احببتُها وانا جاهل بدروب المُحبين

البارت -15

مجدُولين وهي داخله : روحي لحالتس
نجد : انا غبيه يوم اني قلت تعالي معي
نجد لـ شهد : شهدد شهددد
شهد : شفيتس
نجد : تعالي معي نشوف صقر
شهد بتافف : يا الله انك ترزقني خوف جدتي على صقر
نجد بضحك : امشي امشي بس
شهد : يابنتي مافيه مخلوق هنا
تقدمت نجد تتاكد اذا فيه احد او لا نطقت تقول : غريبه وينهم مو موجود احد
شهد وهي ماسكه يد نجد : تعالي نروح نشوف
تقدموا خطوتين واقتحموا عليهم العيال باصواتهم الي كانت عايله صرخوا البنات بصوت واحد حطو يدهم على فمهم من الخوف فزو يتخبون في الحمام الخارجي حق المجلس دخلوا العيال المجلس وما حسوا بصراخهم تاكدوا البنات ان ما عاد فيه احد ودخلوا المجلس
تاففت شهد براحه وهي تنطق : قلبي قام يرقص من الرعب
نجد بصوت هامس : امشي امشي طلعنا تكفيين
فتحوا باب الحمام يطلعون وانصدموا بالي طلع قدامهم لفت شهد على نجد تغطي وجهها بالمحرم الي مع نجد وهي تقول : صد جعلك بالعمى
استوعب ظافر على نفسه نزل راسه بالارض وهو يقول : وش جابكم بحمام الرجال انتِ وياها
شهد بكذب : ما كان فيه مويا داخل وجينا ناخذ مويا من هنا
ناظرت نجد بصدمه في شهد وكيف قدرت تكذب على ظافر
ظافر : الله اكبر من عذر ! ادخلوا ولا اشوف وحده هنا
نجد : الي صار لا يوصل لاحد
ظافر : معليك يبنت محمد
انصدمت نجد ان ظافر عرفها وما كان متوقعه ان بيكون عرفهم كملت نجد طريقها هي وشهد الي كانت ماسكه فيها ومغطيه وجهها تقدمت وهي تناظر لـ ظافر بطرف عين طلعوا من الحمام بخوف رجعو ركض لجهه الحريم
نجد بضحك : شلوون قدرتي تكذبين عليه
تنهدت شهد وهي تقول : لا تلوميني من الرعب الي صار قمت اكذب ولا اعرف كيف طلعت مني
نجد : اهخخ والله انتس كفوو ومحزم
شهد : افاا عليتس
نجد للبنات الي كانوا متجمعين بالصاله يلعبون : ياخاينات ولا تقولون ننتظر نجد و شهد
شهد : تشوفين
رحاب : والله من الحظ ان اللعبه كفتنا ما كان نحتاج نجيب وحده
نجد : لالا دام كذا طلعوا رحاب وثُريا ونلعب انا وشهد بدالهم
شهد وهي تايد كلام نجد : صحيح
ثُريا : انا شدخلني
رحاب : هذا وحنا ضيوف عندكم ياللي ما تستحون
ثُريا : ايي والله
مجدُولين : متعنين يجون وهذا نهايه جيتهم
نجد وهي تحضن رحاب وثُريا : يعيون انتو امزح شدعوه
ثُريا : ياحبيبه قلبي
-
في المستشفى " في غرفه ام صقر "
الدكتور لـ صقر : انتهى موعد الزياده تقدر تجي بكره
صقر : تماام
صقر لـ امه : نامي وارتاحي ولا تشيلين هم بجيتس بكره
ام صقر : ان شاء الله ، ودعتك الله
صقر كلمته المعتاده : بحفظ الرحمن
باس راسها وطلع من المستشفى وهو شايل هم كبيير بقلبه وخايف كيف بتكون رده فعل جده شال هذي الافكار من راسه الي كل ما تذكرها ضيقت صدره شغل وانيته وانطلق لـ بيت ابو عبد العزيز يكمل سهرته مع العيال
-
عند العيال الي للحين متجمعين وبينهم الشيبان والي كانوا مستانسين بجلستهم معهم والقصص الي يحكونها الجد و ابو فلاح وابو عبد العزيز والباقي يسمعون والقصايد الي يقولها مشاري و اللي كان يقصد فيها محبوبته " نجد " وفي كل مره يقول فيها قصيده قاموا العيال يصفقون له ويعززون له والاغاني الي كان يغنوها عيال اهل المُدن " عيال ابو فلاح و عيال ابو عبد العزيز "
والكل مبسوط ومستانس ومشاري الي كان ينتظر صقر احر من الجمر ولاول مره صقر ما يكون موجود بينهم تضايق مشاري وهو ما يحب الا وجود صقر جمبه ومعه
-
اما ظافر الي من بعد ما شاف شهد وهو مو عارف ليه مو قادره تطلع من راسه ما ينكر ان فز قلبه لها من جمالها وحلاوتها الي صدق كانت تفتن ونظراتها له الي مو قادر ينساها قال في نفسه : ليه اتركها لغيري !!
راح كمل سهرته مع العيال وعلى جيته سمع مشاري يقول قصيده
يقول فيها :
كثر النهار اشتاق وانتِ بعيده
إلين اشوفتس كثر ما تنبت الاشجار
ومثل الرمال أحس روحي وحيده
طال السهر والليل ينزف وريده
في صدري هموم وهواجيس واسرار !
كل الحروف المبطيه والجديده
تطري علي لا شك في حبتس أحتار
قبل الورق وانتِ في بالي قصيده
وبعد الورق ضيعت انا كل الاشعار
-
العيال : صح لسانك
ابو فلاح : الله ! والله و صار مشاري شاعر
مشاري بضحك : ياحبيب قلبي يا عمي
التفتو على صوت وانتيت ، نزل منه صقر وهو يناظر فيهم من بعيد بابتسامه خفيفه ومشاري الي فز من مكانه وراح يركض لصقر ويحضنه ويقول : ياهلاا وميه مرحبا ياصقيير !
صقر : الله يبقيك ياعين اخوك
ابو فلاح بحب لـ صقر : ياهلا والله بصقر اقلط اقلط حياك
صقر : ما تقصر ياعمي تسلم ، شخباركم يرجال
العيال : بخير ، الحمدلله ، بشوفتك صرنا بخير
لفتت انتباه صقر هذي الجمله الي ابتسم لا شعوريًا من سمعها واللي كانت طالعه من فلاح اتجهه له وهو يسلم عليه سلام حار جلس جمبه وهو يقول : والله اني فاقدك يا فلييح
فلاح : ماهو بكثريي ، شخبارك كيف امورك
صقر : على ما تحب
صقر لـ ابو فلاح : شلونك عمي ابو فلاح
ابو فلاح : بخير لك الحمد
صقر : ياجعله دوم ان شاء الله
ابو عبد العزيز : ضيفو ولد عمكم ياعيالي
صقر : ما تقصر كثر الله خيرك
فز هتان وهو يصب لصقر القهوه وهو يقول : تفضل
ضحك صقر بخفه وهو يقول : اووه هتان ما تعودنا على الاسلوب الحلو ذا
هتان : عشان ابوي ولا ما كان سمعتها مني
صقر : اقول هات هات عشان لا تحصل لك وحده بهالعقال
قال كلمته هتان لـ صقر ومشى : تخسي
الجد : عاد انا استاذنكم يرجال وكثر الله خيرك يبو عبد العزيز
ابو عبد العزيز : وين يبه اجلس تونا اول الليل
الجد : ورانا اشغال وانت ياصقر لا تتاخر
صقر : ابشر
ابو فلاح : الله معك يبو محمد " الجد "
راح الجد بيته وما طولوا الباقين ودخلوا داخل المجلس يكملون سهرتهم وسواليفهم وباقو العيال لوحدهم والي انقلبت الجلسه كلها لـ ضحك وسواليف ولان كانوا الشياب موجودين ما اخذوا راحتهم فز صقر من مكانه واقف وهو يقول : كيف تتجمعون بدوني يكلاب
ظافر بضحك : يبوي وجودك و عدمك واحد
شال صقر شماغه الي كان على كتفه ويلفه ويضرب فيه ظافر وظافر الي حط يده على مكان الضربه بألم
ظافر بصراخ وألم: الله يكسر يدك
قام ظافر يلف شماغه ويرد الضربه لـ صقر بضربتين
صقر الي تألم وراح يركض ورا مشاري يتخبى
صقر : انا بوجهك وشنبك يا مشاري
مشاري : احتزم يخسي يلمسك
ظافر لـ مشاري : مشاري تبي تسلم وخر !
هتان : اخسى عليك يا صقييرر خايف من ظافر
صقر الي تشجع بعد كلام هتان له واخذ الشماغ وهو يلفه ويرجع الضربه دبل
ظافر لـ فلاح : فلييحح اخوك قاعد ينضرب يا فليح ولا تفزع
فلاح بضحك : خلك تستاهل
هتان وهو ميت ضحك : القمم
فادي بصراخ : بااباااا
فلاح الي ما سمعه من صراخ العيال
سامي : فلاح ولدك ينادي
فلاح وهو ياشر له : تعال يا بابا هنا
صقر وهو فتح يدينه : فاديييي !!!
ركض فادي بحضن صقر وصقر الي كان طاير من الوناسه بجيته جلسه بحضنه وهو يبوس فيه
فادي : عمو يلا نروح البقاله
صقر : على خشمي ابشر
فادي : يلا
هتان : يلا وانا معكم
فادي : لالا عمو هتان ما يروح
صقر : دام قال فادي لا منت رايح
هتان بضحك : فلاح ولدك حاقد علي
هادي : ما الومه والله
صقر : تبون شي يعيال
العيال : لا
فلاح : ترا ما يخلي شي بخاطره بيشيل كل شي بالبقاله
صقر : فدا
راحوا صقر وفادي البقاله مشي بحكُم انها قريبه اخذ صقر فادي يشيله على ظهره وفادي الي كان مستانس وطاير من الوناسه
-
عند البنات "
رحاب لـ ارياف : ارياف ابي اشوف غرفتك
ارياف : سينن سينن ماهو كافف !!
رحاب : وهه شسوي طيب حنا نتكلم بالكاف
ارياف : لا عندنا تكلمي نفسنا
رحاب : خلاص بحاول
ارياف وهي تاشر على غرفتها : تعالي هذي هيي
ثُريا : خذوني معكم
ارياف بضحك : تعالي
رحاب : واوو ذوقك صدق رهيب تعرفين تنسقين الالوان
ارياف : غرفتي الي بالخبر احسن من هذي
ثُريا : حبيبت والالوان خفيفه
طلعت وعد وتركت البنات داخل طلعت جهه الرجال تشوف صقرها الي ما شافته من كم يوم ومن حسن حظها شافته بالحوش واللي كان معه فادي ابتسمت بمُجرد ما شافته التفت صقر لها وناظر لـ فادي الي كان بيده كيس وفيها حلويات طلع منها حلاوه وهو يقوله : هذي لي والباقي لك تماام ؟
فادي : تماام
صقر : يلا روح عند ماما وانتبه احد ياخذه منك
فادي : طيب
راخ فادي يركض وبيده الكيس وصقر الي راح متجهه لـ وعد ، التفتت وعد حوالينها تتاكد ان مافيه احد
صقر : تحتريني ؟
وعد : هاا ..لا طبعًا كنت انتظر فادي يجي
صقر وهو يغمز لها : متاكده ماهو انا
وعد وهي تحط يدها على خصرها : والله لو تبي الصدق شفت مالك حس قلت اتفقد اخبارك وفوق ذا بعد جدتي تسال عنك
صقر : هاليومين كنت مشغول مره ولاني بحول احد
وعد : ليه صاير شي
صقر : لالا ، خذي هالحلاوه
وعد بضحك : سارقهم من فادي
صقر بضحك : لا ما سرقته بس خذيت من الاغراض الي شريتهم له وقلت اعطيتس انتِ بعد
وعد : شكراا
راح صقر بعد كلامه لـ وعد ، وعد الي كانت تناظر فيه من بعيد بحُب وهي تقول : ياربيي وش ذي الهيبه والرزانه بسم الله عليك ما شاء الله
دخلت وعد تتجهز مع البنات بعد ما انتهت العزيمه ، وبيدها الحلويات الي عطاها صقر وفرحانه فيها فتحت شنتطها تخبيهم عشان محد يشوفها وكملت تجهيز
نجد الي كانت واقفه عند امها والبنات وقاطعهم اتصال من صقر ابتسمت وهي تقول : هذا صقر
ناظرت فيها وعد بابتسامه خفيفه وتحس قلبها احترق غيره قالت بصوت هامس : وعد اصحي ترا اخوها شفيتس
رديت عليه وهي تقول : ياهلا والله
صقر : هلا نجوديي ، شلونتس
نجد : بخير عساك بخير
صقر : والله ياني فاقدتس وفاقد البنات
نجد : مو كثرنا والله
صقر : بترجعون بيت جدتي ولا بيتكم ؟
نجد : ما ادري والله بس الظاهر بيتنا ليه ؟
صقر : ابد بس ودي اسولف معكم ونفلها مع بعض
نجد : والله ما اخليها بخاطرك وانا اختك انتظر بكلم امي واجيك
صقر وهو يبتسم حُب لـ نجد : يلا احتريتس
نجد لامها : يمهه يمهه
ام حمد : وجع وش بلاتس
نجد : ابي انام اليوم عند جدتي
ام حمد : وليه ان شاء الله !
نجد : مافي سبب بس ابي اجلس عندها يومين
ام حمد : خلاص زين
طلعت نجد من الغرفه وراحت ركض غرفه البنات وهي تطلع جوالها وتدق على صقر : صقرر صقرر
صقر : لبيه وش قالت
نجد بفرح : وافقت وافقت
صقر : كويس الحمدلله اجل باخذكم معي
نجد : تماام
" ودعو البنات بعض وانتهى اليوم وانتهت العزيمه والكل رجع لـ بيته "
في بيت الجد الساعه ١ص
دخل صقر البيت ومعه البنات راحوا البنات غرفتهم الا صقر الي راح الصاله يشوف جدته ، شافها تصلي الوتر جلس وهو ينتظر تخلص طلعت مسحبته من جيبه وهو يلعب فيها خلصت الجده من الصلاه قام صقر وهو يبوس راسها ويقول : تقبل الله
صقر : منا ومنك صالح الاعمال
تقدمت الجده وهي تضم وجهه صقر بيدها وتقول : شفيك يا امي انت صاير معك شي منت على بعضك
صقر : اي والله يا يمه صاير شي ولا قلت لتس عنه ولا ادري كيف بقولتس عنه
الجده : قول ياعين امك اسمعك
صقر : امس زوج امي دق علي يقول ان امك تعبانه وتبي تشوفك
الجده بتعجب من ام صقر : صادق انت !!
صقر : اي والله
الجده : ورحت لها ؟
صقر : اي رحت شفتها ولاني بقادر اصدق اني شفتها ولا عجزت اتقبل
الجده : قول الحمدلله الي هداها ورجعت لعقلها ما تعرف قلب الام حتى لو انها تركت عيالها تبقى تحبهم وعليهم حنونه
صقر : يمه انتِ منجدتس في ام تترك عيالها وتبقى تحبهم !؟
الجده : اي واكيد انها ندمانه على الي سوته
صقر وهو يبي ينسيها الموضوع : تعالي يمه نجلس مع البنات
الجده وهي تضربه بخفه : اقول يلا غرفتك وخل البنات ينامون تبي جدك يكسر العصاه على ظهرك
صقر بضحك : لا تخافين ماهو صاحي
الجده : اقول يلا على غرفتك وراك اشغال
صقر : ابشري يلا الحين رايح
راح صقر عرفته وهو ناوي تروح الجده غرفتها ويروح للبنات ، تاكدت الجده ان صقر بينام وراحت الغرفه تنام
فز صقر يفتح الباب بشويش وما شاف احد راح غرفه البنات ركض فتح الباب بقوه وهو يقول : ججيتكممم
صرخوا البنات بخوف قفل الباب صقر علطول عشان الصوت لا يطلع : فضحتوناا اصصص لا يقوم جدي
رند : وجع في احد يفتح الباب كذا خرعتنا
نجد : جدتي نامت ؟
صقر : اي راحت تنام مسكينه قلت لها بروح انام وخليتها تنام وجيتكم لان ما رضت تجي معي
نجد بضحك : يعمريي ياجده
-
اليوم الثاني الصبح " في بيت ابو فهد "
الكل كان ينتظر جيه فهد للبيت بعد سفرته للشرقيه اسبوعين وفعلاً خلصت الاسبوعين وكان هذي وقت رجعته للديره ، ابو فهد وام فهد وليالي الي كانوا ينتظرونه بالصاله بحكُم انو كان داق عليهم وعلمهم متى راح يوصل ، ليالي الي ما درت عن احد وكانت نايمه اما حسين للي ساحب على الكل ومنعزل بغرفته ولا يجلس مع اهله
ابو فهد بعصبيه : يا ام فهد شوفي حل لعيالتس ماهي معقوله لا يجلسون معنا ولا ياكلون معنا ولا عاد نشوفهم
ام فهد : وش بيدي اسوي يا ما قلت لهم ولا يسمعون
ابو فهد : انا اعرف كيف اتصرف معهم
لطيفه : خلهم براحتهم يبه...
قاطعها اتصال رد ابو فهد وهو يقول : الو
*** : انت ابو فهد ؟
حس ابو فهد ان صاير شي لـ فهد رد عليه وهو يقول : اي
*** : ولدك صار له حادث وهو الحين بالمستشفى
تغيرت ملاح ابو فهد للخوف التفت لـ ام فهد وهو يقول : لا اله الا الله في اي مستشفى
*** : مستشفى ***
ابو فهد : يلا تمام تماام
ام فهد بخوف : فهد صاير له شيي !!
ابو فهد : استهدي بالله مافيه العافيه ان شاء الله
ام فهد : ولدي مسوي حادث ؟!!!!
ابو فهد : يا مره تعوذي من الشيطان قومي البسي عبايتس نروح نشوفه ، لطيفه خذي امتس
لطيفه : قومي يمه قومي
لحقوا ام فهد ولطيفه ابو فهد الي كان ينتظرهم بالسياره ركبوا وانطلقوا مُتجهين للمستشفى
-
في بيت الجد
على صلاه الفجر ، قام الجد وشاف صقر الي للحين ما صحي كالعاده راح يضرب باب الغرفه وهو ينادي عليه فز صقر يفتح الباب وهو يقول : لبيه
الجد بحده : يلا يلا صلاه
صقر : ابشر الحين الحقك
الجد : اعجل يلا
صقر : ابشر
راح صقر ياخذ شور سريع يصحصح وراح متجهه للمسجد يلحق الصلاه