في عرين الاسد

في عرين الاسد 21

#في_عرين_الاسد
#بقلمي  : #مشاعر_مبعثره
الحلقه  (21)
ما عارفه صدفه ولا قاصد انا لمن شفتو رجعت 100 خطوه لورا كأنو الفتره دي كلها ما عدت قلت له مازن؟  : سمر بالجد انتي يعني  : شنو البجد  : شفتك كم مره طالعه من الجامعه وما صدقت انو انتي اخبارك شنو  : تمام الحمدلله  : وكيف صحتك  : في افضل حال  : الحمدلله
حاولت اتماسك قدامو ومواصله شغلي قال لي ليه ما عاوزه تعايني لي؟  : اعاين لك ليه؟ انا مشغوله  : وانا برضو جاييك في شغل عاوزك تشتغلي معاي البحث بتاعي  : ما بقدر شغلي كتير شوف لك اي زول فاضي  : انتي ما عاوزه تساعديني بسبب  : بسبب شنو في شنو بيننا؟ لو سمحت ما تظهر قدامي  : بتتعاملي معاي كدا ليه  : انا ما عاوزه اتعامل معاك اصلا امشي من هنا  : خلاص خلاص ما تنفعلي انا اسف وطوالي مشى انا كرهت الشغل والجامعه طلعت قبل زمني وما انتظرت الزبير يجي يسوقني قعدت افكر في حياتي واللخبطه البتحصل فيها الزبير اتصل بي قال لي اطلعي انا واقف لك برا  : انا رجعت البيت  : ليه ما انتظرتيني ولا اتصلتي  : خلصت شغلي بدري  : سمر ليه ما اتصلتي طيب  : من غير سبب  : تمام  عاوزه اقفل قال لي ما نفسك في حاجه من برا اجيبا لك؟  : لا  : جاي عليك وقفل طوالي جاء شايل اكياس كبيره لمن جيت شلتا معاه قلت له ليه جايب الحاجات دي كلها  : اصحابي عزمونا عشاء وانا قلت لهم يجو يتعشو معانا انتي رايك شنو يجونا ولا نمشي لهم  : نمشي طبعا البقدر يطبخ لك الكميه دي كلها منو  : طيب امشي اجهزي وما تأخرينا مشيت قعدت في الكنبه وهو مشى شرب مويه
وجاني
قاعده هنا مالك؟ : ممكن ما امشي معاكم؟  : لا مافي اي اعزار انتي مالك الليله عيانه؟ خت يدو في جبهتي زحيتا قال لي بالجد مالك انتي ما طبيعبه  : مافي حاجه  : طيب خلينا نمشي دموعي جرت لمن هو ان*خ*لع  قال لي يا بنت ما ت*خ*و*ف*ي*ن*ي الحاصل معاك شنو ما رديت له بس قعدت ابكي بصوت قال لي حصلت معاك حاجه في الجامعه؟ فصلوك؟ طيب انا عملت لك حاجه؟ ما تبكي يا سمر ذدت في البكاء هو طوالي فهم انو انا متألمه وشديد ومحتاجه ابكي مافي حاجه تانيه حاتريحني طوالي حضني مسكتو وبكيت لفتره طويله بعد شويه انتبهت لانو رقد معاي في الكنبه اصلا دا العاوزو ولا حاسي بي ولا شي بس همو ينوم معاي واستغل فرصة زعلي وبكاي اتضايقت شديد قلت له انت خليت المشي ولا شنو؟  : حسيتك تعبانه ما مشكله نأجل الموضوع لوقت تاني قلت له بزهج تمام وطبعا خلاص راضخه ومستسلمه له اتوقعت يقرب مني بس فاجأني بتصرفو قام على حيلو شالني دخلني الغرفه نزلني في السرير غطاني وقال لي
حاولي تنومي شويه عشان تهدي  :  وانت امشي مع اصحابك ما تتقيد بي  :  قلت لك ما مشكله ممكن تتاجل ليوم تاني انا برا لو احتجتي حاجه بس ناديني رقدت مسافه وانا بفكر مخي تعب من التفكير والبكاء والدموع جو الحزن دا كفاني منو قمت ولعت النور ومشيت الحمام هو لمن شاف النور جاء داخل دقا لي الباب
سمر  : ايوا  : في حاجه؟  : لا ابدا طلعت لقيتو قاعد في السرير قلت له انت بالجد ما عاوز تمشي يعني؟ : ما مهم  : طيب اسي ممكن نمشي بعد دا ولا اعتزرت لاصحابك؟  : ممكن بس ما ضروري  : جهز نفسك انا ماشه معاكم  : بتقدري؟  : ايوا عاوزه اغير جو  : خلاص انا بستحمى بسرعه اياك تتأخري  : ما بتاخر مشيت طلعت فستان طويل لبستو وقعدت اتمكيج جاء شافني قال لي ما عارفك ليه ما بتحبي التياب  : ما بغير نهائي لو اخلي المشي  : لو لبستي توب البحصل شنو  : ما بحبهم بقيدوني انا كدا مرتاحه وهدا الفستان استر من التوب  : خلاص اسرعي
كالعاده اخرتو لمن زهج وانا اصلا بحب اشوفو زهجان
قلت له بتبقى حلو لمن تزهج  : زهجيني كويس لمن تشوفي الوش التاني  : شفتو زمان في واحد ثالث؟ بالمناسبه ماشين وين نحن؟  : ماشين نتعشى  : عارفه قصدي وين  : مفاجأة  : اممم اوك غشى محل كدا جاء شايل كيس كبيييير وختاه ورا بعداك اتحركنا وقف في فندق كورنثيا  قربت اموت من الفرح دا بالجد؟  : لالا هظار خلينا نرجع  : اصحابك ديل ذوق ياخ انت ولا مره ما حصل طلعتني اخر الشارع وبسببهم حاتعشى في مكان بحبو دخلنا وكان حاجز لينا في طاوله مميزه وجنب الشباك المنظر روعه والاجواء خورافيه قلت له دا بالجد؟ طلع الكيس كان فيه باقة ورد مبالغه شكل وريحه مداها لي
لي انا؟  : ايوا  : انت الليله ما براك دا شنو الغنج دا  : دي حاجه بسيطه  : امممم من اصحابك ولا منك صرا لي قلت له بالمناسبه بالمناسبة اصحابك وين  : مافي زول جاي غيرنا  : نعم؟  : اممم ممكن تقولي اتحجت بهم عشان اجيبك  : يعني نحن حانتعشى برانا؟  : ايوا انا العازمك قربت اطير من الفرح حسيت نفسي ملكه على عرشو بقيت اتكلم كتير وبسرعه قاطعني الجرسون وهو شايل المينيو قعدت اعاين
ما عارفه اطلب شنو  : اختاري اي حاجه تعجبك  : محتاره بحب السمك المشوي والبيتزا 🍕  : البيتزا بتاعتهم رهيبه ما ذي البتعمليها انتي ذي القراصه  : انت قصدك انو انا ما بعرف اعمل بيتزا؟  : ما ذي حقت المطاعم  : بالعكس حقتهم كلها خضار وجبنه وما بتكون ناضجه كويس  حتى المكون الاساسي بكون بسيط انا بشتغل بضمير : تجربيها؟  : لا ما عاوزه  : بعملو البروست لذيد برضو  : انت جيت قبل كدا  : طوالي بجي المصنع قريب من هنا على فكره  : خلاص انا حااطلب بروست انت اختار الباقي وما تنسى التحليه والايسكريم  : بتحبي السكر انتي  : لاني ذيو ابتسم واشر للجرسون كانت قعده رومانسيه شديد مع الاضواء والورود والمكان والاجواء ذي الاحلام قلت له مدام عزمتني معناها حاتعزم رقيه ذي ما طلب القاضي بس ما تجيبها هنا اعزما في مكان تاني قعد يضحك قلت له انا جاده حاتشاركني في اي حاجه يعني ما كفايه انها ضرتي؟  : خلينا من سيرتا ما تعكري علينا الجو بقيت اعاين له وهو بياكل قال لي كملتي الفي صحنك؟ ازيدك؟ قعدت اضحك قال لي ما بحب زول
يعاين لي وانا باكل  : هو انت قاعد تاكل اسي؟ مالاقاني زول بطيئ زيك في الاكل وما بياكل كتير  : عشان العمليه  : حتى قبلها اكلك بسيط بالعكس حاساها فتحت لك شهيتك الادويه البتاخدا دي  : اديك منهم؟  : لالا ما محتاجه شهيه طبيعيه  : بالهناء  : الزبير  : عيونو  نزلت راسي مسافه حتى رفعتو وقلت له انت بتعاملني كدا ليه  : كيف  : ما زي زمان يعني  : عاوزاني اض*رب*ك يعني  : لا طبعا ما عارفه اصلا ليه كنت بتعمل كدا ليه من الاول ما عاملتني بالاسلوب دا وخليتني اكرهك  : بسببك خليني اذكرك انا حاولت اصلح العلاقه دي مرتين وانتي كنتي بتصديني  : ما حصل وصلت للمرحله دي خايف من القاضي صح؟ : انا ما بخاف من زول غير ربنا اي حاجه انا بعملا معاك برغبتي وكامل ارادتي  : يعني بعد شويه حاترجع زي زمان وتقسى علي مااشتغل بي قال لي اكلي  : الزبير بالجد عاوزه افهمم مره تعاملني كويس وفجاءه تقلب علي مرات تكون احن واحد علي ومرات اقسى منك مافي بتتعامل معاي باي منطق انت؟  : بمنطق انك زوجتي  : لا شغال بقانون الغابه عامل ذي الاسد  : معناها انتي في عرينو  : اوف  : مالك  : زهجت  : زهجتي مني  : لا  : طيب نرجع؟  : اقول لك زهجت
تقول لي نرجع؟  : يعني اعمل لك شنو طيب قومي  : على وين  : قومي بس  : انا مااكلت الايسكريم بتاعي : خليه طبعا دفع شلت ورودي في يدي وطلعنا ركبنا العربيه واتحركنا فجاءة وقف قلت له قطعت بنزين؟  : استغفر الله متين عربيتي قاعده تقطع بنزين  : بتعمل حوادث بس  :  نزل قال لي يلا لازم تجربي صريت له جاء فتح لي الباب وقال لي ما قصدي الحاث خلينا نتمشى شويه جربي الاحساس دا الشارع كان فاضي بس حلو حسيت بالبرد اتكلت فيه لف يده حولي وبقينا ماشين قال لي في منتزه قريب نمشي؟  : ارح اشترى لي اسكريم وقعدنا قال لي عاوزه تلعبي؟  : ايوا بس كانو الزمن اتاخر  : فعلا اتاخر بس يلا ما كان في ناس كتيره استمتعنا شديد وهو اصر الا يركبني معاه السفينه والنتيجه استفراغ شديد ولفة راس وصرخت عديل لمن نزلنا قلت له ماشه البيت بس راسي لافي  قال لي انتظريني هنا اجيب العربيه مشى وانا حسيت اني تعبانه شديد دخلت الحمام كنت شايله معاي الحبوب اخدت منها طبعا الحبوب دي قصتا طويله شويه دا المسكن الكتبوه للزبير بعد العمليه وما كملو زاتو انا مره حسيت بصداع وتعب اخدت منو حسيت انو نفسيتي ارتاحت بقيت اخدو باستمرار كل ما ازهج لمن اد*م*نتو
كل يوم لازم اخد منو لمن خلص مشيت اشتريه ابو يصرفوه لي الا صيدليه واحده ولقيتو غالي شديد بقيت كل ما يخلص اشتريه ادمنتو ومع اني عارفه ومقتنعه انو اد*م*ان بس بكذب على نفسي وبقول مجرد مسكن ال*م كل ما كان الزبير ي*ضر*ب*ني او يزعلني باخدو وبرتاح وبعد رجعت له بقيت اخدو كل ما يقرب مني عشان ما احس واتحمل وجودو معاي المهم هو جاء لقاني مافي الا اتصل بي طلعت له من الحمام قال لي مالك  : مافي شي  : عاوزه تمشي مكان تاني؟  : لالا خلينا ننوم بس  : شنو  : نعسانه خلينا نرجع البيت عاوزه انوم  : تمام يلا مشينا البيت ورقدت طوالي هو دخل الحمام غير وجاء لقاني راقده قال لي قومي غيري ملابسك دي وغسلي وشك حاتنومي كدا؟  : ما قادره اقوم  : اساعدك؟  : ايوا  : لا ما حاساعدك بطلي كسل وقومي يلا لمن رقد قمت طلعت طلعت الفستان رميتو في الأرض شلت قميص من الدولاب لبستو اتريحت وجيت رقدت جنبو قال لي شايف نفسياتك فل  : مبسوطه  : لو عارفك حاتنبسطي كدا كان طلعتك من زمان  : لازم  : دي شنو الريحه الحلوه دي ابتسمت له قال لي خلاص نومي انتي تعبانه ووراك شغل بكرا طفا النور ورقد انا طوالي حضنتو قال لي سمر عاوزه شنو  :
الا اكون عاوزه حاجه يعني؟  : ايوا الا تكوني عاوزه حاجه  انا فاهمك كويس يلا اطلبي ماشه رحله حفله؟ انا موافق ما تتعبي نفسك نومي ساي فتحت النور وقمت قلت له انت قصدك شنو  : ولا شي موافق على الانتي عاوزه تعمليه  : انا ما عاوزه اي حاجه الخلاك تقول كدا شنو  : سمر ما تخلينا نفتح الموضوع دا خليه غامض كدا وانا ما عندي مانع  : اما انا ما بحب تفهمني غلط رفع نفسو وقعد قال لي انتي كل ما تكوني عاوزه حاجه بتتعمدي تقربي مني مع انك ما عاوزه ولا بتحبي اصلا تكوني معاي في الظروف العاديه ما بتحبي حتى تشمي نفسي متين قاعده تلبسي الحاجات دي ولا تتريحي لو ما انا طلبت منك او انتي عندك طلب اطمني انا ما مطالبك باي شي واي حاجه ما عاوزاها  ما تعمليها انا ما بجبرك اهم حاجه تكوني معاي : انا مابسمح لك تظن فيني ظن وسخ كدا انا لو عاوزه حاجه بخاف اطلبا منك يعني؟ لا بقول عديل لو توافق لو ترفض  : وانا ما بهمني الانتي بتعمليه دا كلو ولا قاعد انفذ رغباتك مقابل انك تسلميني نفسك انا بوافق على اي حاجه تطلبيها لاني مقتنع شيلي الافكار السلبيه الفي راسك دي وخليك طبيعيه ما تتعبي نفسك وتجتهدي عشان طلب مجاب سلفا كدا اريح لك وطوالي قام نبذتو
نبذ بس بيني وبين نفسي حيوان هو فاكرني بالتفافهة دي ارخص له نفسي عشان مطالبي ذي العاهره اصلا هو البدا بالاغ*تص*ا*ب وهو القاعد يجبرني كنت بقول الكلام دا عشان اخفف على نفسي ومتاكده انو كل كلمه قالها صحيحه في محلها تمام الصباح طلع بدري بعد ما نام في الغرفه التانيه ومن غير ما يصبح علي وانا ولا اشتغلت به اتصلت به قلت له الليله حااتأخر ما تجي تسوقني بجي براي  : راحتك
مازن تاني جاني وطردتو بس هو ما بطل يجي كل يوم رغم اني بحرجو اما الزبير علاقتو معاي اتغيرت اهملني مش ما بهتم بي بالعكس بتونس معاي  عادي وبفسحني وبساعدني في البيت بعمل لي اي حاجه بحبا بس لمن نجي ننوم بقبل وشو الجهة التانيه ومافي اي اقوال تاني الا الصباح يعني هو قريب بس بعيد في نفس الوقت من يوم اتناقشنا والموضوع دا مؤثر علي بطريقه غير مباشره كل المعاناة والزعل والزهج انا مرجعاها لاسباب مجهوله  ومستبعده الاحتمال دا مرات ازهج منو بدون سبب ونتناقش ويشاكلني ومرات بمشيني بس كل يوم برجع  يبيت في البيت
اتفضل يا الزبير انت ما غريب  : شكرا  : بقيت ما بتجينا  : مشغول بس يا خالتي  : قومي يا بنت جيبي له العصير  : شارب والله خليك مرتاحه  : لالا دي تجي كيف  : خلاص ياامي جيبيه وانا بشربو  : انت ما بتخجل اصلو اعمليهم اتنين انا ماشه اخدو راحتكم واعمل حسابك يا الزبير الليله ما بتطلع مننا بدون غداء
الحكايه شنو يازول مالك رامي البنت كدا؟  : كيف راميها؟  : من يوم اتشاكلتو وهي جات انت ما جيت اتكلمت ولا ناقشت زول  : هي ما حكت لكم؟ : ما حكت اي شي : تمام  : في شنو عاوز ترجعا بيتا متين  البنت قربت تجن انت عارفا بتحبك كيف امو طوالي نادتو فتحي يا فتحي تعال دقيقه  : شنو يامي  : تعال بس  :  عن اذنك  :  اتفضل  :  البيت بيتك تمام؟  ما تخجل اسي بجي  مجرد ما هو مشى جات رقيه شايله العصير وساكته قال لها كيفك  :  تمام الحمدلله  عاوزه تمشي قال لها رقيه انتي ما وريتي اهلك؟  :  اوريهم شنو  :  بطلاقنا طوالي دموعا جرت قالت له انت ما جيت ترجعني يعني؟ وكمان  بتقولا في وشي  : حاجتين مافيهم هظار الزواج والطلاق ونحن اتطلقنا لمن قلت
اكلم اهلك رفضتي وقلتي لي بكلمهم انا وقلتي كمان ما عاوزه تشوفي وشي  حصل ولا ما حصل؟ : حصل بس...  : مافي بس بتتجرجري لشنو  : اهلي لو عرفو اني مطلقه وقاعده هنا ساي ما بخلوني حايرجعوني البلد وانا عاوزه اشتغل  : دا ما عزر قبل زواجنا كنتي قاعده وشغاله ولو عاوزه انا بكلم فتحي يقنعهم يخلوك  : انت بس عاوز تتخلص مني وما صدقت قلت لك طلقني طلقتني بدون تردد  : انتي العاوزه كدا احنسك يعني؟ ما دا طلبك  : وتطلقني طوالي من غير ما تعرف دوافعي  : البتطلب من راجلا الطلاق  بدون سبب دي واحده قنعانه بس وهو ما بكون راجل لو ما طلقا  : يعني انت ما راجل؟  : احترمي نفسك وما تخليني امد يدي عليك راجل ولالا انت ادرى  : طيب ليه ما طلقت سمر لمن طلبت منك كم مره ورفعت عليك قضيه دخلتك محاكم وبرضو ما طلقتا ليه متمسك بها كدا وانا لا ولا عشان بتحبها قعدت تبكي  انا قصرت معاكم  في شنو عشان ترميني الرميه دي دمرت حياتي والفتره الكان ممكن اعيش  فيها احسن من كدا ليه ليه  :  رقيه لو سببت لك اي ضرر انا ما قاصد وبعتزر لك بس ما حاتجي تلوميني عشان نفذت حاجه انتي طلبتيها ومن غير اسباب  سمر دي بنت عمي و عاشت
معاي مشاكل ما لها اول ولا اخر وانا غلطت في حقها انتي عارفه كدا كويس ما طلقتها عشان نصلح البيننا وندي نفسنا فرصه بس انتي كان بيننا شنو غير الموده والرحمه؟ قصرت معاك في شنو حصل سئتك؟ ولا ض*ر*ب*ت*ك  حصل قصرت في واجباتي ولا حرمت من حق من حقوقك؟  انا لو عاملتك بنفس الطريقة العاملت بها سمر ما كان بس طلبتي الطلاق كان ق......  : كنت حااتحمل صدقني اي حاجه تجيني منك راضيه بها انا كنت ثايره وزعلانه بس كنت عاوزاك تديني قيمه ذي سمر تحس بي وتجي تراضيني بس تقوم تطلقني كدا انا ما بقبل وما راضيه عن الطلاق دا  : الحصل حصل وانتهى كلامنا دا ما برجع شي  : لا ما انتهى مافي اي زول عارف اننا اتطلقنا ولا حااكلم زول عاوزه ارجع بيتي  : ما ممكن  : مافي زول كان قاعد لمن طلقتني وحتى لو انت وريتهم بقول لهم ما مطلقه انا  : لو عملتي كدا حااطلقك في قدامهم ويبقو طلقتين قعدت في الارض تبكي قال لها رقيه انتي مافيك عيب والله انا المابستاهلك بعتزر لك على الالم العشتيه معاي بس اسف ما بقدر ارجعك بتمنى لك كل خير والله وتلقي انسان بستاهلك بالجد  : وليه ما تكون انت انا عاوزاك انت بس  : خلي بالك من نفسك قال كدا وطلع خلاها
تبكي طبعا دي كانت خطه من ام فتحي عشان رقيه والزبير يقعدو مع بعض ويحلو مشاكلهم وبتصالحو بس حصل العكس تماما واكتشفت انو بنت اختا مطلقه وداسه منهم قعدت تبكي وتداعي فينا فتحي قال لها رقيه انتي ليه ما وريتينا؟ ذادت في البكاء قال لها انتي غلطانه عارفه ليه؟  لانك اتزوجتي واحد متزوج وبحب مرتو وكم مره حكى لك عن حبو دا ما كان تقبلي به انتي الغلطتي في حق نفسك ما تلوميه هو  امو قالت له كلو من مرتو المغضوبه الله لابارك فيها الله يعكسا عليها انشاء الله ما تتهنى معاه ولا تضوق منو جنى الله ينتقم منهم الاتنين ويدمر حياتهم ذي ما عملو في بنت اختي جاهله وصغيره  : كفايه يا امي بطلي تدعي الناس ديل عشان ما يرجع فينا
سمر  : انت لاحقني لشنو ماشي معاي وين؟  : عاوز اتكلم معاك بس يعني حاتخسري شنو لو سمعتيني  : ياخ ما تلحقني راجلي واقف برا منتظرني  : انا مالو سالتو راجلك اسي؟ اصلا ما بهمني انتي البتهميني لو سمحتي خلينا نتكلم وانا بوعدك ما اخد من زمنك كتير ولا حااظهر لك تاني لو حابه  وقفت قال لي دا رقمي
اعملي لي مسكول او رساله في الواتس عشان اعرف انو انتي ونحدد زمن تكوني فيه فاضيه نقعد ونتكلم  : انا ما بطلع معاك  من الجامعه دي  : ذي ما عاوزه نقعد هنا جوا الجامعه يلا هاك شلت منو الورقه ختيتا في شنطتي وطلعت
يتبع