زينة الهاشم 2

الجزء 05

زينة الهاشم 2 💝
الجزء 05
غدوة منو قاتلي صليحة عيطلك البارح باباك وزاكي حبو يهدرو معاك وكنتي راقدة تقهويت وديت تليفونها ورحت للبيت سمعت كريمة قاتلها متزيديش تمديلها تيليفونك وحدها باينة راها تعيطلو من عندك ضوك ترجعي فالمشاكل مع نجيب قاتلها كريمة علابالك راكي نتي وخديجة عجوزتها كيفكيف قاتلها اللطف كيفاه تقوليلي هكا قاتلها والله كيما راني نقولك ونتي وسبع نتاع خوك ياويلكم من ربي على واش راكم ديرو في هاذ اليتيمة قاتلها رانا نخمو في مصلحتها علابالنا جايحة ويلعبلها على عقلها دخلت للبيت عيطت لزاكي بلاكام لقيتو فلافاك هو راه يقرا طبيب سنان جمع فالجاردان قالي واش بيها ختي واش دارولها بداو دموعي يطيحو وحدهم قالي فرغي قلبك حكيتلو كلشي واش نرتاح معاه قالي زينة نسقسيك نتي انسان ولا بيدون لي يجي يهزو وين حب نتي علاه متتحكميش في حياتك وحدك مراكيش باغية ترجعيلو ضوكا عيطيلو قوليلو طلقني محال نرجع عندك حابة ترجعي عيطيلو ضوكا قوليلو ارواح اديني قتلو ميخلينيش نجيب وكريمة  قالي علاه ميخلوكش واش يكونو هوما صح خاوتك ورباوك بصح كل حاجة عندها حد ديجا قوليلي كريمة وينها قتلو راها هنا قالي بصح ممبعد تروح لدارها قتلو سمعتها قالت بعد الغدا نروح قالي شفتي وسي نجيب وين قتلو فالخدمة قالي لالا قصدي حتى هو في دارو مع مرتو وولادو زينة تشفاي هذاك اليوم كيفاه سمعناه يحاول في صليحة باه تسمحلو قتلو ايه قالي مالا نزيدك والله ثلاثا قداه من مرة لقيتو جايبلها لي كادو باه يرضيها ووصل وين قالي ارقد مع زينة باه ترجع صليحة للشمبرة عندي شوفي زينة حبيبتي كي جي في حياتك قاع يلعبوها فاهمين الحياة خير منك بصح كي جي فيهم يمشو حياتهم كيما يحبو هوما ياربي ويأذو الناس الأخرى مالا يا ختي العزيزة خصك تقوي شخصيتك وتعرفي تتحكمي في امورك وبابا لي هو باباك ومتخليهش يدخل في حياتك ويسطرهالك زدنا حكينا وكوبيت بقيت نخمم في هدرتو لقيتها صواب انا لوكتاه راح نبقى هكا كريمة راحت لدارها فالليل شدينا بلايصنا حتى جات صليحة مدتلي تليفونها نحاهولي نجيب قاللها واش هذا قاتلو والو جبتلها تشوف هذا الفيديو شافو ودا التليفون وخرج شوية جابلي الطابلات نتاع وليدو دايرلي فيها هذاك الفيديو وخرج شفتو لقيتو للدكتورة هالة سميرة تحكي فيه على التقرب الى الله وكيفاه نفوضو أمرنا ليه سبحانو نتفرج ونبكي على وقتي لي ضاع الناس كل كي طيح فالغم تتقرب لربي بالصلاة والصيام غير أنا لهيت في مرضي وغبينتي من نهار مرضت مقابلتش القبلة بكيت حتى تفسخت ونضت تدوشت وفرشت الصلاية نصلي ونشهق جا نجيب وصليحة يجرو لقاوني نصلي غلقو عليا الباب وراحو صليت واش كتب ربي وجبدت المصحف عندي شحال مقريتش فيه مع فتحتو جا على سورة الرحمن تاني نقرا ودموعي ويدان أذن الفجر صليت وطحت في بلاصتي لوحة منظتش حتى على أذان الظهر غسلت وتوضيت صليت ورحت فطرت جمعت مع صليحة شوية ممبعد حذرتني قاتلي الطابلات راها محمية أبويا وأي حاجة جي تطلعيها مثلا الفايس راها توصل ميساج عند نجيب مالا ردي بالك قتلها معليش.
والله غير هذا وين بدا صح يتحسن حالي وليت متابعة وفية للدكتورة هالة وزدت بالصدفة لقيت قناة فاليوتيوب تبسيط أحكام ورش للاستاذ التوهامي الوزاني هو مغربي يعلم أحكام التجويد ولى وقتي قاع بين الصلاة وقراءة القرآن الكريم لحق علينا رمضان هذا ثاني رمضان نجوزو في دارنا حقا هشام نحكي معاه مرة على مرة مين متكون لا سعاد لا كريمة قاع هذاك وسعاد حيادية في هذا الموضوع جامي جبدتلي عليه ولا قاتلي ارجعي ولا مترجعيش قاللها جمال متدخليش اطلاقا كعاد مهيش حياتنا منقدروش نحكمو اطلاقا المهم خواتاتي وحتى نجيب اندهشو من التغير نتاعي سيرتو كي شافوني وليت ندير خمار قدام رجال خياتي وسيدعلي ولد عمي لي جامي خلاني ، المهم 10 أيام من رمضان جا هشام هو وعمو الكبير كنت نصلي فالظهر كي جا نجيب قالي راهم هنا ادخلي عندهم رحت ليهم بملابس الصلاة عمو سلمت على راسو وهو صافحت عليه برك بقى غير يشوف معايا وساكت حتى حشمني بدا عمو يهدر يا سي نجيب وضوكا متحنش على هذو لولاد قالو اسمحلي دقيقة وقالي زينة روحي جيت خارجة قالي هشام زينة هاكي مدلي صاشي نتاع لي كادو كبيرة شديتها عليه وخرجت بقينا نتصنتو انا وصليحة من الكوزينة قال عم هشام هذو لوينتا راح يبقاو هكا متفارقين قالو نجيب خلاص كمل مكتوبهم وليدك ليراه معند ومبغاش يطلق قالو العم يا وليدي استغفر مولاك كيفاه تسأل الطلاق لختك قالو حنا مستعرفين وليدنا غلط وغلطو كبير وحتى حنا تبرينا وجبدنا روحنا منو وراك شفت جامي جينا ليك على جالو كنا نجو على جال بنتنا بصح كي شفناه ندم على واش دار راني جيت انا طوعا هو والله مقالي أيا تروح معايا يا نجيب وليدي خاف ربي في هذو الذراري ختك مريضة وربي داري بحالها والله نصها راه طايح ولا هذا لي عام كامل مخدمش جابها غير طالع هابط عليها والله يا وليدي ماماه راهي مريضة في حالة غير حنا لي رانا واقفين عليها وهاهو قدامك يدو من لاكسيدون مزال مرتاحت هو موش حاب يداويها خاطر الطبيب لي يشوفها يقولو ممنوع عليك تسوق يا وليدي في هذو العواشير حنن قلبك على هذو زوج طيور لاه راك حاب تهدملهم دارهم بالسيف نجيب غير يسمع وساكت منبعد قاللهم الله يجيب الخير وانا وصليحة دموعنا على خدنا سمعناه قالو ديرلنا طريق زربنا دخلنا ومسحنا وجوهنا شوية دخل نجيب لقاني نعمر فالبوراك قالي وينها الصاشي هذيك شرتلو براسي ليها لقاها مازالها مغلوقة كيما مدهالي بقى يشوف معايا ممبعد فتشها ملقى فيها والو حطها وراح انا صح معلاباليش بلي هشام جاي مخبرنيش وزيد اصلا منهدرش معاه بزاف بصح حكيتلو على الضربة لي شكو عندي تليفون وواش دارو فيا منها موالاش يلومني كي منعيطلوش ولا منطولش معاه فالهدرة ومزادش قاع بعثلي تيليفون، فالليل جات سعاد وجمال يسهرو عندنا كنا حنا فالكوزينة سمعنا نجيب عاود لجمال كلشي قالو جمال ونتا واش عولت قالو راهم حاسبين يقدرو يلعبو عليا والله مترجع عندو وكون يموت سبقتني الدمعة زربت مسحتها طبطبتلي سعاد على ظهري قاتلي كثري الدعاء والاستخارة حنونتي رحت لبيتي فرغت قاع مكبوتاتي على السجادة .
الغدوة منو هدرت مع هشام وقتلو نجيب مزال مهوش قابل ناض يعيط ويكفر دار حالة حاب يهبلني هذا خوك اقسم بالله نشقى ليه نقتلو ونتهنى خلاص معاد فيا حيل كرهت قسام حياتي كرهت كلشي نسمع فالتكسار منعرف واش يكسر كوبيت عليه ومن يومها معاودتش غلطت عندو هو عيط مرتين وقيلا مجاوبناش عليه ممبعد رسلتلو صليحة ميساج بليز متعيطش راك ديرلنا مشكل كبير كي تفضى زينة تعيطلك منهامعاودش عيط كملت باقي الايام نكذب إذا قلت عادي الحاجة المليحة اني وليت دموعي نطيحهم على المصحف ولا على السجادة حتى ليلة القدر عييت نتقلب ونصبر في روحي ونشد فيها بصح مقدرتش جبت تيليفون صليحة ورحت للدوش لعبتها ندوش فتحت الماء وعيطتلو تم تم عاودلي صافا لاباس قتلو الحمد لله ونتا قالي الموتى صبرنا عليهم بصح الحيين مقدرناش قتلو مكانش لي حي قاع موتى قالي علاه راهم يعذبو فينا هكا بقيت ساكتة ممبعد قالي زينة مزلتي تحبيني سكتت قالي جاوبي قتلو منعرف قالي زينة تهربي عندي هدرتو خلعتني قتلو كيفاه قالي ايه حبي صباح نستناك غير يروح نجيب للخدمة اخرجي نديك كي تفوتي جي عندي خلاص ماعندهم واش يديرو قتلو والله قالي هيه حبي والله ميقدرو يدوك قتلو هبلت نتا قالي يا ربك واش بيك خوافة هكا والله متخافي قتلو  راك غالط في حسابك نجيب يجي لتم لداركم يخسر عليا وعليك رصاصة ويروح هذا ويكون المخلوقة لي راها لامتني ديجا سيح دمها انا منيش خوافة بصح نتا لي أناني خممت غير على روحك قالي انا أناني قتلو إيه وانا الغالطة لي مزالني نتبع فيك ونتا حابني نعفس نيف خويا وكوبيت دوشت وشبعت بكا فالدوش جبت هذو 3 ايام توالا غير فراش الصوم وصمت بالسيف عيات فيا صليحة افطري ممبعد رديهم قتلها والو خلي نصوم وإذا موت ربي راح يلطف بيا موش كيما عبادو  نهار العيد ما نضت ما كسرت راسي صليت الفجر ورجعت رقدت للظهر باه نضت وعلاه نوض شكون عندي باه نروح نغافر صليت الظهر ورجعت لبلاصتي جات صليحة قاتلي نوضي قتلها الرحمة خليني قاتلي إذا تعزيني وتحبيني نوضي على جالي رحت غسلت وفطرت قاتلي ايا البسي ضوك يجو لبنات خواتاتي وخواتاتك يلقاوك شابة كيما طبيعتك رحت للبيت جبت هذيك الصاشي لي جابها هشام والله ثلاث من الكية لي ديتها منهم ما شفت واش جابلي فتحتها لقيتو جايبلي جبة نتاع همة فالبلو غوا محرجة من الصدر بلي مونش مع دوبياس نفس الكولاغ وصابو دوغي ،بيجامة دوبياس ساتان نتاع رقاد فالغوز بيبي مع دوبياس بلون وكلاكات غوز وبارفان وديودوغون ، ملاية فالنواغ بالحزام وطالون مارون وخمار مارون ،لبست هذيك الجبة مع دوبياس والصابو وبلاكيت شعري شديتو غير نص مكيجت ورشيت البارفان خرجت لصليحة قاتلي ما شاء الله ربي يحفظك من العين بصح منين جاوك قتلها الصاشي التالي قاتلي ربي يجمعكم عاجلا غير آجل إذا فيها خير ليكم قتلها آمين حنا هكا جات شهيناز وختها فتيحة المطلقة جمعنا قاتلي شهيناز راكي عروسة هاتي نصورك قتلها خليني قاتلي صليحة اتصوري واش فيها تصورت معاها وصورتني فوطوات وحدي شوية حطتلي تليفونها في يدي شفت لقيت ميساج من هشام: "عيدك مبارك حبي كل عام ونتي بألف خير يارب ان شاء الله العيد الجاي تكوني عندي فالدار قل أعوذ برب الفلق ربي يحفظك من كل عين حاسدة متألقة كيما  موالفة... توحشتك فوق الحد يا العمر" غلبتني دمعتي زربت خرجت لحقتني شهيناز اسمحيلي ختي والله من البارح وهو يحاول فيا باغي نشوفها عنقتها قتلها معليش حنا هكاك سمعت خواتاتي دخلو قتلها شهيناز ردي بالك قاتلي والله متخافي خرجنا عندهم بقاو حالين فامهم فيا غافرتلهم وقعدنا مع بعض قسرنا شوية.