و لقد حطمت الفؤاد .. جحيم الحب

19

  ~فؤاد♡..

_فؤاد بقيت كيف؟. سألني وهو بيقفل الباب وبيدخل..

=كويس، طالعت رجلي -الغير موجودة- وكنت لسه حاسي بالغرابة وما قادر اتعود على عدم وجودها، اتنهدت وقلت: حاسي بإنو في شي ناقص، ما قادر أقاوم الشعور دا بس..

_جرّ الكرسي وقعد جنبي، ربت على يدي بمواساة: كلو حيعدي..

=ابتسمت غصبا عني واومأت، سكت شوية وسألتو: اتواصلت معاها؟..

_قصدك ريما؟..

=ايوا..

_كلمتها انك سألت منها، قالت حتشوف وقت مناسب وتجي تطمن فيه عليك، طلع تلفونو من الجيب وقال: احتمال تكون رسلت شي، خليني اشوف..

مط شفاه واومأ بإدراك كم مرة، سالتو: قالت شي؟.

_لالا، رسلت لي جدول الامتحانات، الاسبوع الجاي..

=حسيت بخيبة واطرقت رأسي، همهمت: تمام..

_حتلاقيها ما تشيل هم، في الكرامة بتاعت طلوعك من المستشفى..

=ابتسمت بمرارة وقُلت: شكلك ما سمعت كلام الدكتور، ح احتاح اخد جرعات كيماوي..

_خليك متفائل يا مان..

=اتنهدت تنهيدة طويلة، طالعتو ببطء واتاملت ملامحو، قلت: بتحبها؟..

_حسيتو اتفاجأ في الأول، حك شعرو بإرتباك واطرق راسو، اومأ وهو بقول: وعايز أعمل خطوة جادة كمان..رفع عيونو وطالعني برجاء: ما حتعارض صاح؟..

=ابتسمت وحركت يدي لشعرو، بعثرتو ليهُ وكان مطرق راسو ومبتسم: أحسن منك حألقى منو اكون مطمن عليها معاه..

_رفع راسو ورد بثقة: ما حتلقى..

=ضحكت..

_حسام اتأمل ضحكتي برضا، قال بعد صمت قصير: خالتو فدوى ما راضية بموضوع العلاقة دي..

=اه ما تشيل هم كتير، بتعارض في الأول بس بترضى بسرعة، تتذكر لما عرفت بموضوع زواجي من أماني، خاصمتني شهور بس رجعت سامحتني ببساطة، ضحك حسام وعلّق: واليوم علاقتها هي وأماني احلى ما يكون..

=اومأت موافق على كلامو، زحيت يدي من شعرو وكنت متردد شوية، استجمعت قوتي وقُلت: أنا مبسوط بوجودك جنب الحاج والحاجه..

_طالعني بعيون حائرة ومتسعة: مناسبة الكلام شنو؟، ليه فجأة قُلت كدا؟..

=أتهربت ببصري وطالعت الفراغ بشرود: زمان، كنت بجرحك بتصرفاتي وكلماتي، وكنت قاسي معاك وما حصل..

_قاطعني: شايفك بقيت حساس شويتين الأيام دي!..

=شنو؟، اتلفت وطالعتو بتساؤل..

_ما محتاج تعتذر لي، دي حاجات حصلت زمان ونسيتها، ما تفتح الصفحات القديمة..

___