احببتُها وانا جاهل بدروب المُحبين

البارت-17

ظافر : انا حمار يوم اني واقف اخذ واعطي معك
رحاب : طس بس
ام فلاح : بس بس انتِ وياه لا يسمعكم ابوكم
كملت رحاب تقرا كُتبها وتشرب قهوتها
-
مر يومين وكانها دهر على قلب ظافر الي كان ينتظر الموافقه من شهد ، اما عن الباقي الكل كان مشغول ولاهي بحياته والي يبي يمشي هاليومين بسرعه ويعيش باقي حياته ويعديها على خير والي مو طايق حياته من الاساس
-
عند صقر والعيال بالمستشفى " يزاورون فهد "
هادي : الحمدلله على سلامتك وتقوم بالسلامه يارب
فهد : الله يسلمكم ، يشهد الله ان جيتكم ردت لي روحي
مشاري : يا حبيب قلبي يا فهد
صقر : يلا عاد لا تجلس تدلع علينا اشتقنا تكون بينا
فهد بضحك : ان شاء الله كم يوم واطلع
صقر : انا بطلع شوي واجي
العيال : تمام
طلع صقر برا المستشفى لان يحس انكتم من ريحه المستشفى طلع يتمشى وهو مستمتع بالاجواء الي كانت بارده والجو هادي وريحه المطر الي واضح ان الشتاء على الابواب جلس على احد الكراسي وهو يناظر الناس الرايحه والجايه
-
في بيت ام فلاح
راحت ام فلاح لـ غرفه ظافر الي كان جالس بغرفته فتحت الباب وهي تقول : عندي لك خبر
حس ظافر ام فلاح جايه تقول له عن موافقه شهد قفز ظافر من مكانه وهو يقول : وافقوا صح
ام فلاح بضحك : اي اي وافقوا
ظافر وهو يرفع يدينه ويقول : ياربيي لك الحمد
ام فلاح : ان شاء الله اليوم نحدد موعد الملكه
ظافر : الله يكتب اللي فيه الخير
-
في المجلس عند الحريم
ام متعب : عاد صدق الي سمعناه يـ ام محمد يقولون فاطمه ام صقر رجعت لولدها
ناظرت الجده فيها وهي تقول : اي صدق
ام متعب : زين ردت لـ عقلها ولا في ام تسوي سواتها
نجد وهي تخزها : الشماته ماهي زينه يـ ام متعب
شهد : والله يـ خوفي تقلبين اخس منها
ام متعب : فال الله ولا فالتس يـ ام لسان
اشرت ام مشاري لـ شهد بمعنى انها تسكت فهمت شهد وسكتت وهي الود ودها تقوم تكفخها
قامت انتصار " بنت ام متعب " راحت عند نجد وهي تدلع بصوتها و تقول : وديني دوره المياه
نجد وهي تاشر لها : هذا هو
انتصار : مشكوره
شهد : الله يلوع كبدها تحسب يوم انها تتغنج صوتها زين
وعد : مستحملتها هي وامها
راحت انتصار دوره المياه غسلت و طلعت فجائها طلوع صقر من المجلس ، ابتسمت بخبث طيحت سوارتها بعمد عشان صقر يشوفها وفعلاً هذا الي صار حطت يدها بالارض تمثل انها تدور لها التفتت على صقر الي تحسبه باقي واقف وصقر الي كان طالع للحوش اخذت سوارتها بعصبيه وهي تقول : مسوي ما تشوف هين يا صقر
دخلت الغرفه وهي تناظر للبنات بطرف عين
-
الطرف الثاني عند صقر في الحوش
طلع صقر من المجلس وبمُجرد ما شاف انتصار عقد حواجبه وهو يشوف تصرفها الي كان واضح انها متعمده لف وجهه بنيه ما يشوفها ، طلع فوق السطح وهو يمد رجوله وينسدح عجبه منظر السماء الي كانت معبيه نجوم والقمر الي شبه مكتمل طلع بوكيت الدخان وهو يطلع حبه ويحطها بين شفايفه ويزفرها ، طفاها ورجع جهه الحريم وهو يقول : يوولدد
التفتت وعد جهه الباب بمُجرد ما سمعت صوته ابتسمت وهي تقول. : جعل ما افقد هالحس
طلعت نجد وهي تقول : لبيه
مد لها الثلاجه وهو يقول : لبى نباتس جددي القهوه
نجد : ابشر
اخذت نجد الثلاجه من يد صقر وراحت للمطبخ تجددها لحقها صقر الي كان ميت تعب ولا قادر يشيل نفسه
نجد : شفيك سرحان
صقر : ها .. لا بس تعبان و ودي انام
نجد : باقي راسك يعورك
صقر : بينفجر احتاج انام جدتس ما يخلي احد ينام
نجد : الله يعينك عاد تعرف جدي
جاء فادي يركض وهو يقول : يقول جدي  يلا جيب القهوه
صقر : يلا يلا جاي
اخذ صقر الثلاجه وطلع للمجلس ونجد الي دخلت عند الحريم
-
في المجلس عند الرجال
دخل صقر ودخل وراه ابو هادي وهو يقول : السلام عليكم
الكل بصوت واحد : وعليكم السلام
صقر بصوت خافت : لا بالله واضح ان الليله مطوله
مشاري الي سمعه بحكُم انو جنبه : سواليفهم ما تجي الا وانت تعبان
صقر : اي وربي انك صادق كانه عناد
جلس صقر وهو يحس بدوخه من كثر التعب اشر لـ حمد يصب لرجال فز حمد وهو ياخذ الدله و يصب لهم
هتان بخبث : هات عنك اصب ابي ابين لـ جدي انكم خلتوني اصب ويقول عنكم مو رجال
حمد : من يومك خبيث
مد هتان الفنجال عشان حمد يصب له وحمد الي صب على يد هتان بعمد صرخ هتان بألم
الجد : ولدد علامك انت
حمد وهو ميت ضحك : كبيت عليه القهوه بالغلط
الجد :  ما تشوف
حمد : بالغلط يا جد
طلع حمد من المجلس وهو ميت ضحك ولحقه هتان اللي يتحلف ويتوعد فيه ان ما يخليها له
فلاح لـ صقر : علامك ؟
صقر وهو يحط يده على راسه : تعبان شوي
فلاح : قوم قوم ريح من الصباح وانت تشتغل ماقد تعبت
صقر : شلون تبيني ارتاح وجدي كلشوي مناديني
فلاح : معليك حنا موجودين
ابتسم صقر لـ فلاح وهو يعرف ان مستحيل جده يخليه ينام وفي مجلسه رجال قرر يجلس الين الرجال يروحون وينام
-
عند الحريم
بدأ المجلس يفضى من الحريم وما بقو الا البنات راحت نجد عند الجده الي كانت منسدحه بتعب وكل شوي تغفى تقدمت لها وهي تصحيها تروح غرفتها تنام وفعلاً قامت الجده ورجعت غرفتها وبقو البنات بالغرفه لحالهم استاذنت مجدُولين من البنات ورجعت البيت وماهي دقايق ولحقتها ارياف وبقو بنات سعاد وبنت ابو فلاح وحرمه فلاح
-
عند العيال
فلاح الي كان منتظر ثُريا ورحاب يطلعون ومشاري الي منتظر خواته ، طلعوا بنات سعاد التفت صقر على وعد الي كانت عبايتها مفتوحه قدام العيال عقد حواجبه بعصبيه وهو يناظر بعبايتها من تحت فهمت وعد حركه حواجبه قفلت عبايتها وهي تناظر فيه بضحك وظافر الي ما شال عيونه على شهد وشهد الي مو داريه عنه ولا عن هواه ولا هي للحين مصدقه انها بتتزوج طلعت مع خواتها وشوي لحقوها رحاب وثُريا
فلاح لـ حريمه : يلا مشينا
فادي لـ صقر : مع السلامه عموو
صقر وهو يبوسه : مع السلامه
فلاح : فمان الله
صقر : بحفظ الرحمن
ناظر صقر لـ وعد الي كانت معطيته ظهرها بس قلبها معاه
صقر لـ فادي : انتبه لـ نفسك زين
وهنا صقر كان يحاكي وعد ويقصدها بكلامه لـ فادي ، التفتت عليه وعد وفهمت انو كان يقصدها هيي ابتسمت وكملت طريقها للبيت
والكل رجع بيته ورجعو البنات غرفتهم وناموا وصقر الي نام علطول من شدة التعب
-
اليوم الثاني بدون اي احداث جديده
الكل كان يجهز لـ ملكه شهد وظافر اختلطت مشاعرهم من فرح وحُزن ، بحكُم انها راح تفارقهم وتسافر مع ظافر لمدينته وهذا الشي الي كان مضيق الكل وشهد الي يعتبرونها غير عن الكل ولها طعم بكل مكان متواجده فيه ولا هم مصدقين ان راح تتركهم
-
عند ام فلاح في السوق
ام فلاح الي كانت تقضي الاغراض وتاخذ الي ناقصهم و ظافر الي يمشي معها بكل سوق تروح له ورجوله الي كانت تشكي من شدة الام
ظافر : يمه كل هذي الاسواق الي دخلناها ولا خلصتي
ام فلاح : اصبر الله يهديك
ظافر : يمه تكفين رجولي ماني بقادر امشي عليها
ام فلاح : خل عنك هالدلع هذا وانا عجوز اقدر امشي على رجولي وانت بعز شبابك مو قادر تمشي !!
سكتت ظافر وهو يساعد امه بالاغراض وفي كل مره يقول لها تعبت ذكرته ان هذا زواجه
دق عليه فلاح وهو يقول : خلصتوا ؟
ظافر : وين تبينا نخلص وامك قاشه كل شي وتاخذ اثاث جديد للغرفه
فلاح : وشوله الاثاث
ظافر : عشان بتجلس عندنا كم يوم وبعدين نسافر
فلاح : خساره على الفاضي
-
في بيت ام مشاري
شهد الي كانت متوتره ووتروها البنات اكثر ولاهي قادره تصدق ان راح تاخذ ولد مُدن لا تعرفه ولا تعرف اطباعه وشخصيته ما تعرف غير اسمه شالت هذي الافكار من راسها الي قلقتها ، شافت خواتها الي كانوا يحوسون بالاغراض ويرتبونها وكل شي حوسه صرخت وهي تقول : وههه خلااصص وترتونييي
دخلت عليهم نجد وهي تقول : هلا بعروستنا الحلوه
شهد : زين جيتي تكفين تعالي احس بيجيني هبوط
نجد : وليهه
شهد : من كثر التوتر
وعد : ما تنلام ماخذ ولد مُدن !!
نجد : وعد اسكتي اسكتي لا تتوتري ولاشي ما عليتس من كلام وعد وش فيه ولد المُدن
شهد : ما ادري ما ادري ما اعرف غير اسمه يبنات !!
اخذت نجد كاسه المويا وهي تعطي شهد وتهديها وفعلاً هدت شهد وكملوا البنات ترتيب الاغراض
-
الطرف الثاني في المطبخ
اللي كان موجود فيه " نجد وشهد ورحاب "
رحاب لـ شهد : لا تخافين ظافر والله حنون ما تلقين احن منه وخبل نفسك يعني تطمني لا توسوسي صح انك ما تعرفينه زين بس اوعدك لما تتزوجون بتقولي رحاب صدقت بكلامها
ابتسمت شهد براحه وهي تقول : ان شاء الله
نجد : تطمني والله يكتب لتس كل خير ياربب
شهد : وهه بنات خلااص شوي واصيح مو قادره استوعب اني بتركم
رحاب : لا من قال بتتركينا بتجلسين ببيتنا كم اسبوع وبعدين تسافرون مكان ما تبون وعلى فكره احتمال كبير ان ينقلون عمل ظافر هنا
شهد : صدقق؟ ياربب ينقلونه مقدر اخلي ديرتي واهلي
نجد : ياحبيبتي
طلعوا للحوش مع ام مشاري وكملوا سواليفهم
-
في بيت الجد " غرفه صقر "
طلع صقر من غرفته بعد ما بدل ملابسه شاف جدته اللي كانت مع ام علي تتقهوى بالحوش
صقر : السلام عليكم ، شلونتس يا ام علي
الكل : وعليكم السلام
ام علي : بخير يوليدي شلونك انت عساك بخير
صقر : على ما تحبين ، يلا عاد انا استاذنكم
الجده : انتبه لعمرك
صقر : ان شاء الله ، فمان الله
ام علي : محد كاسر خاطري الا هالولد
الجده : اي والله انتس صادقه
ام علي : الله يكون في عونه
الجده : امين
-
الطرف الثاني عند صقر
طلع صقر وهو يركب وانيته اوقفه صوت الجد وهو يقول : شوف النياق معك وشيك على الحلال كله
صقر : ابشر
الجد : وجيب معك لبن " لبن النياق "
صقر : طيب
التفت صقر على الجهه الثانيه وشاف مشاري الي كان جالس مع عيال الحاره اشر عليه بيده وجاء مشاري وهو يقول له : على وين
صقر : بروح عند الابل تخاويني؟
مشاري : تمم يلا
ركب مشاري مع صقر وانطلقو لـ لنياق
-
في بيت ابو فلاح
وهم ينزلون الاغراض ويرتبونها
ابو فلاح : الله يهديك يا فلاح وشو ذي الاغراض كلها مالها داعي
ام فلاح : تستاهل بنت يوسف وقليل بحقها
رحاب : عاد ما تصدقون لو قلت لكم ان البنت خايفه و متوتره
ظافر : شايفتني وحش تخاف مني
ابو فلاح : معليه معليه لانها ما تعرفك زين ، وانت خلك زين معها ولا اشوفها تشكي منك
ظافر : لا تخاف بحطها بعيوني
فلاح بضحك : الله الله ظافر ما عرفتك
ضحك ظافر على رد فلاح
ام فلاح : قوم قوم انت وياه من هنا وتعالي رحاب ساعديني
رحاب : فلاح تكفى ناد ثُريا تساعدنا
فلاح : لا معليش ما ابي حرمتي تتعب رتبي لحالك
رحاب : لا تخاف ما تتعب هيي
فلاح : اذكري ربك لا يجيها شي بسم الله عليها
رحاب : هذا الي يبيني ادبغه الحين
ظافر وهو يشجع رحاب : ايي عطيه رحاب
رحاب : انا وش مجلسني معكم اصلاً اروح ارتب ابرك من اني اقابل وجهكم
ظافر : افاا رحابي
فلاح : شوف شوف كيف تجي الحين
فلاح بصوت عالي : رحاب بروحح البقاله تبيين شي
رحاب الي جت تركض وتقول : ايي اييي تكفى
ظافر الي مات ضحك وهو يقول : ما همها غير بطنها
فلاح بضحك : طسي اقول ماني ماخذ لك شي
راحت رحاب بزعل التفت ظافر على فلاح وهو يقول له : حرام زعلتها
فلاح : ذي تزعل؟ ذي تعرف تلعب علينا عشان تاخذ الي تبيه
رحاب بصوت عالي : سمعتك سمعتك ترا
فلاح بضحك : تشوف
-
عند صقر ومشاري
اخذ مشاري البرسيم وهو يحطه لنياق وصقر الي يحط لها مويا جلس مشاري بتعب وهو ياخذ علبه المويا ويقول : شرايك ننام هنا ونقول العيال يجون
صقر : جبتها تم كلمهم يجون
مشاري يلا
رفع مشاري السماعه وهو يدق على هتان وصوله صوته وهو يقول : هلاا مشاري
مشاري : هتان جيب العيال وتعالوا عند المخيم بننام هناك
هتان : تم تم اكلمهم واجي
مشاري : زين
قفل مشاري من هتان وراح يساعد صقر
-
الطرف الثاني عند هتان بالشارع
دخل هتان البقاله وهو ياخذ الاغراض الي وصت فيهم ارياف اخذ الاغراض وطلع وشاف هادي بطريقه
هتان : وين ما عاد نشوفك
هادي : والله مضغوط بالدوام
هتان : عاد اليوم لازم تجي معنا بالمخيم
هادي : ابشر
هتان : قول لـ سامي بعد يجي
هادي : تماام
راح هادي وهتان الي رجع بيتهم وارياف الي جت تركض وتاخذ الاغراض من يد هتان وبسرعه هتان رفع الكيس عشان لا تاخده : اشكريني وانا اعطيتس
ارياف وهي تحاول تاخذ الكيس : هتان مو وقتك جيب يلاا
هتان : متعني ورايح اخذ لتس وما تشكريني عيب عليتس
ارياف : شكرا خلاص يلا جيب
هتان : مو كذا بطريقه محترمه وبادب ولا ما اعطيتس ترا
عبد العزيز : غلطه عمرتس انتس قلتي لـ هتان يشتريهم لتس بيجلس يذلتس عليهم
ارياف : اعرفه حيوان
هتان : ياورعه اخوتس انا لا اقص لسانتس
ارياف : بتجيب ولا والله لا اعلم ابوي عليك جيب
هتان : لالا خلاص خذيهم
ارياف : ايي ما تمشي الا بالعين الحمرا
هتان : اقول يلا طسي لا اعطيتس كف على هالعين
ارياف : تعقب وانا اخت عزوز
عبد العزيز بضحك : يخسي يقربتس وانا اخوتس
هتان : يع يشينكم عاد
ارياف : توكل يلا
اخذت ارياف الكيس وراحت المطبخ ترتب الاغراض
وعبد العزيز وهتان الي جلسوا بالصاله يتقهون مع ام عبد العزيز وابو عبد العزيز
-
عند صقر ومشاري
اللي كانوا يرتبون الخيمه ويجهزون الجلسه للسهره على بال ما يجون العيال ، جاء هتان وعبد العزير وسامي وماهي دقايق الا و وصلوا هادي وفهد وحسين وظافر وفلاح وحمد
ظافر : زمان عن الخيمه
مشاري : اي والله
هتان : يا كثر الشوق للخيمه
جلسوا العيال بعد ما رتبو الجلسه والخيمه و ولعو النار جلسو حوالين بعض وهم مستانسين بالاجواء البارده ولمتهم مع بعض ، والي كانوا يغنون والي يقول قصايد
التفت فلاح لـ صقر وهو يقول له : هات صقر سمعنا قصايد
ابتسم صقر بمُجرد ما تذكر وعد قال قصيده عن " محبوبته وعد "
قال فيها :
لا شفتها دنياي عن تغيب
يلفتني موج الهوى بين الاهداب
إن كان ذبحني من عيونتس نصيبي
اموت لـ عيونتس ولا أحسب حساب
-
ردوو العيال بـ : صح لسانك .. صح لسانك
قاموا داخل الخيم وكملوا سواليفهم داخل بحكُم ان الجو بارد ناموا بعد ما كل واحد سحب على الثاني ونام وحمد الي جننهم انو يحس شي يمشي حوالينه ولا هو قادر ينام ولا خلهم ينامون
_______
اهلاً اهلاً ، اعذروني على التاخير الشغف لك عليه🤏🏻
انستا " xn_7ll "