داز شوية ديال الوقت ناضت من المكتب ديالها وتوجهات للحمام (فوسط المكتب) توضات للصلاة وخرجات من المكتب غادية فاتجاه المسجد لي عندها تما فالطابق لي فيه مكتبها,دخلات لبسات،صلات صلاتها وخرجات،توجهات للمكتب جمعات الوراق لي تما وخرجات وسدات الباب، قبل ما توصل للأسانسور رن الهاتف ديالها،جاوبات
نجمة:أمدرا؟
المتصل:تمت المهمة,صفيناهالو
نجمة:صافي سير، و ويااك تتعرف هاد القضية
المتصل:كوني هانية
نجمة قطعات ودوزات مكالمة أخرى
نجمة:ألو
يمنى:وي صحيبتي
نجمة: أنا غادية للدار دابا دوزي عندي
يمنى:صافي أ الزين شوية ونكون تما،وقطعات
كملات نجمة طريقها وهبطات ركبات طوموبيلتها وكسيرات نيشان للڤيلا
دقائق كانت و صلات،دخلات لقات الخدامة كاتجمع الصالون
نجمة:يمنى جاية،ملي توصل قولي ليها طلع عندي راني فبيتي
الخدامة:واخا أمدام
طلعات ودخلات للبيت وسدات عليها الباب،ݣلسات فوق الناموسية كاتفكر كيفاش غادي دير،كيفاش غادير تشوفو بعد هاد السنين كولها,ماتكدبش خايفة تضعف قدامو،عمر شي حاجة حيراتها ولا خلاتها متوترة أولا قتلات شي حد بهاد السهولة، هي بنفسها مستغربة كيفاش غير معلومات و ورقة أترو فيها لهاد الدرجة،عااد يلا شافتو يعلم الله،بقات كاتفكر حتى تعصبات مالقات قدامها غي الڤاز ضربات يديها معاه حتى بدات كاتسيل بالدم،ولكن كان دمها سخون ماحساتش بالضربة.دازو دقائق وحي حاطة يديها بزوج على راسها حتى كاتسمع الباب كايتحل بالساروت من برا ودخل ضو خفييف للبيت بحكم كان مضلام حيت كولشي كان مسدود
يمنى: عاوتاني سادة على راسك هنا جاب الله عندي الساروت،شعلات الضو حتى كاتصدم من المنظر لي قدامها،يدين نجمة كلهم دمايات و الڤاز مهرس حداها وهي حاطة يديها على راسها،مشات عندها كاتجري وحنات على ركابيها وشدات ليها يديها
يمنى: أري نشوف ، شنو درتيي اصحبتيي علاش درتي هاكا شوفي دابا يديك كي ولاو
نجمة خطفات يديها من يد يمنى
يمنى: غادي تنوضي دوشي شوفي حالت كولها دم، وخرجي نداويلك الجرح ونشوفو عاد مالكي شهاد الحالة كولها يلاه نوضي
نوضاتها حتى دخلاتها للحمام ورجعات ݣلسات
هادي يمنى صاحبة نجمة الرووح بالروح، كانو ساكنين بجوج فحي واحد،وتعاونو بزوج باش خرجو من المغرب،دوزو الحلوة والمرة مع بعضياتهم،يمنى بنت سميمرة و متوسطة الطول،طاي حوتة وكولشي فبلاصتو،شعرها بني غامق وكذلك عينيها،شنايفها منفوخين وجذابين.
