GENAHSYDE. -A Jamaican Love Story.

ZIDANE!

Up from five dis morning. Ship out sum weed guh Antigua. Guh portmore guh do sum paper work a di Cannabis Dispensary deh and pass through di one a New Kingston just now.

Deh pan Mountain View Avenue now ago pick up Lans a him house ova Muirfield Apartments. Den wah mek a quick run through Tremaine Road, Crieffe Road, Deanery Road, and Sligo Road see di pree. Cause mi just see di bwoy dem inna blue a maths up road.

Den drop off a piece a food a Jarrett Lane.

Reach back pan di front and all a di man dem deh yah. Coppa and Biggs top scamma bout di place, wicked man inna di street stay speed. Wah link wid sum mad head from mobay.

Bones mechanic run off a mechanic shop wid Knowledge di electrician pan Thorburne Lane. Dem man yah love di old iron cah left di streets...no joke.

Troy big chef bout di place run off a cook shop pan Saunders Lane. Blingaz wah get dip fi murder a Florida been a rough up di streets from him fahwud.

Corey "Ghana" schaeffer real hustler and loyal to death.

Sean "Jubba" Grant a IT Technician a one a dem phone company deh and Candice baby fada. Know mi di haffi get brawlin pan in him fi knock up mi lickle sista a twenty two right unda mi nose. Den she now ...madly in love and nuh wah left view. But mi set har up wid a daycare still, cause a dat she say she waah. And Kia har two year old son a like mi own son suh cah deeven bawl, but wi good now still.

Boysie born hustla bad yuh fuck pan di sniper rifle...strong shoota.

And Lans fuckry man run off a barbershop and a shipping company bout di place.

Wah gi dem a chat and get di four one one bout wah gwan pan di grung.

"A dat wid yuh." Knowledge say to Boysie.

"Ben yuh fuck." Boysie say.

"Man have di car less dan a day and two-twos it get fuck." Knowledge say.

"Y chop badman?"

"Nuh Boysie fuck up di Mark X aready." Knowledge answer.

"Jah jah wah gwan?"

"Nuh Michelle gal man...cah look pan nuh gal...she nuh fuck up mi windscreen dawg."

"Jah know. Yow yuh eva have gal problem. Just mek sure nuh fuck nuh start up bout di place."

"No bossy man dat handle."

"Mek sure. Mek mi know how di bill guh."

"Nuh say a wud mi general."

Hail up di man dem and Uncle Sunny and head inside. Uncle Sunny have Tony back inna di street back inna di days. Him a like family to wi, suh mek him hole down di yard. Cause a nuh all di while wi deh bout. And gi him di shop outta front fi gwan eat a food same way.

Once di man deh forward in wi get down to business.

Wen yuh hear di name Zidane inna di street yuh either ago hear in associate with Don, Drugslord, Warlord, Entrepreneur or Investor. Cause dat a mi life ...wear nuff shoe. A nuh easy wuk, but man know say food haffi eat from youth. And mi neva plan fi stretch out nuh hand.

Between owning Night Clubs & Bars, Villas pan di Coast, working pan buying out two Country Club one Montego Bay & one Kingston... entrepreneur and a investor. Man just haffi just know fi rotate di ting. Days like today mi focus pan being a Don. Ensure View cova cause all dem see wen dem see mi is the most respected or highest ranking boss in action.

And mi do everyting fi nuh let dem down.

Have control ova everyting and everyone from di street corna drug to di gun trade. Oversee di garrison to di highest level a law enforcement and government. Government contracts from di one wah showcase to di public to di one inna di dark.

Ensuring everybody safe and peace and unity inna di turf dem. Woman, babies and old people untouchable.

It like mi a 'fada' to everybody ...ensure every pickney guh school, school fee pay, school book & supply govern, every household cova money and food a nuh problem for low income famiy or whosoever in need, ensure dem get work, business set up and dem nah fi fear fi deh life needa, protect di community from rival gangs and any problem wah cum bout.

A nuh easy wuk, but man do di do, cause mi done know how di ting set.

From di outside looking in yah say him neva get elected so wah mek him qualified?

And di answer yah get a... just a put in di wuk di system fail fi do...fulfill empty promises!

Get dutty and bloody more while and man haffi get brawlin. Cause a just suh di ting set. More while di man dem nah hole nuh harda. And mi haffi remind deh a who a run di grung. Cah most man feel like say a everybody ting...like everybody cah run in. Few head haffi buss more while and body guh missing neva fi find or talk bout again. Hole sum high caliber weapon fi outgun rival, cause yuh betta a pack di right tool and have the right team a mercenaries a back yuh up.

But a just suh it guh still.

Haffi protect mi doorstep, but done know di action a feel every weh. Cause man have a reputation fi up hole. Man live in such a way dat yuh nuh ear bad bout mi. If any bwoy feel dem wah inna chattings ...mi mek di iron dawg do di talking.

System done fail di people dem. And den waah mek it look like wi mek di ghetto people world become small and limited, see dem as dunce. Wen a wi a di only ting dem haffi run to. Dats why wi nuh ramp fi fuck up candidate ability fi get elected... anyting fi ensure View govern.

And dem man yah willing fi put in di wuk wid A1 Intelligence. Honesty is a very expensive gift, cah expect it from cheap people. Cah get sidetrack by people who nuh deh pan track. And dem man yah mi cah trust ...support network. Dem man yah work smart and play smart, grounded, highly fear, always available and know di code. Dem bold, dedicated nuh have nuh room fi doubt, indecision, or squeamishness. Ready any time fi eliminate di competition or problem.

Cah carry knife guh gunfight. Nuh waah nuh man round mi a mek excuse ...need improvement.

And dem man yah constantly a improve inna every aspects. Strategic alliances wid business and partner wah crucial fi building a proper referral base.

Wi deeven talk bout law, cause wi a di law. Either yuh hole yuh cahna, collect a quick food or loss yuh six points.

Everybody hole a spot inna di living room.

"Chat to mi."

Mi phone start ring same time.

Kendra.

"Good Morning Beautiful."

"Hey handsome." Have mi a smile like a fool.

"Wah gwan. Yuh good? "

"Yeah. Reach work early suh mi say mi a gi yuh a call. You good? "

"As should. Deh yah a deal wid sum business ."

"Oh sorry to intervene."

"Dat good man. Yuh know anyting fi yuh enuh."

"Yuh know fi swell head."

"Dat a mi job wen it cum to yuh."

"Now mi convince mi head buss. Nah hole yuh up still. Just wanted to hear your voice. "

"Table turn quick ...head buss off." Mi joke.

"Yuh gwine mek di people dem send mi home from dem work. Ago get ready fi mi first patient."

"Talk to yuh lata Doctor Garcia."

"One day..lata" She say hanging up leave mi floating.

Mi need fi see har.
_________________________________________
Love how everything is merging together. Curious who's pov you like more so far?

Thank you for reading.
Please drop a vote if you enjoyed this chapter.