زينة الهاشم 2

الجزء 03

زينة الهاشم 2 💝
الجزء 03
مع دخلنا للدار جريت لبيتي وطرطقت بالبكا وليت نعيط لربي لخلقني دخلو يجرو عندي وصليحة تحاول تهديني ولات تقوللهم واش بيها زينة علاه راها هكا حكالها زكرياء كلشي قالتلهم الله لا تربحهم كامل كيما راهم بقاو معايا حتى هديت ممبعد بابا قال لخاوتي انا رايح للاوتال تجو معايا ولا تبقاو هنا عند خالكم قالو زاكي انا نبقى مع ختي قاتلهم صليحة مكاش لي يروح حتى( نتا عل بابا) دنيا مهيش هنا راحت مع سعاد لدارها قاللها لالا بزاف نروحو خير قالو نجيب والله متروح ودنيا ضوك نقوللها تبقى ثم عند سعاد خرجو هوما وانا بقيت وحدي في دوامة نخمم واش هو مصيري واش ندير ، يومين وجا سيدعلي  مع المغرب طل عليا كانت كريمة فالدار ممبعد راح قعد مع بابا ونجيب شوية ولاو يعيطو قال سيدعلي انجيب الطفلة تبقى هكا معلقة علابالك راه رفع عليكم قضية بلي راكم مانعينو من مرتو وراح يغلبكم قالو نجيب شوف يا سيدي مالا حتى أنا راني رفعت قضية خلع جديدة وبما انو زينة راها مليحة تقدر تشهد ويقدر يسمعلها القاضي وباين راح نتهناو منو حتى قالو بابا وزينة راها قابلة سقسيتها قالو نجيب هذاك لي بقالي غير نزيد نشاورها تقبل بالسيف عليها يكفيني اني سايرتها وزوجتهالو قالو بابا بصح القرار قرارها لازم تشاورها دخلت عندهم كريمة قاتلو وقيلا ناوي ترجعهالو بعد قاع واش دار فيها زينة خلاص مكتوبها مع هذاك الخامج مفقت بروحي كيفاه دخلت عندهم قتلها ونتوما شكون باه تقررو في بلاصتي قاتلي باغيتنا نخلوك على هواك ونرجعوك ليه باه  هذي المرة جينا فالصندوق قتلها من فمك لربي يا ريت ربي يهزني وتتهناو مني كيما راكم قاتلي نتي جايحة وبهلولة باينة راكي تشوفيه ولا تحكي معاه فالتليفون وراه ياكلك في راسك قتلها مشفتوش وما حبيتش نشوفو كرهتو وكرهتكم كامل غير ملقيت وين نروح عليها بقيت معاكم ومتحملتكم كنت نحكي ونبكي بالصوت قاتلي مليحة هذي كي خممنا على صلاحك كرهتينا عيطت عليها صليحة كريمة علاه متسكتيش علاه راكي تزيدي عليها مكيش شايفة حالتها قالتلها منسكتش وهذي ختي نخمم على مصلحتها قالتلها صليحة حتى انا زينة ختي وصلاحها حاليا في صحتها مهوش في صوالح تافهين هذو مسمعنا غير الكف كيفاه طرطق في وجه صليحة وعيط عليها نجيب كيفاه تهدري مع ختي لكبيرة هكا موليتيش تحشمي قاتلو بنبرة تاع بكا هذا وين عرفتني منحشمش معليش وخرجت قاتلي كريمة عجبك الحال هكا خربتي دارك وزدتي خربتي ديورنا جريت عند صليحة لقيتها تلبس في حوايجها عنقتها ونبكي باستني قاتلي زينة اسمحيلي رايحة نخليك ودات ولادها وراحت لدارهم دخلت لبيتي وغلقت بالمفتاح نشهق و نبكي للخالق خلاص حيلي نهد لقيت تليفون كريمة محطوط هزيتو وعيطت لهشام قالي الو قتلو حسبي الله ونعم الوكيل فيك واش درت فيا قالي زينة عمري راكي تهدري قتلو مانسمحلك لافي الدنيا لا في الاخرة على واش درت فيا بقى يقولي زينة اتهدني حبي والله كلشي ينحل قتلو واش لي ينحل دارنا لي خربتها ولا ديار خاوتي لي خربتهم ولا بنتي لي قتلتوهالي راح ترجعوها خلاص براكات عليا هديتوني حطمتوني ربي وكيلكم انا رايحة لبنتي وانت ان شاء الله متتهناش في هذي الدنيا كوبيت عليه كي كنت نهدر معاه كنت نشوف فالصاشي نتاع الدوا قدامي وسوسلي الشيطان رحت فتحتها وشربت وقيلا 4 بايط ولا 5 وتكورت على روحي شهدت وغمضت عينيا.
فطنت لقيت روحي فالسبيطار والكل داير بيا نجيب كريمة صليحة شادتلي يدي بابا وخاوتي تهسترت وطيرت السيروم وليت نعيط لربي لي خلقني اخرجو عليا علاه حتى الموت شاركتوني فيها الدم يشرشر وانا نتخبط بالسيف لا حكمني نجيب واسحاق خويا دخلت الطبيبة مع زاكي دارتلي لبرة بديت نتكالما بالشوية حتى رحت عاودت فطنت لقيت غير صليحة عند راسي ومعلقينلي السيروم فاليد الثانية مع شافتني نضت حضنتني عندها قاتلي واش حنونتي كيفاه راكي قتلها منيش مليحة خلاص قاتلي واش يوجع فيك عزيزتي اشرتلها على قلبي  قاتلي يا حنونتي اصبري الله غالب هذا القلب الطحان معندوش دوا  هزيتلها راسي قتلها كيفاه حتى جيتي قاتلي عيطلي هشام بعدما هدرتي معاه عيا يعاودلك مكانش عيط لسامط نتاع خوك (قصدها على نجيب) محبش يجاوب عيط عندي قالي وينها زينة واش بيها قتلو علاش خليتها لاباس وجيت لدارنا قالي يا صليحة يعيشك الحقيها راها هدرت معايا حالها ميعجبش وراها تهدر في هدرة كبيرة زربت رجعت للدار عييت نطبطب عليك كي مجاوبتيش ومفتحتيش كسر نجيب واسحاق الباب وجبناك هنا دارولك غسيل معدة قتلها لاه يا صليحة عليك وخليتوني رحت لبنتي وميماتي لاه خليتوني هنا نتعذب قاتلي حنونتي استغفري شي لي درتيه راه اثمو كبير حنا هكاك نهدرو دخل هشام يلهث جرا عندي حضني هبلتي نتي حتى تنتاحري لاه راكي تعذبي في روحك وتعذبي فيا معاك طبعتو عليا قتلو نتا الوحيد لي راك تعذب فيا روح الرحمة على والديك منيش حابة نشوفك نهدر ونبكي خرجاتو صليحة قاتلو هشام صحا خويا غير روح والله مراهي مليحة قاللها علاه انا راني مليح خرجو عند الباب شوية ودخلت صليحة لقاتني ناعسة قتلها شحال الساعة قاتلي 5 تاع الصباح غمضت عينيا رقدت حتى للصباح عاودو جاو عندي خاوتي بقيت ساكتة مهدرتش كامل معاهم شوية دخل هشام بدات تعيط عليه كريمة اخرج واش جابك مداهاش فيها لحق عندي صافا مليحة دخل نجيب غير شافو طار ليه شدو من التريكو ويسب فيه هشام ينحيلو في يدو برك مهدرش قاع معاه عيط عليهم بابا بنتي مريضة ونتوما متقاتلين خلاص راح ندي بنتي معايا والله منخليها هنا ونتوما كملو في هبالكم واحد يموت وواحد يباصي قالو هشام كيفاه تديها معاك زينة تخرج منا تروح معايا منا صايي سكت وصبرت فوق الحد قاتلو كريمة احلم انك تديها معاك يا واحد الرخيس قاللها كريمة إذا ساكت خاطر محتارمك بصح نتي راكي غير تتجاوزي في حدودك متخلينيش نغلط معاك عيط عليهم زاكي ايا تفضلو كلكم برا ختي رجعت من الموت ونتوما دايرين عليها مندبة قالو هشام انا رايح على خاطرها برك بصح عمي (على بابا) انسى الهدرة لي هدرتها قالو بابا خلاص ديجا سقمتلها كواغطها وراح ندي بنتي عيط هشام قالو مالا متلومونيش على واش راح ندير وخرج.
جبت يومين فالسبيطار وخرجت للدار جات معايا صليحة قتلها إذا حابة روحي لداركم مكيش ملزومة بيا قاتلي جامي نتي ختي وامانة عندي ومحال نخليك عنقتها ، لاحظتها تتجنب نجيب كيما يعيا يحاول يهدر معاها هي تروح وتخليه ولادها مجابتهمش من دارهم بقاو عند ختها بابا قالي سمانة ونروحو لفرنسا انا مرات نفرح كي راني رايحة مرات يتزير قلبي ونخاف ، واحد اليوم مجمعة مع زاكي حتى سمعنا الحس سكتنا سمعنا صليحة قالت لي كادو نتاوعك ميبدلو والو انا راني هنا على جال زينة بصح نهار تروح حتى انا نرجع لدارنا وليت نبكي قالي زاكي لاه تبكي (هو معظم هدرتو فرونسي انا راني نترجم على ضربة) قتلو مكفاش تخربت داري زدت خربت دار لخرين تبسم قالي متقلقيش روحك قاع مكان حتى دار راح تتخرب قتلو داري تخربت تبسم قالي إذا قادرة احكيلي كيفاه حتى تزوجتي كيفاه حتى عرفتيه حشمت هبطت راسي قالي باين بلي كنتو تحبو بعضكم من قبل هذا شي باين عليكم قتلو انا منحبوش قالي صح مالا علاه كي تشوفيه تبقاي مركزة معاه وتشوفي ليه من تحت لتحت ولا حسبتي منتبهتش عليكم وجهي ولا طمطومة بدا يسقسي فيا وانا نجاوب حتى رقدنا للصباح فطنت على العياط والدنيا مقلبة في دارنا نضت نجري واش كاين واش كاين قاتلي دنيا راجلك سنياك دهشت كيفاه هذي سنياني واش معناها قاتلي كريمة طلبك بالمحكمة قتلهم كيفاه طلبني بلمحكمة هذي مفهمتش قاتلي صليحة طلبك لبيت الطاعة بمعنى المرأة كي متحبش ترجع لراجلها يطلبها بالمحكمة ويرجعهالو القاضي معرفتش شعوري كيفاه هذاك الوقت الحاجة لي عارفتها اني خايفة بزاف كي وصلت الامور للمحكمة معناها راح تتعقد كثر ، كانو باقينلي يومين زعما ونروح لفرنسا بصح بابا قالي ضوكا منقدرش نخرج حتى تخلاص القضية وليت في دوامة غير ربي لي عالم بيها ، لحقت الجلسة الأولى راح غير بابا ونجيب وانا مخلاونيش نروح ، بصح القاضي رفض وطلب حضوري ضروري ومكانش لي ينوب عليا لحقت الجلسة الثانية رحت معاهم غير لحقت عند المحكمة كلشي مني يرجف دخلنا لقيناه قدامنا معاه محامي تقابض معاه نجيب حتى فكو بيناتهم الامن دخلنا للصالة مزية مكان حتى واحد غير انا وبابا ونجيب والمحامية وهشام مع المحامي نتاعو واكيد القاضي ومنعرف شكون لي معاه ، حط محامي هشام دوسيات لهذاك القاضي وقعد يشرحلو على مرضي وبلي راني محتاجة رعاية خاصة واكدلو بلي مانعينو من زيارتي ومن انو يصرف عليا ناض نجيب يعيط ياك نتا لي مرضتها ونتا سباب لي راها كامل فيه سكتو القاضي وكمل هذاك المحامي منبعد رجعت المحامية تهدر واكدت انو صحتي تدهورت كي تزوج عليا المهم كل واحد يهدر حتى على تالي قال المحامي انو اهلي ضاغطين عليا لدرجة اني حاولت الانتحار وهكا حول همي واذايا لصالحو انا من الاول مكنتش مليحة وزادو هوما فالدار عمروني عليه كون جا يحبك صح ميجرجرك فالمحاكم وزاد استعمل الانتحار ضدي ولى راسي يدور سمعت القاضي قاللهم كامل هدرتو إلا المعنية وشاف معايا واش تهدري نتي في هذيك الدقيقة طحت من فوق الكرسي ومزدت حسيت بوالو