زينة الهاشم 2

الجزء 02

زينة الهاشم 2 💝
الجزء 02:
جوزت شهور غير ربي سبحانو لي داري بيهم ولا لي جرب هم الصحة وقتي كامل مع الريديكاسيون لي نموت ونحيا نهار نديرها رجلي صافا مطولتش وتحسنت يدي هيا لي عياتني خاصة مين ولات اليسار جهة قلبي لي ديجا دارولي عليه عملية نهار ندير سبور عليها نولي نعيط لربي الي خلقني 6 أشهر كاملين باه بديت نتحسن شوية وليت مريضة قلب و ضغط (لاطونسيون) بصح قالولي ممكن مع الوقت ترتاحي منهم أما السكري ولالي مرض مزمن راح نكمل بيه كامل حياتي بصح اكثر حاجة أثرت فيا هي مرضي النفسي وليت حاسة انو معندي حتى فايدة في هاذ الحياة كون نموت افضل ليا من هذا العذاب مقدرتش نصبر على فراق بنتي اطلاقا دايرتها غير على البكا ولا الرقاد ،الهدرة منهدرش هوما دايرين في بالهم بلي من الصدمة صليحة هيا الوحيدة لي علابالها بلي انا محبيتش نهدر وهي الوحيدة لي نهدر معاها اكيد كي ميكون حتى واحد فالدار كاين حكمة تقول من يشكر الناس لم يشكر الله في فترة مرضي لقيت غير خواتاتي رفدوني وقامو بيا بصح صليحة كانت اكثر وحدة فيهم قد ما نحاول نشكرها مراحش نوفي حقها هي تبدلي تغسلي دوشني تبدلي تمشطلي قايمة بيا كيما البيبي الصغير هاملة ولادها وراجلها ولاتية بيا بماكلتي دوايا رونديفواتي نتاع الطبة حتى الليل ترقد معايا غير كي تكون وحدة من خواتاتي تما لي تروح ترقد مع نجيب هو اطلاقا مهوش معارض ممكن حاس بالذنب وولادها الصباح تبعثهم عند يماها كاين ختها كبيرة مطلقة مسكينة هيا تقوم بيهم حتى لليل ومرات يباتو معاها ، بابا كل 3 أشهر يجي يقعد سمانة هنا معايا وكي يروح تقريبا فالنهار يشوفني مرتين ثلاثة في لاكام كريمة وسعاد دايرين النوبة كل سمانة جي وحدة تقعد معانا، كي كنت طايحة فالفراش كان مرة مرة هشام يجي يطل عليا ويشوفني بصح غير بديت نرتاح ونوض ولى نجيب ميخليهش يشوفني نهار ندير ريديكاسيو (ندير مرتين فالسمانة) يجي يشوفني إذا كنت مع صليحة يلحق عندنا ويسلم علينا وإذا كنت مع سعاد ولا كريمة يبقى من بعيد يشوفني كي بديت نهز صحتي ونريح بداو المشاكل لي عمري تهنيت منهم.
بداو المشاكل بين هشام ونجيب نجيب مصر اني نطلق وهشام رافض رفض قاطع مرتين ونجيب يرفع قضية الخلع بصح القاضي كان يرفضها بحكم المعنية لهيا ان غايبة ولا صحتها الجسدية والنفسية تسمحلها باه تحضر ولا توكل محامي تخيلو رجع رفع قضية وصاية عليا وبقى مترافع هو وهشام عليها كل واحد حاب يكون وصي عليا ويقرر حياتي في بلاصتي، كيما قلت بابا ولا كل 3 أشهر يجي هذي المرة مع جا جات من وراه دنيا وولادها زكرياء واسحاق بابا ولى ميلقاش راحتو فالدار كيما موالف اليوم كي جا كان قاعد معايا وانا حاطة راسي على كتفو وهو يحكيلي حتى دخلت علينا دنيا قاتلو عشنا وشفنا هذا وين تفكرت بنتك وحنيت ليها قاللها روحي وبلعي فمك متخلينيش نخسر معاك وزيد زينة مريضة قاتلو يا والله واش بقى مخسرتوش وهذا وين غاضاتك بنتك وين كنت من زمان كون خطيت النسا ولهيت بنتك ميصرا فيها هاكا شدها من يدها وخرجها برا بصح بقيت نسمع فيهم قاللها بنتي نتي سبابها كون طلعتيها معاك ميصرا فيها هاذا كامل قاتلو والله ونتا لاه مطلعتش بنتك معاك قاللها خاطر شفتك مكيش حاملتها ومكيش حابتها قلت خليها تتربى مع جدودها وخالاتها يعزوها ويحبوها خير ما نديها للفعى تشربلها المر قاتلو انا لفعى يا واحد.....عيط عليها تشدي فمك وتخطيني ولا نجبدلك دوسياتك نفضحك قدام خاوتك ، حبس حسهم شوية دخلت سعاد قاتلي زينة راكي مليحة هزيتلها راسي ممبعد اشرتلها نتاع وينو بابا قاتلي راح حنونتي ممبعد ويرجع بصح هو مرجعش قاع هذاك النهار حتى اليوم الثاني قاتلي صليحة حنونتي باباك حاب يديك معاه عند عمومك إذا تروحي ولالا هزيتلها راسي نتاع منعرف انا الفترة هذي وليت متعلقة بزاف ببابا وخويا زكرياء بصح عمومي منحبش نروح عندهم خاطر علابالي ميحبونيش حتى قاتلي صليحة شوفي حنونتي الحمد لله راكي مليحة وتقدري تقضي صوالحك وحدك انا حاباتك تروحي مع باباك باش تبدلي شوية جو وسيرتو كي راها دنيا هنا بصح إذا معجبكش الحال عندهم عيطيلنا نجيو ندوك واش رايك قتلها اوكي داتني دوشتلي مالغري ضوكا نقدر ندوش وحدي بصح هي متحبش تقولي نخافك تتعبي وسشورتلي شعري خملتي شوية حوايج وعيطت لبابا جا داني عمومي يسكنو في ولاية خلاف على ولايتنا بصح مهيش بعيدة علينا مامبا نص ساعة ولا 45 دقيقة ونلحقو عندهم وزيد هوما مازالهم ساكنين في حوش جدي لي هبطوه وطلعوه فيلا واش من فيلا قصر كل واحد دا جهة هو وولادو، المهم رحنا استقبلونا كيما يلزم الحال باينة على وجه بابا ولا شفقوا عليا كعاد مريضة بتنا عندهم وبقيت مع وفاء بنت عمي الصغير هيا الوحيدة لي ارتحتلها ، الغدوة منو خرجنا بابا يوم كامل برا انا وخاوتي ومعانا وفاء مدخلناش حتى بعد العشاء الصباح انا منوضش بكري من المرض وزاد معندي حتى حاجة نديرها كان يوم الجمعة فطنت على الحس والعياط قلت معندو مدخلني حتى ولات وفاء تنوض فيا وتقولي زينة نوضي هشام هنا.
زربت نضت جريت للتاقة نطل قابلني هشام وجهو يخوف يبان راح يطرطق يدو مربوطة في رقبتو يا درا علاش معاه سعيد وبابا وعمومي زوج نسمع فيه يقولو ضوكا ترجعها لدارهم وعمي الكبير يقولو يا وليدي اخزي الشيطان هذي تاني دارهم دار باباها ولى يقولو مهمنيش دار من انا نحتاج مرتي تخرج من هنا قالو بابا بنتي ومعايا نتا لاه راك تعيط هاكا قالو مش حابها تبقى هنا وسط الرجال ناض ولد عمي يعيط عليه عارف روحك مكش راجل وخايفها تبدلك ويقلع هشام مخلى ما قالو مرمدو بالسبان حتى ولى سعيد يسكت فيه ممبعد دار لبابا قالو لحد الان راني محتارمك يا ترجع مرتي منين جبتها يا متلومنيش على واش راح ندير عاود نطق ولد عمي واحد اخر قالو زينة مهيش خارجة منا ودير واش تحب ويطير ليه هشام جبدو من تريكو ربك اسم مرتي متنطقوش وجابو ببونية على فمو تحاماو فيه ولاد عمومي الكل وسعيد وبابا وعمومي يحاولو يفكو بيناتهم مزية لحق سيدعلي ولد عمي لكبير بوليسي زاد بقى يفض بيناتهم حتى نشوف في ولد عمي لي ضربو هشام رافد الموس يا يما ولاو النساء يتعايطو بسيف لا حكمو سيدعلي ودخلو للدار غلق عليه وعاود خرج لهشام قالو غير روح والله ضوك انا نرجع مرتك لدار خوها المهم روح منا قالو راني رايح بصح والله مترجعش عند نجيب اليوم متفراش ركبو سعيد بالسيف فالطونوبيل وراح هو وياه سمعت الحس فالهول نطقت مرت عمي الصغير شحال من عام وحنا ساكنين هنا ولا نهار صراتلنا مشكلة جات زينة نهار فضحتنا بين الجيران عيط عليها بابا ومبعد كي صراو المشاكل زعما ولادكم ملايكة ولى مرة دارو مشاكل ناضو كل واحد واش يهدر سمعت غير عمي الصغير كي قال لبابا الغلطة قاع نتاع نجيب هو مدها لهذا الزبل لاه قلو ولاد عمومها حتى يزوجها للبراني شبع منها وقاسها هدرتو حسيتها موس شق قلبي سمعت زكرياء قالو وين قاسها كون معينوش فيها ميغير عليها ويجي يقلب عليكم الدنيا قالو عمي وقيلا عاجبك الحال وفرحان بيه يا واحد الديوث ناض زكرياء زلزل الدار قالو احترم روحك متنساش زينة مزوجة ولي راك تهدر عليه حلالها حاجة باينة نفرحو بلي مسمحش فيها ونزيدك هذا لي راك تهدر عليه وتسب فيه خرج راجل على ولادك المهم زادت شعلت بيناتهم انا لبست حوايجي وخرجت ليهم شديت بابا من يدو واشرتلو نتاع هيا شاف بابا لخاوتي قاللهم جيبو حوايجكم الظاهر حنا غير مرغوب فينا هنا قالو اسحاق حاجة باينة خاطر الاورو نقطع ممبعد شاف لعمي الصغير قالو الكلاب متعضش اليد لي توكلها ولى عمي يعيط ويخلط فالهدرة حتى سكتو عمي الكبير قاللهم هيا ادخلو للداخل ونحلوها ساعة لا بابا لا خاوتي قبلو راحو جابو صوالحهم وراح معانا سيدعلي باش يوصلنا بقى يستسمح من بابا وخاوتي ممبعد رجع قال لبابا قالو يا عمي شي لي راكم ديرو فيه غالط شوفو حل لزينة مسكينة المرض من جهة وزاد المشاكل من جهة قالو يفرجها ربي ان شاء الله.