمدرسة  بعدها سالة إذا عنده مصرف رد غياث كاله أبوية نطاني البارحه بالليل

كاعدة كبالهم عالقنفه ويادوب متحملة روحي صاحني عمي /  تعاي تريكي

تيماء / ما أشتهي  عمو

حجي حوم / مايصير لزوم تفكي ريجج

عبد العزيز / صباح الخير ، كاعدين من صباحيات

ردو على عزيز الي دخل متلفلف بالفروة وكعد بسد أبوه وعينه على غياث حظنه وباس رأسه

عبد العزيز / ها يبوي تروح للمدرسة ؟