🌧️ 🥀 *عروسة الشتا* 🥀🌧️ بالدارجة المغربية

🌧️🥀 الفصل 97🥀🌧️

💞#عروسة_الشتا💞

بقلم : #فاتي_رعدة

⚡⚡⚡البارت 411 ⚡⚡⚡

بقات هي وخوها يتامة لا حنين لا رحيم مفهوم لابسة حق الله او كرشها سابقاها تا من دار باش كانو ساترين راسهوم دازو عمامها عليها او خلاوهوم الله كريم ، كانت عندها 6 سنين ملي خطاها داك لحيط لي كان حاميها مخلي شعرها عاري ، خوها مسكين خرج يخدم عليهوم او مها غا وبدات مروان خرجات خدمات كطيب العراسات تا طاحت على دريس تزوجاتو او جابت لغريب على ولادها ، كان فداك لول كيخدم شوي عايشين بلبراكة ، مها دغيا هزات كتولد متعطلاتش ، خوها مروان مسكين لي خلاه باه فكرش مو كان كيحسب دريس هو باه كيتبعو او يقول بابا بابا ولكن هيهات دريس ولادو هوما ولادو اما هي وخوتها بجوج مكانش اضرب ليهوم لحساب كانت كتعقل مسكينة كان كيشري ضانون لولادو او يخليهوم هوما ، ادي ولادو اخرجهوم او يشري ليهوم او يخليهوم هوما ، مها لي كانت الى تفتفات شي حاجة تشري ليهوم ولا الى عطاها شي واحد لحوايج قدام لي كتلبسهوم ، شحال كان كيبقا فيها لحال ملي دوز حدا لپاتيسري تشوف دوك لحلاوي او يسيل فمها بريوݣ ، لقات خوها مسكين هاز شحط بزاف او خرجات تا هي كتبريكولي باعت كيلينيكس باعت بورد مسحات الطونوبيلات ، او نهار لي جا كتقول ربي غيفاجيها عليها او يعفو عليها من هاد لعيشة ، مكرهاتش تهز راسها او تمشي لشي قنة ولكن خوتها مقاداش تفرط فيهوم مقاداش تعطيهوم بضهر او تزيد ، ماباغاهومش اتكرفصو كيما تكرفصات هي

#عند لغالية#

ليوم تنين دازت تلايام على نهار فاش رجعو من افران ولات كتقد تمشا شوي مزيان خفاف ليها لحريق بزاف ، فاقت معا تسعود وجدات راسها حيت عندها أول حصة فسونطر تاع اللغة هبطات لتحت عندهوم لقات اكسيل لابس او هاز لباريزة

اكسيل : نمشيو

صباح : فين غاديين ؟

اكسيل : غنمشي نوصل لغالية لسونطر باش نشد طريق لعرايش

لغالية : غتسافر ؟

اكسيل : راني قلتها ليك لبارح ، فين جود

جود : هاني الواليد باغي شي حاجة

اكسيل : شتي دوك لاساتذة علاش وصيتك

جود : واه راني ضبرت عليهوم ليوم عندها حصة تاع رياضيات

اكسيل : مزيان يالاه ، معا جوج دوز عليها جيبها

جود : كون هاني

لغالية : (تبعاتو لطونوبيل راكبة حداه)

اكسيل : راني خديت ليك شي دفاتر او كتوبة من لمكتبة بعد شوي ايوصلوهوم لدار الى خصوك شي كتوبة صوني عليا ولا سيفطي واحد فدراري عندهوم

لغالية : واخ

اكسيل : (حبس قدام السنطر او نزل معاها داخلين ليه)