[Zawgyi]
2
ပါးပြင်ကိုလာရောက်ထိတွေ့သော နှာတံချွန်ချွန်လေးကြောင့် မွန့်တစ်ကိုယ်လုံးကြက်သီးများတဖျဉ်းဖျဉ်းထလာ၏။ ကျောပြင်လေးတောင်အနည်းငယ်ကော့တက်လာရကာ နှလုံးသားသည် သာမန်စီးချက်ထက်အဆပေါင်းများစွာခုန်ပေါက်လာလေသည်။
ကလေးဘဝတုန်းက နှင်းပန်းထံမှအနမ်းခံဖူးပေမဲ့ မွန် ဘယ်လိုမှမခံစားရပါ။ နှင်းပန်း သူမကိုမနမ်းတာ နှစ်တွေကြာပြီလေ။ ရင်းနှီးကြကာ skin ship ရှိကြပေမဲ့ ဒီလိုအနမ်းခံရတော့ မမမွန်တို့ ရင်ဘက်ထဲဝုန်းဒိုင်းကျဲနေပြီ။
ကျောက်ရုပ်တစ်ရုပ်လိုငြိမ်သက်သွားသည့်အပြင်မျက်နှာလေးရဲလာသော မွန့်ကိုကြည့်ပြီး နှင်းပန်းက ပြုံးလေသည်။ ဘယ်အစ်မကညီမနမ်းတာကိုရှက်လို့လဲ။
"မမမွန် ဖြေပါဦး"
နှင်းပန်းသည် လက်တစ်ဖက်ဖြင့်မေးရိုးသွယ်သွယ်လေးကိုထောက်လျက်မွန့်ကိုမေး၏။ အကြည့်တို့သည် ရီဝေလှသည်။ ကြည်လဲ့နေသောမျက်ဝန်းလေးများ၏ဖမ်းစားမှုမှာသိပ်ကိုပြင်းထန်၏။
မွန် အသိစိတ်သွင်းရင်း ပြုံးလိုက်ကာ
"ထင်တာပေါ့"
မွန့်ထံမှကြားလိုက်ရပြန်သောအဖြေကြောင့် နှင်းပန်း၏မျက်ဝန်းတောက်တောက်ကလေးများမှာချက်ချင်းညှိုးကျသွားတော့သည်။ မျှော်လင့်ထားသောအဖြေဆိုပေမဲ့ ထိုအဖြေကိုနှင်းပန်းသဘောမကျပါ။ မွန့်ကို အစ်မတစ်ယောက်ထက်နှင်းပန်း ပိုချင်ပါသည်။ သို့ပေမဲ့ မွန်ကတော့ ညီအမဇုန်ထဲမှမထွက်ချင်ပုံ။
"အတန်းစတော့မယ် နှင်းပန်းသွားပြီနော်"
ဆက်ထိုင်နေလျှင်မျက်ရည်ဝဲလာတော့မှာကိုသိ၍ နှင်းပန်း မွန့်ကိုနှုတ်ဆက်ကာ ကန်တင်းမှထွက်ခဲ့လိုက်သည်။ မွန်ကတော့ ထိုင်လျက်သားကျန်ခဲ့လေပြီ။ နွဲ့နှောင်းစွာဖြင့် တစ်လမ်းချင်းလျှောက်လှမ်းသွားသော နှင်းပန်း၏ နောက်ကျောလေးကို မွန် ငေးနေမိပြန်ပြီ။
ခံစားချက်တို့မှာအလွန်ရှုပ်ထွေးနေပါသည်။ သူမ ထိုခံစားချက်ကို အဓိပ္ပာယ်မဖွင့်တတ်ပါ။ ခေါင်းကိုတစ်ချက်ခါယမ်းလိုက်ပြီး မွန်လည်းကန်တင်းမှထွက်ခဲ့လိုက်၏။
