احببتُها وانا جاهل بدروب المُحبين

البارت - 12

صقر بضحك : افاا هتاني تتوقعها مني
عبد العزيز : نسيت ان اخوك دكتور
هتان : اضمن اني بعيش؟
عبد العزيز : افاا عليك اكيد دام دكتورك عزوز لا تخاف
سامي : يا خوفي يكون موته على يدك
هتان بضحك : اي والله
الساعه : 12 بالليل
" انتهى اليوم وانتهت السهره والكل رجع لبيته الا عايله ابو صقر الي بقت فيه بيت الجد ويرجعون لبيتهم بكره "
كملوا صقر وحمد سهرتهم مع خواتهم اما عن الجد والجده وام حمد وابو صقر راحو ينامون وبقو العيال في غرفه البنات يلعبون ويسولفون
صقر : يلا نلعب والي يخسر يجيب لنا اكل
نجد : تم قدام
صقر : انا ونجد وريناد بفريق واحد وحمد وعهود ورند بفريق واحد تم؟
رند : تمم وتعقبون تفوزون
ريناد : اقول اهجدي لا تهايطين بالاخير خسرانين
صقر : يلا خلاص ابدو اللعب
حمد : عهود ركزي تكفين لا يفوزون
عهود : حممدد اسكت شوي خلني اركز
حمد : راح الوقت وانتِ تركزين بسرعه قبل لا جدي يجي
نجد : خلاص يلا دور ريناد الحين
ما امداها ريناد تحط الورقه الا والجد يضرب بالعصاه على الباب وهو يقول : بترقدون ولا ماهو حاصل لكم طيب محد مزعجنا الا اصواتكم خلو العيال يرقدون وراهم اشغال واجد
فز صقر وحمد تحت السرير عشان لا يشوفهم جدهم وقاموا البنات كل وحده على سريرها تمثل انها نايمه
حمد بصوت خافت : حسيبكم ربي انا غلطت ان سمعت كلام صقر وجيت معكم
صقر وهو ميت ضحك : جدي يحسب اننا بالغرفه نايمين
حمد بضحك : الورطه لا يروح الغرفه وما يشوفنا قسم لا يكسر العصاه على ظهرنا
عهود بضحك : لا خلاص شكله رجع نام
صقر وهو يرمي المخده على حمد : قوم قوم جيبو اكل من المطبخ بسرعهه
ريناد بضحك : ايي ترا جوعانه اناا يلاا
حمد : انتِ شغلتس بالبيت بس تبلعين ما تشبعين انتِ
عهود : مالي شغل انا بنام
ريناد : لا حبيبتي وش الي مالي شغل تراتس مع حمد وخسرانين بعد
صقر : حمد انت وعهود ورند بسرعه على المطبخ جيبو لنا اكل
حمد : تستهبل انت ما تشوف جدي شوي ويكسر الباب عاد شلون لو درا اننا مو نايمين
صقر : ماهو شغلي انتو الي قلتو بتلعبون
قامو حمد وعهود ورند غصب عنهم يجيبون اكل وهم يتسحبون وراحوا للمطبخ وجابوا الاكل ورجعو للغرفه بسرعه
نجد بضحك : شاطرين
حمد بطرف عين : كلي وانتِ ساكته
رن جوال صقر وجلس يناظر بالرقم وهو منصدم
نجد : شفيك صقر رد
صقر الي للحين يناظر بالرقم : هذي امي !!
البنات : امك !!
حمد : اصصص اقصروا حسكمم وجعع
نجد : طيب رد يمكن تبيك بشي
صقر كان متردد وخايف من دق امه بهالوقت المتاخر له وحاس ان فيها شي او صاير لها شي لان مستحيل تدق عليها رد صقر عليها وهو يقول : هلا
مقبل ( زوج ام صقر ): انت صقر ؟
صقر : اي صقر من انت
مقبل : انا مقبل زوج فاطمه امك
صقر بصدمه : زوج اميي !!
مقبل : اي زوج امك وانا داق عليك اقولك امك بالمستشفى تعبانه ولازم تشوفها
صقر بصدمه : وشش تقوول انتتت اميي وش فيهاا
مقبل : امك طلبت تشوفك تعال شوفها يا صقر اسم المستشفى ******* الحين لاتجي مو مسموحه الزياه بكره تعال بعد العصر
قفل صقر بدون ما يقوله شي وحاس ان الدنيا تدور فيه ولا هو مستوعب من الي قاله مقبل
ريناد : شفيك صقر من الي داق عليك
صقر : زوج امي ويقول ان امي بالمستشفى وطلبت تشوفني
نجد بخوف : وش فيها
صقر : ما قال لي بس الي عرفته ان امي تعبانه
نجد وهي تبي تخفف التوتر على صقر : خلاص روحوا ناموا وان شاء الله مافيه الا كل خير
قام حمد وصقر ورجعوا لغرفتهم وغفى حمد علطول ونام الا صقر الي عجز ينام وتفكيره مع امه و ايش فيها جلس يستغفر ربه ويدعي ان امه ما يكون فيها شي لحق حمد بالنوم
-
اليوم الثاني الساعه ٧ الصبح
في بيت ابو فهد " غرفه فهد "
صحي فهد ولم اغراضه كلها عشان ينطلق لشرقيه جلس بغرفته شوي يناظر فيها وهو ماوده يسافر ولا يترك العيال رغم انها اسبوعين بس كان يشوفها شهور طلع الغرفه يفطر مع اهله وشاف امه وابوه بالسفره منتظرينه جلس بينهم وهو يقول : صبحكم الله بالخير
ابو فهد : صبحك الله بالخير
ام فهد : افطر لا تروح وانت ما افطرت
فهد : ان شاء الله
ابو فهد : متى بتمشي
فهد : الساعه ٨ ونص
ام فهد : استودعتك الله وانتبه لطريق
فهد : ان شاء الله ، وين حسين والبنات
ام فهد : لطيفه بغرفتها وليالي وحسين نايمين
ابو فهد : انشدي على لطيفه تجي تفطر معنا
جت لطيفه وجلست معهم تفطر وهي تقول : فهد خلاص بتمشي ؟
فهد : اي
لطيفه بزعل : اهخ بشتاق لك الحين مين اجلس اناقره
فهد بضحك : هذا الي هامتس عندتس ليالي وحسين ناقريهم وتهاوشي معهم
لطيفه : حسين وليالي نفسيات محد يمزح معهم انت غييير
ابو فهد : ها لطيفه وش ذا الكلام هذول اخوانتس
لطيفه : والله يبه هذا الصدق
ابو فهد : وين الشاي
قامت لطيفه للمطبخ تجيب الشاي وتصب لابوها : تفضل
ابو فهد : زاد فضلتس
كملوا فطورهم و سواليف الي كانت عباره عن سفره فهد
-
في بيت الجد
صحي الجد وشاف ان صقر و حمد للحين ما صحو اخذ عصاته وهو يضرب بالباب ويقول : قوموا قامت قيامتك انت وياه هذي سهرتكم اخر الليل
فز حمد من السرير وهو مو متعود ان احد يصحيه بهالطريقه نقز لصقر وهو مخروش من ضرب الباب وصراخ جده الي ما يدري وش سبب ضربه للباب : صققرر قوومم صقررر
صقر بنعاس : ها وش فيك
حمد : قومم جدي يضرب بالباب ويصارخ
صقر : قوم افتح البابب بسرعهه
فز حمد وفتح الباب لجده و اول ما فتح ما حس الا بضربه على كتفه من جده بالعصاه حط يده على كتفه بالم
الجد بعصبيه : متى ناوين تصحى انت وياه ها قوموا يلا صلوا وشيكو على الحلال
حمد بالم : ابشر الحين جاين
رجع حمد عند صقر وهو يتالم والي للحين حاط يده على كفته يتالم من الضربه
شافه صقر ومات ضحك على شكله : يحليلك يا حمد هذا ما تطعمها الا من جدي
حمد : لاول مره بحياتي اشوف احد يصحي كذا ولا ما يصحي الا بالصراخ والضرب
صقر بضحك : اذا بتقعد هنا لازم تتعود
حمد : اخر مره انام عند جدي احس كتفي انكسر من الضربه كتفي ما عاد احس فيه
صقر بضحك : عبالك انت عند ابوي وعمتي ليلى
حمد : قوم تكفى لا يجي يكمل عليك انت بعد
قاموا حمد وصقر وبدل حمد ملابسه بسرعه وراح متجهه للمسجد يصلي شافه هتان على طريقه وهو يقول له : صباح الخير حمد
حمد : صباح النور
هتان : وراك قالب وجهك
حمد : شلون تبيني اروق وانا قايم على ضرب وصراخ جدي من صباح الله
هتان بضحك : تستاهل والله صقر الي متعود على الضرب والصراخ اما انت دلوع محد دلعك الا عمي محمد
حمد : هتان انقلع من وجهي احسن لك
هتان بضحك : روح روح الحق الصلاه وشيك على الحلال الله يكون بعونكم يعيال الديره
حمد ونفسيته ضاربه : تعاال يكلب اعلمك من عيال الديره
هرب هتان من حمد وهو يضحك عليه
كمل حمد وهو رايح للمسجد يصلي ولحقه صقر صلوا وكملوا صلاتهم ورجعو لبيت الجد يفطرون
الجد : وين الفطور يا مره
الجده : الله يهديك اصبر وانا يلا رجولي تشيلني وما عندي احد يساعدني
الجد : مرت ولدتس وينها ما تساعدتس ولا تحسب انها ببيت رجلها خلها تقوم يلا طلع الصبح وهي راقده
سكتت الجده وكملت تحضر الفطور بقله حيله ولا هي قادره على التعب وما كانت تبي تغصب احد يساعدها رغم انها تتعب وتعورها رجولها الا انها ما طلبت من احد مساعده
رجعو حمد وصقر من المسجد وجلسوا على السفره
صقر : صبحك الله بالخير ياجد
الجد : صباح النور افطروا وشيكو على النياق والحلال كله وانت يا حمد ساعد صقر وخل صقر يعلمك الشغل
حمد : ان شاء الله
صقر : ابشر
قام صقر للمطبخ يساعد جدته بالفطور وشاف جدته تحضر الفطور
صقر وهو يبوس راسها : صباح الخير يا ميمتي
الجده : صبحك الله بالنور ياعين امك
صقر : وين البنات ما يساعدونتس
الجده : نايمين وتعودت ياوليدي اساعد نفسي بنفسي واذا ابي مساعده بقولك
صقر : وش ذا الكلام يا يمه الله يهديتس دام بيجلسون عندنا لازم كل صبح يصحون ويحضرون الفطور معاتس
طلع صقر من المطبخ وراح غرفه البنات وهو يقول : ياا نجدد رينادد
قامت نجد وفتحت الباب لصقر وهي تقول : هلا
صقر : قوموا ساعدو جدتي بالفطور
نجد : ابشر
رجع صقر وجلس مع حمد والجد بالحوش والي كانوا ينتظرون الفطور
الجد : وين الشاي يا مره
نجد : سمّ يا جد
الجد : صبي صبي
نجد : ابشر
الجد بحده : وينه ابوتس
نجد : هذا هو جاء
جت ام حمد وابو صقر وجلسوا على الفطور مع الباقي
الجد بحده لـ ابو صقر : وراك توك تصحى الناس تصحى من الفجر تصلي تفطر تشوف اشغالها الا انت ناوي تصحى بعز القايله ان شاء الله !!
ابو صقر : الله يهديك يا يبه تو الساعه ٨ باقي بدري وما تعودنا نصحى بدري
الجد : الي بيجلس ببيتي يقوم الصبح ويشتغل زي ما حنا نشتغل سامع يا محمد
ابو صقر : ابشر
الجد : وانتِ يا نجد ساعدي جدتس بالفطور والشغل انتِ وخواتس
نجد : ابشرر
ام حمد : محد ياعمي يصحى الصبح وش ورانا نصحى
الجد بعصبيه : تصحين تسوين لرجلتس فطور تسوين له الي يبيه تعلمي من عمتس ناديه الشغل الزين و السنع
سكتت ام حمد وتمنت ان ما تكلمت كملوا فطورهم بكل هدوء
صقر وحمد وهم طالعين للعزبه وقفهم صوت نجد وهي تقول : صقرر حمددد
حمد : ها وش تبين
نجد : ابي اروح معاكم
حمد : صاحيه انتِ ولا مهبوله وين تروحين
صقر باستغراب : وينن بتروحين عند النياق ؟!
نجد : اي تكفى بخاطري اروح
حمد : خبله انتِ اقول انثبري هنا لا يشوفتس جدي حش رجولتس حش
نجد : يوهه حمدد شفيك ، صقر تكفى ابي اروح
صقر : اهخ بس يلاا يلاا روحي البسي عبايتس
نجد بحماس : يلاا شوي واجي
حمد : والله ان جيتس ذي بتودينا بداهيه
صقر : المصيبه لا شافها جدي معنا
نجد : لالا ماراح يشوفني شوي وارحع البيت
حمد : هذي تحسب ان العزبه قريبه
صقر : حمد اركب بالصندوق ونجد تركب قدام
حمد : حسيبتس ربي يا نجد
نجد بضحك : اجل تبيني اركب ورا مثلاً
صقر : يلا يلا اركبوا بسرعه
-
عند العزيه
حمد : الحين وش نسوي
صقر وهو يضربه على راسه : جدي لا يسمعك
حمد : وش عرفني طيب
صقر : حط حط لها علف
تقدم حمد وهو يحط للنياق علف حس انها بترفسه من رجولها : صقرر تعال شوف هذي ماهي راضيه احط لها العلف
صقر : الله يعلك ماهو بكذا شلون تحطه لها من برا مُراح الابل خش داخل
حمد : يرجال لو ادخل ترعفست علي وكسرتني ما تخلي فيني عظمه صاحيه
صقر : خش خش بس ماهو جايك شي ولاهي بصاوبك
حمد : بخش امري لله
صقر : ليت يشوفك جدي يعلمك شلون الشغل الصح
حمد : تكفى فكني منه انا للحين احس بالضربه توجعني
صقر بضحك : تستاهل
صقر وهو ينادي على نجد : نجدد
نجد من بعيد وهي تناظرهم وتناظر هواشاتهم : هلاا
صقر بخبث : تعالي يعين اخوتس ، خشي داخل
نجد : منجدك انت تبي ادخل مع النياق الضخمه هذي
صقر : اجل ليه جايه
نجد : جيت عشان اشوف واغير جو
صقر : طيب يلا خشي تغيرين جو مع النياق
نجد : لالا تكفى ما ابي لو اخش بتدعسني
صقر بضحك : ما اخس منتس الا حمد ، تعالي معي ماراح تسوي فينتس شي
نجد : وش بنسوي داخل
صقر : نحلبها
نجد بخوف : يلا ادخل وانا معك
دخلوا نجد وصقر مُراح الابل ونجد الي كانت متمسكه في صقر ولا هي فكته دخل معها صقر بحكُم انو متعود يخش بين النياق دخل وهو ماسك نجد
صقر : يلا امسكي الصحن وانا بحلبها
نجد باستغراب : ومين بيمسك الناقه
صقر : لا تخافين هي ما تروح بس امسكي الصحن
نجد : طيب
دخل حمد مع صقر ونجد وقف يناظرهم من بعيد ويناظر صقر شلون يحلب الناقه
صقر : تعلم تعلم
حمد : يرجال ما ابي اتعلم ولاشي هي شكلها من بعيد تخوف شلون لو قربتها
شافت الناقه باب مُراح الابل مفتوح طلعت برا التفت لها حمد وهو يحسب عادي تطلع النياق وراح ترجع وما يدري انها بتهج التفت صقر للباب بعد ما خلص من الناقه وهو يحلبها وما انتبه الا والناقه هاجه
صقر وهو يركض ورا الناقه بصراخ : حمدد الناقه هجتتت
حمد وهو ما يدري عن شي راح يركض وراها وكل ما ركض الناقه تركض وتبعد اكثر واكثرر
حمد : صقرر تكفى الناقه لاا تهجج
صقرر : الله يعلك وراه ما قفلت الباب وانت داخل
حمد : مادريت انها بتهج
راح صقر يركض وراها واخيرًا قدر يمسكها ويدخلها داخل
__________
طولت عليكم وجيتكم ببارت طويل ولذيذ ، قراه ممتعه يحلوينن❤️❤️
حسابي انستا xn_7ll