أحببت عبدتي 😍 💞🔞

الحلقة 8

اول ما هبطت...أمير قرب منها و حط يده على فكها و كبس عليه....مبعد قال بصوت معمر غضب : شنوا تحب مني انت اه....قول.

ميسون حطت يدها على يده تحاول تبعدها على فكها الي حساته تكسر من قوت الكبسة..
و بصوت خافة قالت على خاطر ما كانتش قادرة تحكي بأريحية: حتى شي.....سيبني السخطة هذا
أمير زاد في كبست يده : سكر فمك و كيف تحكي معايا تحكي باحترام.....و كلام الكلوشارات و الحوم الشعبية خليه عندك
ميسون: على اساس كلامك يقطر عسل.... هبط يدك وجعتني
أمير: احسن....بش تتعلم ما عادش تكذب...
قال هذوك الكلمات....نزل يده و بعد عليها...
ميسون عقدت حواجبها.... شنوا معناها "تكذب" و الدم بدى يطلعلها لراسها.....
ميسون : شنيا هذي تكذب....من وين نعرفك حتى نكذب عليك...اه؟!
أمير ضحك بتمسخير: اااووو برافو ممثلة بارعة.....كاذبة كذبة و نسيتها
ميسون....هزت صبعها في وجهه و بنبرة فيها تحذير و غش : اااخر مرة تقلللي تكذب فهمتتت....
أمير...شدها من يدها و رجعها ورى ظهرها : و انت رد بالك مزلت ترفع يدك ولا صوتك في وجهي..... و توا تمشي تخبر بوك بطريقتك على الكذبة لي كذبتها ولا انا نفضحك بطريقتي.....
ميسون....يدها وجعتها برشا....أما حاولت ما تبينش : انا ما كذذذبتشش اصلا بابا ما حكيتش معاه في هذا الموضوع من وقت تلاقينا....
أمير: يزي من الكذب.....
بقوة دزها بعيد عليه... حتى قربت تطيح.....بدون ميزيد حتى ثانية تلفت لكرهبته....لبس ليناته....سقم الكوستيم
....ركب و طار للشركة عنده أوراق لازم يشوفها قبل عشاء الخدمة....
ميسون بقات واقفة في بلاصتها...مش عارفة لمصايب من وين هابطة عليها.... تنهدت و مسحت وجهها: اووف المصيبة هذا و زيد جايبني لآخر الدنيا....كيفه بش نرجع انا توا....و شوف عاد حالتي نرعش بكلني..
جبدت تلفونها و كمبوزات النيمورو....و قعدت تستنى حتى جاوبتها : سيلين نجم نجي نبات عندكم الليلة
سيلين : بيان سور عزيزتي...أما شبيك صرات حاجة
ميسون : نوصل و نحكيلك
سيلين : اوكي
علقت و كي شافت تاكسي جاية وقفتها و ركبت....عطت للشوفير لدراس....و حطت رأسها عالبلار تتفرج في الطريق....كانت سارحة مع افكارها تخمم في الكلام الي قاله أمير....حتى سمعت صوت تلفونها يسوني.... ميسون : نعم ماما
سامية : وينك يا طفلة مش ناوية تروح ولا كيف
ميسون: لا ماما شنبات عند سيلين ليوم عندنا projet نخدموا عليه
سامية: مممم باهي رد بالك على روحك و سلملي على خالتك بية
ميسون : يوصل....باي
تعدات نصف ساعة حتى وصلت لدار سيلين..
تلقاها تستنى فيها قدام الباب....سيلين اول ما شافتها تفجعت : وه ميسون شبي حالتك هكا.....و جهك اصفر.....
ميسون: بش نقعدوا برشا واقفين لبرى
سيلين تبسمت و عملتلها بيدها تفضل....وقت دخلوا لقاو بية قاعدة تتفرج على التلفزة....تقدمت منها ميسون و هي تتبسم...
ميسون : عسلامة خالتي بية
بية : اهلا بنتي...وينك ياهرابة عندك مدة ماجيتش
ميسون : ماك تعرف القراية و زيد بابا ميحبش الخرجة و الدخلة برشا
بية : مممم....وينها سامية شنوا عاملة لباس عليها
ميسون : الحمد الله....تسلم عليك
بية : يسلمك و يسلمها.....تعرف بزهرك ليوم طيبت مقرونة صالصة نعرفك تحبها
ميسون عدت لسانها على شفايفها : مممم و الله ما تحس بيا كان أنتي....متقولش بالدجاج
بية : ايه و محرحرة كيما تحبها
ميسون : اااااههههه بديت نجوع انا
سيلين : للة غار راك تخلينا بلا عشى....نعرفك مربية وحش في كرشك
ميسون....وقفت توريلها في بدنها : سمله عليا حاشاني....شوف الكور مش كيفك كل شهر ترصيلي نعمل في ريجيم بش نقص عالاقل زوز غرامات
بية : ههههه
سيلين : امي عاجبك لكلام لتقول فيه لبنتك
بية : المشكلة كلامها مش غالط ولا راني حاميت عليك ههه
سيلين: اماان
ميسون : و هذي ضربة أخرى هههههه
سيلين : تحاميتوا فيا....مش عدل هذا واحد ضد زوز
ميسون دورت يدها على كتف سيلين و جبدتها عندها: نفدلك عليك ياعشيرتي انت بكلك تقتل
سيلين : عيشك ميسونة
ميسون : بالغزول هههههه
سيلين قرصت ميسون لين توجعت : يا كلبة..
هما يتعاركوا و بية ميتة عليهم بالضحك....
حظر لعشاء تلموا عالطاولة ياكلوا....بعد ما كملوا هزوا لبنات الماعون يغسلوا فيه و للة بية كيف العادة رجعت قدام التلفزة....تموت على المسلسلات التركية....بعدما كملوا لفوا الكوجينة طلعوا لبنات لبيت سيلين...لبسوا بيجامات و تسطحوا بجنب بعضهم على السرير....
سيلين : ايه....نسمع فيك....شنوا صار بعد ما ركبك معاه....
تنهدت ميسون: ااووف شنحكيلك...قال لي انا كذابة....اصلا مش عارفة حتى شنية الكذبة لي يحكي عليها....
سيلين: شيه هذا هبل ؟؟؟
ميسون : نعرف عليه انا
سيلين : ايه مبعد؟؟؟
ميسون : المشكل مش غادي....انا ميهمنيش فيه يقول الي يحب....أما.....
سيلين : اما شنوا؟؟
ميسون: قال اذا ما خبرتش بابا على كذبتي هو بش يفضحني بطريقته....و انا مانعرفش حتى لحكاية شنيا
سيلين : انت حكيت مع بوك ؟
ميسون: ماني قتلك لا
سيلين: اذا انت ماحكيتش من الأصل مع بوك....معناها بوك مينجم يخبروا بحتى شي...
ميسون هزت حاجبها : معناها تقول انت فما شخص آخر في لحكاية
سيلين : اكيد
ميسون بقات تربط في لحداث ببعضهم....أما ما لقات شي....
ميسون : لازم نحكي مع بابا غدوة و نفهم من وين يعرفه
سيلين : ايه احسن حاجة
ميسون : اوكي....تصبح على خير
سيلين : شترقد توا ؟؟
ميسون : ايه تاعبة برشا
سيلين : مممم بون نوي

الصباح فاقت سيلين بكري....عملت روتينها لبست دباشها....تلفتت لسرير تلقى ميسون مزالت راقدة....
سيلين : ياخي ما تشبعش هذي مالنوم؟؟؟
قربت منها حطت يديها على الفرش....جبدته بالقوي و في نفس الوقت تعيط: مممييييسسووووونن قققوووم
تنطرت ميسون مفجوعة : بسم الله الرحمن الرحيم....شبي عزاك عالصباح
سيلين: البس فيسع ما عادش وقت
ميسون حاطة يدها على رقبتها : قداش توا
سيلين: 7:30
ميسون : ووووهههه على ما قومتنيش من بكري
سيلين : حتى انا ما عنديش برشا....ازرب البس
سيلين تحكي و ميسون تجري منا و منا تلم في دبشها....و مبعد دخلت لدوش....كملت... تمشات للطابل دو نوي هزت تلفونها: يييااااا
سيلين كانت تغربش في تلفونها اول ماسمعتها عيطت نقزت جات واقفة : شبيك
ميسون : يا كللللبة مفيقتني 7
سيلين : ههههههه حتى تتربى تفيق بكري كيف لعباد
ميسون: اجا هوني يما نتفك بسنيا
ميسون جات تنقض على سيلين حتى تفتح الباب....
بية : صباح الخير....شبيكم عالصباح
سيلين : لا شي امي جوست فيقت الكوالا هه
صباح الفل
بية تبسمت على خاطر تعرف ميسون بالقدى....ميسون قحرت لسيلين و تلفتت لبية : صباح النور يا بيوتة
بية : هيا اجاو افطروا
نزلوا فطروا مع بعضهم بتفدليك و ضحكة...مبعد لبنات كل وحدة هزت ساكها و خرجوا قاصدين ربي للفاك....
ميسون : اااا حقا تفكرت....لازم نرجع لدار
سيلين : لباس ماهو....نشالله خير
ميسون : مش تفاهمنا بش نحكي مع بابا
سيلين : ايه بعد الفاك
ميسون : لا لازم نحكي معاه و نحل لمشكلة هذي....ما عادش نحب نشوف منظره
سيلين بتبهليل : شكون ما تحبش تشوفه
ميسون : السخطة هذاك
سيلين : وه شكون
ميسون : تي ماهو أمير الهم
سيلين : اااا تحكي على خطيبك
ميسون شافت فيها خزرة موت : سيييللليينن
سيلين : هههه نفدلك عليك