زينة الهاشم 2

الجزء 09

زينة الهاشم 2 💝
الجزء 09
جبنا طريق كاملة وهو يسقسي حنونتي توجعتي حنونتي تاكلي قتلو نرقد برك كنا زمان الصيف وشعل الكليما هبطلي الكوسالة رقدت حتى قريب نوصلو فطنت قالي صحا النوم قتلو يسلمك كنا قريب لحومتهم عيط فالتليفون خلاص وصلت بقيت نشوف معاه ولى يحك على لحيتو ويضحك مع لحقنا قابلونا لي جان عرفت غير ولاد عمومو صالح سعيد حسين وواحد ممبعد تعرفت عليه والاخرين ظهرو صحابو ولي يخدمو معاه والجوارين عاملين جو روعة الغنا الشطيح لي فلومبو لي فيميجان زغاريت من ڨاع الديور متعرفوش الفرح عند من زرب نزل هو ولحق عليه رياض وحتى سيدعلي لهبو الحالة سيرتو هشام باين فرحتو معاطيها لحد عينيه يلمعو من بعيد جمال جاب لبنات ركبهم معايا وهو فات مع نجيب وعموم هشام للدار وحنا بقينا نتفرجو وزاهيين قاتلي شهيناز افرحي يا زينة زكارة فالعديان هزت صليحة يديها للسماء يا ربي وتكون اللفعة هنا وتتحرحر وتموت بالقنطة بقينا نتفرجو انا حاكمة النظرة غير في هشام لرض مهيش سايعاتو ولا هذاك الحلوف نتاع سيدعلي تقول خوه هوا مش خويا المهم حتى برد قلبو باه تفكرني جا يجري عندي اسمحيلي حنونتي والله نسيت هبطنا كامل و طلعنا مع الدروج لداري دروج نتوعي وحدي ورا دارهم غير وصلنا فتحلنا دخلت انا الاولى ولبنات بعدي يزغرتو علينا من الدخلة باينة الدار روعة جوزنا للصالون ديراكت جاية على الدخلة على الباب نتاع برا مفرشها بالفوتايات ساير داير  (جاين كنابيات وعندهم الظهر نتاعهم هذا الستيل شفتو عند صحاب الشرق بزاف والخليجيين) حاطين زوج طوابل فوقهم قهوة وتاي وقاطو قعدنا شوية قالنا انا نروح ونتوما ادو راحتكم فتح الباب الدخلاني لي يهبط عند يماه وعيط لشهيناز قاللها تعيشي ختي اغلقي من بعدي نضنا نقرعجو على الدار تحفة  كاينة الصالون الاول لي دخلناه بحذاه بيت شوية صغيرة حاط فيها فراشي القديم نتاع جهازي اونفاس ليهم الدوش والتوالات باب واحد بصح الداخل كل واحد وبابو الدوش هبال بالبينوار وهذاك واش نحب انا الكولواغ جاي حرف Lالفوقاني هذا واش فيه والتحتاني فيه كوزينة طويلة عريضة مجمولة من كلشي اونفاص ليها البيت نتاعنا شومبرة كوشي جديدة بوا روج تقتل مفرشينها بالقري بنابل قلوبة غوج وبلون ونتاع الحروف ملسقين فوق تاج نتاع السرير HوZ بيناتهم قلب أحمر شموع طافين وورد مفرشين بيهم كامل الارض المهم الدار تحفة روعة روعة والله متوقعتها هكا اقسم بالله تحسب نتاع المسلسلات تاع الاتراك حنا هكاك سمعنا شوية حس جرات سعاد فتحت الباب الدخلاني غير بالشوية ممبعد قاتلنا ارواحو كان هشام ويماه وواحدة معاهم منيش عارفة شكون المهم العجوز قاتلو نقص حسك الناس هنا قاللها معندو واش راحلي فيهم ودار لهذيك المرا قاللها فهميها كاش ما تغلط والله ثلاث تخرج متعاود ترجع بقات تقولو علاه يا ولدي لاه تحرقلها في قلبها هكا قاللها معندو مدخلني قتلها راح نجيب زينة روحي لداركم هيا مبغاتش تروح مالا دبر راسها وزيد لاه نحرقلها قلبها ياك من النهار الاول قتلها نموت ونفنى على زينة ونتي غير محتمة وهي قبلت مالا تندب راسها من تالي تغلط مع زينة اقسم بربي نكركرها من شعرها لداركم ونطلق ربها حتى انا راني نحوسلها على سبة.
بقيت نسمع ومخلوعة حتى قاتلي سعاد امشي قدامي مالا راها هنا اليوم نخرجو فيها الاول والتالي قتلها حبسي واش حابة ديري قاتلنا اجرو قدامي دخلنا لبيتي قاتلي وينهم حوايج تصديرتك قتلها في لافاليز نتاعهم بصح منعرف وينها حوست عليها لقاتها جبدتلي الصواغي البلون كاسي لي رحت بيها لوتال مع هشام في نهارنا قتلها ياك تفاهمنا نلبس قفطان قاتلي والو البسي هذي قتلها محال نلبسها عيات معايا فهمتني صليحة حنونتي هذيك تفهمني طايرة قالتلها لالا سعاد اجبديلها الكراكو همة وحاجة نتاع عروس وجامي تقدام قاتلها اوكي قالولي ربوزي شوية ممبعد نجيو ليك تسطحت على السرير سمعتهم يقربعو طليت نلقاهم خملو هذيك البيت الثانية قالولي ديريها بيت قعاد نتي وياه وتاني الصوالح لي جبتهم معايا خملوهم كل حاجة في بلاصتها غير اللبسة لقاو الخزانة معمرة قالولي كي تقعدي صفي من هذو لي متلبسيهمش باه يبقالك الوسع كملو كامل شربو قهوة وقالولي ضوكا دالتك دخلت درت دوش خفيف وجيت  لبست الكراكو وسقمتلي سعاد شعري نسيت مقتلكم قطعتو دقرادي قصيرة شوية من اول كان حتى مسلاني ضوكا رجع في نص ظهري ودرتو كستنائي كيما ديمة نتاع حب للايجار جاني توب كيما هيا ماكياتلي لبسولي صياغتي وخيط الروح خرجت توب عروسة حقيقية بقات شهيناز تهبل فيا واليوم كيفاه يصرالك معاه قاتلي سعاد عيطيلو قوليلو نهبط لتحت عيطتلو قالي استنايني ضوك نجي شوية جا طبطب قاتلو سعاد ادخل بقى غير يشوف معايا وفمو مفتوح هههه لحق عندي باسني من جبيني وخدي قالي اللهم صلي على النبي تبسمت معاه لبنات تاني كانو لبسو ووجدو رواحهم هبطنا يدي فيدو وخوتاتي يزغرتو لقاونا قاع فالهول عطاتنا مرت عمو الكبير تمرة قاتلنا اقسموها بيناتكم وشربتلي الحليب عنقتني يا الحبيبة وكي توحشناك عنقتها مع طلعت راسي جات عيني على باب شمبرتها نلقاها واقفة شعرها فالسما عينيها حونر لابسة جبة نتاع دار عادية حاطة راسها على كتف يماها وواحدة صغيرة شوية بانتلي ختها معاها شادتها ديراكت تفكرت نهار دخلت للدار ولقيتها هنا واش صرا فيا بصح الحمد لله ربي جابلي حقي انا لقيتها هنا بصح هيا دخلت عليها عروسة كاملة مكملة والكمال لله وبعرس وزغاريت وشان جاو عينينا مع بعض بصح مبغيتش نشوف معاها ولا نستشفى فيها مهما يكون تبقى ولية كيفي المهم الباقي يسلم ويمرحب بينا جوزونا للصالون الكبيرة دايرين ديكور خفيف نتاع عرايس قعدت انا وياه عاودو كامل جاو سلمو علينا يماه نسا عمومو عرايسهم وخالاتو زوج نورمال ولا هذيك الشرة المسمومة كون مش حشومة نقوللها متقربينيش جاوني لبنات زينب زهية وزهيرة سولاف وبنات عمو الصغير وأكيد عشيرتي وتوأم طفولتي مريومة واش نزيد كثر من هكا ربي يبقي عليا الستر شوية خرج هو قالي إذا تعبتي اطلعي مديريش حسابهم قاع هزيتلو راسي وبقيت مجمعة معاهم كامل يسقسو ويعاودو ويا زينة شحال زينتي قاتلي سولاف زينة لاطاي لاطاي انا ختك كيفاه نديرها فوتناها هايلة شوية جات ضرتي وأهلها قعدو مقابليني ملي نشوف معاها نلقاهم يشوفو معايا كون لاقيين الموت يطلقوها عليا بصح انا قاتلتهم غير بالبارد نتبسم معاهم عادي.
كامل كان علابالهم بيا بلي مرضت ووصلت للموت وحالتي حليلة بصح كي شافوني تخلعو نظن متوقعوش يشوفوني هكا بهذا الزين لي نحمد ربي ونشكرو عليه ولا بهذي التبسيمة انا صح شينت وشينت بزاف وصلت حتى ل 50 كيلو بعدما كنت 68 كيلو عاد هذا وكنت ضعفت بزاف في أول مرضي ممكن نكون وصلت أقل من 40 كيلو عظامي كانو ينعدو المهم كيما قلت فاتت بزاف شابة ضحك وقسرة ومريم المهبولة لي غير تستسمح وتعاود قتلها هذي خليها لنهارها موش اليوم قاتلي داكور فالاول كنت لاهية معاهم بصح منبعد تولهت مع ولد مريم وبنت سولاف كي كنت في الشهر السادس هوما ولدو يعني مهمش كبار بزاف على بنتي لي حتى هيا كون كتبلها ربي عمر كون راها هنا معاهم حتى هيا ددش استغفر الله كون هيا هنا كون مكانش هذي اللمة عييت نحيهم من بالي ممبعد خفت نعاين ولاد الناس وانا والله لا نقصد قلت لشهيناز عييت هيا نطلعو طلعنا الفوق بالسيف لا شادة البكية دخلت للدوش بكيت شوية ورجعت توضيت وخرجت قضيت صلاتي، شوية لحقونا سعاد وصليحة قالولي جايبينلنا العشا باه نروحو كنت ديجا جبدت جبة لبستها شوية جات زينب وزهية حطولنا كل خير وهبطو وحنا تعشينا وكملنا ناضت القافزة نتاع شهيناز لمت الطابلة وغسلت الماعن عييت فيها خليهم قاتلي لالا نورمال رجعت قاتلي صليحة خلي نشوفلك واش تلبسي باه تهبطي تقعدي معاهم قتلها منعاودش نهبط قاتلي عيب زينة راهم جايين على جالك شافت شافت لقات الجبادور لي شراهلي هشام في شهر العسل مزال بالتيكي نتاعو قاتلي هذا علاه ملبستيهش شحال شباب قتلها مجاتش مناسبتو برك جاي لافات نتاعو فاغ مطروز من الفوق لتحت بالدوغي يديه 3/4 سروالو فضفاض باج ومن تحت فيه بوندا فاغ حاجة شابة بزاف مع بابوش نتاعو لبستهم ودرت الذهب حاجة خفيفة مقويتش عاودت مكييت سامبل وبقينا متشايخين ولبنات يعاودو يوصو فيا شوية جا هشام قاللهم راهم يستناو فيكم وانا الغصة حكمتني تسالمنا كي سعاد كي صليحة بقاو يوصو فيه هشام اتهلى فيها ومتنساش راها مريضة رد بالك قاللهم اتهناو بربي الريح ميقيسهاش سلم على صليحة وسعاد قاللهم وقفتكم معايا ومعاها جامي ننساهالكم ومعلابالش كيفاه نردهالكم قاتلو صليحة اتهلى فيها تكفينا وتوفينا ضحكت شهيناز قاتلو وانا موقفتش معاك صحا بدى يضحك قاللها الصح قاع نتي بالسيف لا خرجو خرج هو معاهم شوية وجا بقينا للزوج ساكتين رجع قالي تهبطي لتحت قتلو هيه بصح نصلي قبل قالي معليه صليت العشاء وكانت صليحة وجدتلي سنيوة ميلونج بين بقلاوة ومقروط قاتلي هبطيهالهم للسهرة (هي وجدتلي القاطو فالدار قاتلي علابالي ضوك يجو يهنولك وتاني العيد الكبير باقيلو 10 ايام برك)، شد هو السنيوة وهبطت انا وياه رحت جمعت فالصالون شوية جابو لبنات هذاك القاطو مع التاي .