زينة الهاشم 2

الجزء 01

#زينة_الهاشم2 💝
ممنوع النقل بدون اذني ❌❌
#بقلم_فريال
الجزء 01
نسمع فالآذان بصح مقدرتش نوض مقدرتش حتى نحل عينيا نسمع فأصوات بزاف فوضى كبيرة لاصونات طون طون طون خطوات مشي نسمع فيهم قاويين تحسب نتاع عملاق ألم فضيع في جسمي بصح راسي حاولت نحركو جاني ثقيل تحسب حجرة حاولت نهز يدي مقدرتش حسيتها مربوطة حاجة شاداها وليت نحاول ونحاول باش نفتح عينيا وأخيرا قدرت نفتحهم قابلني راجل شوية كبير لابس كامل الأزرق شكون هذا حتى قالي على سلامتك ختي دقيقة وضوك نجيك شوية سمعت الحس والهدرة بزاف تاني بالسيف فتحت عينيا الرؤية مضببة بقيت نشوف معاهم اه هذو باين فيهم طبة مالا انا راني فسبيطار بصح علاش نسمع فيهم يسولو فيا صافا كيفاه راكي واش تحسي بصح والو مقدرتش نجاوب حتى نطق واحد قاللهم خلوها تفطن مليح روحو خبرو أهلها خرجو كامل بقى غير هذاك لي شفتو فلول بقيت نشوف معاه كأني نحاول نسقسيه وين راني ولا واش صرالي فهم عليا قالي علا السلامة ومتقلقيش روحك ضوك شوية يتنحى عليك راكي كنتي في غيبوبة وضوكا إذا راكي تسمعي فيا جاوبيني مقدرتش قالي رمشي بعينيك لكان كنتي تسمعي فيا رمشتهم قالي برافو راكي تشوفي فيا مليح مرمشتش قالي قادرة تحركي حاجة في جسمك راسك يديك رجليك كامل مرمشتش قالي متتقلقيش كعاد عندك مدة وانت راقدة عليها عيتي تتحركي ضوك بالشوية وتحركيهم كامل، شوية جاو داوني لشمبرة أخرى دخلو عندي خواتاتي يتعايطو معاهم نجيب حالتهم حالة مهمش مأمنين بلي حليت عينيا قاعدين يحكيو معايا زينة صح فطنتني زينة صح رجعتي يبكيو ويهدرو معايا حتى قالتلهم لفرملية الي كانت معايا بالعقل عليها مزال مفطنتش مليح كنت حاسبة روح رقدت وفطنت كي قالولي عندك 3 أشهر وانت في غيبوبة مأمنتهمش ضوكا فهمت علاه مقدرتش نتحرك وزاد حتى راسي نحسو مشوش وماني متفكرة والو كيفاه حتى جيت لهنا.
دخل هشام يجري حضني ويبوس فيا من وجهي من يديا حنونتي صح فطنتي ولا راني نتخايل قاتلو صليحة مراكش تتخايل هو غير يبوس وانا غير نشوف معاه لحية طويلة وجهو أسود عينيه حمورة منظر نتاعو مهوش طبيعي ولا مرة شفتو هكا كان في خاطري نسقسيه واش بيه بصح الله غالب مقدرتش نهدر حنا هكاك جاو باه يديوني يديرولي لي راديو اللازمين رحت معاهم وكي رجعنا بديت نحس بيدي ورجلي اليمين بديت نحاول نحركهم والحمد لله تحركو ملي فطنت كان عندي وجع مابين صدري وفي كرشي من لتحت نحسو كيما ماص خفيف وراسي تاني من اللور الم فضيع فيه مع قدرت حركت يدي حاولت نمس الاماكن لي توجعني حطيت يدي على راسي ممبعد صدري ممبعد على كرشي ممبعد كرشي من تحت حتى تفكرت بلي كنت بالحمل وكرشي كانت خارجة عاودت تحسست كرشي لقيتها فارغة وليت ندير بالاشارة لخواتاتي كرشي وين ولاو هوما يبكو لحقت كريمة عندي وقاتلي زينة استغفري حنونتي بقيت نشوف معاها داهشة قاتلي ربي يعوض عليك مقدرتش نتقبل هدرتها وليت نعيط بالصوت وماقدرتش حتى نهدر ونقوللهم علاه ولا كيفاه نعيط بالم فضيع يا ريت قدرت نهدر ونقوللهم وين بنتي وين حبيبتي لي هذا شحال وانا نستنى فيها وينها عمري لي كنت نخمم كيفاه نسميها كيفاه نلبسها كيفاه نمشطلها عياو يهدنوني بصح مقدرتش نهدى حتى دارولي لبرة وهكا جبت اكثر من سمانة وانا غير بالمهدئات جابولي طبيبة نفسية بصح بلا فايدة كرهت عائلتي وقتلهم واحد ما نشوفو بقات معايا غير شهيناز هي تبدلي وهيا تلبسني توكلني أنا الجهة اليسار منقدر نحرك لا يدي لا رجلي وزاد تحطمت كي دريت ببنتي ماتت.
حكاولي كل لي صار وانا بروحي بديت نسترجع فالاحداث بالشوية تمنيت لوكان موت ومبقيتش نتعذب تعبت خلاص خرجوني من السبيطار حالي يشف الحجر مشلولة نصفيا كلشي تحتي غير بالكوش اما نفسيا علاه علاه محطمة باتم معنى الكلمة الهدرة مانهدرش وليت كي الجثة نشوف غير بعينيا ومرة مرة يجيني انهيار عصبي دارنا مفرغتش من الناس كامل جاو زاروني وحمدولي على السلامة بصح واش من سلامة وأنا في عالم ثاني في عالم اللاوعي نحاول نهرب قد ما نقدر جاوني عموم هشام ونساهم زاروني وحتى عجوزتي جات بصح منعتها كريمة باه تشوفني هشام مرة مرة يجي بصح رافضة اني نشوفو وحتى اهلي رافضين مرات قلال يغيضهم يخلوه يشوفني بصح حتى نكون راقدة جا بابا لي عندي مدة مشفتوش غير دخل عندي وشفتو نضت نعدد لربي لي خلقني كاني نعاتب ونلوم فيه علاه سمحت فيا علاه خليتني وحدي شوف واش صرالي وهو يبكي معايا ويحضن فيا ويقولي خلاص راني هنا انا راح نوقف مع بنتي خلاص راني جيت لبنتي ، أكثر من شهر وانا فراش وحالتي من سيء لاسوء غير مرة مرة ويدوني للسبيطار يشدوني يومين ثلاثة ، حالتي صعابت اكثر سيرتو من الناحية النفسية ولات جيني بسيكولوڨ للدار واكدتلهم امتناعي عن الكلام نفسي، بديت ندير ريديكاسيو والسبور من الأول مقدرتش وعجزت خاطر نتوجع بزاف وزاد مع الاكتئاب لي دخلت فيه وليت منحبش نروح حتى بالسيف لحق رمضان ولقيت روحي عاجزة تماما كلهم يصومو يصلو غير أنا زدت اكتأبت اكثر وأكثر وليت نضل ندعي على روحي بالموت.