احببتُها وانا جاهل بدروب المُحبين

البارت - 13

صقرر : الله يعلك وراه ما قفلت الباب وانت داخل
حمد : مادريت انها بتهج
راح صقر يركض وراها واخيرًا قدر يمسكها ويدخلها داخل
نجد بضحك : من شفت حمد يدخل ويترك الباب مفتوح غسلت يدي منه
صقر : اخوتس خبل شكل يبي وحده بالعصاه على ظهره
حمد : لا يرحم امك تكفيني الي بكتفي والحمدلله انها ما هجت
صقر : كان جدي قسم بالله ليغسل شراعك
التفت نجد على صقر الي كان يشرب من حليب الناقه : يويليي شلون تشربه
صقر : تعالي اشربي بيعجبتس
نجد : والله ما ضنتي يعجبني وهذي ريحته
صقر : تعاال حمد جرب
قرب حمد من صقر واخذ الصحن من يده وقربه من خشمه يشم ريحته وهو يقول : ريحته تلوع الكبد
صقر : يازين من هبدك في ذمتيي
نجد بضحك : الله يكون في عونك يا صقر 
صقر : ماعليك من ريحته اشربه بدون من تشمه
حمد وهو يمد له الحليب : امسك امسك ما ابي
صقر : جيب جيب الله يخلف على ابوي
صقر : يلا يلا نروح نشوق ناقتي
نجد : الله معك ناقه
صقر : اي اسمها رقوب
نجد : الله تحمست اشوفهاا
صقر : يلا اركبي الحين اوريتس فيها
نجد بحماس : يلا
ركبو السياره وانطلقوا مُتجهين للخيم عند نياق مشاري وصقر ، وصلوا عند الخيم نزلوا من السياره وراحو عند مُراح الابل ، شال صقر الشماغ من على راسه وهو يحطه على كتفه ويرفع طرف الثوب
نجد : وين ناقتك
صقر وهو ياشر على ناقته ويقول : هذي هي حبيبه ابوها
نجد : يويليي يكبرها مره كبيره
حمد : والثانيه حق مين
صقر : حق مشاري
ابتسمت نجد لا شعوريًا من سمعت اسمه وهي تقول بداخلها : اهخ ياكثر الحُبب يا مشاري
قربت نجد من القصواء وهي تقول بصوت خافت : ياحضنتس دامتس ناقه مشاري في ذمتي انتس محظوظه
تذكرت نجد ملامح مشاري وتفاصيله وجهه الي تعشقه وقربت من القصواء وهي تمسح عليها بيدها وتبوسها
صقر وهو يناظرها : عاجبتس ناقه مشاري
نجد وهي ماتبي صقر يشك فيها : اي يحليلها احسها هاديه وما تاذي
حمد : وخري وخري لا ترفستس الحين تكسرتس
نجد : عبالك خوافه مثلك
صقر بضحك : ايي يا نجد عطيههه
نجد : وش اسمها
صقر : القصواء
نجد بصوت شبه مسموع : ليه بالذات هالاسم !!
حمد : وانا ابي ناقه زيكم
صقر وبيده العلف : وخر وخر بس
نجد لـ صقر : اساعدك
صقر : لا بس صبي لها مويا من الخزان
نجد : طيب
اخذت نجد الـ ليّ " الخرطوم " الخزان وهي تصب للنياق مويا قربت من مُراح الابل وبيدها شوي علف قربت منها القصواء وهي تاكل العلف الي بيدها : جعله عافيه
-
في بيت ابو عبد العزيز الساعه ١٢ الظهر
وهم متجمعين بالصاله وسواليف وضحك وسواليف هتان الي ما يملون منها وقصص ام عبد العزير وابو عبد العزيز وما تزين هالجلسه الا بالقهوه والشاي
ابو عبد العزير : اليوم ابو فلاح بينزل الديره ونبي نسوي عزيمه بالبيت
هتان : اوهه ابو فلاح بينزل الديره
ابو عبد العزيز : اي واعزم الكل نبي الكل الجي احرص عليهم يجون بالليل
هتان : ابشر
ابو عبد العزيز : وانت يا عزوز اخذ صقر معك وطير خذ الذبيحه
عبد العزيز : ابشر
ابو عبد العزيز : وانتِ يا ام عبد العزيز جهزي الشاي والقهوه والتمر وانتِ يا ارياف ساعدي امتس
ارياف : ان شاء الله
ابو عبد العزيز : بعد الغداء كل واحد فيكم يروح مكان ما قلت لكم
عبد العزيز : ابشر
-
في بيت الجد " في المطبخ "
عند البنات الي كانوا يحضرون الغداء
رند وهي تحضر الشاي : نجدد تعالي ساعديني بالغداء
نجد : وههه ما كان بالبيت الا انا ارحموني وين عهود وريناد
ريناد : كاني سمعت اسمي ها شفيها ريناد
نجد : تعالي ساعدينا بالغداء ولا بس تبين تاكلين
ريناد :  تبشرين من عيوني
الجده : يلا يا بنات جدكم يبي الغداء
ريناد : ان شاء الله
رند : وينها عهود
ريناد : بالغرفه نايمه
نجد بصراخ : ذي وش شغلتها ان شاء الله ماغير نايمه
الجده : شفيكم اصواتكم عايله
نجد بعصبيه : الاخت عهود نايمه ولا تبي تساعدنا حتى بالغداء
الجده : الله يهديتس يا نجد يمكن تعبانه
نجد : لا ياجده مو تعبانه ولاشي مافيها الا العافيه
راحت نجد غرفه البنات وشافت عهود الي كانت منسدحه ومغطيه نفسها باللحاف قربت نجد منها وهي تسحب اللحاف بقوه وتقول : متى ناويه تقومين يا استاذه عهود
عهود بنعاس : وهه نجد خليني انام شتبين
نجد : قومي صرنا بعز الظهر وانتِ للحين نايمه
عهود وهي تشيل اللحاف : خلاص قايمه ما تخلون احد ينام
طلعت نجد من الغرفه وراحت تكمل الغداء مع البنات
ام حمد : وش فيتس انتِ صوتس طالع لاخر الديره
نجد بعصبيه : يمه بنتس ذي ما تبي تسوي شي ولا تبي تشتغل معنا بالبيت !!
ام حمد : مين هي
نجد : في غيرها عهود
اخذت نجد الغداء بعصبيه وهي تحطه بالسفره ولحقتها رند بالسلطه وباقي الاكل ، تجعموو الكل على الغذاء وهذي عاده الجد لازم الكل يكون موجود على الغداء ، خلصوا من الاكل وجلسوا بالمجلس سواليف وحورات الجد الي كلها عن حلاله وعزبته
صقر : ابو فلاح بينزل الديره اليوم وعمي زايد " ابو عبد العزيز" مسوي عزيمه ببيته
الجده : ما شاء الله ، زين ما يسوي عمك
الجد : حط يدك مع عيال عمك وعاونهم ولا نقص عليهم شي كلمني
صقر : ابشر
الجد : وانت يا حمد الكلام لك بعد
حمد : ابشر يا جد
الجده لـ عهود : صبي صبي الشاي
عهود الي ما كانت مركزه معهم ولا تدري وش يقولون وبالها مشغول وتفكر بشي ثاني
الجد : لا يكون اكلم الجدار انا صبي الشاي !
التفت عليه عهود واخذت الابريق وهي تصب وحمد الي كان ميت ضحك عليها وعلى فهاوتها صبت عهود للكل وجاء دور حمد الي تصب له ناظرت فيه وتركت كاسه فاضي وطلعت من المجلس
الجد بعصبيه : صدق انتس ما تستحين
ام حمد : وش فيك ياعم على بنتي ما سوت شي
الجد : بنتس يبي الي يسنعها سنعيها وعلميها كيف تحترم اخوها
-
بعيدًا عن الديره " في بيت ابو فلاح " في الشرقيه
تعريف بسيط عنه وعن عائلته
ابو فلاح ( صالح )
صديق قديم جدًا لـ ابو محمد ( الجد ) ، يعز الجد بشكل كبيير بس شخصياتهم مرهه غيير ابو فلاح شخص متثقف وفاهم و واعي عمره ٤٧
-
زوجته حصه " ام فلاح "
انسانه طيبه ومافي احن منها وتشوف عيالها كل شي بدنيتها عمرها ٤٣
فلاح ' الابن البكر ماخذ شخصيه ابوه فاهم و واعي وماخذ الحنيه من امه يشتغل محامي متزوج من ثُريا عمره ٣٢
-
ثُريا ' زوجه فلاح تقريبًا نفس اطباع فلاح هاديه ومُثقفه تحب اجواء الديره ، ولدهم " فادي " عمره ٤ سنوات عمرها ٢٩
ظافر ' حبوب واجتماعي وفرفوش ويحب الفله و الوناسه وما يخلي شي ينكد عليه عمره ٢٦
-
رحاب ' على رغم كبرها الا انها اكثر وحده مجننه اهلها وعناديه وعباطتها الي ما تخليها عمرها ٢٣
-
في بيت ابو فلاح الي كانوا يجهزون شناطهم واغراضهم عشان ينزلون الديره
ابو فلاح : يلا يلا يا عيال اعجلوا علينا مانبي نتاخر يكفي مسافه الطريق
رحاب : يلا يا يبه يلا
ابو فلاح : يلا يا ام فلاح الله يعافيتس
ام فلاح : هذاني جيت وش بلاك مستعجل الله يهداك
ظافر : فلاح بينزل معنا
ابو فلاح : اي بينزل بسيارته
جاء فادي الي كان يركض ومعه اغراض بيده لـ رحاب
ابو فلاح : لا تركض لا تطيح وتتكسر الله يهديك
فادي وهو يعطي ام فلاح  : هذي لعمه رحاب من ماما
اخذ ظافر الاكياس من يد فادي وهو يقول : تعال تعال ورني وش فيها
سحبت رحاب الكيس من يده وهي تقول : ياحبك للقافه
ابو فلاح : امشوا امشوا يلا
ام فلاح : يلا توكلنا على الله
انطلقوا عايله ابو فلاح متجهين للديره
-
عند هتان وحمد الي يفرفرن بالحاره ويعزمون اهل الحاره على العشاء
هتان : تعال تعال نروح لعمي ابو مساعد اذا شفناه بالدكان
حمد : يلا
هتان : ايي هذا هو زين انو موجود
هتان : السلام عليك ياعم
ابو مساعد : وعليكم السلام والرحمه حياكم الله اقلطو
هتان : الله يبقيك ما تقصر يا عم بس جيت اعلمك ان اليوم في عزيمه ببيتنا وابوي موصي انك تجي
ابو مساعد : وشوله العزيمه
هتان : ابو فلاح نازل الديره وابوي مسوي له عزيمه
ابو مساعد : ما شاء الله ابد ابشر بنجيكم
هتان : الله يحيكم
هتان : يحليله ابو مساعد
حمد : ايي والله انو شخص طيب وحاله حال نفسه
عزموا الكل والكل وافق يجي وباقي ابو متعب شافوا ابو متعب الي كان جالس في دكانه
حمد : خلاص باقي ابو متعب لان تعبت بهالحر ورجولي يالله تشيلني
هتان : اي والله تعب وحر باقي العله ابو متعب
حمد بضحك : تكفى مو وقته لا تجلس تتهاوش معه
هتان : امش امش نعزمه وعساه ما يجي ان شاء الله
ابو متعب بطرف عين : شتبي انت وياه والله ان جيتكم ما تطمن وما قد شفت من جيتكم خير
هتان : الشرهه ماهو عليك الشرهه على انا جاي اعزمك ولا انت ما تستاهل
ابو متعب : اوووهه اشوف طال لسانك هتاانن
هتان : انا جاي اعزمك اليوم على عشاء ابوي تبي تجي حياك ماتبي عساك لا جيت وابركها من ساعه
ابو متعب : والله ان ابوك ما عرف يريبك ويخليك رجال
صد هتان وهو ما يبي يتمشكل معه ويعرف ابو متعب زين وطوله لسانه
حمد وهو ميت ضحك : شفيك عليه
هتان : عله تعله هذا وجهه مو وجه احد يعزمه
حمد : ادحر الشيطان يولد وامش معليك منه شايب ما عليه خلاف
-
في بيت الجد " في غرفه صقر " الساعه ٤ العصر
تذكر صقر مكالمه مقبل شاف الساعه ٤ فز من فراشه ياخذ شور على السريع طلع وبدل ملابسه واخذه مفتاح وانيته وهو مستعجل طلع من البيت بدون ما يكلم احد ركب وانيته وانطلق متجهه للمستشفى
صقر لـ السستر : وين غرفه رقم ٢١٤
السستر وهي تاشر له : هناك على اليمين بالسيب الثاني
صقر : مشكوره
السستر : العفو
راح صقر السيب الثاني التفت يناظر ارقام الغرف وفعلاً شاف رقم الغرفه تردد يدخل اوجعه قلبه ولا هو قادر يفتح الباب تهفف وهو يقول : يلا يا صقر ادخل
اخيًرا قدر يدخل فتح الباب وشاف مقبل الي كان جالس جمب ام صقر الي كانت نايمه وباين على وجهه التعب
صقر : السلام عليكم
مقبل : وعليكم السلام ، انت صقر ؟
صقر : اي صقر
انصدم مقبل من هيئه صقر وهيئه جسمه الي كان طويل وعريض ولا توقع ان صقر بهالكُبر
مقبل : تفضل حياك
صقر : تسلم ما تقصر
طلع مقبل من الغرفه وترك صقر مع امه لحاله
جلس صقر جمبها وهو يناظر وجهه الي صار شاحب وكبرت بالسن اوجعه قلبه على منظرها قدر يجمع نقسه ويمسك يدها ويشد عليها بقوه كان بقلبه عتاب واجد عليها والف سوال كان براسه والسوال الي كان يتكرر عليه
" ليه تركتيني بايام كنت محتاج وجدتس معي "
نسى كل شي بمُجرد ما شافها وشاف حالتها فتحت عيونها تناظر فيه ولا هي مصدقه ان الي قدامها ولدها الي تركته سنين مدت يدها تمسك وجهه قرب منها وعيونه الي امتلت دموع
ام صقر ببكاء : ييمهه صقر
صقر اللي لحين ماسك يدها : لبيه يمه
قامت ام صقر من السرير وصقر الي يحاول يساعدها و يسندها على المخده فتحت يدينها له تحضنه قرب صقر منها وهو يحضنها ولا هو عارف الي قاعد يصير حلم ولا لا