احببتُها وانا جاهل بدروب المُحبين

البارت-20

عند الرجال
ابو فلاح : الله يجعله عافيه عليكم يرجال واعذرونا على القصور
الجد : مابوه قصور يبو فلاح الله يكثر خيرك
ابو هادي : ماقصرت الله يزيدك من فضله
ابتسم ابو فلاح وقال : تسلمون
-
في بيت الجد في الحوش
على العصر كعاداتهم الكُل كان متجمع في بيت الجد عيال ابو صقر وابو هادي وابو عبد العزيز وام مشاري
اخذت ام مشاري الشاهي والقهوه وهي توديه للمجلس
ام مشاري : شلونك يبو صقر
ابو صقر : بخير يوخيتي شلونتس انتِ شلون عيالتس
ام مشاري : الله يديمها عليك ، بخير الحمدلله
ابو عبد العزيز : اقول يبه ماودك تترك الديره وتروح تعيش بالمُدن
تنرفز الجد من كلام ابو عبد العزيز وقال : شلون تبيني اترك اهلي وناسي واهجرهم خلك هناك ولا تعبي راس اخوانك بالروحه للمُدن كلها خرابيط وخراب
سكتت ابو عبد العزيز وهو يدري ان مستحيل الجد يترك ديرته ويروح للمُدن
فز عبد العزيز عند ابو عبد العزيز وقال بهمس : يا يبه الله يهداك انت تدري بجدي مستحيل يترك الديره فـ خله لا عاد تكلمه بهالموضوع
ابو عبد العزيز حس ان عبد العزير كلامه صح :  وانت الصادق يوليدي
ام مشاري لـ الجد : شلون الحلال حقك يا يبه
الجد : على ما تحبين
ام مشاري وهي ماسكه فنجال القهوه : الحمدلله
-
بعد المغرب عند عهود بالغرفه
اخذت عهود تلبس عبايتها وطلعت بسرعه بدون ما احد يشوفها راحت طيران عند بيت ابو متعب فتح لها متعب ابتسم وقال : هلا والله بعهود
صدّت عهود وقالت : وين انتصار؟
متعب بخبث : وش تبين فيها
عهود بصراخ : مو شغلك اخلص ناد انتصار
مسك متعب يدها وشدها بقوه وسحبها له والتصق وجهها مع وجهه وقال : لا تصارخين عشان لا يصير فيتس شي ما يعجبتس
عهود بخوف : وخر عني يا كلببب
غطى متعب على فمها وسحبها داخل للحوش ضحك باستهزاء وقال : صارخي الحين محد بيسمعتس
عهود وهي تحاول تفكه بس ماقدرت بحكُم انو كبير : فكنيي ولا والله لا اجمع عليك كُل اهل الحاره
ضحك متعب وقال : ناديهم وبقلب السالفه عليتس وبقول هي الرخيصه الي جتني بهذا الوقت ومحد بالبيت الا انا
تفلت عهود بوجهه وقالت : تعقب ما الرخيص الا اشكالك نسيت ولا اذكرك ان ابوك تحرش بنجد و وعد فـ طبيعي ان ماراح يصدقونك
متعب مسح وجهه بعصبيه وشدّ شعرعهود بقوه وقال : انتبهي على كلامتس ولا ماراح يحصل لتس طيب
عهود بتألم : فكنيي يا حقيير
حط متعب وجهه بعُنقها وهو يستنشق ريحتها : اهخ وش ذي الريحه الحلوه خليتس كذا لا تتحركين
ناظرت عهود حولها وشافت حجر جنبها قدرت تفك يد متعب الي كانت محاوطتها بعد ما ارتخت يدينه وبسرعه اخذت الحجر ورمته على راسه
فك متعب يدينه منها و حط يدينه على راسه وهو يتألم ناطر بيدينه الي كانت مغرقه دم
ضحكت عهود وقالت : عشان ما تفكر مره ثانيه تقربني ولا نسيت إني اخت صقر
حطت الطرحه على وجهها وعلطول طلعت ركض من الحوش قبل لا احد يشوفها دخلت بيت الجد واستقبلتها ريناد عند الباب : شفيتس هدي من روعتس
ابتسمت لها عهود ودخلت الغرفه بسرعه وفصخت عبايتها وهي ترجف من الرعب ودقات قلبها تزداد بسرعه من الركض اخذت تشرب مويا دخلت عليها ريناد وقالت : وش شفيتس مرتبكه كذا مسويه مصيبه جديده؟
عهود عشان لا تشك فيها ريناد : مصيبه وش !! لا مصيبه ولا شي رحت عند رحاب وجيت وكنت اركض عشان لا اتاخر
ريناد بشك : اتمنى هذا هو السبب الي خلاتس تدخلين وانتِ متوتره وخايفه
طلعت ريناد وعهود الي خافت ريناد تدري زفرت بخوف واخذت تشرب مويا
-
عند صقر بالشارع
دخل صقر البيت واخذ يتمشى بالبيت عشان يشوف وعد التفت على الباب اللي كان فيه البنات بس ما حصل احد استغرب ان يكونوا اعمامه رجعوا للبيت ، طلعت وعد من الحمام وصرخت اول ما شافت صقر قدامها
ارتعب صقر انها طلعت وراه : اششش اقصري صوتس لا يسمعتس احد
وعد بخوف : وجعع وش جابك هنا
صقر بتمثيل الزعل : افاا تدعين علي بالوجع ؟
وعد : لالا بسم الله عليك بس خرشتني
ذاب صقر من كلمه بسم الله عليك : كنت ادور نجدي
وعد برفع حاجب : نجدك؟؟
صقر بضحك : ايي
وعد وهي رايحه للغرفه : وخر وخر عبالك نسيت وقفتك مع انتصار !!
صقر الي حس هذي فرصته يتكلم عن موضوع انتصار و يبرر موقفه : اسمعي يا بنت الناس تعرفيني زين وان هذي مو حركاتي وهي اللي طلعت قدامي وجت اخذت الصحن ولا انا ما دريت عن هوا دارها
وعد الي كانت تعرف صقر وتعرف ان هذي مو حركاته بس كانت تبيه يبرر لها عشان يثبت انهُ يحبها فعلاً
وعد : اعرف بس انتصار حقيره تبي تاخدك مني
نزل صقر يتساوى مع طولها وقال وهو يضحك : تخسي وتعقب ما بقى الا بنت متعب
وعد رجعت خطوتين وقالت : وطيب متى ناوي تخطب؟
صقر بحده : الحين
وعد بصدمه من كلامه : ها.. الحينن !!
صقر بضحك : ايي الحين دام الكُل موجود
راح صقر علطول وما اعطى لـ وعد فرصه تتكلم
وعد بصوت هامس : صقر صقرر
دخل صقر عند المجلس وقال : السلام عليكم
الكُل : وعليكم السلام
صقر : دام الكُل موجود انا يا عمه سُعاد اطلب يد بنتس وعد على سنه الله و رسوله
احتدت نظره الجد وسرعان ما تغيرت ملامحه لـ عصبيه
سكتت ام مشاري ولا عرفت وش ترد
ابتسم مشاري وقال : والله انها لك يا صقر
ابتسم صقر لـ مشاري وجلس عند رجول الجد وقال : سويت لك كُل شي يرضيك دعست على قلبي وخطبت بنت ابو فهد وما كتب الله تصير زوجه لي قلت بخطب وعد ورفضت وقلت معليه بيوافق مع الايام ولا وافقت في كُل مره اكلمك في الموضوع تصدّ عني ولا تعطيني فرصه اتكلم
مسح صقر دموعه بطرف شماغه وقام من عند الجد وكمل كلامه يقول : بس اسمح لي هذي المره إن وافقت عمتي سُعاد باخذ وعد غصبن عن الكُل ولا بشاور احد ولا باخذ موافقه احد انحرمت من كُل شي بس مستحيل اخليكم تحرموني من وعد
الجد الي صدم عيشته كلام صقر وما حسب لهذي اللحظه حسب انفجر عليهم صقر وقال كُل الي حابسه في قلبه من سنيييينن حس الجد ان كلام صقر فعلاً صح وكان ظالمه طول هذي الفتره في كُل شي وما يمشيه الا على كيفه وعلى كلامه
نزل الجد راسه وقال : أعرف اني ظلمتك كثيير ياولدي وحرمتك من اشياء كانت من ابسط اشيائك مشيتك على كلامي ولا خليت لك كلمه تنقال بين هالمجالس رفضت اني ازوجك بنت سُعاد واجبرتك على بنت ابو فهد بس سامحني ياولدي
الكُل انصدم من كلام الجد واستغربوا ان هالكلام يطلع منه ، فز صقر ومسك يده يبوسها وقال : لا ياجد لا تقول كذا مسامحك دنيا واخره ولاني بزعلان منك
ابتسم ابو صقر وحس ان هذي فرصته يتصافح مع ولده قام ابو صقر قرب من صقر وابتسم بوجهه وحضنه وهو ما يدري وش يقول له انلجم صقر من حضنه ، صقر الي تجمد مكانه ولا هو قدر ينطق بحرف اتكفى انو يحاوطه وهو مبتسم ويحس خيرًا الحياه ابتسمت له ، الكُل انصدم من تعامل ابو صقر لـ صقر بس عرفوا ان ابو صقر عرف غلطته وهجره لـ لولده ندمان عليه
ابو صقر بدموع : سامحني يا ولدي سامحني
لف صقر الشماغ على وجهه عشان لا يشوفونه وهو يبكي باس راس ابوه وقال : كسرت ظهري يا يبه والله كسرت ظهري انت وامي كلكم هجرتوني ولا حتى قدرت اختار بينكم ما عاد بقى لي بهالدنيا الا جدتي وجدي لو الله ثُم جدي كنت الحين بشارع ليه يا يبه لييه ؟!!
طاح ابو صقر بطوله على الارض وهو منهار فز الكُل وهم يرفعونه
الجده بخوف : يويليي وليديي بسم الله عليك يا يمه
الجد : تعوذي من الشيطان يا ناديه مافيه الا العافيه
ام مشاري وهي ترفع ابو صقر : قومم يخوي قوم بسم الله عليك
ابو عبد العزيز : اشرب مويا
طلع صقر من المجلس ولا هو قادر يتحمل منظر ابوه ولا يبي احد يشوفه بهذا الضعف والانكسار لحقه مشاري
-
عند البنات بالحوش
" نجد ، ومها ، وعد ، ريناد ، عهود  "
اما الباقي كانوا بالمطبخ " مجدُولين ، ارياف ، رند "
عهود : بنات صوت صراخ؟
نجد : كانه طالع من المجلس
مها : الله يجعله خير
وعد : تعالوا نشوف اكيد صاير شي
نجد : صقر ومشاري موجودين
التفتوا البنات على صقر ومشاري الي طلعوا من المجلس ومشاري الي كان ينادي على صقر ، وصقر ما التفت له ركب سيارته و اوقفه مشاري وقال : صقررر استهدى بالله  يا صقر شفيكك !!
صقر الي عيونه حمرت : اتركنيي يا مشاري !
مشاري مسك يد صقر وقال : وين اترك فينن بتروح ما تروح الا رجلي على رجلك فاهم !!
صقر بقله حيله : فكني ابي اجلس لحالي مابي احد معي
مشاري : منت رايح مكان الا وانا معك تروح وانت شكلك كذا ولا سمح الله وصار لك شي
صقر خبط كتف مشاري وقال : اوعدك ماراح يصير فيني شي ولا احتجت شي بدق عليك
ابتسم مشاري بخفه وقال : استودعتك الله وانتبه لـ طريقك
صقر بابتسامه : ابشر
شغل صقر موتره وراح ومشاري اللي رجع للمجلس وشاف ابو صقر الي منسدح ومغطى على وجهه الشماغ التفتت عليه الجده وقالت : وين راح صقر ؟
مشاري : اهدي ياجده ماراح مكان بعيد شويات ويجي
الجده بخوف : شلون تبيني اهدي و ولدي مو موجود !!
ابو هادي : يا امي الله يهديك ارتاحي لا تتعبين الحين تراه صقر مو صغير ويعرف وش يسوي وعقله براسه
جلست الجده عند ابو صقر وهي تمسح على ابو صقر وقالت : ياكثر ما قلنا لك يا محمد ولدك يحتاجك ويحتاجك جنبه ولا كنت تسمع لنا وشوف الحين عنادك وين وصلك
ضرب الجد العصاه بالارض وقال : هذي نهايه الي يسمع كلام حرمته ولا له كلمه عندها خلها تنفعك الحين
طلع الجد من المجلس وراح للحوش وهو ينادي على نجد : يا نجدد نجد
طلعت نجد من الغرفه وجت تركض وقالت : لبيه
الجد : جيبي جيبي القهوه
نجد : ابشر
-
اما عند ابو صقر
الي كان يسمع كلامهم وهم يرددون عليه " كنا قول لك ولدك محتاجك بس انت ما سمعت لنا " ولا هو قادر يرد عليهم اكتفى يسمع كلامهم وتذكر موقف الي صار قبل ١٨ سنه
" الموقف "
دخل صقر بيت ام حمد والي كان معه عيال الحاره يلعبون شافته ام حمد الي كانت بالمطبخ نادته وطلعوا عيال الحاره وبقى صقر عند ام حمد
ام حمد : صقر صقرر
صقر : هلا
اخذت ام حمد الورقه وعطت صقر الي كان مكتوب فيها
" موعدنا بعد الفجر بجيتس عشان رجلتس يكون نايم وناخذ راحتنا مع بعض "
ام حمد : روح حطه عند دولاب ماما وانتبه احد ياخذها او يشوفها
صقر باستغراب : ليه
ام حمد : بعدين بعلمك وبعطيك حلويات
صقر : عطيني يلا
ام حمد : مو الحين لما تحطها بعطيك حطها عند دولاب ماما وماما لا تشوفها
صقر : طيب
ام حمد بخبث : شاطر
ام حمد الي كانت كاتبه هالكلام عشان يشوفها ابو صقر وكان هذا يوم ام صقر ابو صقر ينام عندها ، دخل ابو صقر  للغرفه وهو تعبان ومنهد حيله رمى نفسه على السرير بتعب وام صقر الي كانت تسوي الاكل بالمطبخ لف ابو صقر على الورقه الي كانت على الدولاب اخذه وانصدم من الكلام الي كان مكتوب طلع من الغرفه متجهه للمطبخ وهو يرجف من العصبيه وعروق يدينه الي برزت من العصبيه صرخ وقال : من هذاا يا بنت الكلببب
انخرعت ام صقر ولا عرفت وش سبب عصبيته : بسم الله شفيك تصرخ !!
رمى ابو صقر الورقه عليها وقال : مسويه ما تدرين من هذا الي مواعدته
اخذت ام صقر تقرا وانصدمت من الي مكتوب ولا هي تدري من الي كتبه جت في بالها ام حمد رفعت راسها لـ ابو صقر الي كان شكله يخوف من العصبيه : هذي فعايل ام حمد روح اسالها هي بتجاوبك
مسك ابو صقر شعرها وشده بقوه وقال : تتبلين عليها ترمين بلاويتس عليها يالحقيره انا تخونيني
ارتفعت اصواتهم صراخ وضرب وابو صقر الي طاح في ام صقر ضرب دخل صقر ولا هو قادر يسوي شي لان بيعرف مصيره راح ينضرب اكتفى يناظر فيهم بزاويه وهو يبكي
مسك ابو صقر شعر ام صقر وهو يرفعها من الارض وقال بعصبيه وعيونه الي تطلع شرار : انتِ طالق من ثلاث وانقلعي من البيت ولا عاد اشوفتس هنا حشيت رجولتس حش ، طلعت ام صقر لغرفتها وهي تلِم ملابسها وملابس صقر تقدمت لهُ وهي تحضنه وتمسح دموعه الي كانت على خده ضمته وهي تبكي وما تدري ان هذي يتكون اخر حضن بيكون بينها وبين ولدها ، طلعت لـ سياره الي كان فيها ابو صقر ناظر فيها وشافها ماسكه يد صقر نزل من سيارته وسحب صقر له وقال : عبالتس بتاخذينه معتس صقر بيبقى معي هنا
ام صقر بدموع : لا تحرمني من ولديي يا محمد مالي بهالدنيا غيرهه الله يخليك
ابو صقر : اقول يلا اركبي بسرعه وصقر تنحرمين من شوفته
ركبت ام صقر وهي تبكي واضطرت تترك صقر
-
دخل ابو صقر وصقر لبيت ام حمد ضحكت ام حمد بانتصار وخُبث وسرعان ما تغيرت ملامحها اول ما شافت صقر مع ابو صقر
ام حمد : خير ان شاء الله جايب لي ولدها عندي
ابو صقر : من اليوم ورايح صقر راح ينام هنا مع اخوانه
ام حمد بصراخ : بيتي يتعذره جايب ولدها عندي وهي مرتاحه هناك
ابو صقر : اكسري الشر يا ليلى الولد ماعنده احد ينام عنده خليه بس هالليله وبعدها ربك يحلها
ام حمد : مو شغلي
زفر ابو صقر بضيق ولان ماله وجهه يروح لـ الجده والجد ويعلمهم بالسالفه لف على صقر وقال : روح عند جدتك وجدك ونام عندهم
صقر ببراءه : وليه ما انام عندكم؟
ابو صقر : انت الحين روح نام عند جدتك وبعدها بتنام عندنا
صقر : طيب
اخذ صقر شنطه ملابسه وراح لـ بيت الجد والجده ومن وقتها ما ينام الا عندهم
-
عند صقر
نزل صقر من موتره وهو يحس زي الجبل على صدره الضيقه الي كانت تاكل قلبه اكل طلع بكت دخانه ويطلع الدخان ويحطه بين شفايفه ويزفره بكُل هدوء ، جلس على صندوق الموتر وهو يناظر السماء والقمر الي كان مكتمل في نصف الشهر اخذ الفروه وهو يتدفى فيها جت في باله ابيات يقول فيها
"
يالله عسى الوقت يمضي على خير
وكُل الامور الي على البال تُفرج
وتشرق لنا شمس الامل بتباشير
ونلقى لنا من ضيقه الصدر مخرج
"
قال هذي الابيات وتذكر مشاري رفع سماعته و وصوله صوته يقول : لبيه 
ابتسم صقر لا شعوريًا من سمع صوته : حيي ذا الصوت الي جعلني ما افقده
ابتسم مشاري وقال : ولا افقدك يا عضيدي ، بشرني عنك شلون نفسيتك
زفر صقر بضيق وقال : والله ضايق صدري يا مشاري
ابتسم مشاري بضيق وهو ما يحب يشوف صقر ضايق : اجيك ؟
صقر : اي والله تعال محتاجك
ابتسم مشاري وقال : اعتبرني عندك
ابتسم صقر وقال : لا تبطي علي
مشاري : ابشر
قفل صقر من عند مشاري وانسدح يريح باله شوي
-
عند البنات
جلسوا البنات بحيره وهم ما يدون وش قاعد يصير وكل وحده قاعده تحلل من عندها وتقول الي ممكن يصير دخلت عليهم ام مشاري وقالت : ذابحكم الفصول مو صاير شي عمكم محمد تعب شوي والحمدلله الحين احسن
نجد بخوف : ابوي وش فيه ؟
ام مشاري : مافيه الا العافيه
ريناد : طيب ليه صقر طلع من البيت وهو متضايق
جلست ام مشاري وقالت : عمكم محمد عرفت غلطته وندمان على الي سواه من سنين في صقر وصقر ما قدر يتحمل كلامه وشال نفسه وطلع ولا تخافون مشاري معه وخلوه يطلع عساه يرتاح ويرتاح قلبه من الي عاشه
ريناد : اطيب بي اشوف ابوي
ام مشاري : لا يا بنتي خليه يرتاح شوي ويريح باله من زود التفكير وبعدها روحي شوفيه
ريناد : طيب
طلعت ام مشاري من عند البنات وراحت للمجلس عند اخوانها وبقو البنات بالغرفه الي كانوا يتكلمون عن الموضوع ويفسرونه 
-
عند شهد وظافر
جلست شهد عند ظافر وقالت : ظافر شرايك نسافر من وقت ما تزوجنا وحنا ما نسافرنا
لف لها ظافر وقال : وين ودتس تروحي
شهد : ودي نروح مكه نعتمر اول شي وبعدها عادي نروح اي مدينه
ظافر : ابشري ان شاء الله بكره نمشي وبعدها ناخذ لف على المدينه وجلس فيها كم يوم ونرجع
ابتسمت شهد وقالت : اجل بقوم اتجهز من الحين
ظافر : اي يلا عشان بنمشي الصبح
شهد : زين
قامت شهد تجهز اغراضها واغراض ظافر خلصت ورجعت للغرفه وشافت ظافر الي كان نايم غطته باللحاف وانسدح جنبه ونامت
-
اخر الليل
رجع صقر للبيت وفزت وعد اول ما شافته والي كانت تحتريه يرجع للبيت قالت بصوت هامس : صقيير
التفت صقر على جهه الصوت وابتسم لا شعوريًا من شافها : عيون صقرتس سمّي يا عروق قلبي
استحت وعد وقالت : وينك كُل ذا الوقت
ابتسم صقر وقال : ليه كنتي تحتريني؟
وعد : تبي الصدق اي خفت عبالي صار لك شي
صقر : لو ادري انتس تحتريني كانت رجعت من اول الليل ولا تخافين صقرتس ما يجيه شي
ابتسمت وعد وقالت : بطلي ما يجيه شي ، للحين ضايق صدرك؟
صقر : شلون يضيق صدري وانا اسمع هالصوت الي يجدد روحي
ابتسمت وعد بخجل وقالت : خلاص روح نام لا يجي جدي يكسر العصاه على ظهرك
ضحك صقر وقال : شكلتس شافتني وهو يكسرها على ظهري
ضحكت وعد وقالت : لالا بس ادري
صقر : يلا روحي نامي
وعد وهي رايحه للغرفه : زين ، نومك عافيه
ابتسم صقر وقال : يعافيتس
راح صقر لـ غرفته وهو يحس ردت له عافيته من سمع صوت وعد غير ملابسه واخذ شور ورمى نفسه على الفراش بتعب وخمول واخذه النوم علطول
-
من بُكره الصبح عند شهد وظافر الساعه ٥ص
قامت شهد على المنبه وبسرعه طفت المنبه عشان لا يقوم ظافر ، اخذت شور وفرشت سجادتها تصلي وتدعي ان الله يتقبل منهم عمرتهم ويسخر لها ظافر ويديمه لها خلصت من الصلاه واتجهت للغرفه تصحي ظافر تقدمت وقالت شهد : ظافر
همهم ظافر والنوم بعيونه وقال : هاا
شهد : قوم الساعه صارت ٥
غطى ظافر وجهه باللحاف وقال : طيب بنام بس شوي وبعدين صحيني
زفرت شهد وقالت : يالله انا ماخذه واحد يحب النوم وما غير نايم يلا قوم
شال اللحاف على وجهه ومسكها ظافر من يدها وسحبها له وقال : بس احبك انتِ اكثر من النوم
ضربته شهد على راسه بخفه وقالت : اللهجه ظافر !!
ضحك ظافر وقال : لا تركزين يا بنت الحلال للحين ما تعودت شسوي
ابتعدت شهد منه وقالت : مو شغلي
قام ظافر وراح للحمام واخذ شور وفرش سُجادته يصلي راحت شهد للمطبخ تجهز الفطور خلص ظافر من الصلاه
وراح للغرفه اخذ جواله يطقطق فيه دخلت عليه شهد وقالت : يلا تعال على الفطور
التفت عليها ظافر وحط جواله على الطاوله تقدم لها خطوتين وقرب من وجهها وباسها جنب مبسمها ابتسمت شهد بخجل وقالت : يلا تعال قبل الفطور يبرد
مسكها ظافر من يدها وراحوا لصاله يكملون فطورهم
خلص ظافر اكل وقام اخذ جواله وهو يدق على ام فلاح
ظافر : هلا يمه
ام فلاح : مسوين اليوم غداء تعال انت ومرتك
ظافر : اعذرنا يمه اليوم ماشين لـ مكه ان شاء الله مره ثانيه
ابتسمت ام فلاح وقالت : الله يتقبل منكم يايمه ومعذورين ولا تنسونا من دعواتكم
ظافر : ابشري يا يمه منعيوني ، تبون اجيب لكم شي معي وانا راجع؟
ام فلاح : لا يايمه نبي سلامتك تروح وترد بالسلامه
ظافر : الله يسلمك ، هاتي لي رحاب بكلمها
ام فلاح : رحاب تعالي كلمي ظافر
اخذت رحاب الجوال وقالت : خير شعندك
ضحك ظافر وقالت : في اخت تكلم اخوها كذا يالي ما تستحين
رحاب : توقعت لما تتزوج افتك منك بس طلعت غلطانه
ابتسم ظافر حُب لـ رحاب وهو يدري ان حتى لو قالت رحاب كذا يعرف انهُ مو طالع من قلبها : الشرهه مو عليك الشرهه علي اقولك بسافر واذا تبين شي اجيبه لك
رحاب بحماس : اكيد امزح معك شفيك صدقت
ضحك ظافر وقال : اقول توكلي يلا طسي
رحاب : ظااافرررر
ضحك ظافر وقال : خلاص يالنشبه ارسليها لي وابشري
رحاب : فديت اخوي بس
ظافر : يلا خلاص طسي
قفل ظافر وراح لـ شهد وقال : يلا خلصتي
شهد : اي خلاص جهزت كل شي ان شاء الله ما اكون نسيت شي
ظافر : توكلنا على الله
اخذ ظافر الشنط وركبها بالسباره ولبست شهد عبايتها وركبت السياره ابتسم ظافر ومسك يدها وانطلقوا متجهين لـ مكه
-
في بيت ابو فلاح
رحاب وثُريا الي كانوا بالمطبخ يجهزون الاكل دخل عليهم فلاح وقال : وش ذي الريحه الي واصله لاخر الصاله مييت جووعع
ثُريا : يخسي الجوع حبيبي تعال كِل
فلاح : لا يا عيون حبيبك شوي ويجون الرجال وناكل سوا
رحاب : وع الله يلوع كبدكم
ضربها فلاح بخفه وقال : مالك دخل اسكتي ، الا صدق ظافر عاد سافر
رحاب : اي سافر اليوم الصبح
ظافر طلع جواله : بدق اطقطق عليه
رحاب : ابوي الي يبحي يطقطق عليك الحين خل عنك ظافر وروح شوف المجلس لا ينقصه شي
فلاح وهو يدور رقم ظافر : المجلس فاضي مافيه احد وكل شي جاهز ومرتب انكسر ظهري وانا ارتب
دق فلاح على ظافر وما رد
رحاب : اعترف ان محد كان يرتب المجلس الا ظافر الحين يلا القم انت بتقوم بشغل ظافر
فلاح : اي حبيبتي اخوك هناك يسرح ويمرح وانا هنا اكرف لوحدي تعبت
ثُريا : بسم الله عليك من التعب
حط فلاح يده على خد ثُريا وقال : محد مخفف علي الا انتِ جعلني قبلك
ضربت رحاب فلاح وقالت : اطلع اطلع برا بسرعه لا اشوفك هنا
ضحكت ثُريا على فلاح وكملت شغلها مع رحاب
طلع فلاح وراح للمجلس شيكت عليه شاف ابو فلاح الي كان جالس في المجلس وهو
ابو فلاح بخوف : بـ اي مُستشفى الحين ؟
المجهول : مُستشفى ****
التفت فلاح على ابو فلاح وجاء باله ظافر يكون صاير له شي تقدم له خطوتين وهو ينتظره ينهي مُكالمته عشان يساله وفعلاً قفل ابو فلاح
وقال فلاح : ظافر فيه شي ؟
ابو فلاح : اخوك صار له حادث وهو وحرمته
حط فلاح يده على راسه بخوف وقال : صار لهم شي ؟!!
ابو فلاح : لا الحمدلله بس حرمته يدها انكسرت وجاها نزيف قوي
فلاح بخوف : لا اله الا الله !!
ابو فلاح : امش شغل السياره وانا لاحقك الحين
فلاح : بتعلم امي ؟
ابو فلاح : لازم نقول لها
راح فلاح لـ سياره يشغلها وابو فلاح الي راح يعلم ام فلاح والبنات
ابو فلاح : يا ام فلاح
جت ام فلاح ونطقت : سمّ
ابو فلاح وهو مو عارف كيف يقول لها : ظافر صار له حادث هو وحرمته والحمدلله الي كتب لهم عمر جديد
صرخت ام فلاح بصدمه وخوف وتردد تقول : يارب لا تختبر صبري بولدي يالله
ابو فلاح : استهدي بالله يا ام فلاح وقولي الحمدلله ان ما صار لهم شي وروحي البسي عبايتك خليني نروح نشوفهم
راحت ام فلاح تلبس عبايتها وانطلقوا مُتجهين للمُستشفى
-
في المُستشفى في الغرفه عند ظافر
قام ظافر من السرير وهو يتلفت حوالينه دخل عليه الدكتور وقال : شلون تحس نفسك الحين ان شاء الله احسن ؟
ظافر الي كان يحس بالدوخه ويحس كل شي قاعد يدور فيه : الحمدلله احسن بس وينها زوجتي؟
ابتسم الدكتور وقال : زوجتك شهد؟
ظافر : اي فيها شي !!
الدكتور : جاها كسر بيدها ونزيف قوي وتحتاج دم باسرع وقت لان نزفت دم كثيير
قام ظافر من على السرير وقال : انا بتبرع لها فصيله دمي O
الدكتور : تماام يلا امش معي
راح الدكتور ومعه ظافر اخذ الدم ونقلوه لـ شهد
جو فلاح وامه وابوه وراحوا للغرفه الي فيها ظافر الي كان للحين مُغمى عليه بسبب سحب الدم
حط يده على راسه وهو يحس بألم متملك راسه ودوخه مسكت يده ام فلاح وقالت : بسم الله عليك ياعين امك
ابتسم ظافر بوجع وقال : ابي مويا
اخذت ام فلاح كاسه المويا وهي تعطيه لـ ظافر
نزل ظافر كاسه المويا وقال : بروح اشوف شهد
ابو فلاح : اجلس وارتاح تونا جاين من عندها وللحين نايمه
شال ظافر اللحاف الي كان عليه وقال : مافيني شي الحمدلله صحت شهد اهم
راح ظافر واهله لـ غرفه شهد ابتسم ظافر بوجع على شكلها و وجهها الي كان فيه جروح مسك يدها ومسح على راسها وقال بصوت هامس وبكُل حنيه : بسم الله عليك جعله الله بعمري عنك يعيون ظافر
دق الباب والكل التفت للباب دخلت ام مشاري ومشاري
ام مشاري بخوف : بنتي وينها !! يويليي قلبي عليتس يا شهد
قام ظافر من عند شهد وجلست ام مشاري وهي تمسك وجهها : ياحسره قلبي عليتس يايمه
ام فلاح : ادعي لها يا سُعاد تحتاج دعواتك و باذن تطلع بالسلامه
ام مشاري بانهيار : الله يقومتس بالسلامه ياعين امتس
الكُل رجع للبيت الا ظافر الي جلس عند شهد جلس على الكنبه وهو يطقطق بجواله ويرد على الكُل ويطمنهم انو بخير فز اول ما سمع صوت شهد تهمهم مسك يدها وشدها وقال : شهد !!
فتحت شهد عيونها وهي تحس بدوخه وألم اخذ ظافر كاسه المويا وهو يشربها سندها على المخده وقال : الحمدلله على سلامتك
ابتسمت شهد وقالت : الله يسلمك
ظافر : خوفتيني عليتس
ضحكت شهد بألم وقالت : وشوله تخاف ما تدري اني بنت يُوسف ما يجيني شي
ضحك ظافر وقال : كل ذا التكسير الي جاتس وتقولي ما يجيني شي
شهد : هذي بس ضربات خفيفه ما تعور
جلس جنبها وقال : تحسين بعوار ؟
شهد : يدي تعورني
باس ظافر يدها وقال : يدتس فيها كسر جعله فيني ولا فيتس
شهد : لا تقول كذا بسم الله عليك والحمدلله جت على كذا والحمدلله بعد الي كتب لنا عُمر جديد
ابتسم ظافر وقال : اي والله والحمدلله انتس بخير لو انتس صار لتس شي بموت
ضحكت شهد ونطقت : لهدرجه ما تقدر تعيش بدوني
ضحك ظافر وقال : ماهو انا الي مقدر اعيش بدونتس قلبي الي ما يقدر يعيش بدونتس
ضحكت شهد لف ظافر على الكيس وطلع الصحن وقال : امي جايبه لتس اكل يحبه قلبتس وقالت لازم تاكلين
شهد : يابعد عمري عمتي ما تقصر
مسك ظافر فكها وقال : يلا كُلي عشان تصيرين بخير وتطلعين ، تماام يا بابا؟
ضحكت شهد وقالت : شايفني ورعه صغيره عندك
ضحك ظافر وقال : اي انتِ بنتي
مسك ظافر الملعقه ونطق : ان شاء الله بعوضتس بدل هالسفره
ابتسمت شهد من حنيه ظافر مسكت يده وقالت : مو مهم السفره اهم شي انت معي وجنبي
ابتسم ظافر وكمل ياكل شهد وهو يضحكها وفي كُل مره يشوفها تتألم يحس ان الألم بقلبه و الود وده ياخذ ألمها ولا تحس بوجع كملوا سواليفهم وضحكهم الين نامت شهد
____
قربنا على الختام يحلوينيي وبنودع روايه " أحببتُها وانا جاهل بدروب المُحبين "💔