احببتُها وانا جاهل بدروب المُحبين

البارت-19

مرت اسبوعين وجاء اليوم المُنتظر اللي الكُل ينتظره ، زواج شهد وظافر وجاء يومك يا عريس ، من ناحيه البنات الي كانوا يتجهزون والمكان الي كان فوضى من الميك اب والفستانين والاستشورات والي تبخر والي تكمل ميكبها وتبخر الفساتين والطرف الثاني عند العيال الي كانوا يحلقون ويضبطون المعرس ويجهزونه
-
عند العيال
صقر لـ للعيال : يلا يلاا لا تاخرونا على الحلاق ما عاد فيه وقت
لف عليه هتان وقال : وراك مستعجل انت تونا بدري
صدّ صقر وقال : نبي نخلص بسرعه اعجلوا
فلاح : يلا يلا جاين
مشاري : يلا يا رجال عشان ناخذ الحريم من المشغل
ظافر : يلا توكلنا على الله
انظلقوا العيال مُتجهين للحلاق
-
عند البنات بالمشغل
خلصت مجدُولين ولفت على البنات وقالت : شرايكم بالميك اب ؟
ارياف : تهبلين ومرهه خفيف وناعم
قامت وعد وهي تضبط لـ مجدُولين الفستان : تجنني بسم الله ما شاء الله بس ناقصتس العريس
ضربتها مجدُولين بخفه وقالت : وجعع انقلعي
لفت شهد على البنات بتوتر : بنات الفستان مره كبيير
تقدمت نجد ومسكت يد شهد وقالت : هذا من كثر التوتر، ولا الفستان مره حلو عليتس
شهد بتوتر : طيب والميك اب ؟
نجد : يجنننن
ام هادي : خلصتو يا بنات ؟
ارياف : باقي رحاب
ام هادي : يلا عجلوا الحين يجون الرجال
ارياف : ان شاء الله
-
" وصف بسيط للفساتين "
شهد : فستان هادي نوعًا ما وماسك على خصرها
وعد : فستان شبه هادي وعلاقي ومنفوش من تحت
مها : اسود وبعد علاقي وماسك على خصرها ومبين جسمها
ثُريا : ابيض ومرسوم عليه ورد بنفسجي وازرق
رحاب : سماوي ومطرز عليه ورد ابيض من تحت وفوق
-
عند العيال
خلصوا العيال من الحلاقه
هتان للعيال : من بيروح للحريم ؟
مشاري : انا باخذ اهلي
صقر وفلاح : وانا بعد
هتان : خذوا اهلي معكم
فهد : تكفى يا مشاري خذهم معك ما معي سياره بروح مع هادي
مشاري : صرت سواق عند اهلكم وانا ما ادري
صقر بضحك : يلا يلا مشينا
مشاري : يلا
افترقوا العيال الي راح لاهله والي راح للقصر
وصل مشاري وصقر للمشغل دق صقر على نجد و وصله صوتها تقول : هلا
صقر : يلا خلصتوا ؟
نجد : اي خلاص خلصنا
صقر : من الي موجود داخل
نجد : وش تبي فيهم
صقر : اخلصي يبنت الحلال بشوف اذا هم كثير نص يجون معي ونص مع مشاري
نجد : عمتي سعاد وبناتها وامي وخواتي وام عبد العزيز وبنتها وام هادي وبنتها
انصدم صقر من كثرهم عدل جلسته وقال : لا اله الا الله هذول وين نحطهم
نجد : قول ما شاء الله اذكر ربك
صقر : ما يجيهم شي لا تخافين يلا يلا انزلوا
نجد : زين
وعد للبنات : يلا يا بنات مشاري برا ينتظرنا
سمع صقر صوت وعد قبل لا تقفل نجد حط يده على قلبه وقال : والله اني فاقد هالحس اهخ يا وعديي
-
لبسوا البنات عباياتهم بسرعه ونزلوا وركبوا ،
في سياره صقر " خواته وام هادي وبنتها "
في سياره مشاري " خواته وام مشاري و ام عبد العزيز وبنتها و ام حمد "
سياره فلاح : رحاب وام فلاح وحرم فلاح وام فهد وبناتها
-
في سياره صقر
الي كان يدور من بينهم وعد صدّ بضيق وقال وهو يهمس : شلون تدورها واخوها موجود مثلاً بتترك سياره اخوها وتجيك !!
وثواني انفتح الباب الخلفي لف صقر على الباب الي انفتح وسمع وعد الي كانت تقول : سياره مشاري ما كفت اذا فيه مكان بجي معكم
صقر من سمع صوتها وهو ابتسم لا شعوريًا وقال بهمس : اذا ما يوسعتس المكان احطتس بحضني وعيونيي
ريناد : اي تعالي
ركبت وعد وناظرت فيه صقر الي كان يناظرها من ركبت ارتبكت من نظراته ولا قادره تلف وجهه بحكُم ان يمينها مجدُولين ويسارها رند
عدل صقر مرايته على وعد ونجد الي كانت تراقب حركات صقر وكان واضح على صقر حُبه لـ وعد
مشى مشاري بسيارته واشر على صقر بمعنى " يلا مشينا "
هز صقر راسه وانطلقو مُتجهين القاعه
-
بعد العشاء في القاعه
ومن هننناا ابتدت مراسم الزواج " في زواج آل زايد " والقاعه الي بدت تُعج بالاصوات والقاعه الي اتملت من المعازيم والحضور منهم الاطفال والحريم والعجايز والطقاقه الي تقول
" يا فرحكُم والسرور يا أهل الطيب والحمية .. اقبلوا يا كُل الحضور .. جعلها ليله هنية "
ومن بعد هالمقطع الكُل نزل للكوشه وبدو بالرقص والردح وانتقلت الطقاقه للمقطع الثاني تقول
" جعل الفرح يضوي بعالي سماها أتم الله سعادها وجعل الهناء خطاها "
" ليلة على كف الفرح ننتظرها الله يهني
عريسنا .. ليلة فرح بـ العُمر تشابة ليلة العيد "
-
عند الرجال
دخلوا الفرقه وبتدت تجهز نفسها، وبدو بالعرضه النجديه والكُل تحمس ودخل مع ابو فلاح ومشاري بالرقص
واشتغل اول مقطع " الله يجمع شملكم يا آل زايد "
والكل يردد مع الفرقه " الله يجمع شملكم يا آل زايد "
رفع فلاح طرف ثوبه واخذ السيف باليد اليمين ويساره هتان الي ماسك يده وفلاح يلعب بكُل احتراف التفت عليه فهد يبتسم اشره عليه بمعنى " تعال " جاء فهد ومد فلاح له السيف وقام يعرض فيه ، وباقي العيال الي كانوا صافين ويصفقون لـ فلاح وفهد وهتان ، فهد الي كان يناقر بالسيف ويلعب فيه والرجال يعززون له ، وصقر الي شاش راسه ودخل من بينهم بابتسامه عريضه وهو يرفع طرف ثوبه وغطى على فهد باللعب صرخوا العيال بتعزيز لـ صقر : حيييك يا صقيير ، الله عليككك
ابتسم صقر من تعزيزهم له كمل يلعب والعيال ماسكين يد بعض ويرقصون ، راح سامي وهو ماسك يد ظافر يرقص معهم وفعلاً دخل بينهم والعيال صرخوا من دخوله بينهم وقف جنب ابو فلاح ومسك يده اليمين واليد الثانيه ماسك فيها البشت
جلسوا العيال بعد تعبب من الرقص والردح وفلاح الي مو قادر يوقف من التعب جلس وهو يحس بدوخه بحكُم ان كان يشتغل طول اليوم ولا اكل شي
لف حسين على ظافر وباس خشمه وقال : مبروكك يا عريسنا
ابتسم ظافر وقال : الله يبارك فيك
خبط مشاري كتف ظافر وقال : هالله هالله بوخيتي حطها بعيونك وانتبه تشكي منك
ظافر بابتسامه : لا توصي حريص
أبتسم مشاري وجو العيال يسلمون عليه ويباركون له
" ومن هنا انتهى الزواج وانزفت شهد ورجعت للغرفه ياخذها ظافر
عند البنات
دخلت رحاب الغرفه عند شهد : جاهزي ؟ بيجي ظافر ياخذك
شهد بارتباك : جاهزه بس باقي لي كم غرض اخذهم
رحاب : وينهم ؟
شهد : شوفيه بالدولاب وجيبي عبايتي معتس
رحاب : زين
دخلت مها و وعد والدموع الي كانت معبيه عيونهم
شهد : لااا تكفووونن لا تبكوني معكم انا بالقوه ماسكه نفسيي
تقدمت وعد وحضنت شهد : بتوحشينيي بيوحشني حستس بالبيت وصراختس اهخ مو قادره اوقف بكي ولا قادره اتخيل ان ماراح تكوني معنا
شهد وهي تمسح دموعها وتوسع صدرها : عبالتس بخليتس كليوم جايه عندكم لا تخافين
ضحكت وعد وتقدمت شهد وحضنت مها وهي تبكي : بتوحشينيي مرهه مهاوي
مها بدموع : انتِ الي بتوحشينيي
دخلوا البنات وسلموا عليها والكُل طلع من عندها ودموعه بعيونه ، التفتت شهد على الصوت الي كان عند الباب وسمعت مشاري الي يقول لـ ظافر : ادخل يا معرسنا
ابتسم ظافر ودخل ولف على شهد الي كانت بكُل زينتها
ابتسم ظافر وقال : تبارك الرحمن سُبحان من سوا هالجمال
ابتسمت شهد بخجل وجلس ظافر جنبها وقال : يلا مشينا؟
رفعت راسها وهي تناظر بعيونه الي ما شالها عنها : يلا
ظافر : بنادي رحاب تساعدك
شهد : طيب
دخلت رحاب وهي تساعد شهد باغراضها ركبت السياره وام مشاري الي كانت جالسه توصي ظافر على بنتها
ام مشاري بدموع : انتبه لبنتي حطها بعيونك والله انها كل دنيتي
ابتسم ظافر من خوف ام مشاري على بنتها : لا تخافين يا عمه شهد بعيوني قبل تكون بقلبي
ام مشاري لـ شهد : وانتِ يا بنتي حطي بالتس على رجلتس
شهد : ان شاء الله
ام مشاري : ودعتكم الله
دخلوا العيال يسلمون عليه ويباركون له دخل مشاري وهو يوصي ظافر على شهد
ركب ظافر السياره بعد توصيه ام مشاري على شهد وبعد ما العيال ودعوه وانطلق متجهه للفندق
-
عند فلاح بالسياره
فلاح الي كان ينتظر ثُريا تركب السياره، لف على فتح الباب الخلفي وطلع فادي : وينها ماما ؟
فادي : الحين تجي
ركبت ثُريا ولف عليها فلاح وقال : وينك تاخرتي الله يصلحك
ثُريا : كنت اخذ الاغراض شفيك مستعجل
صدّ فلاح وهو كان منهلك تعب : وين مستعجل من اول انتظر
مسكت ثُريا يد فلاح وقالت : اسفهه
فلاح : حصل خير
كمل طريقه فلاح للبيت
" وبكذا انتهى زواج ظافر وشهد والكل رجع لـ دياره "
-
في الفندق عند شهد وظافر
دخلوا الغرفه وجلست على السرير بتعب ناظرت في ظافر الي كانت تبيه يطلع عشان تبدل حس ظافر بنفسه تقدم لها وقال : بجيب العشاء وانتِ غيري ملابسك
ناظرت فيه شهد وقالت : اللهجه وينن !!
ضحك وقال : اقصد ملابستس
طلع ظافر يجيب العشاء وشهد الي بدلت ملابسها بسرعه قبل لا يجي وراحت لـ التسريحه تفك شعرها دخل ظافر وحط العشاء على الطاوله تقدم لها وحط يده على خصرها ناظرت فيه شهد وقالت : ساعدني بشعري
ظافر : شلون افكه ذا
شهد : ما ادري تعبني مو راضي ينفك احس راسي بينفجر من الصداع
ضحك ظافر وقال : ما تبين يجيتس صداع وكل ذا بشعرتس
ناظرت فيه شهد بحده وقالت : ما يضحك وكل ذا عشان سواد عيونك
ظافر بضحك : ليه ما تستاهل
شهد : لا
ظافر الي للحين يفك شعرها : ما يحتاج كل هذا انتِ حلوهه بدونه
واخيرا قدر ظافر يفك شعرها لفت شهد عليه وقالت : باخذ شور على السريع
ظافر : يلاا عشان ناكل
شهد : طيب
-
عند فلاح
ثُريا الي كانت تنزل باقي الاغراض من السياره اخذ فلاح الاغراض من يدها وقال : هاتيها عنك وخذي فادي نايم بالسياره
ضحكت ثُريا على نومه فادي في السياره اخذته وهي توديه للغرفه ، اتجهت للتسريحه تمسح الميكب لف عليها فلاح وقال : عادي تخلينهم يشوفوا هالزين وانا رجلك ما شفتك !
تقدمت ثُريا وحطت يدها على وجهه، ضحكت وقالت : ما امداني اوريك كنت مره مشغوله
شال فلاح يدها من وجهه وصدّ بمزح وقال : مو عذر كان تقدري توريني
ثُريا : فلاح لا تستعبط ما امداني صدق وهذا انت شفتني الحين
فلاح : لا فيه فرق بين الحين وبعدين
اخذت ثُريا المخده وهي ترميها عليه وراحت تمسح الميكب وتبدل ملابسها ضحك فلاح على شكلها وانسدح، ثُريا اللي بعد ما مسحت الميكب وبدلت ملابسها ناظرت في فلاح وقالت : فلاح نمت؟
فلاح الي كان يمثل النوم انسدحت ثُريا بهدوء عشان لا تصحي فلاح، تقدم فلاح وهو يحضنها وقال : من قال لك اني نمت
ثُريا بضحك : وليه ما رديت طيب؟
ضحك فلاح وناموا
-
اليوم الثاني عند ظافر وشهد
دق جوال شهد وفزت شهد تاخذه قبل لا يصحى ظافر اخذت جوال وشافت المُتصل ام مشاري ردت وهي تقول : هلاا يمه
ام مشاري : يلا يا امي متى بتجون على الغداء؟
شهد وهي تحك عينها : ليه كم الساعه !!؟
ام مشاري : ولا تدرين كم الساعه !! الساعه صارت ١١ وانتو الحين نايمين
شهد : ماحسينا بالوقت والله وكننا تعبانين
ام مشاري : مو مشكله يا يمه، لا تتاخرون
شهد : ان شاء الله
قفلت شهد وناظرت في ظافر الي للحين نايم دخلت الحمام وصلت صلاه الفجر وراحت لـ ظافر تصحيه
شهد بصوت خافت : ظافر ظافرر
ظافر بنعاس : اممم.. هاا
شهد : يلا قوم نلحق على الغداء
ظافر رجع انسدح وتغطى باللحاف : ما ابي اتغدا خلوني انام
شهد بتعجب : لا يكون يحسب نفسه عند اهله
شهد وهي تسحب اللحاف : ظافرر يلا قومم الساعه صارت ١١
قام ظافر والنوم بعيونه ضحكت شهد على شكله ناظر فيها ظافر وقال : شفيك تضحكين
شهد : لالا بس كنت اكلم وعد وقالت شي ضحكني
ظافر : كم الساعه؟
شهد : ١١
ظافر : وليه ما صحيتيني اصلي الفحر !!
شهد : توي انا صحيت
ظافر وهو رايح للحمام : يلا تجهزي عشان نروح
شهد : طيب
راح ظافر ياخذ له شور ويصلي الفجر خلص صلاه وشاف شهد الي كانت محتاره بين فستانين ناظر فيها وقال : منتظرته يقولتس البسيني انا !
ضحكت شهد وقالت : احترت مدري وش البس
اشار ظافر على الفستان الاسود وقال : هذا حلو البسيه
شهد : تمم
ظافر : يلاا لا تتاخري
شهد : زينن
لبست شهد واخذت العطر وهي ترش منه راحت لـ ظافر الي كان ينتظرها بالصاله : شرايك ؟
ظافر : يجننن اصلاً انتِ الي محليه اللبس
ابتسمت شهد وقالت : مشينا؟
تقدم ظافر لـ شهد ونزل راسه لـ عُنقها يشم ريحه العطر الي كانت فايحه ابتسمت شهد بخجل مسك يدها وقال : يلاا
ركبوا السياره وانطلقوا مُتجهين لـ بيت ابو فلاح
-
في بيت ابو فلاح
ابو فلاح : فلاحح
فلاح : سمّ
ابو فلاح : جهزتوا كل شي ؟
فلاح : اي يبه خلصنا بس ننتظر ظافر يجي
ابو فلاح الي كان حريص ما يكون ناقص شي على الغداء : والقهوه والشاهي بالمجلس ؟
مشاري : اي ياعم كل شي موجود
ابتسم ابو فلاح وقال : ادري فيكم ما تقصرون، دق على اخوك شوف شفيه تاخر
فلاح : تو كلمته الحين يجي
ابو فلاح : يلا زين
التفت هتان على صوت السياره وقال : هذا هو جاء
نزل ظافر من السياره وقال بصوت شبه عالي : السلام عليكم يرجال
التفتو عليه واختلفت الردود : وعليكم السلام ، اقلط ، يالله حي معرسنا ، ارحب
ابتسم ظافر وتقدم لهم وهو يسلم عليهم ومشاري وسامي الي لحقوا شهد يسلمون عليها
مشاري لـ شهد : شلونتس ؟
ابتسمت شهد وقالت : الحمدلله بخير
سامي : شلون ظافر معتس عساه زين
شهد بحُب لـ اخوانها : الحمدلله كويس معي
مشاري : اذا زعلتس علمينيي باكسر له خشمه
شهد بضحك : يا حبايب قلبي انتو الله لا يرحمني منكم
سامي : ولا من حستس
دخلت شهد بعد ما سلمت على اخوانها وهي تحمد ربها وتشكره على وجودهم بحياتها، وتحس انهم مو مُجرد اخوان لها صاروا لها اب وسند وذخر لها على ان الاب مستحيل يعوض مكانه احد الا انهم يسون المُستحيل عشان تحس بوجودهم حولها
دخلت شهد واستقبلوها البنات بكُل حُب وشوق سلمت على البنات وراحت للصاله الي كان موجود فيها المعازيم سلمت عليهم التفتت على انتصار الي كانت جالسه بالزاويه تقدمت وهي تسلم عليها
انتصار بكُرهه : مبروك
ابتسمت لها شهد بدون نفس ولا ردت عليها
شهد للبنات : وينها امي؟
ام مشاري الي طلعت من المطبخ وزغرطتت بصوت شبه عالي التفتت عليها شهد بضحك وحُب لها تقدمت وهي تبوس راسها وقالت : جعلني ما انحرم
ام مشاري وهي تحضن شهد : مبروك يا بنتيي
شهد : الله يبارك فيتس يا ميمتي
جت مجدُولين وقالت : يااهلاا والله ارحبي يبعدي
ضحكت شهد وقالت : جعل من يرحبب يبقى يعيونيي
ارياف : تعالي تعالي والله الشوف الف
شهد بمزح : شدعوه امداكم تشتاقوا
ارياف : مالت عليتس وعلى الي يشتاق لتس
جلست شهد بعد ما سلمت على الكُل راحت وجلست مع البنات في الصاله الثانيه
نطت عندها رحاب وهي تقول : بشري كيف ظافر معك
شهد وهي تضربها : وجعاه كسرتي رجولي وخريي
رحاب : انطقي بسرعه
شهد : خصوصيه بيني وبين زوجي شدخلتس انتِ
ضربتها رحاب بضحك : الله اكبر من خصوصيه
ارياف بضحك : يحق لتس يا شهد
شهد وهي تناظر في رحاب : اكيد
اخذت رحاب المخده وهي ترميها على شهد بقوه قامت شهد وهي تضحك حضنت رحاب وهي تقول : شدعوه امزح واخوتس زي العسل على قلبي
رحاب بضحك : ععشنا والله
قاطعهم صوت صقر الي كان ينادي : يولدد
طلعت نجد وهي تقول : لبيه
صقر : لبى نباتس يعيون اخوتس
نجد بضحك : الله كلام حلو بعد شعندك
تقدم صقر وهو يحضنها : ابد بس وحشتينيي
نجد : متاكد ماتبي شي ثاني ؟
قرب صقر وهمس لها : ابي محبوبتي تقدري تجيبيها لي؟
نجد بغمزه : اخطبها وتقدر تاخذها بدون ما تطلب من احد
تنهد صقر بضيق وقال : باذن الله ، يلا انا بجيب الصحون وانتِ نادي وحده من البنات تساعدنس
نجد : طيب
راح صقر وكلام نجد الي عالق براسه التفت على حمد وهو يناديه يساعده بالصحون اخذ صقر وحمد الصحون وراحو جهه الحريم اخذت نجد الصحن الي بيد حمد وقال صقر : وينهم البنات ؟
نجد : ولا وحده رضيت تجي
صقر رافع حاجبه وقال : وليه ان شاء الله ؟
نجد وهي رايحه للمطبخ : مدري
صقر بصوت عالي : رينادد رندد
البنات الي كانوا بغرفه ومقفلين الباب ولا سمعوا صوت صقر عصب صقر واضطر ينتظر نجد تدخل الصحن الاول للمطبخ وتاخذ صحنه التفت على انتصار الي كانت واقفه قدامه اخذت جلال الصلاه وهي تغطي فيه نص وجهها تقدمت لـ صقر وهي تدلع بصوتها وتقول : هاته اخذه عنك
صقر الي ما قدر يتحرك من مكانه ولا قدر يسوي شي تجمد في مكانه اكتفى يناظر في انتصار الي كان وجهه واضح وبكامل زينتها واناقتها وعطرها الي فايح بكل مكان
انتصار بتغج : جيبه حبيبي اخذه
انتصار الي كانت متعمده تقول هالكلام لانها عارفه وعد وراهم وتسمع كُل كلامهم
وفعلاً وعد كانت وراهم وسمعت كل شي قالته انتصار أنلجمت من المنظر الي قدامها التفت صقر على وعد استوعب صقر على نفسه وصدّ من انتصار وهو يمد لها الصحن اخذته انتصار وهي تناظر في وعد الي كانت مصدومه دخلت وحطت الصحن بالمطبخ وطلعت لـ وعد الي كانت للحين واقفه : شفيتس حبيبتي وعد
وعد الي تغورقت عيونها دموعها من القهر ومن منظر انتصار مع صقر ما قدرت تتحمل منظرها وصوتها الي تدلع فيه قدام صقر رفعت يدها وهي تعطيها كف طلعت حره قلبها بالكف على ان الكف ما برد خاطرها بس رجعت لها كف ثاني رفعت انتصار راسها وهي حاطه يدها على خدها وهي مصدومه من الي سوته وعد
وعد بقهر وصراخ : لهدرجه انتِ رخيصه تطلعين قدامه وتدلعين بصوتس عبالتس راح يلتفت لتس يالقذره !!
انتصار الي ما نطقت بحرف واكتفت تسمع كلام وعد الي خلاها تندم على اللي سوته
-
عند صقر
طلع صقر ولا هو قادر يستوعب من الي صار منظر انتصار و وقفه وعد وهي تناظر فيهم حس ان وعد راحت من يده عقب الي شافته وعز طلع وهو مصدوم وكل جسمه يرجف وخايف من فقد وعد جلس ولا هو قادر يكمل مشي رجع فيه شريط الذكريات لقائتهُ مع وعد وعلى الرُغم انها كم لقاء صار بينهم بس كانت بالنسبه لـ صقر مو بس لقاء كانت ترد له روحه في كُل مره يشوف فيها وعد صراخ وقال : اناا وشش سوييتت يربيي !!
تنهد بضيق وقال : ياربيي والله غصبن عني الي صار، ما ابي افقد وعد بعد ما شفت فيها كُل شي فقدته
قام وهو يتعوذ من الشيطان وراح يغسل وجهه وجلس معهم على الغداء
جلس جنب مشاري وقال : شفيه وجهك؟
صقر : لا مافي شي بس دخل بعيوني الغبار ورحت غسلت وجهي
مشاري الي كان حاس ان صقر فيه شي بس ما كان وده يضغط عليه بالكلام
-
نرجع شوي لـ عهود و انتصار
عهود الي اول ما سمعت صوت صقر ينادي جت في بالها فكره خبيثه راحت لـ انتصار وهي تقول لها : ابي مساعدتس لي
انتصار بخبث وهي تغمز لها : وش هيي
عهود : عاد اكيد تدرين وش افكر فيه
انتصار بغمزه : وعد؟
عهود : بس جبتيها ابيتس تطلعين قدام صقر وتدلعي بصوتس وانا بخلي وعد تشوفكم ويحترق قلبها
انتصار الي عجبتها الفكره : تمم يلا
عهود : جددي روجتس وحطي عطر واطلعي قدامه وخذي الصحن من يده وعاد لا اوصيتس تدلعي يمكن ينغرم فيتس
انتصار : ما ضنتي اخوتس يناظر في وحده غير وعد بس ابشري بسوي الي تبينه
وفعلاً راحت انتصار تجدد روجها وحطت عطر وطلعت قدام صقر، وعهود الي راحت طيران تنادي وعد
عهود : وعد كلمي نجد بالمطبخ
راحت وعد على اساس تكلم نجد وانصدمت من المنظر الي قدامها
ضحك عهود بخبث وقالت : طلع ينلعب عليتس بسرعه يا وعد يا حليلتس والله
-
في الغرفه عند الحريم
دخلت ام فلاح وقالت : يلا يا حريم على الغداء
ابتسمت شهد وقالت : ما قصرتوا يا عمه كثر الله خيركم
راحوا الكل يتغداء الا وعد الي جلست بالصاله تتفرج على التلفزيون وهي بالاساس مو قاعده تتفرج قاعده تتذكر منظر انتصار مع صقرها
نجد : وعد وين وصلتيي
التفت عليها وعد وقالت : لا ولاشي
جلست جنبها نجد وقالت : ليه ما كليتي
وعد بعذر : مالي نفس والله
نجد : افا ليه وش مضيق صدرتس
وعد الي كانت ترتاح بمُجرد ما تتكلم مع نجد وتقول لها بدون ما تترد ، حكت وعد كل الي شافته لـ نجد ونجد الي انصدمت من كلامها
نجد : لا تخافين حبيبتي صقر لا هو ملتفت لها ولا درا عن هوا دارها وانا اوريتس فيها الحقيره ذي اللي ما تستحي
وعد بضيق : والله مو عارفه وش اسوي
نجد وهي تهديها : لا تشغلي بالتس صقر انا بكلمه
تنهدت وعد وقالت : طيب
نجد : عاد يلا قومي لا تجلسي مضيقه خاطرتس عشان العله انتصار
وعد بضحك : وانتِ الصادقه يلا
راحوا البنات يتغدون مع باقي المعازيم
انتصار بهمس لـ وعد : ولا كانها وعد الي قبل شوي تصيح
عهود : حبيبتي اكيد سكتتها نجد ولا تعرفين وعد تموت في صقر تقلب الدنيا وتقعدها عشانه وعشان لا احد يقربه
انتصار : حاقده عليها احس للحين الكف معلم بخدي
ضحكت عهود وقالت : معليتس بنرجعه لها بس بطريقه ثانيه
الفتت انتصار على عهود وقالت : وش من مُصيبه ثانيه بتسوينها ؟
عهود : بعدين تعرفين لا تستعجلي
-
عند الرجال
ابو فلاح : الله يجعله عافيه عليكم يرجال واعذرونا على القصور
الجد : مابوه قصور يبو فلاح الله يكثر خيرك
ابو هادي : ماقصرت الله يزيدك من فضله
ابتسم ابو فلاح وقال : الله يسلمكم
___
ان شاء الله ما تاخرت عليكم بالبارت🫣❤️