"Suh wah di dirt?"
"Wah know sah Budha man dem a fuck wid di people dem business a Thorburne Lane. Waah tek ova, a force dem fi sell dem tings dem a a higha rate dan di others." Knowledge inform mi.
"Miss chin a Jarrett Lane a sah di opposite. Sah di Ashdem man dem waah she drop har price fi suit dem. Plus waah guh pan har payroll ....Extortion ting di man dem deh pan." Jubba say.
Budha, Ashdem,The bloods, Mac90 gang, and Black Western a mi main problem wen it cum to View. Man dem think Tony shoulda mek one a deh gang run tings from mi tek ova.
"Ah Knowledge ...Blingaz see wah gwan deh suh...and if a dirt, a dirt."
"Nuh say a wud mi fada" Knowledge answer.
"Hear say di bwoy Oshane a threaten di people bout ransom a Sligo Road fi dem dawtah." Jubba say.
"Yea hear dah one deh, gi him a page. And if a badness him a push ...den dah duppy deh a fi yuh."
"And di little bwoy wah dem say a di bwoy dem inna blue kill fi gun. Mi a hear say a The bloods dem gi di orda." Jubba continue.
"Bloodclat jah jah. Ah ago gi Inspector Clarke a link outta station hear wah gwan."
From Constable, Corporal, Sergeant, Inspector, Assistant Superintendent, Deputy Superintendent, Superintendent, Senior Superintendent, Assistant Commissioner, Deputy Commissioner to Commissioner everybody deh pan di pussyclat payroll.
"Di venda bwoy outta di primary school, still a prey pan di lickle pickney deh enuh and wah gi di parents dem bay big chat ...and a di bwoy Gibbs mi see a par wid him now." Biggs say.
"Biggs just wet dem lata ...duppy or not. Cah badda wid di fuckry...nuh like repeat mi self."
"See Chole wid di hole har face buss up a Windward Road wah day yah...say a har man do it, but dem good now still." Lans inform me.
Chloe a Trinika bestfriend. Nuh too deal wid dem people deh. But nuh tolerate man a beat pan woman suh haffi guh page him.
"Ah mi wi gi him a page."
Man dem chip in one by one wid di latest.
"Think dat a it fi now enuh boss." Coppa say.
"Ah. Suh watch dah style yah. Waah uno see wah gwan wid Mac90 and Black Western dem too quiet. And as mi did a mek uno know say a time fi wi expand inna new territories strengthen up di empire. Move ago start mek and di place ago get loud suh get ready fi dat. Cause yuh know di man deh nah guh tek it suh. But a di end a di day ...a good ting fi dem people inna dem area deh. So look out fi movement afta mi earthstrong."
"Ready right now." Blingaz say.
"Wah gwan fi yuh earthstrong mi g?" Ghana ask.
"Everyting govern man ...just show up inna yuh Sunday best."
Di man deh laugh.
"Just nuh badda wid di fuckry."
"Anyway di MP link mi bout a peace meeting tings and a show mi say him waah mi move a shipment fi him stay speed. Nuh really know did four one one yet still, suh mi wi mek uno know wah gwan."
"And oh mi a forward a West tomorrow pan di weed farm and have a shipment fi guh Trinidad for mobay. Ghana, Biggs, Boysie link mi early inna di morrows. Wah guh link Joy a public wah har baby fada broke up har foot before wi cut to."
"Pussy still deh pan di run." Biggs get up.
"Dat good man. Him days numba."
"Rass naily fi got enuh ...yuh know say Scarface fada drop out a Denham Town. Man did a say if yun cah gi him a strength." Ghana stand up from di chair him did sidung pan.
"Ah nuh say forty. Ah gi him a link."
"Anyway mi ah lift up enuh. Knock mi if anyting gwan."
Man dem head out and Lans mek mi know him waah gi mi a chat.
"Wah gwan dawg, yuh good?
"Yea dawg just waah show yuh a pree."
"See Kendra a left Norbrook dis morning. Think yuh di say a Liguanea she live."
Fuck ...dat mi know bout. And she say she nah see nuh body.
"Suh wah yah say."
"Nah say nutting dawg just a show yuh a vibes."
"Ah."
Kendra neva lie to mi suh mi nuh see why she woulda start now. Before wi lie to one another wi mek one another know wi nuh waah or ready fi talk bout whatever it be yet.
Sidung outta front inna di BMW waah guh a Cherry Gardens guh hole a fresh, den guh di office handle sum business and do sum trading. Di fi guh link Tony, but mi haffi guh mek him know a afta country settings dat.
Tek out mi phone and shot Kens a text, cause nuh know how har ting set a work.
Zidane: Did ago tell mi bout joe grind?
Less dan a minute Kendra reply.
Kendra: Wah yah talk bout?
Zidane: Word out say yuh a jim screechy bout di place.
Kendra: Zidane cut di fuckry and talk to mi strength.
Laugh to mi self bossy yuh fuck.
Zidane: Hear say yuh have new man.
Kendra: Last time mi check mi alone go bed and a mi alone wake up.
Zidane: Mi waah see yuh.
Kendra: By di time mi reach home and do wah mi a do ...mi nuh know.
Zidane: Kens nuh stay di fuckry. Wi talk bout dah year yah. Say a different settings.
Kendra: K. (Funny looking face emoji)
Zidane: K yes? And why di funny looking face?
Kendra: Nothing and yea.
Kendra: Just neva really wah come a Mountain View. (Funny looking face emoji)
Kendra cum a View one time since she move cum a Kingston. And if mi cah keep har way from dah side yah as much as possible ...ago do it by any means. If kens nuh haffi know bout mi Don life dat a victory fi mi. But mi know how my luck guh she bound fi find out soona or lata. Worst mi waah tek tings to another level. Nah lie to har just choose nuh fi show har mi dark side. Cause cah predict har reaction and mi cah afford fi lose har. She keep mi grounded and a di light inna mi dark world.
Zidane: Dat good babes. How bout mi cum to yuh?
Yuh haffi think smart. And mi selfish wid Kens cah afford fi a next man get har.
Kendra a mine!
Kendra: 32 Norbrook Drive. I'll message you when I get off work.
Fuck di address check out. Suh yuh mean fi tell mi Kens live inna mi back yard all along.
Zidane: K cool.
Kendra: (Smiling emoji)
Have mi a smile to ...just realize how much mi miss har since Christmas.
_________________________________________
I had so much funny writing this chapter. Let me know your thoughts.
Thank you for reading.
YOU ARE READING
GENAHSYDE. -A Jamaican Love Story.
RomanceLove. Loyalty. Sex. Family. Friends. Business. Drugs. Crime and Violence. Underworld. War. Gang. Jamaica.
