GENAHSYDE. -A Jamaican Love Story.

ZIDANE!

Drop a country bout to six. Burn up di toll wid Jubba Black Mark X, Ghana and Lans pan di back sit. Neva waah loud up di ting suh one car and a few man good.

Decide fi handle business a Westmoreland pan di weed farm first and den circle Marksman a Bay.

Link di man dem and get di locate. Find Shabba ova pan Roaster Lane a drink tea inna a yard.

Beretta nine mm, lock pan belly mi greet di lady and a young girl good morning inna di yard. Wid Jubba and Ghana a di gate.

"Shabba Don mek a step wid mi."

Man look like him see a rassclat ghost ...waah move and cah move.

"Mi general."

"Everyting good dawg just ah show yuh a pree."

"Mek mi ...mek mi ...mek mi tek a quick wash off first mi Don."

"No man yuh good ...dis ah be quick and fast." Mi tell him.

Man just inna a black Adidas sweatpants, white socks and slippers. Walk outta di yard mi point to Marksman white Axio.

Marksman dem run off a slaughterhouse pan dem endz carry him ova deh. Corey a bad bumboclat butcha a gwan run off di grund. Dem man yah kill anyting wah cah move.

"Bossy mi know a fuckry gwan, but but mi a beg yuh a chance."

Jubba and a next youth tie him up pan a chair inna di back.

"Shabba yuh see inna life wi haffi know wen fi build ...humble wi self.

"Bossy... bossy..."

"Yuh see badness a nuh fi every man and right now yuh fuck up mi medz."

"Phone." Ghana hand mi him phone.

Get di code and shot a message inna him group chat. Mek him linky dem know fi meet up fi decide next movements pan di Don.

"Gi di man dem di locate tell dem all guns out." Mi tell Lans.

"Mi Don just hear mi out..."

"Nutting yuh cah tell mi fi bring back di man. Yuh have any youth Shabba?"

"A lickle bwoy mi Don."

"Ah suh it only fear mi mek tings equal." Pull out di Beretta one inna him knee.

Him start fuss and fighting mi just put one inna di otha.

"Dawg mi a beg yuh." Him bawl.

"Nuh really plan fi send fi hole day still enuh. Cause guess wah today a di man burial."

"Don ...Don ...mi Don do."

"Shabba a borrow time yuh di deh pan dawg. Dah one yah a fi Troy." Empty Beretta inna him chest.

Almost a week since di funeral and back to business as usual. Almost all a Budha and Ashdem man dem dust out. And di remain lift up from bout di place. Pops link mi pan di Deputy Superintendent bwoy, say everyting up. And by di middle a di week hear say dem send him a country. And send a new one wah know di schweppes.

Today a one a dem office day deh meet up wid mi lawyer pan sum business move and bay tings. Mi nuh know how people do dis fi a living, round a desk hole fucking day.

Between di farm a West, cannabis dispensaries cross di island (and a look fi expand), night clubs dem, villas and other investment mi frass yuh fuck.

Today mi ago through di books dem mek sure everyting good. But mi woulda rather a chill wid mi woman or a fuck har mi smile.