زينة الهاشم 2

الجزء 31

زينة الهاشم 2 💝
الجزء 31
واش من طلاق انا معنديش بنات يطلقو _هذي حاجتك مش حاجتي _كيفاه هذي مدينالك الطفلة باه ترجعهالنا _حتمتوها عليا وانا عييت معاكم منحتاجهاش مالا معندي منديرلك _كيفاه معندك مدير واش دارتلك حتى طلقها _هذا وين  عرفت واش دارت شحال من مرة نبعثهالك مزرقة قاع مسقسيتش واش دارت _حاجة بيناتكم واش دخلني _لالا كي تولي حكاية عرض وشرف عندو مدخلك _اسمعني لعب الذر هذا نكرهو امشي روح تنازل ورجعها هنا عندك وكاش ما غلطت ربيها بطريحة واسكتو علينا _ياو بنتك متترباش الطرايح لي داتهم لحمار كون داهم كون رجع بنادم من تالي بنتك منستحقهاش وغير غدوة فالجلسة وصيها تسنيي بالتراضي ديجا انا راني طلقتها لفظا نهار جبتهالكم يا تسني ولا  أقسم بالله نجبد قاع واش دارت يا لوكان يدخلوها للحبس أقسم بالله معلابالي بيها _واش دارت على زوج كلايم بين ضراير _حبس مهيش حكاية زوج كلمات كيما كاذبين عليك بنتك مدت نيمرو مرتي للرخاس فوتهالها بطريحة طيحتها من الدروج وهيا ثقيلة فوتها بطريحة بصح نتاع تحكي في شرفها وشرف ختي وزيد السحور لالا محال نفوتهالها _السحور واش من سحور _روح سقسي بنتك ومرتك وختك _اخديجة هدري علاه ساكتة _معندي ما نهدر قالك منحتاجهاش يدبر راسو _هكا مالا بصح من اليوم ماني خوك مراكي ختي وهز روحو خرج شافت لعجوز مع هشام يا هشام _ما الحكاية متدخليش فيها نهائيا أقسم بالله تدخلي ندي مرتي وولدي وحق ربي متزيدي تشوفي وجهي وخرج منكذبش إذا قلت مفرحتش من قلبي لداخل جريت لداري عيطت لصليحة قاتلي متتأمليش بزاف تخافي يعاودو يدورو بيه ويعمرولو راسو ويرجعها _كي وصلت للمحكمة منظنش يرجعها قاع ذاك وبقيت متخوفة بحكم نوجدو لعرس زهية راني نظل لتحت اليوم بعدما خرجت العجوز جات هدى وامها فتحت عليهم زهية. طبعوها ودخلو عيات معاهم واش جابكم امشو خرجو هوما والو انا مع شفتهم دخلت للكوزينة مع شغلي عياو يستفزو فيا بالهدرة غير من برا مجاوش عندي بصح مديتهاش ڨاع فيهم شوية جات لعجوز وزينب _واش ديرو هنا طيرو عليا _معندها وين تروح دار راجلها تبقى فيها حتى تكمل العدة يا يحكمها يا يرجعها لدار باباها _ادي بنتك وطيري عليا قال دار راجلها الدار داري وانا لي نحبو يبقى يبقى ولي نحبو يخرج يخرج _هكا يا خديجة صحا نسيتي نهار كنتي تحاوليني باه نعطيهالك _انا حاولتك وينتا مش نتي والسحارة لي نهار بطول ونتوما تاكلولي في راسي بنت خوك وبنت خوك تلمك هاني بصحتي وملقيتهاش عاد وين طيح بيا امشي طيري عليا نتي وبنتك _صحا اشفاي عليها _طولتي غير وريني شطارتك دات بنتها وراحت أف واش رتحت مع جا هشام عاودتلو واش صرا ويطير لينا فالزوج كيفاه تفتحو الباب عليهم دار فينا حالة منا وجاي كي تلقاوهم هوما ولا عمتهم السحارة ممنوع تفتحو عليهم منعا باتا ويا ويلهم نجي ونلقاهم كي طلعنا الفوق سقساني واش قالولك _مخلاو ما سمعوني _ونتي واش درتي _والو كأني منيش نسمع حتى حسبوني خايفة مش حابة نرد _برافو عمري هكا نبغيك الحكمة تقول لا تجادل الاحمق حتى يخطئ الناس بينكما هذا مهوش خوف وانما انتصار ليك  شوفي ما أحلاكي لا تقلقتي لا مرضتي حبي ديما شوفي لراحتك وصحتك ومتعمريش راسك بالامور التافهة. هشام طلق هدى فالمحكمة في زوج جلسات الاولى داروهالهم للصلح بصح هو حكى للقاضي كلشي فالجلسة الثانية طلقهم جات دات قشها هيا وأهلها ومعاها المحامي بدات تكذب سرقولي هذي وهذي بهدلتها العجوز قدامهم قاتلها لي سوفاتمو وأنا شريتهملك نتي واش جبتي من داركم ياك حتى روبة العرس ومكراوهالكش كي لبنات مع خرجت وطلقت واحد تزغريتة خرجت معاها هموم قلبي كل بقاو قاع يشوفو معايا مخلوعين كانو حاسبين حسبي الله و نعم الوكيل ساهلة الغدوة منو هشام طلعنا الفوق وجاب زوج قشرو هذيك الدار وبنتروها وخرج المابل لي فيها سمعتو قال ليماه حرقتو الكلاب السحارين مفيهمش لامان لحق عرس زهية فوتناه يطرطق لا ليلة الحنة لا العرس فاتو هبال وفاتت دخلتها ودخلتنا ههههه على خير.
مع تزوجت زهية وزهيرة تقرا  هبطنا لتحت غير الرقاد نرقدو الفوق زهية الحمد لله تهنات في دار عمها اصلا هوما ناس ملاح وعجوزتها سكر كيما عجوزة زينب منعرف علاه غير عجوزتي جاية واعرة والمشكل أنو بناتها مشبهوهاش اطلاقا ، وزادت هزت الحمل ولاو حاملينها على كفوف الراحة ، خالد تاني جا هدر مع هشام على زهيرة مدهالو بصح قالو العرس حتى تكمل لقراية كيما طبيعتها لعجوز دارت حالة خليها تزوج واش دير بالقراية ديجا تشد دارها متخدمش قاللها تخدم متخدمش الله يسهل هذي حاجة بيناتهم انا نسال تكمل قرايتها وتدي ديبلومها في يدها غدوة يقدر ربي تلقاه عيات معاه ساعة غلبها فالراي وصح الصيف لي سوتنات فيه عرسنالها فيه هيا تاني خالد وحيد امو  وصراو بيناتهم شوية مشاكل من لول على جال الخدمة بصح غير هزت الحمل حبسها خالد من الخدمة فالاول تناشعو وجات غضبت بهدلتها لعجوز وقاتلها هذا شي نورمالمو يديرو من لول من بعد حنا لبنات وهشام معاها معاها حتى اقتنعت هشام قاللها  إذا شايفة مش ملحقلك احتياجاتك نبدا نمدلك حقك من الحوانيت كلي شهرية قاتلو لالا لي نقول عليها تحضر قاللها والفتي الطرق امالا شدي دارك وتهناي، مالا رجعت وصح تهنات حتى من تنقريش لعجوز قاتلي كون دريت كون من لول حكمت الدار، زينب جابت ولد على بناتها مريم عندها 2 بنات وولد وأحوالها ما شاء الله مع صالح حتى مع دارهم وتحسنت العلاقة ،صليحة جابت بنوتة على ولادها الزوج وهيا ونجيب كيما اول نهار عرفتهم فيه جامي عرفناهم مدابزين مالقري كيما تقول هيا مكاش دار مفيهاش مشاكل بصح هيا جامي تسمعنا ولا تبين مشاكلهم، سعاد ختي مزال منابش عليها ربي دارت تلقيح اصطناعي مرتين بصح مصدقش ضوكا راها تحاول فجمال باه يجيبو طفل يربوه، كريمة ختي هيا هيا مالغري ضوكا تبدلو بزاف حوايج في حياتي بصح مزالها تقولي مديريش فيهم لامان ،نسيت حاجة بابا دا تقاعد ورجع هنا للبلاد زوجتو باخت صليحة فتيحة المطلقة وولات عندي أخيرا بيت أهل مالغري خالي وخالاتي كانولي نعم الاهل والله مننكر هذا الشي بصح نتاع باباتي معايا عندها طعم آخر ،أنا حاليا ساكنة مع عجوزتي لتحت صح متفاهمين بصح باقية تزن على حكاية لولاد درت برايها كان عبد الاله عندو عام ونص ونحيت هذيك لابيس نتاع الذراع (منع الحمل),بلا راي هشام وهزيت بصح مكملش أجهضت في شهرين ووصلت للموت دار فيا هشام حالة تلعبي بصحتك وبنفسك وكي قتلو يماك قاتلي هبل ودابزها  صحتها أولى _وناوي تبقى بطفل واحد _واحد خير من والو ولي معندهمش قاع  دابزتنا سمانة ورجعت رضات هدى مبغاتش تتربى وتخطينا مرة هربت عند هشام فنص الليل قال واش  حابين يزوجوها وهيا قلبها مزال عندو وكون مترجعنيش ننتاحر قاللها انتاحري على روحك راحت بصح بقات تعيطلو ماسكي نص الليل تبعثلو لي ميساج باش ندابزو انا بصح العكس مديتهاش كامل فيها صح كنت نلهب ونشعل بصح منبينش وزدت شفت هشام ولا علابالو مداهاش فيها كامل شحال من مرة يبدل لابيس على جالها وفالتالي شقى ليها لدارهم سوطها سوط لكلاب وحرش عليها خاوتها لكبار رباوها ماشي كيما هذاك خوها الطحان لي من نهار سوط لي كلاه من نجيب وسيدعلي ولى كي يسمع اسمي يغلق وذنيه ، عبد الاله عندو 3 سنين حاولت هشام باه يخليني نحمل فالاول محبش ممبعد قالي صح نتي حابة ولا ما تزن عليك قتلو لالا والله أنا حابة داني للطبيبة نحيت منع الحمل وقاتلي هذو 3 أشهر نقصي لادوز نتاع الدوا باه تحملي وميصرا والو للجنين استعملنا الواقي وانا نقصت الدوا وعجوزتي كي سمعت بلي حابة نحمل حتى شغل الدار منعاتو عليا هيا طيب والميناج جيب مرا كل مرة فالسمانة نهار لي ميكونش هشام فالدار باه ميديرونجاش ، عندي روطار نتاع شهرين قلت للعجوز شراتلي تاست وخرج بوزيتيف فرحتها قاتلي اليوم طلعو باتو لفوق (عبد الاله من يوم حبستلو رضاعة يرقد عندها ) راني طلعت وجدتلو سهرية الفوق وخبرتكم نتوما قبلو .
                النهاية💝