🌧️ 🥀 *عروسة الشتا* 🥀🌧️ بالدارجة المغربية

🥀🌧️ الفصل 158 🌧️🥀

💞#عروسة_الشتا💞

بقلم : #فاتي_رعدة

⚡⚡⚡البارت 725 ⚡⚡⚡

محسن : صافي صافي خلي تضامن فجنب واجي لهنا

صباح : ههههه تا نولد ازين (دارتها ليه على قد فمو او مشات حيدات داكشي لي كانت لابسة او لبسات پيجانة مصوفة واصلة تال ركبة عاد رجعات ݣلسات حدا محسن حالة واحد لبكية تاع الشكلاط) ايوا كي دازت لخطوبة

محسن : مفعايل ما والو اصباح ، عطيني غا شوي تاع شكلاط

صباح : لا جمع يديك (شحطات ليه ليد ، او دارت رجليها على فخاضو) دلك ليا رجليا او عاود شنو وقع فلخطوبة

محسن : (بدا كيدلك ليها رجليها) داك شارف على جوك طلب قالك فصداقها ڨيلة كبيرة بلاپيسين او جردة طونوبيل عشرين مليون ، تلاتة تلاتة من كل حاجة او جوج اصمبلات بلبراسليات ديالهوم او سرتلة تاع ستة او جوج براسليات خرين مع ݣورميط طويل

صباح : ياكما غيخطب ولية لعهد ؟ تسطا ماباغيش ازوجها

محسن : ماباغيش ازوجها لخوك ممهضومش ليه بتاتا

صباح : لهلا ݣاع اخليها عندو تا تغمل

محسن : هههههه نوضي نوضي تنعسي راه تعطل لحال (تحنا عند كرشها) ياك أصاحبي نمشيو نعسو

#بعد اسبوع#

هوما فلأصل كانو سبعيام ولكن بالنسبة لمجد كانو ميات عام ، دوز سيمانة تاع تكرفيس ديال لمعقول خدمتو من جيهة او صداق غزلان من جيهة خرى مقدش اوفر داكشي لي طلب منو ميمون ، يالاه قدر اتسلف باش اشريلي ليهوم دوك جوج اصومبلات او يوجد عشرة تاع لمليون دصداق ، كان ݣالس فلقهوة كيتسنا فميمون ايجي يدوي معاه او يحطو النقط على لحروف طامع ياكما يرجاب شوي واخة قالت ليه غزلان بلي مصر على هضرتو واخة هضرات معاه هي او جداتها

ميمون : سلام عليكم

مجد : وعليكم السلام تفضل تشرب شي حاجة

ميمون : لا مزروب طلقني علاش جايبني تال لهنا

مجد : احن ، بغيت ندوي معاك بخصوص صداق

ميمون : آه صداق وجدتيه ليوم ، غدا لي درنا ياك

مجد : واه ليوم ولكن انا باقي موجدتو كامل

ميمون : ايوا معندي مندير ليك مامكتابش ليك تزوج بيها

مجد : انا وجدت عشرة تاع لمليون او جوج اصمبلات ، الى صبرتي عليا غي شوي هاد لأيام لقضية شوي مزيرة عندي داكشي لي كان عندي بعتو

ميمون : على حساب مك ياك

مجد : واه

ميمون : قالتها ليا غزلان

مجد : او خدمتي يالاه بديت فيها تا لكريدي منقدش نهزو قلت زعما الى بغيتي نعطيك دبا هادشي لي عندي نديرو لعقد او ملي يترخفو عندي لأمور نكمل ليها صداقها يمكن تا تقيدها فلعقد