هلو حبايبي
***
تلك الايام التي كنت لا استطيع تحملها لقد تخطيتها
***
_ حور كومتني باجي رحمة بعد ماشاركتني حزني
حتئ لو شكليا يكفي نزلت دموعها علئ حزني
لان هيه متعرف هذول الناس شنو من بشر
بس حزنت علئ حزني وهاذا كافي بالنسبة الي
لحتئ تاخذ مكانه بقلبي مشاركتها اليه و وكفتها وياي
بهيج يوم اسود ماانساه الها ابد هيه وابنها
مشتبه الي جان واكف ومدنك راسه
رحمة ،، اوف يايمه اويلي عليج منو يتحمل هل
بلاء الله يقوي كلبج يمه بنيتي ويلهمج بالصبر والسلوان لحق سيد الاحرار
_ حور محجيت شيئ ماعندي لا صوت ولا حيل
صرت امشي وياها مثل دميه صعدنا بسيارة
باجي رحمة كعدت يمي ليوره ماكعدت بصدر
عمودي نص المقبرة السيارة تمشي اول مرة
اشوف المقبرة ضليت اباوع برعب عبالك ماكو بشر
حي كل العالم هنا من كبر حجم مقبره وادي السلام
مالك محط رجل مزدحمة بشكل مخيف
صرت اقرأ اسماء المتوفين اكو منهم معليكن
صورهم اوي كلبي شلون شباب صرت ابجي
من تذكرت عامر وايلا بعدهم بعمر الورد شلون
طميتهم تحت التراب شلون اخ كلبي صرت احس
بنغزات بكلبي ودموعي صارت عبالك ينبوع
طلعت من عالمي علئ صوت باجي تحجي ويه ابنها
رحمة ،، يمه مشتبه خلينا نزور ونرتاح خطيه هل مسكينه كون الامام يريح كلبها خلي تذب حملها هنا
_ ماحجه شيئ صفو سيارة بالكراج نزل هوة كدامنا
ونزلت اني وباجي كنت متربنه وشالي مبهذل
وعباتي تشحط ضايعه بيها عاوجه ركبتي وامشي
ويه باجي لازمه ايدي وتسحب بيه
وصلنا لحد تفتيش فتشتنا بعدها طبينا غسلنا
وباجي نفضت عباتي دخلنا للامام اول مرة ازور
بس شنو ازدحام مكدرنا نوصل للشباك
من الباب سلمنا و بسرعه طلعنا كعدنا بصحن ننتظر
اني مددت باجي كلبت عليه زوليه لان عيب
ناس رايحة راده وخلت راسي بحضنها وغطت
وجهي بعباتها واسمعها تقرأ علئ راسي سور من القران الكريم احس كلبي ارتاح هدئة وانفاسي استقرت
جان الوقت قريب المغرب سمعت موبايلها يدك
ردت عليه
رحمة ،، هلا يمة احنه كاعدين بصحن اي من هاي تعال علئ ايدك اليمين
_ سدت الموبايل ورجعت تقرأ علئ راسي
دقائق وسمعت صوت مشتبه
مشتبه ،، زيارة مقبوله حجيه
رحمة ،، يتقبل الله اعمالك وليدي تعال اكعد
خلي ترتاح شويه هل مسكينه
