~ريما♡..
_طالعت نفسي بإعجاب، كنت لابسة فستان بلون البنفسج، ناعم وضيق مرسوم مع جسمي النحيف بخفة، بيصل لنص ساقيني كدا مع فتحة طويلة من ورا -خطوة- أما الاكمام فكانت من قماش شفاف، شعري القصير مكوي ومنسدل بحرية واطراف خصلاتو بيداعب عنقي الطويل، اكسسورات مناسبة وميكب خفيف، اتلفتا على خالتو الكانت وراي، اتأنقن ولبست هي كمان، توب حرير نبيذي مزين بخرز فضي لامع، والحنة والميكب الخفيف والهيلز الشفاف المناسب للبستها حاجة جميلة شديد♡..
=عمو عبد الوهاب لو شافك بيقع في حُبك من اول وجديد، قلت وانا بتأملها، خجلت وقعدت تمتم، طالعتني وقالت: وأنتِ الفستان حياكل منك حتة..
=موش؟، لفيت حول نفسي، الهيلز كان عالي فقربت اقع، ضحكت فيني: خلي بالك يا بت..
تلفوني رنّ فيديو كول، مشيت عليه وخالتو اتحركت طالعة من الغرفة، قالت ماشة تتفقد ماما..
=سومااا..
_انتِ منو..
=صريت ليها: بطلي عوارتك..
_قعدت تضحك: صحبتي ما سمحة كدا..
=شكرا شكرا، غطيت وشي بخجل مصطنع..
اتونسنا شوية وسالتني من ماما، كلمتها انها بتتجهز حالياً، عانينا صعوبة كبيرة عشان نقنعها تختار فستان زفاف، كانت مستخسرة اي شي على نفسها..
_اتنهدت سوما: المهم انها مبسوطة..
=ابتسمت: ايوا دا المهم، سمعت صوت عامر فسالتها: عموري حبيبي وين؟، اشتقت ليهُ، لو خليتيني كنت سوقتو معاي..
_حوّلت الكاميرا عليه كان راقد ورافع رجولو ماسكهم بيدينو وبيكلم نفسو، الود دا انا بموت فيه، متأكدة لما ماما تولد ح احب اخوي/اختي اكتر من نفسي..
=ياريت لو جيتي معانا، همهمت..
_انا زاتي اتمنيت احضر عرس خالتو مِسك، بس يلا نقول شنو..بالمناسبة!، رجعت الكاميرا لوشها وظهرت ملامحها المندهشة..
=شنو؟..
_انتِ عارفة بعلاقة نهلة مع قريبكم داك، صاحب إياد..
=معاذ!..
_اي.
=عارفة من زمااان..
_شكلو مفكر يتقدم ليها، بعد تخريجها طوالي..
=جد!، قعدت اضحك، تابعت: احلى خبر، تخريجها موش الاسبوع الجاي؟..
_اي، يا زولة شغالة في نفسها حبسة عروس بس، قعدت تضحك..
=مبسوطة ليهم..
_حُسام خبرو شنو صحي..
=رسمت ملامح حزينة ورفعت اصبعي بتامل في الخاتم: مشتاقة ليه حسام خطيبي..
