زينة الهاشم 2

الجزء 23

زينة الهاشم 2 💝
الجزء 23
جبنا  4 ايام هايلين هدى مش هنا متهنية من حسها وحبيبي وقتو كلو ليا حتى اليوم بعد الظهر عيطتلي زهية خالتي وام هدى هنا قالولك ارواحي تشربي معانا قهوة تزينت وهبطت عندهم قالولي زينتي حلاك الحمل وانا نتبسم برك كي دخلت للصالة لقيت غير الخالة وام هدى وهدى مدتلي ام هدى طمينة ورفيس قاتلي حقك تقهواي بيه معانا علابالي مجيش لكنتي تحمديلها فالعرس تاني عرضناك ومجيتيش حشمتني كولي ذوقي ملحنا ذقت منهم للزوج حنا هكاك دخلت اخت هدى وجها صفر قاتلها لعجوز وين كنتي _في بيت هدى غفيت شوية شفتي فالدار والله مرانا نرقدو _الله يعينكم _زينة زينة _اسمحولي هذا هشام يعيط عليا شفت ام هدى وجها تخطف خرجت ليه تلاقينا فالدروج _علاه كي عيطتلك خرجتي وخليتيني مديتيهاش فيا _وينتا هذي _زينة متهبلينيش كي دخلت نتي كنتي خارجة من الباب عيطتلك _لالا انا عندي ساعة لتحت مع الضياف هنا وعيطولي نشرب قهوة _ربك واش قتلك على الباب مش قتلك اغلقيه متخليش قسامو مفتوح شكون لتحت _خالتك لكبيرة وهدى ويماها _وعلاه هبطتي لجدهم _هوما عيطولي حقا اعطيني نمد باروك لمرت خالك للمزيودة _خليني من جدهم _لالا بليز في خاطري وخاطر البيبي بليز _خلاص هاكي على وجهك برك _مرسي عمري عاودت هبطت عندهم مديتلها مكتوبها ورجعت لداري بصح منيش عارفة واش بيا حسيت روحي مخنوقة ومجيفة اللهم اجعل الخير، غدوة منو نضت الصباح بالسيف كامل مكسرة بايتة نخلط فالمنامات بالسيف لا قضيت شغلي وحاسة حاجة مزيرتلي على قلبي مرة مرة ويتهيألي كاين واحد معايا فالدار نروح نفتش منلقى والو جا هشام على الغدا _واش بيك وجهك صفر روحي ترقدي هيه رايحة راسي مش قادرة نهزو هو تغدا وانا رحت غفيت جا باسني مقدرتش نشم ريحتو مزية زرب خرج اف رقدت بصح نفس الخالة الي جاتني فليل غير نخلط رجعت نضت وهبطت لتحت جمعت معاهم تنحاتلي هذيك الخنقة بصح كي جا هشام عييت نشم ريحتو ولى قلبي يدور عليا بغيت نقولو نوض دوش وحشمت منو فالليل بالسيف لا رقدت شي من ريحة هشام شي من الكوابيس  الصباح نضت خلاص ديخانة عيطت لصليحة قتلها قاتلي يا نندب النسا يتوحمو قبل 4 شهر نتي وقيلا هذا وين المهم مفيها والو قوليلو راح يتفهمك كي جا حاولت معاه وقلتهالو بدلال قالي مفيها والو حبي من وجاي منديرش الريحة ونتي كي تشمي فيا شي ريحة قوليلي ندوش قتلو اسمحلي والله ما بيدي قالي نورمال عمري نتي بالحمل وانا راني نضل برا قاع الروايح يلصقو فيا لليل عييت نرقد معاه في فرد مطرح يا خاه واش بيا انا عييت نحاول مقدرتش هزيت روحي للصالة تبعني واش بيك  قتلو مقدرتش فهمها راح مسكين دوش وجا بصح انا تقول منعرف واش دار في روحو دار عليا قلبي وبقيت نرجع كي كملت غسلت قالي روحي رقدي في بلاصتك انا نرقد هنا قتلو اسمحلي ورحت رقدت بصح تعذبت نشوف فالكلاب يجرو ورايا مرات نشوف روحي رايحة نطيح من العلا نشوف فالدم المهم حيا وخلاص نضت منسواش.
جوزت يامات الله لا يشوفهم لبنادم الليل منرقدش آلاز أبدا نبات نعافر ونبكي فالنهار عايفة داري ونظل نشم فيها فالروايح لي مش ملاح  منقدرش للشغل مين منرقدش مليح قلبي ديما مزيرني هشام مخصرة معاه فوق الحد غير يجي قدامي نعيفو ونعيف ريحتو ولا قرب مني بغا حقو علاه نولي منسواش ومنحملش يدو تتحط عليا  أقسم بالله كي يتوشيني نحس حرقولي ضيك البلاصة بالزيت السخون نولي نضبح آي  آي من الالم هو مفاهم والو مع الاول استحملني بصح ممبعد جبد مني ولا غير يدخل يشد الصالة يتفرج ويرقد ولينا الماكلة ومناكلوش مع بعض انا زاد قوا عليا الحال وليت نستخايل بزاف مرة وليت نعيط كلب كلب والله ثلاث نشوف في كلب كبير نتاع لابوليس فالكوانة واقف ومكشر على سنانو حاب ياكلني نعيط لربي لي خلق هذا فالنهار يعني مكنتش راقدة هوما كانو الكل لتحت طلعو يجرو لبنات وهشام انا نبكي ونقوللهم هاهو وهوما  يقولولي راكي راقدة وتنومي يا ربي راني فايقة مكنتش راقدة بالسيف لا هديت وهبطوني لتحت ارتحت وتنحات عليا، وليت هاربة غير لتحت مش قادرة نقعد في داري وهشام مش حاملة جدو اطلاقا نشفى نهار نتاع جمعة فقت الصباح خلاص مكسرة تكسار والريحة كارثة في داري هزيت لبستي الكل غسلتها وغسلت الخزانة بالازيس والجافال  غسلت الحيوط المهم البيت قلبتها دخل عليا هشام واش ديري نتي هاكا ياقسامك ناسية بلي راكي بالحمل كيفاه طالعة فالتاقة قتلو اخرج عليا يا المعفون ريحتك وريحت هذي الدار متتحملش قالي الله يهديك هذا وين خارج من الدوش _اسكت الرحمة على والديك ريحتك وريحت نفسك وريحة الدار تقول جيفة كاين هنا_يا مهبولة خافي ربي البارح فالليل سيقتي 3 مرات علاه قاتلة عمرك هكا _ مزالت الريحة وتلفت على يميني نهدر وحدي راني نقولك منخرجش حتى نقيها باغيتهم يضحكو عليا ويقولو خانزة ومعفونة دارها فيها الريحة _زينة معامن تحكي _مع هاذ لمرا لي واقفة هنا ديما تجيني وتقولي اهربي اخرجي من الدار هشام مسكين مفهم والو شد راسو لا اله إلا الله استغفر الله ولا حول ولا قوة إلا بالله _اخرج عليا راني نقولك بعد من وجهي الرحمة عليك خرج وخبط الباب وانا كملت نحك ونعاود فالحيطان ، بعد صلاة الجمعة دخل هشام لقاني مزالني مع الميناج الدار بالكل مقلبة مزرزقة يديا الدم يسيل معاهم من كثرة الحكان والجافيل قالي البسي هيا نخرجو وين نروح ونخلي داري معفونة حتى نكمل نقيها _هيا برك ممبعد نقوها مع بعض _لالا غير بعدني حتى نتا موسخ وريحتك لا تطاق _صحا هيا البسي وروحي معايا للحمام دوشيلي ونقيلي منغيضكش باقي موسخ هكا _صحا نلبس حجابي وخماري ونجي مع لبست سمعتو عيط صالح ادخل _لالا ميدخلش الدنيا معفنة يضحكو علينا دخل صالح وسعيد وواحد مع شفتو خفت تخبيت ورا سعيد نتا خويا خرجو يخوف وهذا وأشرت على هشام ريحتو متنطاقش انا نهدر مع سعيد بدا هذاك الراقي يقرا فالقرآن وأنا بديت نضبح اسكت اسكت ونغلق في وذنيا وندور كي المهبولة.
مع بدا يقرا وليت نغلق في وذنيا ممبعد وليت شادة غير رقبتي حاسة حاجة تحرق في بلعومي  ونتلوى فالارض مع شافني هذاك الراقي هكاك قاللهم جيبولها بسينة وجيبولي قرعة ما خرج هشام وصالح يجرو جابولو بقى يقرا على هذاك الماء وعليا ممبعد عطالي نشرب من الماء المرقي بلا ما نفيق نشرب ونعاود كملت هذيك القرعة عند دقيقة بديت نفرغ ونرد في الما أقسم بالله أسود وفايح كارثة كامل غلقو نيوفهم هشام مسكين شادلي راسي وسعيد حاكملي هذيك الباسينة وأنا خرجت أكثر من الما لي شربتو قتلهم زيدولي الماء شافو مع الراقي قاللهم لالا ممكن الصغير يتأذى جيبولها ماء عادي راح صالح جابلي شربت بصح مرجعتش هزني هشام للصالة وغطاني على ما حطني رقدت دخلت في سبات مفطنت لوالو جا نوضني هشام شحال من مرة بصح منضتش حتى للفجر باه فطنت لقيت هشام مفرش بحذايا بصح مكاش رحت شفتو مكانش توضيت وصليت كي كملت دخل صباح الخير صافا زينة _هزيتلو راسي  ومش حاملة ريحتو خلاص قالي إذا قادرة نوضي افطري وهيا نديك لداركم طرت من الفرحة ورحت درت قهوة حتى شربت انا دخل هشام شرب وانا عاودت لبست حجابي وخماري كان هشام نحاهملي وملبسلي جبة مهيش نتاعي منعرف مين جابها حوايجي لخرين لقيتهم مشمخين طريق كاملة ساكتين هو مرة مرة يشوف معايا حتى وصلنا طلعت للدار نجري حابة ندير سوربريز لصليحة خاطر معيطلهاش مقتلهاش جايين هاني جيت _اهلا حنونتي على السلامة متعانقين لحق علينا هشام لاح السلام ودخل للصالون دخلنا بقات صليحة تساول فينا وحنا نردو ممبعد هشام قاللها نجيب فالخدمة _هيه خدام اليوم _هيا ملا انا نروح نشوفو ونروح _علاه ابقى للغدا _لالا خليه يروح لدارهم جاوبتها انا شافت فيا مستغربة _هيا سلام _اهشام استنى ... يا طفلة كيفاه تقوليلو هكا ماشي تصالحتو لا تكونو دابزتو من جديد _خلينا منو يا يما شحال معفون وفايح تحسبيه جامي دوش _يا طفلة واش بيك واش هذا الوحم المتأخر لي حكمك هزيتلها كتافي ورحت دوشت وسشورت شعري واحد الراحة يا مامي تقول كنت في بير وخرجوني منو لقيت صليحة مع الغدا _يامي واش موجودة قاع هذا علاه _راه جاي هشام يتغدا _اف علاه ها يروح لدارهم _يا طفلة احشمي _المهم انا نعيفو حطيلهم وحدهم فالصالون وانا ناكل معاك فالكوزينة _هبلتي رسمي مع جاو وقبل مايدخلو قتلها راهم جاو قاتلي وين شفتيهم حتى فتح نجيب الباب دخل ووراه هشام رحت لخويا تعنقتو وسلمت عليه وحطيت يدي على فمي ونيفي من ريحة هشام بقى نجيب يشوف معايا دخلو للصالو حطتلهم صليحة تغداو وحنا تغدينا وحدنا سمعت هشام رايح قال لنجيب غدوة ان شاء الله نجي قالو نجيب لالا اتلهى بالحالة عندكم ممبعد ساهل _راجلك رايح نوضي بقيه على خير _خليني منو طل على باب الكوزينة ابقاو على خير صليحة صحا ختي تهلاي فيها قتلو روح برك راك طولت قرصتني صليحة يا طفلة احشمي _غير خليها يا صليحة الله غالب عليها بقات تشوف فيه باستغراب.