GENAHSYDE. -A Jamaican Love Story.

ZIDANE!

Inna life wen yuh left a wound unattended yuh only gi it more room fi deteriorate. And a dat a gwan a View been a say di yard need fi clean up. But di man dem a move unda style...suh mi a say ah...wet up di news carrier and wait fi catch di master red handed. But inna life atleast fi mi world nutting nuh name play nice or fair. And wen yuh left dutty wata too long it start smell.

Nuh waah mi woman inna nuh war wid nuh body. But mi nah guh sidung and gwan like mi nuh please wid how Kens deal wid Trinika. Nah lie mumma have di battle field lack... sexy yuh fuck.

Plus Miss Charmaine a mad head suh mi nuh really expect nutting less from Kens...just nuh waah she haffi a do dat.

Suh basically Trinika link wid di man dem from Black Western, cah apparently mumma feel violated. Yuh enemy joint wid yuh enemy... become friend just fi fuck yuh up. Deeven see har since har eardrum buss, but she did have it a fahwud...and she know betta fi guh one side.

Di next day afta everyting gwan fahwud a View business as usual. Di fuck ...nutting nuh special bout har...once a hair pan Kens head nuh move everyting up.

Kendra decide say she done suh mi just gi har har space, cause that's all she ah get from mi... sum fucking space.

Fuck breakup a guh.

Mek a quick run guh Atlanta wid Lans fi a few days. Cah one a di gunna dem from View drop out ova deh. Fuck up mi medz nuh get fi gi di man a chat before him drop out. But a di same time Tony drop out did haffi do di do. Nineteen rounds di man get to pussyclat...tear up di hole a him...jah jah.

Plus been a talk to a jeweler, design a ring fi Kens. Sumting unique...one of a kind...radiant
craft it fi represent har personality, cum at a cost but fuck dat. A mi Queen wi a talk bout suh di haffi fahwud fi it same speed.

Did a plan fi pop di question a Bali, from last weekend cause she been a rave bout deh, but everyting just guh left to pussyclat. Still inna  disbelief say Kendra say yes.

Love how har face light up from di reflection light a di ring, making har more beautiful dan ever.

Kendra Gonzalez.

Wid everyting wah gwan neva sure wah card ah play. But just know if she did say no...mi a continue till mi get it right...must say yes one day.
Kendra a mi life line cah live wid out har. Plus success wid out love is a lost inna fi mi book.

Drop back a View Wednesday did fi fahwud from Tuesday. But just fuck up di day guh look pan a few property wid Lans. Did waah do it wid Kens, but next time cause by right a fi wi vacation house anyway yuh tek it.

Deh pan di grund a check wah gwan since mi cut wid di man dem. Spot a white Axio a fahwud slow up di road and mi know a problem. As mi pop of di ruger haffi mi belly di man raise dem machine. Di Axio bwoy push a pistol through di window and start beat it...pussyclat.

Draw fi cova mi pump di ruger wet up di car, meanwhile Lans empty di tire dem. Like di bwoy inna di passenger seat get lick from start. Suh Ghana just finish him wid di beretta. As mi walk ova dem and light up di driva wah look like him rounds dem done.

Two two is another white Axio a fahwud up di road. One inna mi pussyclat left shoulder feel di sting but deeven pay it mind. Start light up di car...same time Lans get one inna him left shoulder ...fuck. See say mi a run outta rounds mi call Jubba wah throw a taurus gimme quick and fast. Tek di driva three points and di car tear off di hole a Miss Susie wall wah deh infront a Uncle Sunny shop.

Deeven know Lans get one more shot inna him left legs. Is like mi head just chip ...finish di bwoy pan di passenger seat as Boysie deal wid di one inna di back.