#جريمه_فى_حى_المقطم
#صاحبه_البطل_الواحد
#اميره_اسامه
البارت التاسع...
أبتسمت زينه وهي شايفه الساعه في الموبايل
12:00
مسكت الموبايل وطلبت رقم عشوائي ثواني وأتفتح الخط
🙄🙄🙄🙄
بقلمي ……………أميره أسامه
رد عليها شاب.
الووووو
فضلت زينه ساكته شويه مش عارفه تكمل ولا لأ وبما أنها كانت أول مره تعمل الجنان ده فكانت متردده
زينه....أيوه
الشاب...مين معايا
زينه....نصيبك الأسود إللي عارف كل إللي أنت بتعمله
الشاب...لا ياشيخه طب ما تقوليلي كده بعمل إيه
زينه....أنت فاكرني بهزر طيب قابل بقي لما تلاقي فضيحتك في كل مكان من بكره
الشاب..أديني مستني أهو🤔 ويلا أتكلي بقي عشان عايز أنام وقفل في وشها مره واحده
فضلت تضحك 😂😂وعجبها الحوار قررت الأتصال تاني لكن علي رقم مختلف.أتصلت برقم عشوائي
ردت عليها بنت في عمر
ال 20 عام الوو
سكتت زينه بتحاول تجمع الكلام إللي هتقوله
البنت...الوووو مين معايا
زينه....أنا عارفه كل إللي بتعمليه.
سكتت البنت شويه وكأنها مصدومه مين معايا
زينه...وهي بتفتكر كلام علي في اللعبه مع صاحب ماجد😂🙆♀️
زينه...مش مهم أنا مين المهم أنا أعرف إيه
البنت...بخوف واضح أرجوكي قولي أنتي مين وتعرفي إيه
زينه....أعرف كل حاجه
وفجأه قفلت البنت الموبايل بسرعه بخوف واضح
بصت زينه عالتليفون بأستغراب وحست إن البنت دي وراها حاجه خوفها وتوترها مش طبيعي أتصلت تاني لقت الموبايل مقفول سابت زينه الموبايل من أيدها وضحكت لكن بسرعه أبتدت ضحكتها تختفي وهي بتفكر في حاجه و قررت أنها تتصل في وقت تاني وتحاول تعرف إيه حكايه البنت دي ولو عندها مشكله تساعدها.
مسكت زينه المذاكرات وبدأت تسجل كل حاجه حصلت في يومها ومن أهمهم اللعبه إللي قررت تجربها لأول مره مع نفسها.
بقلمي ………………..أميره أسامه
في مكان أخر بعيد وفي حي شعبي..
في غرفه فتاه تدعي دعاء ظاهر عليها الخوف والتوتر راحه جايه في أوضتها ودموعها نازله. بعد تفكير راحت دعاء علي تليفون البيت الأرضي وأتصلت علي صديقتها المقربه وجارتها في نفس الشارع
ياسمين...أيوه يا دودو
دعاء...بصوت باكي أيوه يا ياسمين
ياسمين...إيه ده في إيه صوتك ماله إنتي معيطه ولا إيه
دعاء....ياسمين أنا في مصيبه وعيزاكي تجيلي بكره ضروري
ياسمين...في إيه يا دعاء ومالك بتعيطي ليه
دعاء...بصوت واطي جدآ مش هعرف أحكيلك الوقت بس لازم تيجي بكره
ياسمين...يابنتي هاجيلك والله بس إنتي كده قلقتيني قولي في إيه
دعاء....مش هعرف أحكي والله الوقت تعاليلي بكره بس قبل ما بابا يرجع من الشغل عشان أعرف أحكيلك
ياسمين....طيب حاضر عالضهر هكون عندك بأذن الله
دعاء....يلا سلام الوقت
ياسمين...سلام.
......
في صباح يوم جديد.
تقريبا دعاء مكانتش عارفه تنام من كتر ما هي خايفه وطول الليل وهي صاحيه لحد ما النهار طلع والدها فطر ونزل عالشغل كالعاده
فضلت هي مستنيه ياسمين وخايفه تفتح موبايلها كل ده
رن جرس الباب جريت دعاء بصت من العين السحريه ولما لمحت يا سمين فتحت بسرعه وشدتها من إيدها وقفلت الباب علي طول
ياسمين...إيه يابنتي في إيه براحه
دعاء...أتاخرتي كده ليه
ياسمين...علي بال ما مصطفي أخويا نزل هو وبابا وسبت ماما بتعمل الغدا وجتلك في إيه بقي إنتي روشاني من بليل
دعاء...بدموع أنا في مصيبه يا ياسمين
ياسمين....مصيبه إيه كفي الله الشر بطلي عياط وأحكيلي
حكتلها دعاء عاللي حصل كله.
ياسمين....هتكون مين دي
دعاء....معرفش يا ياسمين عشان كده قولتلك تجيلي عشان أفهم منك
ياسمين...تفهمي مني أنا؟!
دعاء...أيوه محدش غيرك إللي عارف يا ياسمين
ياسمين...بصدمه إنتي شاكه فيا أنا يا دعاء إنتي تعرفي إني ممكن أعمل حاجه زي دي ده أنا عشرت عمرك يا صاحبتي
دعاء...بدموع مقصدش يا ياسمين والله العظيم أنا بفكر معاكي بصوت عالي بس فعلا محدش يعرف غيري أنا وأنتي وسعيد
ياسمين...وهو عشان محدش يعرف غيرنا أحنا التلاته يبقي أنا عموما أنا مش هحاسبك عاللي بتقوليه ده أنا عارفه إنتي حالتك عامله أزاي الوقت ومش هعتب علي كلامك
دعاء...ياسمين صدقيني أنا عمري ما أشك فيكي أبدآ وعارفه أنك يا ما نصحتيني أبعد عن سعيد بس أنا مش عارفه أفكر يا ياسمين دماغي واقفه وهموت من الرعب وأنهارت دعاء من العياط
خدتها يا سمين في حضنها بحزن طيب بس أسكتي بقي خلينا نفكر العياط مش هيعمل حاجه..وبعدين مش يمكن سعيد نفسه إللي عمل كده إنتي عرفاه عيل واطي وإللي خلاه يعمل معاكي كده
ميخلنيش أستبعد أبدآ إن هو إللي وراها
دعاء...بس إللي كلمتني بنت
ياسمين...وإيه المشكله يمكن هو إللي مسلط واحده تقولك كده
دعاء...دي تبقي مصيبه وفضلت تعيط وتضرب علي رجليها بعنف يا نهار أسود دي تبقي مصيبه تبقي مصيبه يعني كمان قايل لحد إللي حصل
ياسمين....أنا بقول يمكن يا دعاء أحنا لسه مش متأكدين
وممكن كمان يكون حد بيعاكس
دعاء...لا مظنش يا ياسمين إللي كانت بتتكلم واضح علي صوتها الجد ومن أول ما رديت بتقولي أنا عارفه كل حاجه لو بتعاكس هتقول أي كلام لكن دي كانت تقصد كل كلمه وأكيد الكلام إللي قالته مش صدفه ولا حتي عشان أنا علي راسي بطحه.
