زينة الهاشم 2

الجزء 10

زينة الهاشم 2 💝
الجزء 10
بقينا نقصرو حتى جا هشام قالي عمومي يسقسو عليك شفت منا ومنا لقيت خمار هزيتو درتو بقى غير يشوف معايا دهش فالتغيير لي صرا معايا انا لي كان يدابزني على لبسة تاع الخرجة لقاني درت حجاب شرعي وزاد بلا ميقولي وليت نتحجب قدام الرجال ولي خلعاتو كي دخلنا عندهم عمومي سلمت على ريسانهم بصح ولادهم مصافحتش عليهم لقيتهم الكل تما غير واحد معرفتوش قالي هذا فاتح ولد عمي الصغير لي يقرا فالخارج قتلو متشرفين قالي الشرف ليا لي تعرفت على لي جرجرت سي هشام قالو تبلع ولا نهرسك ضحكو عليهم قالي صالح ارواحي ختي عندي توحشناك بزاف شدني هشام من ذراعي قالو باه تحرشها عليا نعرفك يا الخبيث بقاو بلعاني يقسرو عليه ويهبلو فيه شدني عمو الصغير قعدني بينو وبين خوه قاللهم الطفلة مريضة وعيانة ونتوما تتمسخرو بقاو يسولو عليا كيفاه مع المرض وأنا نجاوب من تالي قالولي عمومو المرة لي فاتت اسمحيلنا موقفناش معاك فالحق مدريناش حتى طفرت بصح هذي المرة والله كون يغلط معاك بكلمة رانا هنا حنا نوقفو في وجهو شكرتهم كامل مدولي باروك رجوعي وخرجنا من عندهم قالي هشام ترجعي تجمعي قتلو لالا تعبت نطلع دخلت بقيتهم على خير وطلعنا قالي حنونتي يروحو ونجي قتلو اوكي جزت غسلت ولبست بلعاني البيجامة لي جابهالي في رمضان الغوز بيبي وتسطحت على السرير مفطنت حتى لقيتو ينوض فيا قتلو واش قالي سڨمي روحك لاه راقدة هكا ولات فيا طبيعة نرقد متكورة على روحي دخل فالفراش غير جبدني ليه قتلو بعدني اني بمدام غوج ضحك قالي والعشاء لي صليتيه جبدت عليه قتلو مرضت غير ضوكا قالي معليه مزال الوقت ارقدي برك حضني من اللور ورقدنا فطنت على الاذان الاول نضت توضيت صليت زوج ركعات وقلت نوضو يصلي لقيتو نايض غمزني زعما بالعادة لا ولا نتوما تصلو بيها غير هذيك الحاجة الخاصة لالا ضحكت وهربت للصالون وهو ناض توضى وراح للجامع ، جا بقينا في فراشنا حتى رقدنا نضت لقيتها العشرة غسلت ورحت للكوزينة دخل عندي صباح الحب تبسمت كاش ما تحتاجي لالا راح غسل وأنا درت قهوة حطيت القاطو رفد حبة بقلاوة وقال توحشت زوج بقلاوات بقلاوة تصنعها صليحة وبقلاوة لي ولات بنت صليحة ولينا نضحكو ناض لبس قالي نعمل دورة ونجي ونجيب معايا غدا من برا حنا هكاك عيطولو فالتليفون سمعتو قاللها خلاص زينب تقهوينا يعطيك الصحة قالي راهم يسقسو إذا نضنا باه يطلعونا فطور هو خرج وأنا جبت تيليفون عيطت لخواتاتي حتى كريمة حكيت معاهم حتى جا وجاب معاه غدا من برا حطينا كلينا ورحت غسلت وتوضيت وبقيت نستنى فظهر زعما غفيت سمعتو نوضني زينة أذن كملت رقادي حتى فطنت لقيتو متكسل بحذايا ويتفرج قتلو واش أذن الظهر قالي مبقاش ظهر راه رايح يأذن العصر قتلو يا خاه قالي تحسب بايتة سهرانة قتلو الله غالب الدوا نتاع السكر يرقد غير نشربو نطيح حضني عندو اسمحيلي مهوش قصدي قتلو نوغمال ورحت توضيت وقضيت صلاتي لقيتو اذن العصر كملت على ضربة ودرت قهوة شربنا كيفكيف ممبعد قالي خارج شوية ونجي قتلو اوكي هو راح وانا رجعت لهذيك الخزانة حطيتها كامل عيطتلي شهيناز تلهيت معاها شوية ممبعد رجعت للخزانة  اغلبية الحوايج نحيتهم انا هكاك سمعت الباب تفتح دخل هشام قتلو مطولتش قالي تأمني وصلت للحوانت ودرت قلت كيفاه خليت الحب وحدو وأنا عندي شحال مشفتوش ومتلهيتش بيه قتلو هشام اخطيني متنساش واش تفاهمنا قالي يا منحرفة جيت نجمع ونقسر معاك هذاك مكان قتلو كون جيت منعرفكش ولى يضحك بالصوت قالي واش ديري قتلو نفرز في لبستي لي منحتاجهاش نحيها قالي هذو قاع متحتاجيهمش قتلو هيه قالي لاه قتلو ميجيونيش كامل كبار عليا قالي قيسيهم وانا نقولك قتلو صحا قبل روح قضيلي باه ندير عشا قالي حقا نسيت مقتلكش اهي ما قاتلي اهبطو تتعشاو معانا قتلها لالا زينة عيانة من الطريق البارح قاتلي زينب مالا ممبعد نطلعولكم العشا أيا مزية تهنيت حتى أنا محبيتش ندخل للكوزينة رحت درتلو عرض الازياء وهو يخير معايا لي خيرهملي قاع ستفتهم فالخزانة ورحت جبت لي فاليز لي جبتهم معايا قالي واش هذو قتلو حوايجي قالي خليهم لغدوة ريحي حبي راكي من العشية مع هذو درت برايو خليتهم ورحنا للصالة (بيت القعاد) شعلنا تيلي وبقينا متشايخين حتى جابولنا العشا تعشينا فالكوزينة عاوني فالغسيل بقيت نضحك خاطر مش من عوايدو هو صح منظم جامي يطيش حوايجو ولا يخلي فراشو مش مسقم بصح حاجة الطياب ولغسيل جامي يلحق ليهم كملنا جمعنا شوية جات زينب بقاتنا على خير هي وبناتها شوية ورقدنا نضنا صلينا الفجر وكملنا رقادنا للصباح نضت قيس 8 قالي وين علاه مبكرة قتلو شبعت نوم غسلت ودرت قهوة وهو تاني غسل وجا شربنا كيفكيف ممبعد قالي زينة عمري نهبط نشوف ما كاش ما تحتاج باه نخرج نقضي على ضربة ونجي اوكي هزيتلو راسي  شللت الماعن ورحت خملت الصالة درت مسحة خفيفة للبيوت ورجعت لبيتي قلت نكمل تطباق الحوايج انا معاهم ونسمع فالباب الدخلاني يدقدق مع فتحت نلقى ضرتي في وجهي ودايرة يديها على مسلانها جات داخلة وبدات تعيط وتزقي يا خامجة يا رخيسة يا لي متحشميش يالي معندك نيف معندك كرامة طبعتها وخرجتها ونعرشلها إذا كاين وحدة متسواش هيا نتي ولا كاينة لي ماعندهاش كرامة هيا نتي شفت ختها فالدروج ويماها في اول الدروج مع شافت لبنات والعجوز جاو وهيا بدات تتسيتت يا هدى اخزي الشيطان وهبطي طارت ليها لعجوز امشي اهبطي واش راكي ديري ثما قاتلهم منهبطش حتى نفريها معاها طلعت زهيرة تجري عندي ووقفت بحذايا نظن خافت يتحاماو فيا هيا وختها وهذيك لي بلا تربية قاعدة غير تقول فالكلام الفاحش خسرت عليها غير كلمة ناقصة تربية  قاتلي انا قتلها مالا شكون كون جيتي متربية هذا الكلام بينك وبين نفسك ومتقوليهش مش حتى قدام يماك وعمتك قاتلي واقيلا نتعلم التربية منك يالي متسوايش يالي بلا كرامة  قتلها انعم متربية عليك والكرامة لي تهدري عليها ديريها قبل لروحك يا الرخيسة قاتلي نتي لي رخيسة لي قبلتي تدخلي على ضرة قتلها واشنو علاه شكون دخلت على لخرى انا ولا نتي قاتلي ياك كنتي في داركم واش رجع يا ع.......ية علاه رجعتي عليا قتلها حنونة انا من قبل في داري ومع راجلي وغير كي تقدر عليا المرض رحت لدارنا بدات تضحك باستهزاء ياك لعبتيها عندك نيف وهربتي لداركم قتلها هيه عندي النيف عليك وانا مهربتش لدارنا كنت مع راجلي حبيبي في دارنا لي كريناها شفت الصدمة على وجوهم حتى العجوز معاهم قاتلي ختها واش من دار تحكي عليها قتلها دار لي كراهالي في .......قاتلها هدى متأمنيهاش تكذب قتلها والله مالا وين كان يبات وتباتي نتي تعيطي حتى يطفي عليك التليفون ولا يهز يسمعك وسخ وذنيك قد مانوصف حالتها متتوقعوهاش وبدات تعيط على طول صوتها وهبطت تجري للعجوز امنتيني كي قتلك وليدك خرج الطريق وراه يبات مع القحبات عيطت عليها من الفوق احترمي روحك كان يبات مع مرتو حلالو عاودت طلعت عندي وتهدر في واحد الكلام يا لاطيف فمها بوبال هذاك راجلي وحدي وكون ماشي نتي تحككتي عليه فالجامعة ميشوف فيك ضحكت قتلها علاه حسبتي نفسي رخيسة كي نتي هو يقولك نموت على زينة ونتي لاصقة فيه قاتلي يموت على..... لكان مغريتيهش وكاش مادرتي معاه من قبل والله ثلاث متدخلي للدار جيت نردلها نسمع غير هشام عيط يا قحبة اليوم ن......كك على هذي الهدرة ولاح الصاشيات فالارض وطار ليها كركرها من شعرها مع هذوك الدروج وهيا تعيط تبعوها هوما دخلو وراهم وانا دخلت لداري وخبطت الباب الفرخة واش تقول عليا بصح والله منفوتهالها حسابها ممبعد كلشي فيا يرجف بغيت نهبط عندهم نكسرها تكسار ، دخل هشام لقاني مننشافش قالي زينة لا زينة لا جد ماليها شفت كذبتك وين وصلتنا وليت نتعاير بحاجة مفياش ازينة اهداي قبل بعد عليا منهداش حنا هكاك سمعنا الخبيط فالباب جرا فتح لقاها زهية اهشام اجري ما طاحت هوما هبطو جيت هابطة واش مدخلني الموت ان شاء الله على الهم لي لحقتني ليه.