رواية " وكانت صدفة "
الفصل الثالث عشر ( محمود)
~~~~~~~~~~~~~~~~~~~~~~~
بصوت محمود :
انا وجنة بقينا صحاب اوي بقالنا ٤ شهور صحاب جدا ، بحضر جلساتها وببقي فخور بيها لما بتكسب قضية ، ولما بتخسر القضية وتكتئب ببقي قلقان عليها اوي ، قولتلها لما اتقابلنا اخر مرة عايز اتعرف علي اهلك علشان لما معرفش اوصلك اطمن عليكي عن طريقهم ، اتعرفت علي اهلها عرفتني بلقب" صديقي محمود " ، لكن احنا في الحقيقة اكتر من اصدقاء ، انا معجب بيها وهي معجبة بيا بس انا معرفش ولا هي تعرف ، بنتصرف علي اننا صحاب ، هي محتاجة تعرفني اكتر وانا محتاج اكسب ثقتها ، النهاردة هنروح عيادتي علشان تشوفني وانا دكتور ، قولتلها دايما باجي معاكي شغلك وانت لا .
الفترة الفاتت اتخانقنا خناقة واحدة زي اي صحاب بيتخانقوا ، زعلت مني علشان لغيت مقابلتنا عشان كنت عاوز انام ، الصراحة مش اول مرة اعمل كدة ، بس فعلا ببقي تعبان وعايز انام وفي نفس الوقت ببقي عايز اشوفها ، زعلت مني يومين ومرضتش تقابلني وقالتلي " خلي النوم ينفعك " ، البت دي بتضحنكي اوي والله ، بتبقي زي الطفلة لما بتزعل ، رحتلها الشغل وجبتلها شوكولاتة وغزل بنات اتصالحت في ثانية .
الفترة الفاتت مكتبناش احنا الاتنين حاجة علي الجروب ، الجروب دة حاجة مهمة اوي بالنسبالي عشان بسببه اتعرفت علي اكتر انسانة نقية في الدنيا .
النهاردة نازل اقابلها وهتيجي معايا العيادة.
محمود: ألو يا جنة فينك ؟
جنة: انت الي فين؟
محمود: انا تحت بيتك
جنة: بجد ؟ انا نازلة حالا
محمود: بقالك ساعة بتقولي نازلة ، والله لو مانزلتي همشي واسيبك
جنة: لا لا نازلة اهو اصبر شوية
نزلت جنة سلمت عليها وركبنا العربية ، طبعا كنا مستأذنين اخوها علشان تيجي معايا الشغل
جنة: ازيك؟
محمود: كويس يختي ما بدري ، انا عندي مواعيد
جنة : يا سلام!
محمود: اة والله ، انا دكتور مهم
جنة:هههههه طب يلا يا دكتور يا مهم
بعد انتهاء اليوم
محمود: يلا تعالي اوصلك
جنة: لا روح انت ، انا هقابل سمر اصلا
محمود: رايحين فين؟
جنة: سمر رايحة تجيب فستان وانا رايحة اختار معاها
محمود: طب اوصلكوا؟
جنة: لا
محمود: ماشي علي راحتك ، خلي بالك من نفسك كلميني لما توصلي
جنة: ماشي
جنة: سمر عاملة ايه؟
سمر: الحمدلله
جنة: المحل فين؟
سمر: بصي هو في المعادي ، هنركب اوبر
جنة: ماشي
ركبا الفتاتان السيارة وعند وصولهن ، نزلوا من السيارة ساروا خطوتان ثم جاء " توكتوك" يركبه رجلان ، اخرج الرجل جسده واذ يخطف حقيبة جنة من يدها ، ويقود الآخر بسرعة كبيرة
صياح عالي من الفتاتان
جنة: ألحقووني حرااامي سرق شنطتي
ثم بكت كثيرا
سمر: اهدي يا بنتي ، اخوكي ظابط انت نسيتي دة هينفخه
جنة: طب هاتي موبايلك اكلمه
جنة: لاااا
سمر : ايه؟
جنة: موبايله مقفول عشان هو نبطشيه
سمر: طب يلا نروحله
جنة: صدقيني معرفش هو نبطشيه النهاردة فين بالظبط ، طب كلمي بابا
اتصلت جنة بوالدها لم يجبها ايضا
سمر: طب اتصلي بمحمود
جنة: ماشي
هاتفت جنة محمود فأجابها: ألو مين معايا؟
جنة: محمود دة رقم سمر ، الحقني انا اتسرقت
محمود: ابعتيلي لوكيشن انا جاي
ذهب محمود لهن وجدهن جالسات علي الرصيف ، كانت جنة تبكي كثيرا
محمود: حصل ايه؟
سمر: في واحد بتوكتوك سرق شنطتها وباباها واخوها مبيردوش
محمود: طب يلا تعالو هوصلكم وبعدين هروح لجلال
جنة وهي تبكي: انت عارف مكانه؟
محمود: اة
جنة:هاجي معاك
محمود: لا انت هتروحي البيت
جنة : لا هاجي
محمود بصوت عالي: هتيجي تعملي ايه؟ دة حتي الدنيا ضلمه مش هتبقي عارفة شكل الراجل ، هوصلك واروح لجلال انا فاكر شكل شنطتك ، يلا
لم تجب عليه جنة وركبت هي وسمر معه في السيارة ، وقف محمود بعد ربع ساعة ، نزل من السيارة ثم عاد
محمود: خدوا مايه وعصير زمان ضغطكوا وطي
جنة: مش عايزة
محمود: معلش يا جنة لازم تشربي علشان ميغماش عليكي ، يلا اشربي بعد اذنك
شربت جنة العصير ، ثم ذهبت للمنزل وذهبت معها سمر
عائشة: ايه دة في ايه؟
سمر: جنة شنطتها اتسرقت
جنة: هو فين بابا؟
عائشة: ايه؟ اتسرقت؟! امتي ؟ حصل ايه ؟
سمر: واحد بتوكتوك سرقها ، بس محمود وصلنا وراح لجلال
جنة: هو فين باباا؟
عائشة: ابوكي قي فرح ابن صاحبه ، انت اتصلتي بيه؟
جنة :اة ، ومردش
عائشة: اكيد عشان الدوشة مسمعش
بعد ٤ ساعات رن جرس الباب ففتحت عائشة الباب وكانو" محمود، ابراهيم"
وبيد محمود شنطة جنة
عائشة: عملتوا ايه؟
ابراهيم: جلال اتصل بيا وانا خارج من الفرح رحتله وحكالي هو ومحمود الي حصل وبعدين قالنا اطلعوا اقعدوا بره وبعد ساعتين ونص كدة طلع ومعاه الشنطة وطلع عارف الواد اللي سرقها سوابق ومعروف
عائشة: كتر خيرك يا محمود تعبت معانا وسبت شغلك ، ادخل
محمود: انا معملتش حاجة والله يا طنط ، معلش لازم امشي علشان اتاخرت ، ممكن بس جنة اقولها حاجة
عائشة : تمام هناديها
خرجت جنة ووقفت معه ودخل والدها للداخل
محمود: ياه انت لسه بتعيطي يا عيوطة
ابتسم محمود ثم مسح دموعها بيده
جنة: شكرا ( قالت هذا بأبتسام ونظرة امتنان)
محمود: هبلة دي ولا ايه ، ادخلي نامي يا بت
جنة: بكرة الجمعة
محمود: ايوة عارف
جنة: اجازة مفيش شغل
محمود: عارف برضو
جنة: بطل غلاسة ، مش هشوفك بكرة
محمود قال بهزار : اخيرا يا شيخه دة انا زهقت منك
جنة: بجد؟ طب باي
محمود: ياه علي القموصة ، بهزر يا ستي ، نبقي نتكلم فون بقا
جنة: ماشي ، مع السلامة
