زينة الهاشم 2

الجزء 25

زينة الهاشم 2 💝
الجزء 25
سمانة نفس السيناريو هشام يخرج مامبا 10 دقايق يصوني الباب وانا نتخطف نطل نلقى صاشي كل مرة كيفاه لونها نقطع الحس ونبقى مرة مرة نطل وغير يقرب وقت هشام يرفدوها مرة منين طليت شفت راجل هابط على الدروج يا خاه كون يتلقى مع هشام واش راح يكون موقفي ولا واش راح نقولو كي نحلف على المصحف مراحش يصدقني عيطت لصليحة اعطيني حل خلاص الموت حاكمتني واش ندير لازم نصارحو خلاص معادش فيا حيل _هبلتي والله غير يقتلك حاولي معاه يجيبك هنا يامات بالاك ينساك ويغفل عليك _علابالي مراحش يجيبني خاطر قربت زيادتي هذا إذا ما زيدتش قبل وقتي _خلاص متخافيش نتي كاش ما يصرا فيك ضوك نلقالك حل هشام هذو اليامات شاك فيا ديما يقولي مكيش تعجبي واش بيك مع لول نقولو والو وضوكا دورتها عليه قتلو مهوش عاجبني الحال مين راك تهبط لتحت وتخليني _زينة هني روحك وهنيني معاك ياك منيش مقصر معاك في حتى حاجة ونتي مرتي وحبيبتي كيما زمان كيما اليوم وحاجة لي خاطياتك متدخليش فيها _كيفاه خاطيتني والحكاية فيها نتا ولا نتا تاني خاطيني وشعلتها معاه بلعاني باه ميحطش معايا خاطر متأكدة بلي نفضح روحي خبط الباب وخرج وانا كي طبيعتي شبعت بكا وعيطت لصليحة لي نكدت عليها حياتها بهمومي حكيتلها _يا طفلة علاه متنعليش ابليس ياك قلتي مزال معايا كيما زمان _راني نقولك راه يبات معانا ليلة بليلة زمان كان عندي غير أنا _مالا نقولك والله علا جالك باه هدى تلهى عليك ومتعاودش تسحرك باه تأمن بلي السحر نتاعها نجح وراه معاها شوفي ملي بدا بيناتكم مهيش تظل ديرلك فالمشاكل _والزبل لي راه يظل عند بابي مالا شكون شكون دزهولي _والله معلابالي بصح تعيا وتبان جبت يمات حتى واحد اليوم تاني بعدما راح هشام صونا تليفوني نيميرو جديد مع لزل مجاوبتش بصح كي عاود جاوبت _ألو ....ألو _وأخيرا حنيتي عليا وسمعتيني صوتك _شكون نتا بخوف _انا لي طيرتي نومي وحيرتي عقلي وقلبي...كوبيت ونرجف ياخاه جاب نيميرو نتاعي عيطت لصليحة نشهق بالبكا حكيتلها قاتلي متزيديش تجاوبي وكوبات درتو فالروجوتي بقا غير يعيط ويعاود شوية عيطلي نجيب درت الكوراج وجاوبت _اهلا خويا صافا _لاباس لاباس مزال يعيطلك _ااااااشششكون_راها قاتلي صليحة كلشي ديري رونفوا عندي ضوكا _اوكي درتها وباقية نرجف في بلاصتي شوية دخلني ميساج من عند نجيب نحي رونفوا نحيتها عيطلي _اسمعي راني غير هزيت عليه كوبا عييت نعاودلو مجاوبش المهم نتي ديريه فالروجوتي وكي تكوني الاز نحيه وهدري معاه _كيفاه نهدر معاه _اسمعي قسامك مليح هيه اهدري معاه وسجلي هدرتو وابعثيهالي باه نحطها فالمحضر ونقدر نجبدو هو شكون صحا وبالاكي هشام يسمع بالحكاية انا ممبعد نحكيلو وليت نبكي تعيش متقولوش والله يقتلني _علاه يقتلك تعرفيه نتي هذا كاش ما بينك وبينو _لالا والله منعرفو _خلاص خليها عليا كوبيت وانا خلاص الموت حاكمتني ديجا قبري راه مفتوح أي دقيقة ندخلو ، الغدوة منو حتى راح هشام نحيتو من الروجوتي هذا وقتو عيط _نعم شكون _مفتون بيك _راني مرت راجلك احشم على روحك _وهذي لي معذبتني كون جيتي عزبا كون راكي معايا تعرفي واش ندير فيك _آي احترم روحك _من اول مرة شفتك قلبي هواك صورتك غير بين عينيا اقسم مرتي ملي نقرب منها نتخيلها نتي لدرجة وليت نعيطلها باسمك _نتا صح متسواش راني مرت راجل ونتا متزوج واش تحتاج مني _نحتاجك نتي كامل اقسم كون تطلقي من هشام نطلق مرتي اليوم وقبل ما تولدي ندخلك داري ونربيلك بنتك ولا ولدك كيما ولادي والله غير نديرلك فالدنيا دنيتين _نتا زبل ورخيس امشي اخطيني سينو نشكي بيك _روحي اشكي وهكدا نضمن بلي هشام يطلقك ونديك أنا كوبيت النفس ضاق فيا كلشي مني يرجف يا نندب راح يقتلوني هذو أفضل حل نهرب لدارنا قبل ما يسمع هشام بقيت على هاذ الحالة كثر من نص ساعة قريب دا عمري الله يجيبهالو عيطت لصليحة قتلها قاتلي ابعثي لنجيب الفوكال قتلها هبلتي هو يقولي باغي ندير فيك وأنا نبعثو لخويا _هاتي بركاي من الجياحة ابعثيه عندي وانا نبعثهولو _لالا منقدرش كوبات عليا شوية صونا تليفوني_ابعثي جد الفوكال _خويا ....._ابعثيه متخلينيش نشقى ليك كوبا بعثتهولو وطفيت التليفون وطحت في فراشي السكر ولاطونسيو طلعولي للبلافو.
جا هشام لقى حالتي حليلة هزني للسبيطار عرفتها لاطونسيو طالعة وحتى السكر قريب دا عمري الله يجيبهالو الكلب دارولي الدوا مخرجتش حتى للمغرب _نتي علاه صاري فيك هكا كاش ما مخبية عليا _واش نخبي عليك بارتباك _ما في باليش بصح ديما ترجفي عينيك متحطيهمش في عينيا غير تتهربي مني _من فعايلك كرهت وعييت صحتي راحت عمري رايحة تخرج _بعيد الشر علاه تفاولي على روحك بالموت _رايحة نموت علابالي المهم تهلالي في وليدي برك _يا طفلة استهدي بالرحمن واش جاب سيرة الموت وعلاه حتى نتهلالك في وليدك ونتي وين _هاني نقولك راح نموت _لا إله إلا الله دخلنا للدار شديت بلاصتي جا معايا هشام _خايفة من الزيادة حنونتي وليت نبكي هيه _متخافيش يا عمري بإذن الله تجيك ساهلة هاني معاك وكان تحبي تولدي بالعملية تاني معليش _لالا منيش حابة العملية _إذا على لي سيكاتريس نديرو تصحيح كيما المرة لي فاتت _نحبك بليز متخلينيش وحدي _يا عمري والله منخليك تهناي _تعنكشت فيه وزيرت عليه تقول خايفة يهرب صح خايفة هذاك الرخيس يروح كاش ما يقولو ونخسرو والله منقدر بلا بيه للصباح عيطلي سيدعلي ولد عمي _واش زينة لاباس _بخير الحمد لله _هشام فالدار _لالا _ايا مليح شوفي راه حكالي نجيب وصليحة كلشي بصح خصني نسمع منك _ياخاه واش حكاولك _زينة راها حكاية عرض وشرف وكون راكي عزبا يطيحو عليها رقاب فمابالك متزوجة وفي رقبة راجل وهشام كون يسمع واحد مراح يسلكك حتى نتي مالا هيا ختي احكيلي كلشي وحتى ممكن في من شاكة _حكيتلو كلشي _صحا كاش واحد شاكة فيه _لالا كنت شاكة بلي ضرتي دزتلي كاش واحد باه ديرلي المشاكل بصح هذا كي مايكونش هشام فالدار يعيطلي وكي يكون هنا ميغلطش قاع _هيا مزية ختي عسي روحك منو علابالي نتي معندك حتى ذنب بصح الحكاية عرضو في هذيك اللحظة محال يتحكم في غضبو كاش ما سمع طول قوليلو نجيب علابالو سقسي نجيب صحا ختي _هيه_نوعد ختي نربيه ولد الكلب جازو يامات مش بزاف حتى مع العشية عيطلي  نجيب وجديلنا قهوة جايين عندك _نتا ولبنات _لالا انا وسيدعلي هشام تما _ايه  _ايا بيان يا نندب وقيلا الحكاية كبرت وقيلا جايين يقولولو كوبيت، شكون _نجيب وسيدعلي جايين _علاش غير الخير _مفيباليش  _كاش ما نجيبلك _ لالا عندي قاطو نضت طيبت قهوة وجدتها وحطيت قاطو والتخمام قاتلني شوية جاو هوما وهشام كان يستنى فيهم برا سلمت على نجيب وسيدعلي لحتلو السلام برك _واش حوالكم لاباس _والله بخير _يا سيدي واش من ريح قاسكم نطق سيدعلي  يا ودي راهم بدلوني هنا راني جيت على جال باه نبدل كواغطي ونرجع لهيه _لاه هاو قعد هنا وندبرولك عروسة وتتوانس مع بنت عمك _هذي ختي ومذا بيا نكون قريب ليها باه مكاش لي يقيسها بصح.... _ لاه وانا وين رحت _ها راني عليك باه متحقرهاش _علاه كاش ما اشتكاتلكم متأمنوهاش راها من الحمل غير تشري فالمشاكل بقاو يضحكو حطيتلهم تقهواو كي جاو مروحين جبدني نجيب على جهة _سيبون الحكاية وفات بصح نتي عسي روحك كاش حاجة عيطيلي ديراكت لا صليحة لا حتى واحد طول عندي هزيتلو راسي _تليفونك وينو _هاهو منعرف واش خربلي فيه ومدولي هيا بقاو على خير تفكرت الفاليزة _نجيب دقيقة رحت جبتها _واش هذي _وصاتني عليها صليحة _نتوما النسا ضحكنا هوما خرجو وانا تنهدت من عروش قلبي اف مزية خلاصت على خير فرحانة شوية جا هشام نضحك ونلعب معاه _ياه راكي مطروبة كي شفتي خوك كون غير قتلو جا زارك من هذو يامات بقيت نهبل فيه وندلل ونبوس فيه _راضية عليا مالا هيا ياحبي استسلمت ليه وخليتو دار فيا غرضو مع كملنا ونضنا ندوشو سمعنا الدقديق فالباب الدخلاني بصح قاوي زرب خرج وفتح وانا فالدوش نسمع فيهدى تبكي وتعيط خويا خويا _واش بيه ها سكتي باه نفهم _منعرف عيطتلي ما وقاتلي اجري راه فالسبيطار منعرف لا تلحقيه وللا _صحا البسي وضوك نجي هيا راحت وهو دخل تبعتو _خير ان شاء الله واش صرا _منعرف وقيلا النقش نتاع خوها دار أكسيدون نديها هيا وما ونرجع لبس وخرج زعما صدفة لالا بصح راه يقول أكسيدون واش دخل خاوتي خليني منهم رحت درت العشا جيت نعيط لصليحة مفوتليش التليفون عيط لهشام والو مالا مكاش ريزو سيغ حطيت تليفون وبقيت نتفرج حتى جا هشام سلام واش عمري لاباس _الحمد لله يادرا سلامات ولد خالك _هههههه يا ودي واش من سلامات فسدولو وجهو وكسرولو رجلو ويدو _ياخاه _واش بيك تخلعتي _لالا بصح مسكين قريب مات وبنتو مزال مشبعهاش _وهو واش داه _الله غالب الواحد يدير حذرو وكي تتقدر تتقدر _واش لي تتقدر _الاكسيدون ياك قتلي دار أكسيدون _لالا جماعة ضربوه هو قال بغاو يقريسيوه بصح انا نحلفلك غير كاش ما دار وطاح في رجال ولاد رجال عجبو بيه _ياخاه والله لا هو لي كان يعيطلي ونجيب وسيدعلي ضربوه ياربي تستر عليا وعليهم زعما تكون هدى دزاتو عليا منضنش كون راها فضحتني _وين تخممي _لالا هنا برك هيا نتعشاو ولا نهبطو لتحت  لبنات _لالا ما هنا جبتها معايا وهذيك راحت لدارهم هيا نتعشاو ونعاودو بارتي بديما راضية نتي تتقلبي _هههه منتقلبش متخافيش _مالا ارواحي هنا لا عشا لا جد ماليه........
للصباح جاتني زهية هشام يعيطلك تليفونك طافي _لالا شاعل هدرت معاه وينك وتليفونك لاه طافي _راه شاعل بصح مفيهش الريزو _خلاص كي نجي نشوفو المهم صليحة عيطت تسقسي عليك هيا باي حبي شوية هكا _باي حبيبي ، زهية ختي معليش تسلفيلي تيليفون شوية _معليه هاهو ليك هيا راحت وأنا عيطت لصليحة قتلها خو هدى لي تبلاني _وين علابالك انا مقاليش نجيب _حكيتلها _مالا عسي روحك منو ومن ختو  متقوليش مفيبالهاش صحا _اسمعي الفاليزة بعثتهالك على جال هذوك الصوالح خفت نرميهم  ويشوفهم هشام _هيه عرفتها خلاص رميتهم  تهلاي كيما وصيتك هيا باي رجعت تليفون لزهية وهشام دالي تليفوني للريباراتور قالو لابيس نحرقت تليفون لاباس باينة خدمة نجيب جابلي بيس جديدة تهنيت اف ، غير سمانة عاود جا نجيب وحدو جابلي الفاليزة فيها حوايج البيبي وحوايج ليا قتلو علاه _وأنا وين علابالي مدوهملي جبتهم صحا كاش ما ديرونجاوك _لالا_ايا مزية انا نروح تهلاي في روحك ، سقسيت صليحة قاتلي هوما عندهم ام البنت تجهز بنتها والبيبي نتي شوفي كان لمحتلك وريهملها مقاتلك والو روحي اشري نتي وياها راه حفيدها الأول خليها تفرح فيه والصوالح شريتهم انا وخواتتك وعلابالك مقدرتش نجي مين بالحمل _ربي يحفظكم ويخليكم ليا وربي معاك على الوحم _آمين حنونتي هيا باي حكيت لهشام كلشي قالي خلاص مالا بعد العشاء  هبطنا قاللها ما باغيبن نشرو حوايج الصغير تروحي معانا طارت من عينيها وينتا أكيد نروح للغدوة منو خرجت انا وياها وهشام والله خليتها على راحتها عندها ما شرات مع كملنا قاتلو دينا نشرو لزينة قتلها عندي قاتلي تسكتي ولالا مع دخلنا لي تشوفني نقلب فيها تقولي ارفديها قتلها لالا وقاع ذاك وعندها مشراتلي وجينا وصات هشام جيبلنا عشا من برا نتعشاو قاع مع بعض قاللها خلاص راح كمونداه ودانا للدار قالنا ممبعد نجيبو دخلنا لتحت عندها فتحت العجوز الصاشيات توري لبنات حتى هدى هزت روحها راحت عند لحظة غاضتني مهما يكون ولية ربي يعمر حجر كل بنت وراتلهم كلشي ممبعد قاتلهم غدوة اطلعو نقولها الدار وخملوللها كلشي قتلها والله نقيتها قاتلي لاه متسكتيش قتلها صحا ميكون غيرخاطرك للعشا عيطت زهية لهدى جات عينيها منفخين وحمر باينة باكية تعشينا حنا طلعنا اليوم دالتي وهوما كل واحدة راحت لشمبرتها.