احببتُها وانا جاهل بدروب المُحبين

البارت - 9

لبست عبايتها وطلعت مستعجله لبيت ابو عبد العزيز وهي تمشي ما حست بنفسها والا وهي تنضرب في شخص وطاحت الأكياس من يدها خافت ان يكون صقر من طول وعرض جسم الشخص الي انضربت فيه رفعت راسها تشوف مين وارتختت ملامحها من بعد ما تأكدت انو مو صقر حمدت ربها وهي تقول : عمى ان شاء الله ما تشوفني قدامك
هتان : هذا الطول والعُرض وتقولين ما تشوف قدامك؟
عهود : من الي طلع قدامي !
هتان : وبتقنعيني الحين انو انا السبب؟
عهود باستحقار : ايييي و وخر من طريقي يكون احسن
هتان وهو منصدم من طول لسانها : يازين من قص لسانتس اي والله
اخذت عهود الأكياس وهي تناظر في هتان بطرف عين مرت من قدام هتان وهي مستحقرته وهتان الي رافع حاجب ويناظر فيها اتجهت عهود لبيت ابو عبد العزيز وهي تدق الباب وطلعت لها ارياف الي كانت تنتظرها عند الباب
عهود : يوووه احس قلبي بيوقف الحمدلله طلع هتان ولا صقر
ارياف : بسم الله شفيتس شفيه هتان
عهود : حكت لها الي صار معها والموقف الي كان بتموت منه لا طلع قدامها صقر جلست ارياف تضحك على موقفها مع هتان
ارياف : بموت يربي تخيلي لو طلع صقر بس كان ذبحتس
عهود : اي قسم ما يخلي فيني عظمه صاحيه
ارياف : يويليي انا خفت عاد كيف انتِ
عهود : ما اقول الا الله يعين لطيفه عليه
ارياف : صدق تعااليي وش عاد صار عليها هي وصقر
عهود : مدري بس من كلام صقر ما عاد يبيها ولا يبي الزواج مدري وش علته
كملوا عهود وارياف سواليفهم عن خطبه صقر
-
عند بيت الجد
رجع الجد وابو صقر للبيت فز صقر من مكانه وباس راس جده وهو يقول : هلا جدي
الجد بزعل منه : وين شردت امس من سمعت ان راح نخطب لك بنت فهد
صقر : كنت عند الإبل وعلى سالفه الخطبه انا ما عاد ابيها
الجد بعصبيه وصراخ : ماهو على كيفك بتتزوج غصبن عنك وش تبي الرجال يقول عنا وحنا عطيناه كلمه اليوم ان شاء الله بالليل نروح نخطب البنت
صقر : ماني برايح
الجد : تكسر كلمتي يا صقر !!
صقر : اذا تبي تزوجني انا مستعد اتزوج بس اخذ الي ابيها
الجد بطرف عين : ومن تبي تاخذ؟؟
صقر : وعد بنت عمتي سعاد
الجد : تُحرم عليك الين اموت زواج من بنت سعاد مافيه
الجده : هااا وش بلاك انت يرجال الولد يقولك يبي وعد خله ياخذها ولطيفه الله يرزقها بالنصيب ان شاء الله
الجد بعصبيه : ناديه مالتس دخل
طلع صقر ودمه يفور عصبيه وقهر وتأمل ان جده راح يوافق لو قال له بتزوج واخذ الي ابيها ما كان يدري ان جده همه كلمته ما تنكسر عند الكل وكلمته هي الي تمشي وما يبي يقول عنه ابو فهد كلام ماهو زين لا خطب بنته وما تمت الخطبه من ناحيتهم لحقه مشاري الي كان راح ينفجر غيره وفضووله الي ذبحه يعرف بين وعد وصقر شي
مشاري وهو ماسك كتف صقر : بينك وبين وعد شي؟؟؟
صقر بعصبيه : مشااري لا تفور عصبيتي اكثر من كذا ما بيني وبينها شي وانا ابيها على سنه الله ورسوله !!!
مشاري وهو يضرب كتف صقر بخفه : تبيها تعال اخطبها وتبشر بهاا وانا اخوهاا
صقر بقله حيله : على ذا الخشم بس عطني شوي يومين احاول بجدي
مشاري : عليه الشحم، وابد خذ راحتك بس مو زود
صقر بضحك : يارجال لو بيدي خذيتها الحين ما عاد اقدر بدونهااا
مشاري وهو ياخذ نعوله ويرميها على صقر : استح استح يحيووان وهذا وانا اخوها
صقر وهو ميت ضحك : يشيخ توكل بس
مشاري : اجل تبي وعد هااا
صقر : باخدها عناد عن الكل ومرجله وطرق خشووم
مشاري : انشهد انها محظوظه دام بتاخذ واحد مثلك رجال عن الف رجال والنعم فيك يبو ادهم
صقر ومن يضرب كتف مشاري بخفه : معليك زود يا عضيدي
_
عند بيت ابو فهد
ام فهد لفهد : والله قلبي ماهو مرتاح لخطبه لطيفه من صقر
فهد : يمه الله يهداتس وشوله ذا الكلام الحين ماراح يصير الا كل خير ان شاء الله
ام فهد : الله يعدي هذا اليوم على خير
فهد : امين
لطيفه : يمه ولا انا قلبي مرتاح له صليت استخاره مره و مرتين ولا ارتحت
فهد : اقول سدي حلقتس وعن الدلع الي ماله داعي وش فيه صقر رجال واخلاقه الكل يشهد بها
لطيفه : تبيني اخذ واحد ما ابيه ولا قلبي مرتاح له !!
فهد : لا يسمعتس ابوي يقص لسانتس
لطيفه : يمه شفيتس ساكته !! راضيه بنتس تاخد واحد ما تبيه
ام فهد بحزن على بنتها : والله يا بنتي كلمت ابوتس ولا راضي يسمع مني
ليالي : ما الومتس والله من يأخذ صقر عصبي ولا احد يقدر يتفاهم معاه
لطيفه : لا تخوفيني منه أكثر تكفيين
حسين : الله يكون في عونتس يوخيتي والله انتس اخذتي لتس واحد دمه حاار وما يسكت عن الغلط
لطيفه بزعل : ابيكم لي عون تصييرون لي فرعون !! صدق انكم اخوان بلا فايده
طلعت لطيفه غرفتها وهي تفكر ليه تحس قلبها مو مرتاح لصقر من الرغم ان الكل يعرف صقر ويعرف أخلاقه وتربيته الي الكل يشهد بها من الي بعيدين عنه والي قريبين كانت تبي اي شي يصير عشان تتكنسل الخطبه وجاء ببالها تكلم نجد عن الي تحسه تجاه صقر بحُكم انها أقرب وحدها لها وراح تفهمها وتتفهم مشاعرها وسبب ورفضها لصقر
-
في بيت الجد
اجتمعوا الكُل ببيت الجد وكان هذي عادتهم كل جمعه يجتمعون في بيت الجد
جلسوا البنات وهم حول البعض وهذي الجلسه واللمه الي ما يملون منها الي كلها سواليف وضحك وحش وفضفضه وما تزين الي بالحب والقهوه والشاي
مجدُدولين : اهخ ياكثر يالحُب لهالجلسه
ارياف : اي والله
شهد بكل ثقه : ومحد محليها الا انا لا تكذبون
مها : الثقه الي الله يحرمنا منها
نطت شهد وأخذت الفنجال ترميه على مها وطاحو البنات ضحك عليهم
مها : الصدق يزعل
رن جوال نجد وقامت من عند البنات تشوف من المتصل وشوي وصلها صوت لطيفه وهي تنطق : نجد ابي اكلمتس بخصوص خطبتنا انا وصقر اسمعيني تكفين
نجد : عسى ما شر اسمعتس انطقي
لطيفه : اخوتس الكل يمدح بأخلاقه وترتبيته بس انا قلبي مو مرتاح لهالخطبه ماني مرتاحه لصقر ابدا احس ماراح نتوفق مع بعض
نجد : طيب الموضوع بيدتس ليه ما ترفضين !
لطيفه : رفضت والله رفضت بس اهلي مُصرين سبب رفضي شي تافهه وان شي الي احسه مجرد وسواس
نجد : طيب ايش بيدي اسوي
لطيفه : كلمي صقر قولي لطيفه ما تبيك قولي اي شي بس لا تتم هذي الخطبه يانجد
نجد بتفهم : فاهمتس وفاهمه شعورتس و ابشري يعيوني بكلمه وما يصير الا الي يسر خاطرتس
لطيفه : يجعلني ما افقدتس يا نجد
نجد : ولا افقدتس يعيون نجد
قفلت نجد من لطيفه وهي تقول : يالله وكأنها حاسه ان صقر مو لها اهخ يا صقر الله يجمعك مع وعد على خير يارب ويعوض لطيفه بالاحسن
طلعت نجد تشوف صقر وتكلمه عن رفض لطيفه له لبست عبايتها وطلعت وشافت عهود تناظر لاحد من جهه الرجال وهي مبتسمه استغربت نجد وانحت تشوف مين وانصدمت ان عهود تناظر في مشاري حبيب قلبها وحُب حياتها الاول جلست واقفه في مكانها وهي مو قادره تتحرك ولا تسوي شي صحيت على نفسها وهي تنطق بهمس : عهوود عهوودد
التفت عهود لجهه الصوت : اصص اقصري حستس لحد يسمعتس
نجد وهي ما تبغى عهود تعرف انها شافتها تناظر لمشاري : وش موقفتس هنا لحالتس
عهود : ولاشي ولاشي
ودخلت عهود بعد كلامها الي قالته لنجد وتركت نجد في صدمتها راحت نجد جهه الرجال تنادي صقر وطلع بوجهه مشاري
نجد و الدموع بعيونها : ناد لي صقر
مشاري وهو يناظر فيها رغم أنها صاده عنه : هلا بالزين
نجد : مشاري مو وقتك ابي صقر بسرعه
استغرب مشاري من كلام نجد الي ما تعود على هالكلام منها
مشاري : افاا من مزعلتس قولي لي
نجد بحقد : انتتت
مشاري : انا زعلتسس !!!
نجد : انت مو بس زعلتني انت كسرتني بعد وقفتك مع عهود وضحكاتكم مع بعض ياقذر
انصدم مشاري من كلامها وكيف نجد تقول كذا عنه وهذا الشي ما صار
مشاري وهو ماسك فكها : انا قذرر !! انا يا نجد تقولين عني كذا انااا؟
نجد وهي تبكي : مشاري خلااصص فكنيييي عورتنييي
مشاري باصرار : متى شفتيني واقف معها
نجد بانهيار : ما ادري ما ادري بس شفت عهود تناظر فيك وهي تضحك
استوعب مشاري على نفسه وفك فكها الي بان عليه الاحمرار وعلامه يده الي طبعت على خدها وتقطع قلبه على نجد واول مره يشوفها تبكي بانهيار وبسببه ندم انو مد يده عليها نزل راسه وهو يتعوذ من الشيطان
ويقول : خلاص اهدي ولا عاد اشوف هالدموع مره ثانيه ... و متوقعه مني اني التفت لغيرتس واخلي هذا الزين كله؟ لا عهود ولا غير عهود ياخذوني منتس ارتاحيي
نجد بضحك مع دموع : اي خلاص تطمنت ان ما بينكم شي وادري اني تسرعت بكلامي اسفه
مشاري بضحك : حصل خير، طيب والحين ما عاد تبين صقر
نجد وهي راجعه جهه الحريم : لا خلاص اهم شي شوفتك تكفيني
مشاري : يويييلل قلبييي ارفقي يا بنت محمد
راحت نجد وقلبها يرفرف وطايره من الوناسه وتطمنت ان ما بينه وبين عهود شي وتأكدت ان مشاري ماراح يكون الا لهاا و تذكرت كلام عهود عن مشاري واحترق قلبها غيره وحاولت تتناسى سيره عهود وكلامها عن مشاري
-
عند البنات اللي كانوا جالسين يلعبون
رند : ارياف لا تستعبطين حطي واحد بسرعهه
ارياف : كيفي خليني العب على راحتي
مجدُولين : غبيه تقولتس واحد
ارياف : وش عرفني
شهد : يلاا طسو فزنا عليكم
ريناد : لعبكم ماش
ارياف : بنات وينها نجد اختفت قبل شوي كانت معنا
مجدُولين : لا اله الا الله على نجد ما تجلس ما غير تحوس من الصاله للمطبخ وتضيف الحريم
وعد بضحك : اي والله انتس صادقه يعمري عليها
ريناد : الحين تلقونها مع العجايز تسولف عاد تعرفونها تموت على سواليف الحريم
طاحوو البنات يضحكون على ريناد
شهد بضحك : قسمم بالله صااددقهه
جت ام مشاري و ام عبد العزيز والجد على صوت البنات الي كانت اصواتهم عاليه والي تنسمع من برا من زود الضحك
الجد : وصم ان شاء الله قصروا حسكم اصواتكم واصله لاخر الديره
رند : لييه يا جده خلينا نسولف
شهد بكذب : لا ياجده تراتس فاهمتنا غلط الله يهديتس شفنا كلب مر من عندنا واحنا بالحوش فدخلنا وحنا نصارخ
ام مشاري وهي تغمر للبنات : اي يمه كان في كلب ومن اول يدور هنا وشكله جيعان ويدور اكل ف شافوه البنات وخافوو
الجده : هيا لا اسمع لكم حس والله ان الكلب شافكم وخااف منكم وهج
طاحو البنات يضحون على جدتهم واتجهو للمطبخ يحطون الاكل ولقو نجد تقطع السلطه
ريناد : قلت لكم نجد اذا تبونها بتلقونها في المطبخ
نجد : خلوني فلحالي تدرون ان احب الطبخ واحب اطبخ
ارياف : فااتس الكذب الي صار يين شهد وعمتي سعاد على جدتي
نجد بضحك : اوفف ليه ليه وش صار
ارياف : وهي تحكي لها الي صار ونجد الي كانت تضحك على كذبه شهد وام مشاري
نجد : يحليها  حتى عمتي سعاد شاركت معكم بالكذبه
شهد : اي هذي محزمي الكفو فديتها نبع الحنان
نجد : يلا ساعدوني بالاكل
وعد : يلاا يلا
-
عند الرجال
قام صقر لجده وهو يقول له : متى بنخطب البنت الساعه صارت ٧
الجد : رجعت لعقلك الحين وتبي تخطب البنت
صقر : يا جد قلت ان تبيني اتزوج ف ما ابي الا وعد غير وعد ماني ماخذ غيرها
الجد : اذا تبي تعصيني وتكسر كلمتي لا اشوفك بينا ولا تجلس معنا اللي بيكسر كلمتي لا اشوفه بينا
قام صقر ورجع مكانه لان عارف جده ومستحيل احد يقدر يقنعه
مشاري : قوم نصلي وادعى ربك بيفرجها ان شاء الله
قاموا العيال مُتجهين نحو المسجد يصلون
صلى صقر وهو يدعي ربه ان جده يغير رايه وتكون وعد من نصيبه
اخذ صقر القران يقرا وجمبه مشاري الي يسمع تلاوته  وحس ان قلبه ارتاح شوي قفل القران ورجعه مكانه
مشاري بابتسامه خفيفه : الله يريح قلبك
صقر وهو يبادله الابتسامه : امين
-
عند بيت ابو فهد
في المجلس عند ام فهد الي كانت ترتب المجلس وتحضر القهوه والشاي وتنتظر الضيوف وكانت مستسلمه لهاليوم عكس لطيفه الي ما جهزت نفسها ولا كانت مستعده لهاليوم والي كانت بالصاله تنتظر ابوها يرجع للبيت وتكلمه عن الخطبه وكانت تتمنى يكون هالمره حن عليها ويتفهم رفضها ويوقف معها جاء ابو فهد للبيت وفزت لطيفه له تحب راسه وهي تقول بترجي : يبه طالبتك لا تصير هالخطبه لا تتم يبه بنتك ما تبيه ماراح اكون مرتاحه معاه ولا حتى اتخيل اني اكون زوجه له
ابو فهد : يا بنتي الله يهداتس تعوذي من الشيطان وما يصير الا كل خير باذن الله وهذي كلها وسواس
لطيفه : يبه ما قدرت والله ما قدرت اتقبل فكره اكون زوجه لصقر صليت اسخاره مره ومرتين وثلاث ولا حسيت اني مرتاحه ابدًا لا تزوجوني وانا مو راضيه
ابو فهد بتفهم : ابشري علي هالخشم الي يرضيتس بيصير هالخطبه ماراح تصير وش تبين بعد
لطيفه بفرح وتبوس راس ابوها : يا جعلنييي ما ابكيك والله ، الحمدلله الله يخليك لنا ويطول في عمرك يا سندي
ابو فهد وهو حاضن لطيفه : ويخليكم لي عزوه وسند
ام فهد بضحك : الله الله وش ذي الاحضان الي ما تصير الا بمناسبه علومني وش المناسبه
ابو فهد بضحك : خلاص ما عاد فيه خطبه اهم شي رضى بنتي حبيبه ابوها
ام فهد : يالله لك الحمد اجل ضموني معكم
لطيفه بحُب : تعالي تعالي
ضموا بعض بمناسبه خطبه صقر و لطيفه تكنسلت ومحد يقدر يوصف فرحه لطيفه وقتها ارتاحت وحست بشعور الانتصار الي ما توقعت ان ابوها يكنسل الخطبه عشانها
ابو فهد : يلا يلاا تجهزوا نروح لبيت ابو محمد
راحت لطيفه غرفتها وهي مبسوطه واللي كانت تتجهز عشان تلحق البنات عند بيت الجده
-
عند نجد
اللي طلعت للمره الثانيه تشوف صقر وهي ما تبي ترجع بيتهم الا وصقر عارف ان لطيفه ما تبيه شافت حمد من بعيد وهي تنادي عليه : حمدد حممدد
حمد : لبيه
نجد : لبيت حاج ياعيوني ناد لي صقر
حمد : ابشري كم عندي نجد
نجد : الله يبشرك بالجنه ياعين اختك
حمد وهو ينادي على صقر : صقررر يا صقيرر
صقر من بعيد : ههلاا
حمد : تعال تعال نجد تبيك
صقر : لبيه وش بغيتي
نجد : ابي اكلمك بموضوع الخطبه
صقر وهو حاط كل تركيزه على كلام نجد : سمي اسمعتس