سيد الريف🌾مكتملة🌾

🌾الجزء 9🌾

سيد الريـــف 🌾🍁
عميق السلاك
الجزء 9🌙
ــــــــــــــــــــــــــــــــــــــــ

قاسم تكا على الكرسي تما تيشوف فالنجوم لي بداو تيبانو فالسما وحدة بوحدة

اريج وصلات لقدام الخيمة وبدا الحمار تيهرنط وهي بقوة العيا والضغط وزيد عليها الحمار غادي بشوية وسط العقبات جاب ليها النعاس ولات كلها مدگدگة

حمد شد الحمار وتيشوف فيها : هبطي ابنيتي هبطي راه لحكنا لخيمة

اريج شدات ليه فكتفو ونزلات حطات رجلها لارض وحيدات الصندالة لاخرة تتشوف فيها بحصرة حيت كانت عزيزة عليها
مشا الدري الصغير جاب ليها صندالة تاع مو وجا تيجري ومو شافتو مخرج ليها صندالتها وتبعاتو تا وصلات لباب الدار وهي توقف فالعتبة

حسنة باست يد باها وتتشوف فاريج: با هادي هي السيدة ؟
حمد : اه هادي ابنتي هي الضيفة غتبقا عندنا شهر باش تعلميها داكشي لي علمتك المرحومة

حسنة زادت لعندها تتسلم عليها بالحنك واريج مصدومة: مرحبا مرحبا بضيف الله اش سماك الله

اريج هزت ايدها بشوية تتمسح فحناكها ورجعت لور ومدت ليها يدها : اريج سميتي اريج

حسنة قاست ليها ايدها بصبيعاتها وجمعاتهم باستهم. (حركة معروفة فالسلام ديال العروبية ) : متشرفين انا قولي ليا ختي حسنة ومرحبا مرحبا زيدي دخلي

حمد هبط ليها باليزتها: حسنة ديري ليا نتوضا هانا غادي نربط لحمار ونرجع

حسنة هزت لباليزة ودخلات تابعاها اريج: زيدي اختي زيدي

اريج داخلة وكلشي جاها غريب من الصباغة تاع الجير لي مسبوغ بيها الحيط تاع التراب حتالفراش فالارض ولي هادشي كلو معندهاش عليه فكرة تا دخلات حسنة لواحد لبيت دايرين لخامية فبابو دفعاتها ودخلت مفرش فالارض وكاين واحد جوج سدادر شادين لقنت وواحد الجهة مجموع فيها لفراش مطوي منوع وجهة اخرا فيها ماريو تاع الخشب قديم لاصقين فيه غير جوج بيبان ولباقي طايرين ليه وطبلة فوقها ڤاز تاع الورد ديال لبلاستيك وشي ديكورات عندهم علاقة بالبحر كوكياج وحجر ملون وببوش البحر... مراية وكحل وعكر فاسي وريحة حمرة وعواد الند وشي تخربيق اخر محطوط تما

حسنة حطات ليها الباليزة ودارت تتشوف فيها: غتنعسي معايا هنا وحوايجك غنخوي ليهم جيهة فالماريو

اريج مشات كلسات فوق السدادر جاوها قاصحين متقول غا حجر

حسنة: هانتي اختي رتاحي انا غنمشي نكمل لعشا لبغيتي شي حاجة عيطي ليا من داك التاقة (سرجم صغير قريب لسقف) هاني غا حداك فالكشينة (الكوزينة)
....