زينة الهاشم 2

الجزء 08

زينة الهاشم 2 💝
الجزء 08
هذاك الراقي من 7 تاع لعشية وهو معايا يقرا ويعاود فالقرآن حتى لل 12 نتاع الليل باه بدى يرخف عليا الحال شوية كنت واعية نسمع فيهم واش يهدرو نشوف واش يديرو بصح مني قادرة نهدر لا نوض غير الرجفة حاكمتني ويديا ورجليا مربوطين بالسيف لا نقص عليا الحال شوية قاللهم الراقي نروح وغدوة نرجعلها ، وصح جاب سمانة وهو يجي عندي من المغرب للعشاء وهو معايا يقرا فالقرآن أهل الدار قاع لونهم مخطوف ومخوفهم حالي بصح صح وليت في حالة مهيش عادية وندير صوالح انورمال تاع وحدة مهبولة في هاذ الفترة عيط هشام لنجيب قالو نجي نديها قالو راها مريضة خليها تبرى ممبعد ساهل مأمنوش عيط عند صليحة أكدتلو بلي مريضة قاللها حاب نحكي معاها مقبلتش انا رجع قاللها صحا نجي نشوفها نضت نعيط والله وتجي نقتل روحي متجينيش مكاش لي يجي ليا محبيتش نشوفكم درت حالة بالسيف لاهديت وعيطو لهذاك الراقي جاني تاني بقى معايا شحال ، المهم جبت  سمانة كاملة باه بدى يتنحى عليا قاللهم الراقي عندها عين قوية واعراض سحر قديم بصح نظن مهيش المقصودة خاطر مأثرش فيها بزاف قالي داومي على الاذكار وعلى قراءة القرآن العين راها مأثرة فيك بزاف المهم وليت نوض ونخرج من بيتي وليت نحكي معاهم عادي نقعد ناكل معاهم زدنا تاني سمانة نشفى كنا نتعشاو حتى قالي نجيب مزالك في رايك ترجعي عندو قتلو زعما راح يقبل بيا بقاع هذو الامراض غير خليني انا ختك ونضت رحت للبيت قاتلي سعاد لاه حتى ميقبلش بيك هو من الاول شاريك ومنهار طحتي مريضة وهو معاك ومسمحش فيك قتلها هذاك زمان شوفيني ضوكا كيفاه دايرة الكلب خير مني قاتلي لالا والله مزال عينو فيك وغير كيما جا لجمال قالو عاوني نديها وقالو جمال والله راها مريضة بزاف محابا تشوف حتى واحد ورجع عيط عند صليحة قاللها نعيطلك بلاكام وريهالي بلا متفيق راني هابل عليها حطيت راسي على حجرها ونبكي دخلت صليحة واش بيها عروستنا تبكي شفت معاها وكملت نبكي قاتلي نوضي يا البكاية جاي هشام يديك شفت معاها مخلوعة قاتلي لاه تشوفي معايا هكا والله هدر معاه نجيب وقالو السبت ارواح ديها وليت نضحك ناضو عنقوني في زوج.
فرحتي معاطيتها لحد قاتلي سعاد هذي المرة مفيها لا يحب لا ميحبش الصبيغة وتقطاع الشعر امر أساسي قتلهم كيما تحبو الغدوة منو خرجت مع لبنات شرينا حوايج جدد ليا ورحت للحفافة شديت رونديفو لليل عيطت لهشام حكيت معاه سقسيتو إذا كرا دار ولا مزال قالي زينة كملت البنيان الفوق صراحة معجبنيش الحال كنت حابة يكريلي ونبعد عليهم كامل صارحتو قتلو كنت حابة نبعد قالي زينة درتلك دخلتك وحدك وتاني الدار راح تكون ليك إذا حبيتي ما متدخلش متحليش الباب يعني لي حبيتي دخليه صحا ولي محبيتيش الله يسهل قتلو خايفة نرجعو فالمشاكل قالي تهناي بربي منلحقو ليهم قتلو صحا والقش لي كان فالدار هذيك جبتو ولا كيفاه قالي كاين لي جبتو وكاين لي لالا قتلو علاه قالي كيما الكتروميناجي لي كان عندنا قديم شريتو نتاع زربة برك هذاك الوقت بصح ضوكا خصني نجيب واحد جديد نتاع دوم قتلو ان شاء الله تفكرت قتلو معليش الكويزينيار جيبها لي لفور نتاعها فونتيلي قالي اوكي غدوة نشوف قتلو صحا حتى أنا اليوم خرجت شريت شوية قش قالي علاه وقشك لي هنا قتلو ميجونيش كامل كبار عليا قالي صحا معليش غدوة نفارسيلك كاش ما تزيدي تشري قتلو لالا غير مكالاه قالي علاه قتلو عندي ديجا صليحة كانت مخبية الدراهم لي كنت تعطيهملها بالتخبية وزيد شهيناز راها جابتلي تليفون لي عطيتهولها قالي بصح زينة انا قتلها اديه كي محبيتيش تحكميه نتي قتلو علابالي هيا محبتش تديه كانت مخبياتو قاتلي كون نديه يديرلي مشاكل مع دارنا منين جبتيه قالي معليش انا من هذا الكل يفيدني أنك راكي مليحة ياك مكيش مريضة قتلو علابالك بلي مرضي مزمن وراح يبقى معايا قالي لالا حبي قصدي مكيش موجوعة ولا كاش حاجة مذابيا تشوفي طبيبتك وحتى انا راني شفتلك طبيبة هنا تبداي تسويفي عندها قتلو اوكي زدنا حكينا شوية وكوبيت جات صليحة وسعاد وشهيناز تاني كانت عندنا بقاو يحكو معايا ويفهمو فيا كيفاه نتعامل معاهم صليحة قاتلي متعانديش العجوز وضرتك ومهما يوصل بيك الزعاف ردي بالك تغلطي فالهدرة سيرتو قدامو لانك نتي متربية عليها (خاطر كنت قتلها بلي هدرتها قاع تطياح وسب) وتاني حاجة كي يكون مدابز معاهم ديما احتويه تهلاي فيه هكا يولي ديما يهرب منهم عندك وكي تدابزي معاه ردي بالك يسمعو حسكم ولا تخليه يخرج من عندك زعفان قادر هيا تستعمل هذي الحاجة ضدك، زادت قاتلي سعاد علابالي فيك نظيفة وأنيقة بلا منوصيك بصح ضوكا زيدي على لي كنتي قاتلي شهيناز هدرة لقيتها صح خرجت عليا قاتلي زينة تعاملي معاها أنها هيا الزوجة الاولى ونتي الثانية و حرحريها والله تموت غير بالقنطة سيرتو انو معاك معاك حتى رجعك ،بقينا نحكو شحال وهوما غير يوصو ويعاودو قالولي شدي دارك وجبدي عليهم نساي عليك الدصارة هذيك وووو شحال من حاجة وصاوني عليها.
للصباح زدنا خرجنا شرينا صوالح يخصوني وزادو شراولي ذهب بالدراهم لي كان بابا يبعثهملي هو صح هشام قالي كي جينا نعقدو قوليلو ميزيدش يبعثلك بصح بابا محبش قالي نتي بنتي قبلو وانا مسؤول عليك وكان مزال يبعثلي بصح مقلتش لهشام عليهم اطلاقا شراولي سارفيس اتابل من مجاميعو حاجة شابة نتاع دوم وشراولي تاني صوالح عمليين نحتاجهم للدار باه منتعبش ومنعياش لليل عيطلي هشام لقاني متقابضة مع لبنات قالي غير الخير واش كاين قتلو حابيني نخرج بالقفطان وانا محاباش قالي ونتي علاه مكريتيش غوب بلونش عيطت قتلو واشنو غوب بلونش هبلت نتا سمعوني بقاو يضحكو عليا رجع قالي هاه واش فيها وديجا علابالك بلي راني دايرلك عشا اني هدرت مع نجيب وقتلو يجي ويجيب لبنات معاه قتلو راك تتمسخر قالي علاه حتى نتمسخر قتلو والو نخرج بالملاية قالي علاه قتلو نديرونجا فالطريق قالي خلاص كيما تحبي العمر وكي نجو هنا نطلع حبي تريح وتلبس براحتها ممبعد اهبطي لتحت قتلو شكون عارض قالي غير عمومي وولادهم وعماتي قتلو صحا مليح ومتقوليش داير غنا قالي علاه قتلو مش حابة قالي ميكون غير خاطرك زيدي واش تحبي قتلو هذا مكان قالي كاش حاجة قوليلي قتلو أكيد وكوبيت قلت لبنات واش تفاهمنا قالولي دبري راسك نهار الجمعة بكرت للحفافة قصتلي شعري وصبغتلي ممبعد دخلت للحمام دوشت بالبيان ودرت ابيلاسيون ، المهم نهار هذاك تهليت في روحي مليح كي جيت لقيتهم خملولي كامل صوالحي بالحاشية والورد قتلهم من نيتكم قاتلي سعاد حاجة باينة و الله والله يا زينة لا في خاطري تدخلي عليهم بلاغوب بلونش باه تقهريهم وتقتليهم على ضربة بقيت نضحك قتلها إذا على العجوز بالاك بصح لخرى محال تكون ثما باينة راحت لدارهم المهم سهرنا دارولي الحنة صليحة وسعاد وشهيناز رايحين معايا كريمة محبتش قاتلي علابالي بروحي شينة ونشعلها مدابزة معاهم مالا غير مكالاه نفسد عليكم.للصباح بكرنا كل وحدة واش دارت ممبعد دوشت وكوافاتلي سعاد شعري ولميتو جاو هوما مع الظهر غير الرجال هشام وعمومو زوج ورياض وجابو الامام عاود فتحلنا خرجو كامل بقى غير هشام عيطلي نجيب دخلت عندو بقى فاتح فمو كي لقاني بالحجاب الشرعي والاسدال باسني على جبيني قالو نجيب هذي المرة فاتت مرة خلاف نخسر عليك رصاصة ديراكت قتلو تهنى هذي المرة انا نقتلو تبسم هشام معايا خرجنا لقيت ولاد الحومة كامل برا يشوفو معانا ركبني هشام معاه وحدنا عمومو مع رياض لبنات مع جمال ونجيب راح مع سيدعلي، طريق كاملة وهشام يتغزل بيا ما شاء الله ربي يبقي عليك الستر والله زادك نور على نور.