و لقد حطمت الفؤاد .. جحيم الحب

17

  ~ريما♡...

نزلت من العربية وقفلت الباب وراي بدون ما اسمع اي كلمة وداع من حسام، كان متضايق شديد ورفضي أني ابرر ليه او احكي ليه اي شي ضايقو زيادة، مشيت خطوتين واتلفت عليه لقيتو بعاين قدامو بحدة وتركيز، كأنو بحاول يصنع قصة حول الموقف الحصل قبيل مع رضا بما إني ما أجبت على أي سؤال من أسئلتو، زفرت نفس قوي وأنا بتأملو بتنفس بعنف لدرجة صدرو بيعلو ويهبط. أنا ظالماه صحيح؟..

___

دخلت البيت واول ما وصلت الهول حسيت بجو البيت مُكهرب وعرفت أنو كان في نقاش حاصل وبرضو عرفت سبب النقاش، عبدالوهاب..

=سلااامُ عليكم، قُلت بصوت عالي وانا بدخل عليهم، كان في ماما وحبوبة في الصالون وكانو بهمهموا، قطعو كلامهم وردّوا السلام..

_كشفت للمطبخ بنظرة متفقدة وسألت: وين خالتو ملك الليلة؟..

_زفرت حبوبة نفس قوي وردّت وهي بتهزّ رأسها: في أوضتها..

=مالكم في شنو؟..

_ماف شي، ردت امي وهي بتقوم من مكانها، لحقتها في السلم وانا بسأل: خالتو ملك كويسة ماما؟، في شنو؟..

_قالت بضيق: كويسة، عبدالوهاب جا الليلة عشان يصالحها تاني، وجاطتها معاه وطلبت الطلاق تاني برضو وهو رفض وانفعل وقال كان انطبقت السما بالأرض ما بطلقها، المهم انها منهاره من قبيل تبكي في غرفتها، وحبوبتك شاكلتها بعد مشى..

=اتنهدت بتعب، وقفنا فجاءة في نص السلم وماما اتلفتت علي وعيونها مولعة: بس أنا ما فاهمة دي شنو البجاحة وقلة الادب دي هاا؟..

=عقدت حواجبي بتساؤل منتظراها تتم كلامها عشان افهم قاصدة شنو ومنو!..

_رفعت أصابعها قدامي وبدت تحسب: تخونها، وتكذب عليها، وتجيبها تقعدها معاها في البيت وتستغفلها، وتجي بكل البجاحة الفي العالم تقول بحبها وما بطلقها، طلقة في نُص راسك ياخ..

=ماما، ماما أهدي، ريلاكس ما تنفعلي، عاينت لي وملامحها الغاضبة أختفت، قالت: انفعلت شديد!..

=أكتر مما تتصوري..

عاينا لبعض مسافة وفقعنا الضحكة..

واصلنا مشينا، هي قدامي وانا بتأملها من ورا وقلبي واجعني، بتذكر كلام رِضا قبيل، هل فعلاً أنا أنانية وبأذي فيها!!..

ماما دخلت غرفتها وانا مشيت اتفقد خالتو، الكانت فعلا محتاجة تقعد مع نفسها فترة..

طرقت الباب بحذر فقالت: اتفضل بصوت متحشرج، كانت بتبكي..

دخلت وقعدت جنبها في السرير، أنا ما عارفة موجوعة لشنو بالضبط؟، عشان رفض يطلقها ولا عشان خانها؟.

_ربت على ضهرها وميلت راسها على كتفي، مسحت دموعها وكانت عيونها متورمة، سألتها: خالتو؟، ممكن اقعد جنبك شوية..