زينة الهاشم 2

الجزء 30

زينة الهاشم 2 💝
الجزء 30
طاح فيها ضرب بالكابل ممبعد رماه وجرها للهول ونحا السنتورة نتاعو وطاح عليها _نيمرو زينة لمن مديتيه شكون لي عيطلها _والله ما أنا ختي قاتلي اعطيهولي نعيطلها منبعد حطاتو فالفايس في باجة ...._كملي في باجة نتاع لقحاب كيما هيا وزاد ضربها حتى قتلها عاود حبس _السحور شكون وكلهولها وشكون رشو _واش من سحور _والله واش من سحور وزاد شحطها _والله ماهو سحور عمتي قالت (خالتهم الكبيرة)زينة راها ساحرة هشام وهذا  قطيع باه يتنحى عليه والله مهو سحور طاح فيها يضرب يضرب ولعجوز تعيط واش من سحور ياطفلة قتلها داروهلي فالطمينة والرفيس قريب قتلوني بيا بولدي ورشوهلي في داري باه نهج ونهرب _لا اله إلا الله لا اله إلا الله واش دخلت لداري زاد هو يسقسي فيها _زينة طبعتيها بلعاني من الدروج _أقسم بالله ما بلعاني اقسم مقصدت المهم ولات تلقف بين يديه مرة يضرب بالسنتورة مرة برجلو مرات يهزها ويرميها للارض شحال من مرة قلت للعجوز فكيها محبتش قاتلي خلي يربيها على تالي عيطت عليها فكيها منو هو يقتلها ويباصي في جرتها راحت تفكها منو عيط عليها ردي بالك دخلي روحك عجبك وين وصلتيني عجبك الحال هكا عجبك وشد هدى من شعرها وكركرها مع الدروج خرجها ومبانش عيينا نستناو والو مجاشول 12 ومبانش هزيت ولدي وطلعت مع دخلت لقيتو متكسل فالصالة مع شافني خرج ليا _ارجعي لتحت حالتو تخوف بالسيف نطقت قتلو ندي كوش لعبد الاله بعدلي من الطريق زربت جبت وخرجت هبطت لقيت لعجوز مزال تستنى فيه قتلها راهو لفوق جات تطلع ليه قتلها غير متشقايش راه حاوزني وديجا حالتو متعجبش إطلاقا ،  للصباح جات أم هدى والخالة المسمومة من الباب يعيطو كانت فتحت عليهم زهية كيفاه يضربها هكا ناضت لعجوز دارت فيهم حالة وحاوزتهم أنا تسحرولي وليدي يا الكلبات الله يلعنكم ويلعن النهار لي طاوعتكم وجبت بنتكم لداري وحاوزتهم خرجو يعرشو ويسبو ،جاب سمانة وهو لفوق منشوفوهش إطلاقا أنا مين نحتاج حوايجي وحوايج وليدي ونطلع نتلامحو ممبعد قالي ادي صوالحك وطيري متضليش داخلة عندي هزيتهم ورحت، مجاوش أهل العم الصغير يخطبو عيطتلهم لعجوز قاتلهم اصبرو علينا. واحد اليوم وسوستلي لعجوز اطلعي راضيه وغير نتي لي تقدري عليه و صحا بنتي متخليهش هكا قتلها في قلبي هذا وين بانلك بلي غير أنا نقدر عليه قاع ذاك ودرت رايها بعد لعشا( هو مهوش ياكل معانا ياكل برا)دوشت ونشفت شعري خليت عبد الاله عندها وطلعت مع دخلت عيط عليا من داخل الصالو واش جاب ربك جاوبتو محتاجة صوالح _اديهم وطيري عليا زربت دخلت لبيتنا لبست نويزات ودرت شوية مكياج حس عليا طولت دخل عليا _واش ديري _هشام حبيبي رايحة ليه وندلل _وليت حبيبك ضوكا هذا وين تفكرتي لحمار هذا _اششت علاه تقول هكا والله...  _بلعي على قسامي وطيري عليا _توحشتك _أنا متوحشتكش طيري عليا بقيت نشوف معاه عينيا تعمرو بالدموع _ حاسبة تغريني جاية تتمايعي عليا خلاص هذا برد عليك وحتى وكان توشيتك شهوة برك ياك أنا منحبكش تالمو قاستني هدرتو هبطت هكاك نجري ونبكي دخلت على لبنات تخلعو طحت غير نبكي حتى رقدت الصباح لقيت روحي مزالني بهذيك النويزات قطعتها ولبست من عند لبنات وخرجت للعجوز قتلها حاوزني ورخسني _مزالو متغشش احبسي عليه ضوك يرضى _راني كلبة كان عاودت رخست روحي ليه ، جوزنا نهارنا نورمال حتى لليل حنا نتعشاو وهو دخل لاح السلام عيات معاه لعجوز اقعد تتعشا محبش سقساها وينو عبد الاله قاتلو في الشمبرة دار راح لعندو وانا معبرنيش ومقيمنيش قاع تقول كامل مكنتش حتى كملنا لعشا عاود جا كان هاز ولدو قاللها _ما دار عمي راهم يقولو طولتو علينا بزاف _غير غدوة قوللهم يجو _بصح منيش قابلة جاوبتهم زهية وناضت حط هشام عبد الاله وجرا بعدها لحقنا عليهم خرجنا وغلق الباب بالمفتاح.
بقينا مقلقين وخايفين لا يضربها ساعة مكانش كامل حسهم شوية خرج مع شافني فات وضربني بكتفو على صدري وفات بقيت شادة صدري ونشوف معاه حتى طلع مع الدروج باه تولهت دخلت لزهية لقيتها فرحانة وتضحك كانت تحكي ليماها وختها كيفاه خوها راضاها وتصالحو منيش عارفة علاه حكمتني الغصة خرجت رحت هزيت ولدي ودخلت للبيت شبعت بكا صح مغلطتش منيش من أولوياتو اطلاقا ديما هوما قبلي انا بالنسبة ليه رقدت بدمعتي للصباح جات زهية نوضتني هيا تخرجي معانا نشرو _حنونتي والله ماني قادرة هوما راحو وانا بقيت متكسلة  مصبحتش كامل مليحة تاعبة والدوخة تدي فيا وتجيب بالسيف لانضت غسلت تقهويت سقساتني عجوزتي _علاه صفرا هاكا _منيش عارفة بصح منيش حاسة روحي مليحة _عيطيلو يديك للطبيب _لالا خلي ضوك يتنحى عليا _روحي تسطحي رجعت للبيت كلشي يدور بيا شحال وانا تم لعجوز مرة مرة تجي طل عليا كنت غير انا وياها عبد الاله وسخ روحو ومكانش عندو كوش لتحت قلت نطلع نجيب عتبت زوج درجات وطحت فيهم مقدرتش نوض ولا حتى نعيط بقيت تما قريب 10 دقايق مزية تفقدتني لعجوز جات لقاتني طايحة فالدروج جرات هزت تليفون عيطت لهشام وجات تحاول تهزني هزيتلها راسي ب لالا خاطر منيش قادرة نتحرك بقات معايا تهدر فيا وانا كلشي فيا ثقال حتى لساني مع فتح هشام الباب التحتاني طالع ويعيط ما ما وينكم _رانا هنا ازرب _واش بيها زينة هكا _مافيباليش يا وليدي طلع مع الدروج يجري جابلي حجابي وخماري لبسهملي نشوف  نظرة الخوف في عينيه _يا هشام نجيب الصغير ونروح معاكم _لالا خليك هنا حتى كي يجيو لبنات شدي طاكسي وارواحي هزني وداني للسبيطار قريب ساعة وهوما معايا دارولي ليزاناليز لقاو السكر طالع بزاف 4 غرام دارولي الدوا وبقينا نستناو حتى دخلت عجوزتي هيا وسعيد _هاه غير الخير واش بيها _طلعلها السكر _يخاه علاه _اما وانا وين علابالي لحقت عندي تسقسي فيا وتهدر وأنا غير دمعتي طيح زاد جاو عمومو و صالح رياض حتى فاتح  مور العصر باه خرجت دخلني هشام للبيت القديمة جابولي عبد الاله  حظنتو ورقدت شوية نضت  غسلت ورحت للكوزينة لقيت لبنات مع العشا و هشام ولعجوز مجمعين عندهم ومعاهم عبد الاله لحت السلام وقعدت سقساتني عجوزتي _كيفاه راكي _صافا خير ملي كنت حطيت وليدي في حجري نبوس ونلعب معاه قال هشام _ما نقول لعمي يخليها نهار آخر _لالا خلي يجو غدوة شاف معايا هشام كملت قاتلو ياك هوما أهل الدار وعلابالهم بلي كاينة وزيد زينة غدوة بإذن الله تصبح لاباس قاللها ان شاء الله هو ناض وهيا قاتلي متزعفيش بصح هكا خير رانا غير نأجلو قتلها لالا نورمال المهم تعشينا وشديت بلاصتي مع وليدي لي بدلتلو ورضعتو ورقدتو حسيت بهشام كي دخل للبيت درت روحي راقدة شوية حسيت بيه دخل معايا فالفراش قلبي قريب يخرج من بلاصتو يا خاه واش بيا وعلاه صرالي هكا بقيت مادتلو بظهري لاعبتها راقدة وهو دار يدو في شعري يلعب بيه حتى رقدت ، للصباح نوضني صباح الخير كيفاه راكي _لاباس الحمد لله _صحا نوضي نديك لطبيبتك _لالا راني مليحة متشقاش _لالا هيا نضت غسلت ولبست فطرنا ورحنا مع وصلنا دخلتنا حنا الولين شافتني وشافت لي زاناليز نتاع البارح رجعتلي الانسولين زعما كنت حبستها قاتلي غير 15 يوم عاودي ليزاناليز وجيبيهملي نشوفهم خرجنا شرالي الدوا ورجعنا للدار كانت 10 قدقد لقيت مريم تما تعاون فلبنات لحقت نعاونهم محبوش بالسيف لا خلاوني وجدت سنيوة نتاع القهوة ولاتاي فالصالونات زهيرة تجيبلي وانا غير نستف كملنا تغدينا غسلت زينب ومريم لماعن حنا غسلنا سشورت لزهيرة شعرها ورجعت لزهية هوما كانو حابين يروحو للحفافة قتلهم راني مليحة انا نخدملكم كملتهلهم وزدت زينب ومريم للزوج شعورهم كاري وكانو ماشطينهم عاودتلهم خفيف برك مكييت غير لزهية ورجعت زهيرة كوافاتلي جبدو الحوايج يلبسو لقيتهم شراولي جبة نتاع قيمة معاهم شكرتهم ولبستها رحت لبيتي نبدل ل عبد الاله لقيت لعجوز ديجا غسلتلو وبدلتلو، انا نرضع فيه سمعتهم جاو كملت رضعتو ورحت لبيت لبنات لقيت غير زهية وحدها بقيت معاها ونكوراجي فيها لقيتها ميتة بالخوف كي حالتي في نهار خطبتي.
بقينا نحكو شوية ودخلنا عند النسا فالصالة الصغيرة سلمنا عليهم وجمعنا حتى يما الجوهر قالت لعجوزتي حتى انا جيت اليوم نخطب تخلعنا كامل شفنا معاها _جيت نخطب بنتكم زينة لوليدي هشام طرطقنا بالضحك فوتناها هايلة للعشية ناضو لبنات مريم زينب وسولاف زهيرة وبنات العم الصغير تعاونو دارو العشا وانا وزهية قالولنا راكم مخشوبين (زعما مخطوبين)مديرو والو ضحكنا جابو الامام تعشا معاهم وفتحلهم وتفاهمو العرس على شهرين بالتمام قصرنا وضحكنا نحينا على خاطرنا علامة لليل هوما راحو وحنا كل واحد لبيتو تاني جا هشام رقد معايا فالبيت جبنا 4 ايام عادي ناكلو مع بعض نرقدو مع بعض نقعدو مع بعض بصح علاقتنا باردة هدرتنا قليلة حتى ونكونو وحدنا في شمبرتنا يا نلعبو مع ولدنا يا نتفرجو المهم السكات سيد الموقف ، اليوم مع تعشينا خليتهم فالكوزينة مزالني معاهم لتحت ورحت دوشت ودوشت عبد الاله تاني خرجت لبستلو ورضعتو وحطيتو على السرير وانا لبست وبقيت نشف في شعري غير بالفوطة دخل هشام تلاح طول نحالي الفوطة وبقى ينشفلي في شعري شوية باسني من رقبتي من لور الرجفة سرات في كامل جسمي دورني ليه _مزال زعفانة _لالا مش زعفانة نتا لي زعفان _وعندي الحق نزعف ولالا سكت هبطت دمعتي زربت مسحتها باسني على فمي بحنانة قلبي ولا يدق ف 200 تقول أول مرة يمسني _جاوبي من حقي نزعف ولالا هنت عليك لدرجة تجرحيني بهذاك الكلام _لالا بصح _اشتتت حطلي يدي على قلبو لقيتو يدق بقوة _سمعتي كيفاه يدق على جالك يا ترى هذي نزوة هزيتلو راسي بلالا ودموعي يطيحو مسحهملي _ردي بالك تعاوديها انا مش نحبك انا نموت عليك _حتى انا نحبك _تالمو نحبك جرحني كلامك وقاسني لدرجة النوم حرم عليا علابالي قسيت عليك بصح تالمو متوشي منك ردي بالك تعاوديها وتعيشيني هذا شي مرة أخرى عاودت هزيتلو راسي _ انا نحبك ونتي تحبيني عمرك تشكي ولا تخمي في  هاذي خلاص _هيه_صايي حنا نحبو بعض وحنا لبعض اوكي _اوكي _ندي عبد الاله ل ما وحنا نطلعو لدارنا _يا خاه لالا عيب كيفاه تديهولها واش تقوللها _نقوللها حاب نذوق العسل _والله متحشم خلي نطلعوه معانا _بصح ينوض تخلصيها غالية نتي ديجا عندك واش تخلصي طولتي عليا ومجيتيش راضيتيني _كيفاه جيت وحاوزتني _جيتي روطار نورمالمو متخلينيش زعفان ولا نهار مش كثر من سمانة _سامحني حبيبي _آه واش توحشتها وتوحشتك يا ربك هيا ازربي طلعي نجيب عبد الاله ونلحق عليك _اوكي طلعت انا وهو ورايا مع دخلنا وحط عبد الاله غرقنا في عالمنا الخاص للزوج متوحشين بعضانا وحتى ولدنا تقول حس علينا مناضش حتى للفجر، الصباح فطنا على عبد الاله يبكي رضعتو وقتلو حبيبي روح جيبلو حوايجو من تحت باه نبدلو _خلي نهبطو عمري نتقهواو لتحت مكان والو هنا ممبعد ونقضي _اوكي عمري نضت غسلت وبدلت وهشام يهبل فيا هبطنا مع بعض دخلنا للكوزينة عند لعجوز صبحنا عليها قاتلو _يا سيدي مزية وشفنا ضحكتك قلت راح تبقى مغشش طول العمر هوما ضحكو وانا حشمت سربيتلو وسربيت لروحي تقهوينا منبعد قاللها _ما العرس كيفاه عمي راه يقول نديرو فرد عرس يعني في صالة واحدة ياك عندنا نفس المعاريض _هيه عندو الصح في هذي مالا حنا نديرو ليلة الحنة هنا فالدار والعرس فالصالة _خلاص مالا نكمل هذي السمانة و السمانة الجاية نخرجكم تشرو واش تحتاجو _هيه هذيك هيا هو ناض خرج _يعطيك الصحة يا ساجية هكا راضي راجلك ميدوملك غير هو بيني وبين نفسي واقيلا عندها انفصام فالشخصية ناضو لبنات قضينا شغلنا وبقينا نخمو في واش نشرو وواش تحتاج زهية لجهازها ، هدى من يوم داها هشام عندها شهر اليوم حنا كنا لفوق الماكلة ناكلو مع بعض بصح رقاد والمقيل نطلعو لدارنا لفوق حتى طبطب الباب الدخلاني بالقاوي مع فتح هشام نسمعو فالحس كانت زهية قاتلو هشام اجري خالي لتحت هبط هو يجري تبعناه انا وزهية لحقنا عليه نلقاوه رمى على هشام ورقة واش هاذي واش هاذي هشام _ورقة طلاق بنتك ولا متعرفش تقرا.