زينة الهاشم 2

الجزء 12

زينة الهاشم 2 💝
الجزء 12
نضنا قضينا صلاتنا وانا درت العشا كي وجد تعشينا انا نغسل فالماعن حتى قالي زينة خاوتي جايين واش نجيبلك قتلو يجو يتعشاو صراحة كان راح الحال بصح قلت معليش قالي لالا حبي يسهرو برك قتلو مالا متجيب والو كاين كل خير قالي صح هزيتلو راسي قالي حبي نطلعهم هنا معليه قتلو هذي حتى تشاورني زربت جبدت مقروط من لفريجيدار وطيبت تاي رحت مسحت الصالون مسحة خفيفة الحق نظيف غير خفت قالي خلي نقعدو فالصالة خير قتلو لالا اقعدو فالصالون غسلت الفاكهة وجدتها ووجدتلهم طابلة بالطبع رحت لبست غوب طويلة ومستورة درت خماري سمعتهم عيطولو قتلو متهبطش قوللهم يطلعو وصح طلعو هوما دخلهم شوية ورحت ليهم سلام صافا ملاح والله لاباس بصح علاه عليك يا زينة علاه شقيتي روحك قتلهم لالا نورمال ومرحبا بيكم هوما تاني مساكن كل خير جابوه زدت حطيتلهم قالولي لالا متجيبي والو قتلهم اسمحولي وخرجت لبيتي شوية دخل هشام عندي حبي ارقدي علابالي عيانة وزاد دواك قتلو معليه إذا نعست راح نرقد بقيت نتفرج حتى رقدت فطنت غير كي دخل هشام معايا فالفراش قتلو واش راحو قالي هيه قتلو اسمحلي رقدت وخليت ضيافك قالي لالا حبي ياك درتي اللازم والله فرحو وقصرنا علامة وهاهم راحو علابالك راها قريب 3 واش يقدك تبقاي سهرانة كملنا رقادنا للصباح نضت لقيتهم مساكن مخملين الحالة غسلت لماعين ودرت قهوة شربت درت الغدا ورحت فرزت الحالة هشام كان مزال راقد حتى جات انفال قاتلي قاتلك ماما اذا تعرفي تقيسي لاطونسيو ارواحي قيسيها ليما قتلها ضوك نجي كنت راح نبدل جبتي منعرف كيفاه تكلحتلي قلت ياك مكان حتى واحد هبطت لابسة فوندغوب دوميمونش وتحت الركبة شوية وطامة شعري كعكة صبحت عليهم قاتلي زينب قيسي لاطنسيو لما زهيرة راحت تقرا قتلها معليه رحنا عندها صبحت عليها ووزنتلها بقات تسقسي فيا على هشام قتلها راه مليح مزال راقد كعاد البارح سهر مع لولاد قاتلي هيه معليش هدرة تجيب هدرة وحنا كلنا تما حتى هدى معانا صونا تليفونها هزتو وخرجت شوية سمعنا الهدرة مجيت نزرب نخرج تلاقيت فالباب مع باباها ويماها وخوها يا تبهديلتي ومامبا منيش ساترة روحي كون جات على الخمار برك معليش جبدت بجهة وهوما تسالمو ممبعد عجوزتي قاتلو هذي زينة مرت هشام علابالي معرفتهاش قاللها الله يبارك الله يبارك لحقت سلمتلو على راسو وجيت خارجة تكروازيت بهشام طرطق عينيه فيا خليتو وزربت طلعت لفوق علابالي اليوم والله ميفوتهالي سمعتو طالع مع الدروج والله يخبط في رجليه خبيط مع فتح الباب عيط زييينة ياي خلات عليا كلشي مني يرجف تخبيت فكوانة مابين الحيط والخزانة دخل وخبط الباب رببببك هابطة هكا وداخلة عليهم وشكون النقش هذا لي خيالك منحبش يشوفو شدني من شعري وبدا يدي فيا ويجيب شديتلو يدو هشام تعيش راسي متنساش راني مريضة لقيتو طلقني وبقى يتخنزر فيا من فوق لتحت ورجع خبط الباب وخرج طحت نبكي شوية نضت تغديت غير شوية باه نشرب الدوا وحطيت راسي رقدت حتى لعشية نضت غسلت هو مرجعش ،عيطت لصليحة حكيتلها قاتلي ونتي لاه جايحة كيفاه تهبطي هكاك علابالك عليهم المرض ويجوهم الضياف قتلها قلت منطولش يخي شوفي واش صار قاتلي وهذيك شافاتك تما ومش ساترة روحك ودخلت عليك خوها رخيسة دارتهالك بلعاني علاه مقلتيش لهشام قتلها مخلانيش مامبا نهدر قاتلي زينة عزيزتي اعذريه تصرفو صحيح صح نتي تاني مغلطتيش بصح الغيرة اقوى قتلها ايه كملت معاها الهدرة رحت ندير عشا ندير وقلبي ياكل كيفاه دارتهالي وقريب ديت طريحة من تحت راسها وانا مزال معنديش سمانة ملي رجعت طفيت على العشا وهبطت لقيتها فالكوزينة دير فالعشا ونطير ليها يا خامجة كيفاه دخلي علينا رجال بلا متهدري مفيبالكش الدار فيها نسا قاتلي ياك خالهم ولا عليك مكاش لي قالك عري روحك قتلها باباك خالهم وخوك كيفاه قاتلي نوغمال موالفين بيه اسمعي إذا ديتي طريحة مجيش تتبلايني نتي سباب روحك قتلها حاشاك الطرايح للكلبات لي كيفك.
بدات توغ وتعيط انا كلبة يا واحد القحبة ياواحد الرخيسة، انا كعاد لافوا نتاعي رقيقة قد مانعيط منتسمعش بزاف بصح هيا عاطيلها ربي واحد لافوا حق الله لاتحسب نتاع راجل دخلو عندنا يجرو حتى هشام هنا واش بيه ربكم فضحتوني وسط الجيران قتلو منيش انا هي دخلت عليا باباها وخوها وانا كنت نوزن ليما في لاطونسيو مامبا مقاتليش ديري طريق باه يدخلو عندها شاف ليها قاتلو تكذب انا وين علابالي بلي راها هنا تحت قاتلها زهية نتي لي كذابة ياك كنتي معانا فالصالون كي عيطولك رحتي فتحتي عليهم ودخلتيهم علينا وحتى زينب معانا معلابالكش بلي هذو نسا رجال مدخليش خوك عليهم يا يما ويطير ليها هشام بيد واحدة وجيفها طلعها للسما ولات تتخبط كي الجاجة بالسيف لافكيناها منو طاحت فالارض تندب حقار وقادر عليا غير انا جا راجع ليها قاتلها لعجوز شدي فمك واسكتي بدا هو يربرب هذي القحبة لي حصلتيها فيا كرهت من ربها وديما دايرتلي المشاكل كرهتلي معيشتي المهم عندو ما دار وطاير لهدى يحوس غير يضربها والعجوز تحاول تهديه رجعت قاتلي ادي راجلك وطلعو لداركم صحا بنتي شديتو على يدو هيا ضوك تمرض ولا كاش مايصرا فيك قالي الموت تديني ان شاء الله وجبد يدو مني وطلع طلعت حتى انا لفوق غسلت وحطيت العشا جا يتعشى بالتشناف غاضتني فوق ما رفد يدو عليا وزايد يشنف من فوق غسلت لماعن ودخلت للبيت لقيتو متكسل ويتفرج لبست بيجامة نتاع رقاد ورحت نمشط فشعري ونوحوح بلعاني انا صح وجعني بصح مش لهاذ الدرجة كنت زايدة فيها ياسر كي سمطت قالي واش بيه قسامك توحوحي هكا تقول راني ن......ك فيك وانا ناشف قتلو متحكيش معايا فوق ماقريب نحيتلي شعري قالي ياك شديتك بيدي اليسرى كون باليمنى نقول صح وجعتك قتلو اليمنى ولا اليسرى علاه معلابالكش راسي مخيط  من لول كان يحكي بالزعاف غير قتلو هكا نلقاه طار عندي احبي اسمحيلي والله نسيت قاع وريلي عمري وريتلو الخياطة لي في راسي بقى يبوس فيها ويعاود حبي سمحيلي وليت نبكي هذا لي قلتلي محال نهز يدي عليك قالي ان شاء الله تتكسر كيما ختها بصح حنونتي احسني عوني كيفاه هابطة هكاك وزاد شافوك الفروخة والله يا زينة كون مقلتيليش راني مريضة كون كاش مدرت فيك راهي الغيرة عماتني قتلو والله ثلاثا مشفتهم مامبا مدقدقوش الباب باه ندير حسابي ونطلع حتى لقيناهم دخلو علينا قالي خليها حسابها راه غير يزيد وجاي نهارها نقتلها وربي كبير تعنكشت فيه وحضنتو لاه تباصي على جالها وتخليني وحدي زعما مزلتي تحبيني قتلو علاه عندك شك قالي حاس كرهتي مني قتلو مالا علاه رجعت عندك قالي منعرف وقرب ليا كثر حط فمو على فمي غير بالشوية تجاوبت معاه هبط مع رقبتي جبدت روحي هيا نرقدو عييت ضحك قالي هرابة قتلو لالا جيست راك مريض متقدرش قالي اواه هذاك لباس عليه قتلو تعرفني نحبك كي تهزني مالا كي متقدرش مكالاه انا نحب كلشي ولا والو ضحك قالي تدللي 10ايام ونحي البلاتر ونفرجك قتلو والله منخليك تنحيه غير انسى بقينا هكا متناقرين حتى قالي حبي ارخفي رجلك على لتحت قتلو والله جيست كعاد يماك مريضة والضياف قلت نعاون قالي التاي بحنونك مريض اخطيك منهم راهم بسلامتهم 3 ويتعاونو قتلو داكور وصح من يومها مهبطتش حتى لنهار عرفة صمنا كامل وقتلو حابة ندير انا الفطور قضالي كل خير درت الفطور ولميت لماعن نغسل فيهم قالي حبي غير ندخل للخدمة السمانة الجاية نشري لحنونتي ماشينة ياسر عليك قتلو ان شاء الله ،منك بالصح تدخل السمانة الجاية ويدك قالي لازم ندخل مكاش كيفاه قتلو علاه استنى تبرى يدك قالي لالا مكاش كيفاه حبي علابالك منخبي عليك والو راني نصفر دراهمي قاع صرفتهم قتلو اسمحلي كثرت عليك حط صبعو على شواربي ردي بالك تعاوديها وانا شكون عندي بغيرك نصرف عليها استغفر الله حلوفة هنا قريب فطرتني انوض خير ،حتى للعشية هبطت الفطور لتحت فطرنا كامل في رحبة خليتهم مع ماعنهم وطلعت دوشت وخرجت نسشور في شعري ونبكي لقاني هشام هكاك قالي واش بيك قتلو والو قالي زينة بديتي توسوسيني ملي دوشي تخرجي تبكي واش بيك قتلو والو وكملت نشف في شعري ودايرة الحس بالسيشوار باه ميحكيش معايا.
كملت قتلو حابة نلبس الجبة لي جبتهالي فالعيد الصغير إذا مشافوهاش قالي حاجة لي نجيبها لعمري ميشوفوهاش كامل هوما تبسمت ورقدنا للصباح نضنا قالي نصلي وندي لكباش للباتوار نذبحهم منقدرش انا نذبح قتلو معليش هو راح وانا لبست ورفدت القاطو وهبطت لتحت تقهويت معاهم شوية عيطلي هشام جاي مع خاوتي فهمتو عليا باه ندير خماري سقمتو شوية جا مع سعيد ورياض غافرو للعجوز ولبنات انا غافرتلهم من بعيد قاتلو لعجوز كون ذبحت فالباتوار علاه حرمت على خاوتك لمتهم قاللها سعيد عمتي هذي قاع متعاوديهاش هذا خونا ولازم نوقفو معاه تعاونو ذبحو وحنا تعاونا هدى وزهية نقاو الدوارة وانا وزهيرة شوطنا الزليف كملنا رحنا نبدلو والعجوز ديجا كانت وجدت الكبدة والغدا للولاد كلاو ،طلعت انا غسلت ولبست جبتي بلو غوا لي جابهالي فالعيد الصغير بصابوها درت مكياج حطيت خمار على راسي وهبطت شافني سعيد ضحك مع هشام قالو واخيرا الحلم اصبح حقيقة وطرطقو بالضحك قاللهم رياض واش كاين فهموني قالو هشام ممبعد وناضو قالو نروحو نغافرو حنا تغدينا جيت طالعة عطاتني العجوز الدوارة قاتلي هادي حقك نتي وراجلك عوجت هدى فمها قاتلي مطيبيهاش اليوم نتعشاو كامل هنا صحا بنتي قتلها صحا جات تمدلي الزليف قتلها لالا منحبوش وهشام ياكل هنا كي طيبوه وطلعت رحت بدلت لبست جبة تاع دار ودرت عصبان الله الله حطيتو فالفريجيدار ونقيت كوزينتي رقدت وكي نضت عاودت عيطت لخواتاتي هدرت معاهم الصباح غافرتلهم برك وحكيت تاني مع بابا وخاوتي سيرتو زاكي يقتل بالضحك جبتها في داري معاودتش هبطت ما شفت لي جا يدبرو راسهم حتى كي جا هشام على المغرب هبطنا لتحت تعشينا قالنا غدوة فيها خرجة بداو لبنات فرحانين مزية مزية اف واخيرا قتلهم علاه قاتلي زهيرة من ساعتك معاودناش خرجنا قتلها علاه ياك كل عام تخرجو قاتلي لالا بطلناها قتلها علاه شفت لعجوز تخنزرت فيها بدلنا السوجي للصباح لبست ليكات وسروال وبيما وهبطت عاونتهم خملنا الدوزان ولعجوز تتخنزر فيا من تحت لتحت حتى قالي هشام زينة راهم جاو طلعت لبست حجابي وخماري كي شافوني بيهم كامل تخلعو سيرتو لعجوز تقاسمنا وحدين ركبو مع سعيد ووحدين مع فاتح ودرنا خرجتنا بالطبع نحيت على خاطري علامة وهشام وين نتحرك ورايا يجيبلي ناكل مهتم بيا ومش دايرلهم حساب كامل لاحظو هذا الشي وفرحانين غير هذيك المسمومة عاقدة شنايفها للفوق وغير شوية تقولو هيا نرجعو للدار كي سمطت عليه قاللها عيطي لخوك يجي يديك لداركم شمتها حامضة شدت بلاصة وسكتت وانا باقية نلعب ونتمهبل مع لولاد صغار ممبعد جيت بجهة انا ومريم قسرنا شوية ورجعنا للجماعة قاتلي نعرضك عندي ونحكو الاز قتلها ان شاء الله المهم جازت فالتوب مدخلناش حتى لليل غسلنا ورقدنا ديراكت ، الغدوة منو عرضتني مريم للعشا رحت عندها بقات غير تستسمح مني وتبكي قتلها يا طفلة هذا مكتوبي هكا نتي معندك حتى دخل وحتى صالح يا زينة ختي اسمحيلنا قتلو على تاع نسمحلكم ونتوما اكثر ثنين وقفتو معايا وقت الشدة المهم تصافينا تعشينا وسهرنا شوية وجينا للدار عيطتلي صليحة قاتلي غدوة جايين من جهة العيد ومن جهة نزورو هشام ويماه منين مرضو قتلها مرحبا بيكم قاتلي نجو غير مع العشوة عييت معاها قاتلي لالا والله نجيب محبش وحقا كريمة باغية تجي وخايفة هشام قتلها نوغمال هو ميقولش قاتلي منعرف وكوبينا قلت لهشام قالي مرحبا بيهم بقيت نلمحلو ونرطب فالجو كيما يقولو ممبعد قتلو واقيلا كريمة جاية قالي مرحبا بيها قتلو صح قالي اكيد زينة هذو اهلك بالسيف عليا نحتارمهم ونرحب بيهم على جالك كيما نتي دايرة وجه لاهلي على جالي وزيد قتلك هذي دارك لي تحبيه مرحبا بيه ولي متحبيهش نتي حاوزيه انا مندخلش خلاص عنقتو وبستو على فمو بوسة خفيفة وزربت دخلت فالفراش قالي اهربي جاي نهارك وتخلصي لقديم والجديد.