BALETE CHRONICLES: Unang Aklat

TALAAN NG MGA SALITA

AGIMAT makapangyarihang bagay mula sa kaibuturan ng isang anito o maligno

AMIHAN anito ng hangin na nag-aanyong ibon

ANGGITAY isang uri ng malignong sa kabayo ang katawan at sa tao naman ang beywang pataas, kahawig ng centaurs; mahilig sa mga alahas at makikinang na bagay

ANITO mga nilalang na nalikha upang gabayan ang mga tao sa kanilang pangaraw-araw na gawain at bantayan ang likas na yaman ng sankalibutan

APOLAKI anito ng digmaan at nangangalaga sa haring-araw

ASWANG uri ng mga malignong kumakain ng laman ng tao at nag-aanyong itim na hayop

BAGWIS kakayahang kumilos nang mabilis

BAHAY-KUBO tradisyunal na tirahan ng mga Pilipino na gawa sa kawayan, pawid at iba pang local na materyales

BALATIK lupon ng mga bituing ipinangalan sa isang uri ng bitag ng mga mangangaso; mas kilala sa tawag na Orion's belt

BALETE malaking punong puno ng kahiwagaan at nagsisilbing lagusan papunta sa mundo ng mga anito at maligno

BATANGAN pinagmulan ng ngalan ng lalawigan ng Batangas

BATHALA ang Maykapal at pinakamataas na punong anito

BAYBAYIN sinaunang pamamaraan ng pagsulat ng mga Pilipino

BINHI bagay mula sa kaibuturan ng isang nilalang (hal. itim na itlog/sisiw mula sa aswang)

BULAWANG TANSO metal na gawa sa piraso ng natunaw na katawan ng sinaunang anitong pinagmulan ng buwan

DATU pinunong namamahala sa isang barangay

DAYANG MAKILING orihinal na diwatang bantay ng Bundok Makiling, kabiyak ni Gat Panahon at ina-inahan ni Maria/Diyan Masalanta

DIYAN MASALANTA anito ng pag-ibig, panganganak, kapayapaan at mga nag-iibigan

DIWATA mga bantay ng kalikasan; ADA sa Espanyol

DUWENDE maliliit na malignong gadangal lamang ang taas at may kapangyarihang magpamaga ng parte ng katawan ng tao; iba-iba ang kanilang kulay ayon sa kanilang kapangyarihan at silbi

ENGKANTADA mga bantay na elementong nakapagpapalit-anyo upang maging halos perpekto ang itsura

ENGKANTO lalaking engkantada

GAT PANAHON kabiyak ni Dayang Makiling at ama-amahan ni Maria/Diyan Masalanta

GINTONG LUYA bagay na may mataas na halaga na nabanggit sa alamat ni Maria Makiling

HABAGAT anito ng hangin na nag-aanyong ibon

HAIK anito ng mapayapang tubig at tagapag-ingat sa mga manlalakbay-dagat

HINLOG tawag sa mga inapo o salinlahi ng mga anito

KABALYERO hukbo ng mga bantay na tikbalang; Caballeros sa Espanyol

KAMPILAN uri ng sandata o espada

KAPEROSA mga galang elemento o kaluluwa ng mga namayapa na; WHITE LADY sa ibang katawagan

KAPRE higanteng maligno na mabalahibo, may subong tabako at naninirahan sa matataas na puno

KATALONAN mga taong nabigyan ng kapangyarihang makipag-usap sa mga anito; Babaylan sa Kabisayaan

KLAB MAHARLIKA samahan ng mga Maginoong nagsasanay na maging Maharlika at may kapitulo sa iba't ibang lugar

KUMAKATOK tatlong nilalang ng dilim na nakasuot ng kaputsa at may bitbit na kandila o gasera; tagasunod ng mga bagong panaw na kaluluwa

LAKAN magalang na katawagan sa mga kalalakihang may katungkulan o kaya'y mula sa angkan ng datu

LAKAN BAKOD anito ng ani, bunga at hangganan; Lacan Bacod/Lakambakod sa ibang ngalan

LAMANG-LUPA uri ng mga malilit na malignong nakatira sa ibabaw o ilalim ng lupa

MAGINOO mga taong may dugong-bughaw mula sa angkan ng mga anito; Hidalgo sa Espanyol

MAHARLIKA mga Maginoong sinanay upang makipaglaban at magsagawa sa tungkuling iniwan ni Bathala

MALIGNO mga nilalang na 'di maipaliwanag ng karaniwang tao

MAMAY lolo sa salitang Batangan/Batangueño (INAY naman sa lola)

MANANANGGAL isang uri ng aswang na may pakpak na tulad ng sa paniki at nahahati ang katawan sa beywang

MAPULON anito ng panahon, klima, kalusugan, pagpapagaling at mga halamang-gamot

MARIA MAKILING ang kasalukuyang bantay ng Bundok Makiling; ipinangalan kay DIYAN MASALANTA noong panahon ng Kastila

MAYARI anito ng himagsikan at nangangalaga sa buwan

PILONCITOS sinaunang salapi ng mga Pilipino na gawa sa ginto

PUGOT elementong nag-aanyong taong napugutan ng ulo

PUNSO bunton ng lupa na tirahan ng mga duwende at nuno

SANTELMO mapaglarong nilalang na naga-anyong-apoy at mahilig manligaw ng mga tao

SARANGAY malignong mukhang taong-toro at may suot na hiyas sa tainga

SINUKUAN anito ng Bundok Arayat sa Pampanga

SUGANG PILAK metal na gawa sa nawasak na katawan ng sinaunang anitong pinagmulan ng mga bituin

SUPREMO pinuno ng kabalyero ng mga tikbalang

TALA mataas na anito ng bituin, lupon ng mga bituin (konstelasyon), at direksyon

TIKBALANG isang uri ng maligno na itsurang kabayo ang ulo at paa at sa tao naman ang katawan hanggang binti

TIKTIK isang uri ng aswang na may mahabang dilang ginagamit niyang panguha ng mga bata sa sinapupunan ng mga buntis

TIMAWA tawag sa mga karaniwan o malalayang tao

TIYANAK isang uri ng aswang na nag-aanyong bata o bagong silang na sanggol

TORONG tatlong bituing naghuhudyta ng palapit na bagyo

UMALOHOKAN opisyal na tagpaghatid ng balita o mensahe ng mga anito o kaya ng isang barangay

UWINAN SANA anito ng kabugatan at kasukalan sa lupa; namamahala sa mga lamang-lupa