و لقد حطمت الفؤاد .. جحيم الحب

10

   ~ريما♡...

_البت دي ما اكلت حاجة من امس، قدر م الحيت وحلفتها رفضت، كدي ادخلي انتِ وحاولي اقنعيها ان شاءالله تاكل ليها لقمتين بس ، قالت مُنى -ام نسمه- وكل القلق والخوف الفي الدنيا ظاهر في ملامحها..

=طيب حاحاول يا خالتو، مشيت لنسمه الكانت قاعدة متلفلفة ببطانيتها وشاردة في الفراغ، قعدت جنبها ومسكت يدينها الاتنين احتوتيتهم بين كفوفي وضميتهم بقوة، كاني بقول ليها انا جنبك وسانداك وداعماك مهما كان، ببطء شديد وبرود حولت نظرها من الفراغ وركزتو على عيوني، سألتني:

_صحي القالتو نهلة أُختي؟..

=نهلة قالت شنو؟، سألت بخوف انو نهلة تكون ضعفت وكلمتها بمرض إياد الداسيه عن الجميع..

_انكم م لقيتو إياد وحتى صحبو قال طوّل م شافو..

=اومأت براسي بإرتياح: ايوا..

_اتنهدت بتعب وقربت مني، ختت راسها على كتفي وغمضت عيونها، ضميتها علي وبديت امسح على شعرها وأرّبت على ضهرها وبحاول اخفف عنها، حسيت بإني شايلة حمل تقيل بمعرفتي بمرض إياد وحاسة بالذنب لانها اقرب صديقة واخت لي ودسيت عنها مرض حبيبها وانا شايفاها بتتوجع قدامي كدا.

بديت اتذكر الاحداث الحصلت في المحل بتاع إياد...

▪▪▪▪▪▪▪▪♡

معاذ بتأثر واضح: قال انو حيسافر مدني عشان يخضع للعلاج الاشعاعي هناك..

_نهلة بإنفعال وآسى: وليه م كلم حد مننا؟، ح يسافر براه يعني؟.

_معاذ: طلب مني اسافر معاه، اصلا عندي عمي في مدني، ح انزل عندو وهو حيتحجز في المستشفى فترة العلاج كلها تقريبا..

=افهم انو دا السبب العشانو خلا نسمه؟، سألتو بإندفاع..

_معاذ بصدمة: يعني خلاها!!..

_انا ونهلة اومأنا في نفس اللحظة"ايوا"، معاذ سكت شوية وقال: حاولت اقنعو انو دا م حل واحسن يوريها ويكلم باقي اهلو بقصة مرضو عشان يقيفو معاه ويسندوه في الاوقات الصعبة البمر بيها دي، بس هو قال انو أبوه واخواتو معتمدين عليه في حاجات كتيرة وما حيتحملو الصدمة، وقال انو نسمه بالذات حساسة و حتتأثر شديد، لو جاتو ملاريا بس بتقلق وتجي تحرسو للصباح ومرات بتفوت محاضراتها عشان تمارضو فما بالك لو عرفت انو عندو كانسر!

_حُسام وكان دي اول مُداخلة ليه في الموضوع: من ناحية وجهة نظرو صح، المرض ما بيوجع المريض، بيوجع اهلو والناس البحبوه أكتر..

_نهلة: فعلا نسمه لو عرفت ممكن تجمد السنة عادي، وحـ تسافر معاه مدني فترة اخد العلاج كلها عشان تكون جنبو، بس حرام البت ح تجن والليل والنهار تبكي..

_معاذ: برضو في شي تاني، الدكتور كلمو انو السرطان عندو بيتطور بسرعة، في خوف انو يصل للمرحلة التالتة والورم ينتشر للانسجة المجاورة، إياد خاتي احتمال اذا ما اتعالج من السرطان واتمرمط في المشافي والاجل اخدو نسمه حتفضل الفترة دي كُلها مُتمرمطة معاه، و حترفض تشوف حياتها و تضيع عمرها وزمنها، فقال احسن يخليها وتقنع منو من تقعد منتظراه بأمل كاذب وما معروف حـ يتعالج ولا لأ.