My hornable love (Complete)

Part -29

ပန်းခြံထဲမှာ ကျင်းပတဲ့ မင်္ဂလာပွဲလေး။

ဟန်ဘင်းကစောင့်နေရပြီး မက်သရူးကတော့ နောက်ကျမှ ၀င်လာလိမ့်မယ်။ မက်သရူးလာမယ့်လမ်းကို ဟန်ဘင်း ရင်တွေတဒိတ်ဒိတ်ခုန်ရင်း စောင့်နေရတယ်။ မကြာပါ။ သူချစ်တဲ့ကောင်လေးက အဖြူ‌ေရာင်၀မ်းဆက်လေးနဲ့ ကြော့ရှင်းခန့်ညားစွာ ထွက်လာတာကို တမေ့တမောငေးနေမိတယ်။ တကယ်ဆို စောစောကတည်းက ချောမောခန့်ညားနေတဲ့ ကောင်လေးကို အ၀တ်အစားလဲ အလှပြင်နေတာ ထိုင်ကြည့်ပြီးသားပေမယ့် ကြည့်လို့မ၀ပေ။

သူရှေ့တည့်တည့်ကို ရောက်လာတဲ့ ကောင်လေးလက်ကို ကိုင်မိတာနဲ့ မျက်ရည်တွေက ဒလဟော။ ဒီကောင်လေးကို ဘယ်သတ်မှတ်ချက်နဲ့ တိုင်းတိုင်း သူ့အပိုင်ဖြစ်လာပြီဆိုတဲ့အသိက အတိုင်းမသိ ကြည်နူးပြီး ကျလာတဲ့မျက်ရည်တွေ။ မျက်ရည်တွေသုတ်ပြီး မက်သရူးကို ကြည့်လိုက်တော့ မက်သရူးကလည်း မျက်ရည်ဝဲနေခဲ့တာ။ မက်သရူးလည်း ဟန်ဘင်းလို ပျော်နေတယ်ထင်ပါရဲ့။ မက်သရူးပါးပြင်ပေါ် ကျလုလု မျက်ရည်တွေကို ကြင်ကြင်နာနာလေး သုတ်ပေးရင်း

"မငိုပါနဲ့ မက်ချူးလေး"

ငိုနေရင်းက ပြုံးလိုက်တဲ့ မက်သရူးအပြုံးက တလောကလုံးကို လင်းသွားအောင် တောက်ပပြီး

"ကိုကိုလည်း မငိုနဲ့လေ"

"အင်း"

လို့ပြောရင်းက မျက်ရည်တွေကျလာတော့ နှစ်ယောက်သား မတိုင်ပင်ဘဲ ရယ်မိသွားတယ်။ ဒီလောက်ချစ်စရာကောင်းတဲ့ ကောင်လေးအပေါ်ကို အနိုင်ကျင့်မိခဲ့တဲ့အတွက် ဟန်ဘင်း ကိုယ့်ကိုယ်ကိုတောင် ခွင့်မလွှတ်ချင်။ ရှိသမျှ မနက်ဖြန်တိုင်းမှာ ဆော့မက်သရူးကို အသက်ထပ်ပိုချစ်ရင်း ကုန်ခဲ့တဲ့ အချိန်တွေအတွက် အလျော်ပေးရမယ်။

မင်္ဂလာနှစ်ကြိမ်ဆောင်ခဲ့ပေမယ့် အခုကမှ တကယ့် မင်္ဂလာပင်။ ဖွားဖွားမရှိတော့ပေမယ့် ဖိုးဖိုးကလည်း ပျော်နေသလို မက်သရူးမိဘတွေနဲ့ မက်သရူးမမကလည်း အများကြီး ပြုံးပြီး ပျော်နေခဲ့တာ။

ဂယူဘင်းနဲ့ ယူဂျင်းကလည်း စေ့စပ်တာကြာပြီပေမယ့် သူတို့ စေ့စပ်ပွဲတုန်းက မက်သရူးမတက်နိုင်တာမို့ မက်သရူးနဲ့ ဟန်ဘင်း မင်္ဂလာပွဲမှာမှ သေချာလေး မိတ်ဆက်ပေးတော့ မက်သရူးနဲ့ အနှစ်နှစ်အလလက ခင်ခဲ့သူတွေလို ရင်နှီးနေကြတာ။ ရစ်ကီနဲ့ ထယ်ရယ်ကလည်း ညားခါစမို့ ဟန်ဘင်းတို့မင်္ဂလာဆောင်မှာ ကဲလို့ကောင်းနေတယ်။ မင်္ဂလာသီချင်းကိုတော့ ဂင်ဂျီ၀န်းက သေချာလေးဆိုပေးခဲ့တာ။ မင်္ဂလာသီချင်းဆိုတာက ဂင်ဂျီ၀န်းအတွက် ပထမဆုံးပင်။ ဂွန်ဝုက အခမ်းအနားမှုးအဖြစ် လုပ်ပေးတယ်။