احببتُها وانا جاهل بدروب المُحبين

البارت-18

رددو العيال بـ : صح لسانك .. صح لسانك
قاموا داخل الخيم وكملوا سواليفهم داخل بحكُم ان الجو بارد ناموا بعد ما كل واحد سحب على الثاني ونام وحمد الي جننهم انو يحس شي يمشي حوالينه ولا هو قادر ينام ولا خلهم ينامون ، فز حمد بمُجرد ما شاف ظل شخص دخل سامي الخيمه ناظر فيه حمد وهو يقول له : اووه خوفتنييي يرجال
سامي : وراك ما تنام انت ازعجتنا مافيه احد هذا صوت الخرفان
صدّ حمد وقال : عجزت انام والله المكان يخوف
سامي : وخر وخر خلني انام
سحب سامي لحفه وانسدح ينام
حمد : انا وش جابني معكم
التفت حمد على هتان يشوفه نايم ولا لا : هتان صاحي ؟
مارد عليه هتان رجع انسدح حمد بخوف وهو يتلفت حوالينه
صقر وهو فاتح نص عين : حمد بتنام ولا شلون ؟
حمد : خلاص خلاص بنام
هتان الي كان مسوي نفسه نايم شاف حمد خايف بعد ما تاكد انو انسدح قام وهو يتسحب عنده اخذ العصاه الي كانت عند باب الخيمه وهو يدقها برجول حمد وبسرعه انسدح وسوا نفسه نايم فز حمد وهو يتلفت يمين يسار ويقول : بسم الله بسم الله
هتان الي ماقدر يمسك ضحكته عض يده عشان لا يطلع صوت ، رجع حمد انسدح قريب من فلاح ، دق هتان كتف ظافر التفت ظافر عليه وهتان الي كان حاط يده على فمه بمعنى " لا تتكلم " اشر على حمد وفهم ظافر ان هتان يبي يخوف حمد هز ظافر راسه " بنعم " اخذ هتان العصا وظافر الي طلع برا الخيمه عشان حمد يشوف ظله وفعلاً حمد شاف ظل ظافر وفز وهو يصارخ ويقول : فيي احد في احدد
فز عبد العزيز وصقر على صوته
صقر بعصبيه : حمد وش فيك تراك ازعجتنا ما خليتنا ننام ورانا اشغال
حمد : في ظل برا الخيمه
طلع صقر وشاف ظافر الي جاي من عند دوره المياه شك فيه صقر ان هو الي يخوف حمد ناظر فيه وهو يقول له : وين رحت
ظافر وهو يحك عينه يمثل النوم : رحت دوره المياه ليه وش صاير
صقر : ولاشي ولاشي خلاص ناموا
رجع الكل انسدح وظافر الي ميت ضحك اما هتان الي اول ما سمع صوت صقر سوا نفسه نايم ولا يدري عن شي انسدح هتان واخيرًا الكل نام
-
اليوم الثاني " اليوم المُنتظر ملكه شهد وظافر "
في الغرفه عند شهد
وقفت شهد عند المرايه وهي تناظر في نفسها وترتب شكلها وتشوف باقي التجهيزات رجعت جلست على السرير ودخلت عليها وعد وهي تقول لها : خلاص تجهزتي وخلصتي؟
شهد بصدمه : بيدخل الحين ؟!
وعد : لالا
شهد : عبالي ، طفشت حابسيني بالغرفه هنا
وعد : جايين البنات
شهد : زين
-
عند الرجال
جلسوا الرجال ينتظرون الشيخ وماهي الا دقايق ودخل فز فلاح وهو يحيه ويدخله المجلس مد الشيخ الكتاب لـ ظافر اخذه ظافر وهو يبتسم بحُب وقع ولف على الموجودين وهم يباركون له بعقد القران : مبروكك يا عريس ، الله يكتب لك حياه هنيه ، مبروك منك المال ومنها العيال
ظافر بابتسامه : الله يبارك فيكم وعقبالكم
مد الشيخ يده لـ ظافر يصافحه : مبروكك الله يجمع بين قلوبكم المحبه
طافر : اللهم امين
اخذ مشاري الكتاب وراح جهه الحريم وينادي : يوولدد
راحت له وعد مد لها مشاري الكتاب وهو يقول لها : خليها توقع
وعد : طيب
اخذت وعد الكتاب وراحت للغرفه الي كانت موجوده فيها شهد والبنات عطت شهد الكتاب واخذت شهد توقع ، قاموا البنات وهم يحضنونها ويباركون لها ويهنونها
رجعت وعد الكتاب لـ مشاري : بيدخل العريس اذا عندها احد خليهم يطلعون
وعد : تماام
راحت وعد وهي تقول للبنات : يلا يا بنات اطلعوا العريس بيدخل
التفت عليهم شهد بارتباك وهي تقول : لاا بنات لا تخلونيي
التفتوا البنات عليها بضحك
شهد : بنات شكلي مرتب ؟
ثُريا : تهبلين بسم الله عليتس
طلعوا البنات وتركوا شهد
-
عند الرجال
مشاري لـ ظافر : تقدر تدخل
ظافر : تماام
مشاري : بحسب لك خمس دقايق ان ما طلعت يويلك
ظافر : اقول توكل تراها زوجتي
مشاري بضحك : ادخل ادخل بس
دخل ظافر بعد كلامه لـ مشاري ناظر في شهد اللي كانت جالسه نزلت راسها اول ما دخل ظافر ، ناظر فيها ظافر وانهبل من جمالها وزينها قال في نفسه : بسم الله ما شاء الله !! وش ذا الزين كله يويل قلبيي
جلس جنبها وهو يرفع راسها له ابتسم وهو يقول : مبروك
ارتبكت شهد من حط يده على دقنها : الله يبارك فيك
ظافر وهو يتاملها : هذا الزين كله لي ؟
سكتت شهد من الاحراج وحمر وجهها بعد كلامه قرب منها ظافر وهو يرجع شعرها ورا اذنها ويقول : ماودك تسمعينا صوتك
ناظرت فيه شهد وهي تقول : وين حرف السين !!
استغرب ظافر كلامها له ولا عرف وش تقصد ضرب راسه بخفه وهو يقول : اهااا ابشري بقول حرف السين مو الكاف مع اني متعود على الكاف
شهد : مو شغلي
ظافر اللي للحين يتامل وجهه : من عيوني كم عندي شهد
شهد : وحده
ظافر بضحك : اكيد
قام ظافر وهو يقول : يلا انا بروح قبل لا يجي اخوتس العله
شهد بضحك : طيب
اوقفه كلام شهد له : اي صح ظافر
التفت لها ظافر بكل حواسه من سمع اسمه منها : عيون ظافر
ابتسمت شهد بحيا : متى الزواج
ظافر : اسبوعين او اسبوع
انصدمت شهد من موعد الزواج : منجدك !! ما يمدي اتجهز !!!
ضحك ظافر على شكلها : عيوني لتس متى تبين ؟
شهد : شهر
ظافر : وعبالتس جدي بيرضى
شهد : وش علي من جدي انا بتزوج ولا هو
ظافر : تعرفين جدي وعمامي ماراح يخلونه الا بعد كم اسبوع
شهد : يالله !!
ظافر : خلاص بحاول فيهم ولا تزعلين ولا الود ودي اخذتس الحين
شهد بضحك : وبلا زواج ؟
ظافر بضحك : ايي
تجرأ ظافر وقرب منها وهو يحضنها وما خلها بخاطره، أنلجمت من حضنه لها عضّت شفايفها السُفليه بإرتباك وتوتر أحتر جسمها وحمر وجهها وهي تحس بيدينه الي كانت محاوطتها وتمرر على ظهرها ، اختلطت ريح العود بريحتها نزل يده لـ خصرها رفعت راسها له وهي تشوف ملامح وجهه من قرب شد على خصرها بقوه وهو هايم فيها ومنهبل على قربها منه ابتعدت منه بخجل باس راسها وهو يقول : يلا انا رايح انتبهي لتس
شهد وهي بالقوه تنطق : وانت بعد ، الله يحفظك
طلع ظافر وهو مو حاس بنفسه وطاير من الوناسه والابتسامه اللي ما فارقت وجهه طلع وهو يبصم بالعشر ان شهد خذت قلبه وعقله طلع وقابلوه العيال وهم يضحكون : افف الابتسامه شاقه وجهه ، واضح معرسنا مبسوط
ظافر بضحك : لا اله الا الله شفيكم هجمتوا علي
قرب صقر وهو يسلم على ظافر : على البركه الله يتمم لكم على خير
ظافر : اللهم امين يارب
-
الطرف الثاني عند شهد
نطت شهد عند المكيف وهي تحس بحراره بجسمها ابتسمت وهي تتذكر حضن ظافر لها وكلامه : يويليي ما توقعت ولد الديره مزيون كذا
اقتحموا عليها البنات وفزت شهد بخوف من فتحت الباب
رحاب بضحك وحماس : هاا وش صاررر ؟
شهد بضحك : ما صار شي شفيكم مشتطيين
وعد وهي تضرب شهد : وهه شهدد قوليي شصاارر
طلعت وتركت البنات والبنات الي راحوا وراها ركض مسكوها وهم يقولون : انطقيي !!
شهد : تبون الصدق
رحاب : اييي وش
شهد : ولدكم ما شاء الله مزيون
البنات بصراخ : ااوووههه شهددد
رحاب بضحك : عجبككك اخويي ؟
شهد بانكار : لاا خفيفف بزياده
نجد : اكيد تتوقعي بيثقل عند ذا الزين ؟
ثُريا : يحلوك يا شهد لايقين على بعض الله يتمم لكم يروحييي
شهد : يا حياتي انتو اللهم امين
-
عند الرجال
سامي : شغلوا خلونا نلعب
هتان بحماس : يلاا يلا تمم
شغل فلاح وبدو العيال باللعب والعرض
هتان وعبد العزيز و وسطهم صقر ومشاري وجنبه هادي وباقي العيال صافين وهم يرقصون ويعرضون مسك صقر يد مشاري ويسحبه على جنب وياخذ السيف ويعرض فيه باحتراف ، ومشاري الي بيده الثانيه السيف ويرقص وباقي العيال يلعبون ويصفقون دخل بينهم ابو فلاح وصرخوا العيال بـ " العببب يبو فلاحح "
تحمس ابو فلاح من تشجيع العيال له مد له صقر السيف واخذه وهو يرقص فيه بكُل فن ، ومشاري الي عطى صقر السيف واخذه وهو يلعب فيه وباقي العيال يصفقون ويصارخون
-
عند البنات
وعد الي كانت رايحه للمطبخ والتفتت على الشباك وشافت الرجال يرقصون ويلعبون ركزت على صقر الي كان يلعب مع ابو فلاح ابتسمت وهي تقول : يويلل قلبييي بسم الله عليك ما شاء الله الله يحميك
تنحنحت نجد والتفتت عليها وعد بسرعه
نجد بغمزه : ها تناظرين مين
وعد بانكار : لا ما انظار احد
نجد بضحك : عليناا تراتس مفضوحه
وعد بضحك : واضح ؟
نجد : مرهه
وعد : لا تلوميني احبه مقدرر
نجد : الله يلوم الي يلومك
وعد : اهخخ مقدر على هالرقص والعرض والهيبه
نجد : كانتس تغزلتي فيه واجد
وعد : من حقيي
نجد : مو من حقتس للحين ما صار رجلتس
وعد : الله يجيب هاليوم على خير
نجد وهي تحضن وعد : امين يارب ، الله يجمعكم على خيير ياربب
وعد : امينن
ناظرت فيهم عهود من بعيد وهي كانت شاكه ان وعد تحب صقر وتاكدت الحين من بعد نظراتها لها صدت بكرهه وراحت جلست مع باقي البنات بالغرفه وشوي لحقوها نجد و وعد وجلسوا يخططون للزواج وايش راح يلبسون
-
جلس ظافر محتار يكلم مشاري او لا ، شاف مشاري الي كان طالع من المجلس فز وراه وهو يقول له : مشاري مشاري
لف عليه مشاري : هلا
ظافر : ما ادري وش اقولك اعرف ان تقاليدكم غير عنا بس دام حنا ملكنا ابي اكلمها
استغرب مشاري من كلامه واحتدت ملامحه : تكلمها !! شلون تكلمها
ظافر : اكلمها بالجوال
مشاري بحده : ماعندنا هذي الامور تبي تشوفها تعال البيت حياك الله بس تكلمها اعذرني ما اقدر اساعدك ، وشهد ماعندها جوال شلون تبي تكلمها ؟!
ظافر : بشتري لها جوال
مشاري : لما تصير حُرمتك وقتها اشترا لها ما اقدر اخلي وحده من خواتي عندها والباقي لا
انحرج ظافر من كلام مشاري : من حقك
راح مشاري كمل طريقه و ظافر الي راح جلس في صدر المجلس مع الرجال
لف ظافر على جده و ابو فلاح وهو يقول : الزواج ان شاء الله بعد شهر
الجد بحده : وليه مو بعد اسبوع
ظافر : ليه العجله يا جد وناجله عشان المره تتجهز وتخلص اغراضها كلها
الجد : لالا يمدي تتجهز معها اسبوعين
ابو فلاح : ظافر وهو صادق عشان الحرمه تتجهز وتخلص
الجد : بعد اسبوعين وقفلوا على الموضوع
صد ظافر بكرهه وهو وده يصير الزواج بعد شهر على كلام شهد بس يعرف جده مستحيل يقدر يغير من كلامه قام من وسط المجلس وراح جهه الحريم يكلم شهد عن موضوع الزواج شاف رحاب وهو يناديها بصوت شبه عالي : رحابب رحابب
التفتت رحاب على جه الصوت وهي تقول : هلا
تنحنح ظافر : نادي لي شهد
رحاب وهي تغمز : الله اكبر صار نادي لي شهد بدل امي
ظافر اللي كان ناوي اصلا يشوفها ويجلس معها وتعذر بموضوع الزواج : اخلصي بسرعه بمشي
رحاب : طيب طيب
راحت رحاب وهي تنادي شهد اللي كانت تسولف مع البنات : شهد كلمي رجلك برا
البنات بضحك : حركاتتت والله
لفت شهد عليها باستغراب : تو شفته وش يبي
رحاب : مدري عاد
قامت شهد من عندهم وراحت للمرايه تجدد روجها ضبطت شعرها بسرعه وطلعت لـ ظافر اللي كان ينتظرها
شهد : هلا
ناظر فيها ظافر اللي كانت لابسه فستان شبه هادي وقصير ولونه اسود وماسك على جسمها : بتذبحيني ؟
رجعت شهد شعرها ورا اذنها : بسم الله عليك وش اذبحك فيه
ظافر : بتذبحيني بهالزين والروج الاحمر اللي اخذ قلبي
نزلت راسها بخجل من كلامه ، تنحنح ظافر ورفعت راسها له وهو يقول لها : عجزت اقنع جدي يصير الزواج بعد اسبوع قالوا بعد اسبوعين تكفيتس؟
شهد : ان شاء الله تكفيني
ظافر : معليتس بتكفيتس انتِ بس اعجلي
شهد : شايفني اله تراني بتزوج ويبي لي وقت عشان اتجهز
نزل ظافر وتساوى مع طولها : طيب يالنتفه
تخصرت شهد : ما سمعت ؟
ظافر بضحك : نمزح
شهد : اي ادب
ظافر : يلا انا بروح
شهد : الله يحفظك
لف ظافر وعطى شهد ظهره ناظرت فيه وهي تشوف هيبته وطوله وعرضه طلع ظافر وهي تقول في نفسها : ياربب ثبتني ، شلون ولد المُدن اخذ قلبي بهالسرعه !!!
" انتهت الملكه على خير والكل رجع لـ دياره "
-
اليوم الثاني في بيت ام مشاري
الكل اجتمع على الفطور وجلسوا وهم يفطرون بهدوء استغرب مشاري ان شهد و ومها مو موجودين ناظر في وعد و ام مشاري وهو يقول : وينهم شهد ومها
وعد وهي تحط كاسه الشاي على الطاوله : للحين نايمين
ام مشاري : هذا هم جوو
نزلت شهد وماهي الا ثواني و لحقتها مها
شهد ومها : صبحكم الله بالخير
الكل : صبحكم الله بالنور
ام مشاري : يلا تعالوا
جلسوا البنات وفطروا مع الباقي
-
في بيت ابو فلاح
ام فلاح وثُريا ورحاب اللي كانوا ناوين يروحون السوق ويخلصون تجهيزات الزواج دخل فلاح وجلس معهم يفطر وشوي لحقه ابو فلاح واجتمعوا الكل على الفطور
ثُريا لـ فادي : تعال حبيبي اجلس
قام فادي من عند فلاح وهو يجلس عند ثُريا
ابو فلاح : وينه ظافر مو من عوايده ما يفطر معنا
ظافر الي سمعه وهو نازل : هذاني جيت
اخذت ثُريا المحرم وهي تتغطى من ظافر ، جلس ظافر ما بين فلاح وابو فلاح يكملون فطور
ابو فلاح : وش عاد ناقصكم لـ الزواج
ام فلاح : ناقصتنا اشياء واجد يبو فلاح
طلع ابو فلاح من جيبه 500 وهو يعطي ام فلاح : مو مشكله هذي فلوس خذوا فيها اللي ناقصكم
ظافر : ما تقصر انا معي فلوس وان شاء الله ماراح ينقصهم شي
ابو فلاح : معليه معليه خذوها للاحتياط
رجع ابو فلاح ياخذ 400 من جيبه ويعطي رحاب و ثُريا : وهذي لـ بناتي الحلوات
ثُريا : لا يا عم فلاح مو مخلي شي ناقصني الحمدلله
ابو فلاح : يا بنتي خذيها وانا اعرف فلاح مو مقصر معك بس اعتبريها مني لك هديه
رحاب وهي تاخذهم : ما تقصر ياعمي
فلاح لـ ثُريا : ثُريا صبي شاهي
ثُريا : ابشر
اخذت ثُريا براد الشاهي وهي تصب لـ فلاح
-
عند بيت الجد
طلع صقر من غرفته وهو يشم ريحه اكل : الله وش ذي الريحه الحلوه
الجده بابتسامه : تعال يمه افطر
صقر : يلا جايكم
راح صقر وهو ياخذ شور سريع وجلس معهم على الفطور
الجد لـ صقر : ماودك تعرس زي ظافر
صد صقر بضيق من سالفه الزواج : ان شاء الله بس ماهو الحين
الجد : ومتى ناوي تعرس نبي نشوف عيالك
صقر : بتشوفهم باذن الله
التفتت الجده على صقر الي وقف اكل : اكل يا يمه
صقر : ابشري
خلصوا وقاموا الكل من على الفطور وصقر اللي راح غرفته ورجع للصاله وشاف الجده اللي كانت جالسه لحالها ، جلس صقر على رجولها وهي تلعب بشعره
صقر : والله يا يمه القلب فاقد له محبووب
الجده : وش حادك يا يمه ما تشوفه وتريح قلبك
صقر : عجزت والله بس باذن الله بنلتقي اذا ربي كتب
صقر هنا كان يقصد وعد والجده الي كانت عارفه صقر من يقصد وعارفه بـ وضعه من وقت ما قال للجد يبي يخطب وعد والجد رفض
-
عند بيت ابو صقر
البنات الي كانوا يرتبون اغراضهم من بعد ما رجعو من بيت جدتهم ، رند اللي كانت ترتب اغراضها ومن بين اغراضها لقت ثوب لـ صقر اخذته وهي تقول للبنات : بنات مو هذا حق صقر ؟
لفو عليها البنات : ايي وش جابه باغراضتس
رند : ما اعرف شكل حطيته بالغلط مع اغراضي
كملوا البنات ترتيب ورند الي اخذته تلبسه : بنات شرايكم ؟
نجد بضحك : ياخبلهه وش تسوين
ريناد بضحك : رندد شكلتس يضحك اهخ لو يشوفتس صقر
رند وهي تناظر بالمرايه : الله لايق علي ولا شرايكم ؟
نجد بضحك : يبي له تقصير شوي
رند : يويليي يالطول
نجد : ما شاء الله صقر من طوله شوي ويوصل السقف
رند بضحك : ايي والله
ريناد : معليه نقول لـ جدتي تقصره لتس
رند : قصدتس بتخنقني فيه
دخل عليهم حمد بالغرفه : هذا حقيي !!
رند وهي ميته ضحك على ملامحه : لالا حق صقر
حمد : وش جابه معتس يا خبله
رند : لقيته بـ اغراضي
حمد : عطيني عطيني
اخذه حمد وهو يلبسه وبعد جاء عليه طويل
حمد بصدمه من طول الثوب : يساتر حتى علي طويل
رند : مو من الثوب منك انت يالقصير
اخذ حمد الثوب وهو يرميه على رند : اخوتس الطويل كانه نخله
نجد بضحك : لا يسمعك صقر
حمد : يعقب يخوفني
ريناد بضحك : ما يكون حمد اذا ما هايط
حمد الي سمعها من برا الغرفه : بعلمتس بعدين من يهايط
طلع حمد من الغرفه وشاف ابو صقر وام حمد اللي كانوا جالسين بالحوش جلس معهم وشاف ابو صقر اللي كان ساكت وباين انو ضايق من موضوع
حمد : وش فيك يبه وجهك مو عاجبني
ابو صقر : والله الدنيا ضايقه فيني
حمد باستغراب : عسى ما شر من ايش !
ابو صقر وهو يقلب في مسبتحه : اخوك يا حمد اخوك
حمد : وش فيه صقر !!
ابو صقر : رميته سنين ولا دريت عن حاله ولا فكرت اسال عنه ولا اساله ناقصك شي ولا حسسته اني ابوه
ام حمد بحده : لا تخاف ماهو ناقصه ولاشي عمي وعمتي مو مخلين شي ينقصه
لف عليها ابو صقر بعصبيه : بس هذا ولديي يا ام حمد ولدي زي ما حمد ولدي وهذول بناني وهو يكون ولدي اللي من لحمي ودمي !!
طلعوا البنات على صراخهم وصواتهم الي كانت عاليه وبسرعه ابو صقر اخذ نفسه وطلع من البيت
عهود : شفيه ابوي !!
نجد : ليه ابوي معصب ؟
سكتت ام حمد وحمد بعد سكت ولا ردوا على اسالتهم صرخت نجد بعصبيه : شفييهه ابويي !!
قامت ام حمد لغرفتها وحمد الي بقى لف عليهم وهو يقول : ضايق على حال صقر
نجد : ليه وش فيه صقر ؟
حمد : ابوتس تو يصحى على نفسه ويعرف انو ترك صقر
قام حمد ولحق ام حمد وراح غرفته وبقو البنات بالحوش ونجد الي كانت مشاعرها ملخبطه ماتدري مبسوطه من ابوها الي تذكر ان عنده ولد ولا تزعل ان ممكن ام حمد تلعب براسه ويرجع ابو صقر الاولاني وينسى عن صقر !!
-
راح ابو صقر لـ دكان ابو علي وفعلاً شافه
ابو صقر بضيق : السلام عليكم
ابو علي : وعليكم السلام والرحمه يالله انك تحيه اقلط اقلط
ابتسم ابو صقر : ما تقصر يبو علي ارتاح
ابو صقر : شلونك عساك بخير
ابو علي : بخير اللهم لك الحمد ، انت قولي شخبارك كيف امورك ما صرنا نشوفك
زفر ابو صقر ضيق وقال : والله ضايقه فيني الدنيا يبو علي ولاني عارف وش اسوي
ابو علي با استغراب : علامك عسى ما شر !!
ابو صقر : والله مدري وش اقولك بس حاس زي النار تاكل قلبي ، ضيعت ولدي من السنين ولا اعرف كيف ارجع الامور لـ مجاريها
ابو علي وهو يخطب على كتفه : قول الحمدلله الي هداك وباذن الله كل شي يرجع وترجع علاقتك بولدك احسن من اول وصقر يبقى ولدك واكيد بيعذرك
صدّ ابو صقر بضيق : وين يعذرني يبو علي مافيها اعذار هذي
ابو علي : بتزين وانا اخوك بتزين ان شاء الله ، انت كلم صقر واجلس معه وتفاهموا وتنحل
ابو صقر زفر براحه من كلام ابو علي الي ريح قلبه شوي : باذن الله ، يلا عاد انا استاذنك
ابو علي : وين ما شربت شاهي
ابو صقر : مره ثانيه مره ثانيه ، يلا فمان الله
ابو علي : ودعناك الله
قام ابو صقر من عند ابو علي وهو يحس براحه من بعد كلامه له والي يفكر في كلامه ويكلم صقر ويرجع علاقته بـ صقر كـ اب الي تركه سنين ولا لاقي عذر لهجره له ،
ابو صقر الي كان حاس بتانيب الضمير تجاه صقر اللي رماه سنين ولا درى عن احواله ولا هو عارف وش يسوي ولا له وجه يروح يكلم صقر ضاقت فيه الدنيا وقام يشكي لـ ابو علي رفيقه
ابو صقر وهو يكلم نفسه : افرجها يارب من عندك وسامحني وقرب ولدي مني
شاف على طريقه ابو فلاح ومعه ظافر رفع يده يسلم عليهم وقال : شلونك يبو فلاح
ابتسم ابو فلاح وقال : على ما تحب ، شلونك انت
ابو صقر : بخير الحمدلله ، شخبارك يمعرسنا
ابتسم ظافر وقال : تماام الحمدلله
كمل طريقه ابو صقر وهو يتمشى بالحاره ولا وده يرجع للبيت ويسمع كلام ام حمد الي يغث فضل يتمشى بالحاره لف على صوت ابو متعب اللي كان يتكلم على زباينه ابتسم وقال له : عهدك قريب يبو متعب
ابتسم ابو متعب وهز راسه له وكمل طريقه ابو صقر
______
ارحبو يحلوينيي جايتكم بالبارتات الحلوهه🤌🏻❤️❤️❤️