احببتُها وانا جاهل بدروب المُحبين

البارت - 8

-
عند العيال
ناموا الكل الي مشاري الي عجز ينام وباله مشغول بصقر ويفكر وين بيكون الحين و وين راح وهل هو بخير ولا لا حاول يتذكر الاماكن الي يروح لها صقر بس ما جاء بباله اي مكان رجع انسدح بعد تعب من التفكير الي هلكه وشغل باله لحق العيال وغط بالنوم
-
عند البنات
وعد بخوف : تكفين قولي انهم عرفوا وين مكانه
نجد : لا للحين ما يدرون
وعد : اهخ يارب انك تحفظه ويرجع سالم
نجد : امين
عهود : خلاص تراه مو صغير عشان تخافون عليه وين مثلا بيروح و وش فيها لطيفه ما يبيها يحليها ما يلقى زيها
نجد : عهود انتِ بالذات ما ابي اسمع صوتس
شهد : خلاص مو وقت هواشكم انتِ وياها
عهود باستحقار : وعد وش عندتس خايفه عليه
وعد : ها.. طبيعي بخاف ولد خالي
عهود : متأكده ذا هو السبب
نجد بعصبيه : عهوووود والنهايه معاتس
راحت عهود بدون ما ترد عليها وتركت البنات وراحت تنام وما استفادو البنات من جلستهم ولا سمعو خبر عن صقر ولحقو عهود وناموا
-
تحديدًا في بيت ابو فهد
ابو فهد : بكره جاين يخطبون كلمي لطيفه تجهز نفسها
ام فهد : قلبي ناغزني لليوم ذا
ابو فهد : ماراح يصير الا كل خير خلي عنتس الوسواس
ام فهد : الله يكتب الي فيه الخير ان شاء الله
" ناموا الكل، والكل متوتر من الي راح يصير بكره وانتهى اليوم واخر يوم في المزرعه وانتهى بقلل وخوف على صقر الي محد يدري وينه "
-
اليوم الثاني الساعه ٩ الصبح بدون اي أحداث جديده الكل يجهز أغراضه عشان يرجعون البيت ويجهزون لخطبه صقر من جهه الرجال اما من جهه الحريم ما كانوا متجهزين وكل تفكيرهم صقر وينه وهل راح يخطب لطيفه ولا لا
ام مشاري : يلا يا بنات مشاري برا
فز قلب نجد من سمعت اسم مشاري : اهخ اشتقت لشوفته انشهد ان شوفته تسر الخاطر
همست وعد بإذن نجد : لا اوصيتس لا عرفتي عن صقر شي علميني
نجد : من عيوني
وعد : فمان الله
نجد : بحفظ الله
ريناد : نجد كلمتس صقر؟
نجد بياس : لا
تاففت ريناد ورجعت تجهز أغراضها مع خواتها
طلعت نجد للسياره متقصده تطلع قبل أهلها عشان تشوف مشاري ركبت سياره وهي تناظر فيه يركب أغراض اهله لمح بنت تناظر فيه عرف انها نجد غمز لها وراح متجهه لها وهو يقول : اليوم تركبين مع ابوتس بكره تركبين معي
نجد : يلا شد حيلك وتعال اخطب قبل لا اطير من يدك
مشاري : والله ما تروحين لغيري تبين اجي اليوم ؟
شهقت نجد وهي تقول : لا لا
مشاري بضحك : استودعتس ربي
نجد بصوت خافت : الله يحفظك
الكل تجهز بدون استثناء ورجعو البيت وانتهت رحلتهم في بيت المزرعه واتجهوو لديارهم
-
عند صقر
صحي وشاف الساعه ١٠ دق على مشاري وصوله صوت مشاري وهو يقول : صقرررر !! وينك انت
صقر : تجيني الحين محتاجك
مشاري : بجيك بس وينك
صقر : عند الخيم
مشاري : يلا جايك
شغل مشاري سيارته وانطلق متجهه لصقر وصل عند صقر الي كان جالس بضيق عند ناقته الي يعشقها ويشوفها غير عن النياق الثانيه
صقر : ارحب ياعين اخوك
مشاري : وينك يخوي ندور عليك خفنا صاير لك شي
صقر : ضايقه فيني الدنيا يا مشاري كل ما قلت الحمدلله زانت وفُرجت القى الباب تقفل بوجهي
مشاري : ربك يزينها ان شاء الله وتوكل على الله وخطب البنت ما تدري ربك وش كاتب لك بإذن الله امورك تزين وتتعوض
صقر بقله حيله : ما ابيها افهمووو
مشاري بشك : انت شايف في البنت شي عشان ترفضها
صقر : لا والله البنت مو شايف فيها شي ولا اعرفها لا بخيرها ولا بشرها بس ما ابيها
مشاري : طيب وش بتسوي
صقر : بجلس هنا ولاني رايح لهم
مشاري : تستهبل انت وجدي مكلم ابو فهد انو بيخطب اليوم
صقر : بيتعذر منه دامني مو موجود
مشاري : طيب وأهلك بتعلمهم انك هنا؟
صقر : وانا معي اهل؟ هههه
مشاري : خواتك
صقر : بدق عليهم واعلمهم بس لحد يدري اني هنا ولا سالك جدي قول ما اعرف
مشاري : على خشمي
بأس صقر خشم مشاري " سلام رجال " وقال : عليه الشحم
مشاري : تعال نروح لنياق
صقر : يلا
اتجه مشاري جهه النياق وهو ينادي : يالقصوواء ... يالقصوواء
صقر بضحك: ماش شوف الحين بنتي رقوب : يالرقوووبب
رفست رقود رجولها وهي تلعب داخل مُراح الابل " مكان الابل "
صقر بحُب لناقته : حي عينتس يالرقوب
مشاري : افاا وينها القصواء بنتي
استغرب مشاري من هدوء القصواء قرب مشاري من مُراح الابل وشاف القصواء تاكل
ضحك وقال : يجعله عافيه ياعين ابوتس
حط صقر راسه على رقوب انسدح جمبها وهو يقول : يا مشاري جيب القصواء وتعال هنا
مشاري : جايك
اخذ الحبل مشاري وصار يقود القصواء عند صقر وهو يقول : يلاا جايك
صقر : ناقصنا في هالقعده هتان
مشاري : اي والله
صقر : دق عليه اسأله عن الوضع هناك وقله يجي
دق مشاري على هتان الي كان نايم وصوله صوته وهو يقول : شتبي انتت داق من صباح الله
مشاري : يخوي مادريت انك نايم وفي أحد ينام هالوقت
اخذ صقر الجوال من مشاري وحط الجوال باذنه وهو ينطق : هتاني ناقصنا وجودك يحيوان
فز هتان من السرير وهو مصدوم : صققررر
صقر بضحك : اي صقر بس لا تفضحنا تكفى لحد يسمعك
هتان : معليك محد سمع
صقر : كيف الوضع عندك شفت جدي ولا جدتي
هتان تذكر جدته وقال : حرام عليك يا صقر جدتي من امس ما تاكل ومشغول بالها عليك وكل شوي تسأل لقيتو صقر
صقر : اهخ يا جدتي لازم اروح لها واكلمها
هتان : وينك الحين
صقر : عند الخيم
هتان : نص ساعه وانا عندك
قفل صقر ومد الجوال لمشاري وهو يفكر بجدته وخايف لا تتعب ويجيها شي
صقر : ابي ارجع عشان جدتي
مشاري : و الخطبه
صقر : لا تذكرني يا مشاري تكفى تعبت من هالموضوع
مشاري : مافي حل غير انك تواجهه جدي
صقر : لا جاء هتان نرجع سوا
-
عند الجد
الجد لابو صقر : وينه صقر
ابو صقر بدون اهتمام : ما ادري
الجد بعصبيه : عله تعلك انت و ولدك الي بتفشلوني عند الناس دق عليه وخله يجيني بسرررعه
دق ابو صقر على صقر مره ومرتين وثلاث ولا رد
ابو صقر : ما يرد يبه
خاف الجد على صقر لان هذي اول مره يختفي فيها ولا احد يدري عنه بس ما بين خوفه راح الجد جلس عند الإبل حقه
" الابل حق الجد بمكان الثاني وحق صقر ومشاري بمكان "
-
في بيت ابو صقر
رند : دقي على صقر مو معقوله مختفي له أكثر من ٦ ساعات!
نجد : طيب
دقت نجد على صقر وماهي دقايق الا وصولها صوت
نجد : صقررر
مشاري : اصير لتس صقر لو تبين واصير لتس كل الناس بعد
نجد : مين انت و وين صقر؟؟
مشاري : افا نجدي ما عرفتي صوتي انا مشاري
نجد : مشاري ! وش جاب جوال صقر معك
مشاري : انا عند صقر وهو راح ونسي جواله
نجد : صقر فيه شي؟
مشاري : لا مافيه الا كل خير لا تخافين
نجد : الحمدلله لا جاء قول له نجد دقت عليك
مشاري : من عيوني شي ثاني؟
نجد : لا سلامتك
قفلت نجد وهي طايره من الفرحه من سمعت صوت مشاري نجد بهمس : ياكثر الحُب اي والله
رند : يهووو اشوفتس انبسطتي الله اكبر ذا كله عشان سمعتي صوت مشاري
نجد : هاا.. لا طبعا بس عشان عرفت ان صقر بخير ومافيه شي
رند : زين الحمدلله
-
نرجع للعيال
هتان : حييي صقوري وينك يحيوان اختفيت
صقر وهو يضرب كفت هتان بخفه : جيت هنا اريح لي شوي
هتان : عسى ارتحت
صقر : نقول الحمدلله
مشاري : قوموا مشينا يلا
العيال : يللا
مشوا العيال للبيت ابو محمد ( الجد )
مشاري : اي نسيت صقر نجد تقول دق عليها دقت عليك وانت مو موجود
صقر : جعلني ما افقد حسها
مشاري بهمس : ولا انا افقد حسها وصوتها الي يلعب فيني لعب
صقر : مُر على بيت ابوي بشوف خواتي
مشاري : ابشر
وماهي الا دقايق و وصلوا لبيت ابو صقر نزل صقر يدق الباب
فتحت ام حمد و استغربت من جيه صقر ومن اختفائه المُفاجى صقر : السلام عليكم ورحمة الله
ام حمد : جيتك لنا ماراح تودينا الا بمصيبه
صقر : الناس ترد السلام بالأول
ام حمد بكُره : وعليكم السلام
صقر وهو متعود على الأسلوب الجاف من ام حمد : نادي لي البنات بسلم عليهم وامشي
ام حمد : البنات مو هنا طلعوا مع حمد
راح صقر بدون ما يرد عليها وركب السياره
صقر : مشيناا
استغرب هتان من رجعه سكوت صقر وما طول عند خواته ورجع ليساره بسرعه
هتان : وش بلاك
صقر : وفي غير ام حمد؟
مشاري : ذي الانسانه مدري شلون عمي صابر عليها
هتان بضحك : يرجال ذا مو صبر ذا حُب انت وش عرفك
مشاري : لا جابه من حُب
ضحك هتان وصقر على رد مشاري
ضرب هتان كتف صقر ينسيه كلام ام حمد و يحسسه ان الموضوع عادي والمفروض يتعود على كلامها القاسي الي دايم تكون متقصده فيه لصقر
وصلوا العيال لبيت الجد ونزل مشاري وشاف جدته الي كانت جالسه بالحوش بقهوتها والتمر وكان هذي عادتها من زمانها تجلس بالعصريه بالحوش والقهوه معها والتمر  وتستقبل اللي يسيرون عليها
مشاري : يالله انك تحيها
الجده : الله يبقيك اقلط
صقر وهو يحس بتأنيب الضمير تجاه جدته راح وجلس عندها وباس راسها : سامحيني يمه سامحيني
الجده وهي تمسح على راسه  : مسامحتك ياعين امك والحمدلله انك بخير وشوفتك والله انها ترد لي روحي
هتان : وانا الي واقف لي ساعه لا ترحيب ولا حتى معبريني لا يكون ولد البطه السوده
ضحك مشاري وصقر والجده على رد هتان
الجده بضحك : لا والله انك ولد الغاليه تعال جعلني فداك
راح هتان بحضن جدته وهو يدف صقر من حضنها : قم انقلع محد ماخذ حنان جدتي الا انت ومحد محظوظ غيرك
صقر : انشهد اني محظوظ
الجده بضحك : جعلني ما افقد حسكم
هتان : ولا حستس يا احلى جده
صقر : وينه جدي
الجده : مع ابوك عند الابل الحين شوي ويجي
صقر : زين بكلمه بموضوع الخطبه
الجده : ما عاد تبي الزواج؟
صقر بضيق : ماهو الحين ياجده لا جاء وانا ابي اتزوج جيتس
الجده : الي يريحك يا وليدي
-
عند بيت ابو صقر
ام حمد : يلا يبنات تجهزوا بنروح بيت جدكم
ريناد : وش المناسبه
ام حمد : ما تدرين ان اليوم الجمعه ولازم نتجمع عند جدتكم
ريناد : يووه نسيت
عهود : انا رايحه لبيت عمي ابو عبد العزيز عند ارياف باخذ كم غرض من عندها واجي
ام حمد : لا تطولين
عهود : ان شاء الله
لبست عبايتها وطلعت مستعجله لبيت ابو عبد العزيز وهي تمشي ما حست بنفسها والا وهي تنضرب في شخص وطاحت الأكياس من يدها خافت ان يكون صقر من طول وعرض جسم الشخص الي انضربت فيه رفعت راسها تشوف مين وارتخت ملامحها...