شهقت ورد بصدمة وارتفع صوت سليم بغضب: الكلام اللي بتقوليه ده ميصحش و انا غلطان اني جبت مراتي لحد هنا.
ثم جذب ورد من يديها: هتيجي معايا الدوار دلوقتي حالا ومش عايز اسمع منك ولا كلمة.
جذبها من يديها الي سيارته وهي تبكي.
جلست بداخل السيارة واغلق الباب عليها ورمق زوجة عمها بغضب وتوعد واتجه الي مقعده بداخل السيارة وانطلق بها.
بكت ورد وتحدثت اليه بحزن: فضيحة ايه اللي مرات عمي بتتكلم عنها؟ انا عايزة افهم اللي بيحصل؟؟
سليم وهو ينظر امامه بغضب: مفيش حاجة ياورد وانا اللي غلطان اني خدتك لبيت عمك.
ورد ببكاء: انا عايزة افهم ايه اللي بيحصل بالظبط وايه الكلام اللي مرات عمي قالته ده؟
سليم بعصبيه: قولتلك مفيش ياورد وملكيش دعوه بالكلام ده انا هحل كل حاجة.
لتفاجأه ورد بصراخها عليه بعصبيه مماثلة لعصبيته: يعني ايه مليش دعوه دي حاجة تخصني يا سليم وانا لازم اعرفها.
نظر اليها عندما نطقت اسمه بحريه بدون قيود وهدأ كثيرا عندما استمع إلى اسمه يخرج من بين شفاتيها. ابتسم بداخله واوقف السيارة جانبا وامسك يديها وتحدث اليها بثقة: مش مهم ايه الكلام اللي اتقال المهم اني مش هسمح لمخلوق ينطق اسمك على لسانه واللي غلط وجاب سيرتك صدقيني هيندم ندم عمره.
بكت من حنيته عليها وتحدثت ببكاء: كلام ايه انا مش فاهمه حاجة ومعملتش حاجة عشان جد يجيب سيرتي.
ابتسم اليها وهز رأسه قائلا: مش عايزك تفكري في اي حاجة واللي حصل في بيت عمك ده كأنه محصلش وانا هكلم عمك لو لقيت منصور حالته صعبه هاخدك ونروح نزوره في المستشفى.
هزت رأسها بالايجاب وهي تنظر اليه بعيناها اللامعه بالدموع.
ابتسم لها بحنان واعاد تشغيل السيارة مرة أخرى وتحدثت ورد بحزن: انا كده هاجي معاك الدوار بتاعكم؟
اجاب بابتسامه: مفيش حل تاني ومش عايزك تخافي من اي حاجة انا معاكي.
ابتسمت بخجل وخفضت وجهها أرضا.
توقف بالسيارة امام الدوار وتحدث اليها: يلا بينا.
استمعت الحاجة رابحة الي صوت توقف السيارة امام الدوار وتحدثت الي زوجها: سليم شكله وصل.. انت متأكد يا حاج انه قالك انه هيسيب بنت البسيوني في دار عمها مش هيجيبها هنا؟
الحاج مرزوق: ايوه قال كده وعايزك يا ام عواد ابنك جاي فيه اللي مكفيه وكفايه عليه موضوع مراته ده يعني بلاش زنك عليه انتي كمان انا عارفك.
الحاجة رابحة: ولا هزن ولا هتكلم وخلي بت البسيوني تنفعه بعد فضيحتها اللي بقت على كل لسان.
الحاج مرزوق بغيظ: شوف انا بقول ايه وهي بتقول ايه وليه اسكتي ابنك زمانه داخل ولو سمع كلامك ده هيزعل منك دي مراته يعني شايله اسمه.
