ချိပ်ပိတ်ထားသောရာဇပုလ္လင်

အပိုင်း ၁

Throne Of Seal
(ချိပ်ပိတ်ထားသောရာဇပုလ္လင်)

မူရင်း - Tang Jia San Shao
ဘာသာပြန် - Xiao Leo

အပိုင်း (၁) : သူရဲကောင်းစာမေးပွဲ

အိုဒင်မြို့...

ဟောက်ယွဲ့မြို့တော်၏ တောင်ဘက်စွန်းစွန်း၌ရှိသော လက်အောက်ခံမြို့တစ်မြို့ ဖြစ်ပြီး အိမ်ခြေသုံးထောင်ခန့်ရှိသော မြို့ကြီးများထဲမှတစ်ခုဖြစ်သည်။

မနက်မိုးသောက်ချိန် မြင့်တက်လာသော နေမင်းကြီးနှင့်အတူ၊ ကမ္ဘာမြေသို့ ဖြာကျလာသောအလင်းရောင်နှင့်အတူနွေးထွေးမှုဟာ မနက်အိပ်ယာနိုးထရန်အချက်ပြမှုပင်ဖြစ်သည်..ထိုအချိန်တွင် အိုဒင်မြို့အလယ်၌ စတုရန်းမီတာ တစ်ထောင်ကျော်ရှိပြီး အတော်အသင့်ကြီးမားသော နှစ်ထပ်ဆောင်ကြီးထဲတွင် စမ်းသပ်အကဲဖြတ်မှုတစ်ခု ပြုလုပ်နေခဲ့သည်။

ယနေ့တွင် အယောက်သုံးဆယ်ထက်ပိုသော ကလေးငယ်များသည်
အခြေခံသူရဲကောင်းတစ်ယောက်ဖြစ်ရန်အတွက် အကဲဖြတ်စစ်ဆေးမှုသို့တက်ရောက်အရွှေးချယ်ခံနေကြသည်။ သူရဲကောင်းစစ်သည်တစ်ယောက်ဖြစ်မှသာလျှင် သူတို့သည် ကျင့်ကြံခြင်းနှင့်သက်ဆိုင်သည့်အကြောင်းအရာများကိုသင်ယူလေ့လာနိုင်မည် မဟုတ်လော ။

"မင်းတို့ဘာဖြစ်လို့ သူရဲကောင်းစစ်သည်ဖြစ်ချင်တာလဲ ငါ့ကိုပြောစမ်း"

ဩဇာအပြည့်နှင့်  အစွမ်းထက်သော အသံသည် ကျယ်လောင်စွာမြည်ဟိန်းလျက်  ထွက်ပေါ်လာသည်။

    "လူသားမျိုးနွယ်ကိုကာကွယ်ရန်၊ ကြင်နာမှုကိုထိန်းသိမ်းရန်၊ ကျောင်းတော်ကိုကာကွယ်ရန်၊ ကျွန်ုပ်တို့ရဲ့ မိသားစု‌၊ဆွေမျိုးများကို ကာကွယ်ရန်"

ထိုကဲ့သို့ဖြေဆိုသံများသည် ရဲဝံ့စွာ ထွက်ပေါ်လာခဲ့
သည် ။ ထိုအရာကို ကြည့်ခြင်းအားဖြင့် ထိုကလေးများ၏ ဖြေဆိုမှုများသည် ပထမဆုံးအကြိမ် ဖြေဆိုခြင်းမဟုတ်သည်မှာ သိသာထင်ရှားလှသည်။

ဤနှစ်ထပ်ဆောင်ကြီးမှာ အိုဒင်မြို့၏ အဓိကခန်းမတစ်ခုဖြစ်ပြီး သူရဲကောင်းစစ်သည်ဖြစ်လာနိုင်မည့် ကလေးငယ်များကို ရွေးချယ်၍ လေ့ကျင့်သင်ကြားပေးနေသော သူရဲကောင်းကျောင်းတော်တစ်ခုလည်း ဖြစ်ပေသည်။