أحببت عبدتي 😍 💞🔞

الحلقة 15

فتح الباب بقوة متحلف يفسدلها خليقتها....
امير: ما تفهمش انتييييي...مع شافها هي عدل روحه مسح وجهه بيدو....توا جاية..
ميسون: ملا وقتاه تحبني نجي ماك قلت بعد العصر...هاني جيتك قبلها بدقيقة....
أمير شاف في ساعته حب يتأكد لقى كلامها صحيح...حمحم...و عمللها بيده ادخل..و هو ما ستناهاش و دخل...قعد عالفوتاي متكي راسه لوراء يستنى فيها تقعد....وقت ما حسش بحركتها....رفع راسه لفته يمين و يسار ما لقاهاش....عقد حواجبه مستغرب...و رجع للباب يشوف فيها وين مشات... لقاها مازال في بلاصتها تلعب بساقيها( ترسم في أشكال عالقاع )
أمير: شبيك واقفة هنا؟؟؟؟
ميسون: مش طلبت مني نجيك لدار...لحق دار شوي عليها لازم نقول فيلا
أمير: ايه..و علاه الوقفة هنا؟؟؟
ميسون: احكي شعندك خلي نمشي
امير: نحكوا هنا!!!
ميسون: ايه...ما نجمش ندخل
أمير: علاه؟؟
ميسون : كيفاه علاه هذي...شنوا يقولوا عليا جيرانك و انا جيتك قريب المغرب
امير: توا تفكرتهم جيراني....و كي جيتني عقاب الليل ما تفكرتهمش؟؟؟؟ ادخل بلا فلاحة زايدة....
ميسون: ما ندخلش..المرة لي فاتت كنت مجبورة...
اما المرة هذي.....
أمير قص عليه: حتى المرة هذي مجبورة....ما تنساش العقد....تبسم بمكر
عوجت فمها مش عاجبها الحال....طنشة عليه و ضربت فيه دخلت الصالة....دخل وراها و سكر الباب....كانت تدور في رأسها تتفرج في الفيلا...و هو بقى يعمل في مساج لراسه مطبس لوطة( تحت)....على تلفيته ليها قابله باسكاتها النوار....بقى يتبع في بدنها من ساقيها لراسها...سروال بوي فراند نوار و مريول روج فيف.. شعر مسبول....قطرة مكياج لا...ساك في الأبيض....تعصب عيط عليها: شنما الشوالق لي لبستهم؟؟؟
ميسون : شمدخلك في امهم انت...قول شتحب خلي نمشي...
امير: وين ماشية....وين عندك تمشي بهالحالة..
ميسون: لجهنم الحمرة تحب تمشي معايا...
قحرلها قحرت موت سكتت: توا هاذم متع عشاء
ميسون: اما عشاء؟؟؟؟
ضرب جبهته بيده...تفكر الي ماقالهاش عليه...عض شفته مكرز: انسى.....بابا طلب مني نجيبك للعشاء عندهم بش يتعرفو عليك...
ميسون: اما انا ما نعرفهمش....
امير: ايه هاكا علاه بش نهزك تتعرف عليهم و يتعرفوا عليك
ميسون: لا مافهمتنيش...نقصد الي انا قاعدة نمثل في دور حبي...احم...خطيبتك لازم نكون ديجا عارفتهم....و كيف يسألوني على حاجة تخصك شنوا نجاوبهم....كان يفيقوا بلعبتنا....و بوك يخبر بابا...يا ناري شنوا بش يصرا فيهم و فيا....
امير: اسكتتتت....ما تعرفش تسكت...شنوا الدراما لي صورتهالي في دقيقة...اففف...بابا يعرف و الكل يعرف الي انا و انت مازال كي تعرفنا جدد....الحاجة الوحيدة لي ما يعرفوهاش هي العقد و حد ما لازم يسمع بيه....
ميسون تنهدت براحة : اوكي...
امير: توا امشي قدامي...
ركبوا في الكرهبة...زمان و هو يسوق مركز مع الطريق و هي راخية روحها عالكرسي تخمم في بوها اسكو لباس ولا صارتله حاجة في غيابها ولا... حتى حست بيها سكتت...تلفتت لشباك.... تلقى انهم وصلوا قدام بوتيك دبش....تفكرت كلامه من قبيلة طلعلها الغاز للراس....دورت رأسها عنده و شعلت فيه
ميسون:علاه جايبني هنا....بش تصدق عليا قطعتين قماش...لا يا سيد دبشي عاجبني و ساترني مش مستحقتلك...
امير: مش صدقة....داخلة في الدين
ميسون: انا عاجبتني روحي هكا...حد ما عنده الحق يدخل فيا....يا نمشي هكا...يا انسى اني نمشي...
امير: بربي و العقد
ميسون ضمت يديها لصدرها: نفخو و اشرب ماه....
عض لسانو بغل على كلامها جا يرجع عليها....بطل عارف لكلام معاها ميجيش...ديمارا قاصد قصر بوه...
من اول ما دخلوا من بوابة القصر و هي تدور في رأسها...عجبتها الجنينة...مليانة ورد من كل نوع و لون...نافورة تتوسط المدخل لباب القصر...وقف قدامه ديراكت...نزلت من غير ما تستناه...عيونها قلوب من منظر الجنينة...دارتله متبسمة
ميسون: تعرف احلى منظر شفتو في حياتي
امير: منين ليك تشوفهم المناظر لي كيف هاذم
ميسون فيسع ما تمحات بسمتها: اسم يا شسمك مش في كل مرة ترمي لكلام....نعرف روحي فقيرة و مقتنعة الحمد لله مش للزم في كل مرة تذكرني داكور...
امير: اسمي امير....و صوتك ياهم....صوتك قتلك ما يعلاش....
ميسون: طلعلي الدم لراسي و قول ما نعيطش عليك....نتسمى باهية معاك كيف ما نتفتكش بسناية
امير اختصر المسافة لي بينهم هاز صبعو في وجهها: صدقني كلامك الكل يا من خليك تندم عليه...جات تنطق.حمر عينيه فيها سكتت....و توا كلمة ما نسمعها منك....قدامي...عمللها إشارة للباب
تمشي قدامه خطوة بخطوة و هو وراها يكالمي في روحه....غافلين عالعينين لي تراقب فيهم....وحدة ناوية الشر و ما تتهنى غير بخرابها... و وحدة فرحانة لشوفتهم مع بعضهم حتى و هكا متناقرين....مش يقول الحب لحقيقي يبدى من عركة صغيرة....
حلتلهم البون الباب....دخلتهم للصالون قعدو بجنب بعضهم.....رأسها ما تهزش من القاع....حتى ولو عجبها لقصر مستحيل تنسى القناعة لي تربت عليها....و تبدى تتفرج كيف المفجوعة الجيعانة.... وتنزل من قيمتها قدام الناس....
امير للبون: وينهم الجماعة؟؟؟
البون: سي حسان في بيروه....مدموازال ريمة في بيتها كيف كيف مادام صوفيا....و مدموازال لي....
امير: اوكي اوكي فهمتك....قول لبابا يجي
البون: حاضر سي أمير
مع تلفتت تلقى حسان و صوفيا نازلين مع بعضهم...
حسان الفرحة مش سايعته : مرحبا....اهلا بيكم طولتو علينا...تعانق مع امير برجولية...و بعد
امير: هاكا حدنا
صوفيا بتشناف: مرحبا امير...صافا
امير: امممم....حط يده على ضهر ميسون و قدامها لعندهم....هذا بابا حسان...و هاذي صوفيا....
صوفيا: امه
خزرلها بشطر عين و كمل: و هاذي ميسون
حسان: اهلا بنتي....لاباس
ميسون متبسمة : الحمدلله و انت صافا؟؟؟؟
حسان: ياربي و لك الحمد
صوفيا تكيل فيها من فوق لتحت....معوجة فمها على لبستها....مش عجبتها جاية بلبسة سبور لعشاء تعارف....لاحظت ميسون نظراتها مدتلها يدها: عسلامة طاطا
صوفيا : نو نو....انا مادام
حسان كبس يده لي لافها على خصرها...توجعت لكن ما حبتش تبين...و أمير شاف فيها شوفة تقتل كان جات رصاص.....أما هي تبسمة تبسيمة صفرة و هزت براسها بالايجاب.....
قعدو لكل يحكيو و يتعرفوا على ميسون....
حسان: تقرا؟؟؟؟
ميسون: ايه...ثالث عام طب
حسان: ما شاءالله كيف بنتي ريمة...أما هي اول عام
ميسون:اااا ايه
صوفيا مستحيل تبقى ساكتة لسانها ديما واكلها: شنوا اسم عايلتك و امك و بوك شنوا خدمتهم.
حسان يهمسلها: ميجيش سؤالك
صوفيا: عادي
ميسون: الالقاب عمرها ما كانت مهمة لتعارف لعباد على قدر ما تكون حبر على ورق و تفرقة بين الناس ......امي ما تخدمش و بابا كان حارس في شركة
صوفيا : اه...ااا بون
حسان تبسم على جوابها من غير ما تحشم بخدمت بوها : متشرفين بنتي
ميسون: عيشك
جاتلهم البون قهاوي....خذى كل واحد فنجان يترشح فيه...
حسان: و شنوا قولك في امير
ميسون: شرقت:كح كح....ها!!؟؟؟
امير: شنوا بابا توا؟؟؟
حسان: شي نسأل اكهو..
نزلت تجري من اول ما خبرتها البون بجيت امير و ميسون....ما نجمتش تصبر لبست بزربة و خرجت...
طارت على امير تعنق و تبوس....
امير: ههههه يكفي راك كبرت
ريمة: لا مازلت صغرونة...مش ديمة تقلي صغروتي... طلت على ميسون من وراه متبسمة....ولا فما شكون بدلك علينا
ميسون وقفت مفجوعة: اه لا لا....و الله ماقلت حاجة
ريمة سيبت امير و مشاتلها: هههه نفدلك يا بنتي شبيك تفجعت...حضنتها تهمس...إن شاءالله تكون زيادت خير في حياة امير...و مرحبا بيك في عائلتنا
تبسمتلها ميسون و هزتلها براسها ايه: ان شاءلله
بقوا يحكوا و يتعرفوا...ميسون رتاحت برشا من جيهة ريمة و حسان...أما من تصرفات صوفيا و كلامها عرفتها وحدة لفعة و مش ساهلة....
حضر لعشاء...نادتهم البون بش يتلمو عالطاولة....
خيورات ربي لكل موجودة المالح و لحلو....
حسان: صوفيا وينها ليلى مش متعشية معانا
صوفيا: بعثتلها ميساج...عدك بيها جات
حسان: اوكي مالا نزيدو نستنوها شوي...
أمير كلامهم عليها عصبو...مشى في باله مش جاية... و هي هي بش يتلاقا بيها....ميسون ساكتة متوترة تفرك في يديها على بعضهم...لاحظت ريمة الشي هذا....بقات شاهية فيها و في ملامحها...
ريمة: ميسون
ميسون: نعم
ريمة: تعرف لي انا شايفتك قبل وين ما نعرفش... و ممكن شبهتك لشخص
قبل ما تحكي حرف سبقها حسان: سير شايفاها في الفاك....تقرى طب كيفك و في نفس الفاك
ريمة: ا بون...مسالتكش قبيلة ههه...مالا اكيد تلاقينا مرة و لا صارت حاجة خلتك تبقى في بالي
ميسون رجعت بيها الذاكرة لأول نهار تقابلوا فيه... حتى هي كانت شاكة انها شايفتها من قبل و توا تأكدت...ضحكت ضحكة صفرة تدعي انها ما تتفكرش كلامها و عركتها الصغيييرة معاها: ههههه يمكن
اما هيهات حتى هي مع شكون طاحت بكارت ميموار على حالها....ريمة تفكرت كلام ميسون نهارتها ما حبتش تفضحها قدامهم قربت لميسون تهمس: امممم عرفتك...انا بنت سلطان مش باي و اخت أمير ههههه....و انت خطيبة الأمير هاكا علاه بش نعدي كلامك....
أمير سمع كلامها تدخل: ريمة الحكاية وفات نهارتها مش لازم نجبدوها مرة أخرى...مش هكا؟؟؟
تبسمتله دليل على موافقتها....
صوفيا كانت مراقبتهم: على شنوا توشوشو من بكري
ريمة: شي
صوفيا: ساعة و انتم تهروا على حتى شي
ريمة: حاجة ما تخصكش....
حسان حمحم و اشارلها لميسون...يعرف اذا كان تقابلوا ما يعرفوا كان القصف بين بعضهم.....
أمير فد من القعدة ما يحملها..ما يحمل بنتها...: شوف بنتك وين...
صوفيا: وه ماو قتلك جاية
حسان: شبيك مزروب....اصبر ما زالت السهرة طويلة
امير: لا مش مطولين ميسون تقرى غدوة و انا تاعب
ميسون تالفة من كلامهم مع صوفيا و كلمة "بنتك" و بدات تالف في سيناريوهات...زعمة ليلى لي يحكو عليها اخت أمير من امهم هاكا علاه يكرهوها و متغششين من صوفيا.....ولا تطلع جايبتها في الحرام...وه يا شومك خاينة حسان و مازال قابلها تعيش معاه مع بنتها....نفضت رأسها من تخمامها لعوج على ضحكت ريمة....تلفتلها تحب تفهم
ريمة: ههههه يكونوا يحبوا يكملوا السهرة وحدهم...و غمزت ميسون...
حسان تطرشق بالضحك....صوفيا تغلي على ميسون الي كان تلقى تنشق الأرض و تبلعها من الحشمة.....أمير مش في مود تفدليك قحر لريمة: ريييمة
عرفته مش في جوه عملتها سكتت بيدها....

☆☆☆☆☆☆☆☆☆☆☆☆☆☆☆☆☆☆
نوقز الباب....
صوفيا: اها ما تكون كان ليلى جات....مريم(البون) ايجا افتح الباب فاش تستنى...
ريمة تهمس: تقول السلطانة هيام...ما جابت كان هي لبنات؟؟؟
أمير ملامحه باردة محافظ على هدوءه عكس النار لي لداخل لو كان يلقى يشد يكرفسها بطريحة يبرد قلبه من عمايلها...ميسون باهتة تخزر لليلى تايها في مشيتها...تايها...لبستها...مكياجها...شعرها... لدقيقة ندمت لأنها ما سمعتش كلام أمير....
ليلى: salut tout le monde
حسان و صوفيا: اهلا بنتي
ريمةو ميسون: عسلامة
ليلى: اوووه عندنا ضيفة و ما قلتوليش
ريمة: هههه لا مش ضيفة هاذي وحدة مالعايلة
ليلى تخزرلها بستحقار: ههههههه من وقتاه عندنا أقارب كيفها
ميسون عينيها غرغروا بالدموع تحقر فيها و هي مش منجمة تحكي احتراما للبقية...أما ما تخافش يا ميسونتنا مدام عندك ريمة: من اليوم و لآخر لعمر ان شاءالله....نقدملك مرت خوويا امير( ترص على حروف اخر كلمتين)
ليلى تصدمت خزرت لميسون و أمير و من بعد لأمها لي عملتلها تهنى بعينيها: و...وق..وقتاه
ريمة: ههه شبيك ما عادش تسمع....قتلك من اليوم...
حسان قص النقاش و فيق ليلى : هيا ليلى اقعد خلي نبدو نتعشوا....
كانت واقفة جنب امها...شدتها من يدها و قعدتها جنبها توتوتلها: شبيه وجه صفار...فيق ما زال ما عرسوش جيست يتعرفوا اكهو....تهنى ما نخليهمش يوصلوا حتى للخطبة مش عرس اكهو
بعدت عليها متبسمتلها و لخرى فرحت من كلامها....
سارباتلهم البون لعشى...ياكلوا في سكوت...لين قطعتها ليلى: مالا شنوا اسمك
ميسون: ميسون
ليلى: قداه عمرك
ميسون: 22
ليلى: ممممم مزلت صغيرة
ميسون :......
ليلى: مالا تخدم ولا تقرى
ميسون فوق من قلبها: نقرى
ليلى: à bon ما يظهرش عليك...لي يشوف يديك كيفاه جافين يقول خديمة ولا تغسل في ماعون في وحدة من المطا.... بلعت الكلمة على ضربة امير لطاولة...
امير: شدخلك في امها انتي....حاكم تحقيق تسأل و تعاود....شاف في ميسون عينيها يقدحو نار....قوم نوصلك
حسان: وين هاز الطفلة خلها تكمل عشاها
امير: ما عادش فيها عشاء...نفظ الكرسي و وقف 
ميسون ناضت بالوقت..عطتها البون ساكها و خرجت لاحقة امير لي ديجا خرج....
طريق كاملة واحد فيهم ما تكلم و لا خزر لآخر.... ميسون مقهورة من معايرتهم ليها و هي ما تنجمش تحكي معاهم و لا تدافع على روحها مش خوف من امير و عقده اما احتراما لحسان و ريمة لي شافت المحبة منهم..... أمير معصب من ليلى و جراتها و في نفس الوقت ما حملش حقرتها لميسون و مش عارف كيفاه يطلب السماح ولا شيعمل....
امير: احم...احم...انا...قص عليه تلفونه ينوقز: الو
مالك: وينك شبيك ما جيتش لتوا
امير: مش قتلك متعشي في دار بابا
مالك: ااااا....أما الصوت لي جاي من عندي يقول لانت في الطريق...وين ماشي؟؟؟
امير: صحيتك يا حاذق...مروح لدار
مالك: مالا نجي عندك نكمل السهرية معاك
امير: نو تاعب بنرقد
مالك: أمير
امير: امممم
مالك: ميسون وينها
امير: معايا علاه
مالك: ****** معايا عندك ساعة و انت بش تبات شايخ مع الطفلة.....من وقتاه وليت هكا يا &&&& تبع في لبنات
امير: تشلل فمك ولا نجي نكسره...موصلها للدارهم
مالك: متأكد؟؟؟؟
قطع في وجهه...عارف تخمامه الخامج...دور راسه لميسون يحب يكمل كلامه...يلقاها ضامة يديها لصدرها و تخزرله حواجبها معقودين....
أمير: شبيك؟؟؟؟
ميسون: يشبشب بيك ان شاءالله...شكون لي يحكي عليا
امير لوى لسانه...نهار من النهرات يتجلط من كلامها: كلامك يا فرخة....اعرف شتخرج من فمك...
ميسون: خلقت ربنا... مش موضوعنا...جاوبني على سؤالي
امير ببرود: كيف يجي الوقت تعرفه
ميسون: ايوااا اوكي
امير: للدار ولا كلينيك؟؟؟؟
ميسون: للدار
........................
سامحوني هذا على شنوا قدرت...عندي allergie قوية....صبروا رواحكم بالشويا هذا 😘😘