🌧️ 🥀 *عروسة الشتا* 🥀🌧️ بالدارجة المغربية

🌧️🥀 الفصل 49🥀🌧️

⚡⚡⚡البارت 182⚡⚡⚡

ياسمين : (شديها طرطق باغي قلبها يسكت خرج مخليها كتغلي ، داوها لبوليس او رجعوها لزنزالة لي فيها لبنات ، مشات طلعات ليها لباياصها او ݣلسات تما عاقداهوم) شكون هاد بنت طحبة لي مدور بيه ، غيمشي يتعشا معاها ويلى محبسوش فلعشا ، زعما تكون صحبتو لا ميمكنش ، واخة تكون والله لا خليتو ليها بلاتي نخرج لكلبة دجدها نوريها الضورلي بالراجل ، تفو تفو غا غبرت من حداه بداو ايضورو بيه ، كان خصني نرشمو قبل منجي لهنا ، ناري الى لقيتو معاها شغانديرليه

امينة : لحبيبة ديالي مالك معصبة

ياسمين : (تكات فوق الناموسية ديالها او واجهات بوجها لحيط)

أمينة : (بقات مطرطقة عينيها فياسمين خصوصا فطغمتها ، مدات يديها او حطاتها فوقها كتعجن فيها) أح على طغمة عندك العمر مهداكش الله تخليني تخشي فيها صبعاني

ياسمين : (نترات ليها يديها بزعفة او شافت فيها ساخطة) جمعي عليا اتاملة يديك قبل منخشيهوم لجدك فلعينيه تفو على ݣنس

أمينة : دايرالي فيها صعبة لمنال ايوا ها حنا غنشوفو

ياسمين : (رجعات تكات ممسوقاش ليها ݣاع)

#عند صباح#

فهاد شهراين كان اكسيل ضاغطها بمعنى لكلمة هو بنفسو كيديها فينما بغات واخة مقالهاش السبب الحقيقي على فعلو ، كيكتافي يقولها بلي بنتو وباغي هو بنفسي يديها او يجيبها فينما بغات ، زائد الضغط تاع لقراية لي كانت بدات شي شهر او تلاتة تاع السيمانات هادي ، هادشي كامل ممخليهاش تبقا تلاقا معا محسن لي هو بنفسو كانو سيفطوه شهر سطاج لواحد لبلاصة ، ولكن هادي سيمانة باش رجع لكازا ، صباح شافت تا عيات او لقات بلي هادا هو لوقت لمناسب باش تفاتح محسن فموضوع زواج أو توافق عليه او تخليه اضبر راسو معا باها وخوتها ، رغم انها باقي مواتقة او خايفة من ردة فعلو ملي يشوف لغالية ، صلاة صلاة الإستخارة و زعمات تمشي تلاقا معاه مستغلة فرصة لمسافرة تاع اكسيل ، او ضغط لخدمة على مجد حيت ولا هو لي مقابل لقهاوي هاد ساعة ماحدو باقي مالقا شي شركة يسطاجي فيها ، او جود لي شاب مسكين للمحاكم او لقضايا لجنائية ، كانت ديك لوحدة ملي ناضت صباح بدلات عليها بواحد لكسوة طويلة معا سمطة لوسطة او فولار او نضاضر ، هزات سوارت تاع طونوبيلتها او هبطات لتحت

صباح : لغالية هاني مشيت

لغالية : فين بسلامة ؟ عند فلان

صباح : واه الى صونا بابا لقايلي شي سبة صافي

لغالية : سيري سري تشوفي حبيب لقلب ونتي دايرالي كي لملهوفة

صباح : بسلامة (مشات طايرة ركبات طونوبيلتها او زادت معا طريق او هي كتصوني على محسن) الو محسن

محسن : زين دمحسن وصلتي ولا باقي

صباح : هاني فدخلة تاع كازا قريب نوصل