#جريمه_فى_حى_المقطم
#صاحبه_البطل_الواحد
#اميره_اسامه
البارت السابع عشر...
زينه كانت بتسمع اللي
بيتحكي ادامها وهي مصدومه من كم الجرايم والعلاقات المشبوهه اللي متورط فيها اكبر رموز في البلد اسامي كتير لرجال أعمال سمعتهم في السوق تشرف ازاي قادرين يظهروا بالشكل ده وهما وراهم بلاوي ازاي قادرين ينجحوا ويكبروا ويلبسوا قناع الفضيله وهما عاملين كوارث تضر بأسم مصر
ازاي قدروا يتاجروا بالبنات اللي عمرهم لا يتخطي العشرين سنه عشان مصالحهم تمشي وازاي قادرين يضحوا بأطفال مصرين وياخدوا أعضائهم عشان مصالحهم في دول تانيه تمشي ازاي قادرين يتاجورا ببنات واطفال بلدهم ازاي بيبيعوا بلدهم للي يدفع اكتر ليه ولحساب مين وعشان ايه فلوس ألف سؤال وسؤال كان بيدور في دماغها وهي بتسمع خالد
خالد...بس يا ستي هي دي كل الحكايه
زينه بصتله وهي قرقانه منه
زينه...ليه؟ ليه عملت كده ليه اشتركت في كل الجرايم دي
خالد....بإبتسامه سخريه إيه عايزه تديني درس في حب البلد والانتماء والكلام الفاضي ده
زينه....لأ اللي يعمل كل الجرايم دي سواء انت او اي حد وراك صدقني صعب معاه الكلام بس انا سؤالي ده عشان اقدر اخلص من الحيره اللي جوايا عشان اقدر الاقي رد واحد لكم الأسئله اللي جوايا دي
يمكن سمعت وشوفت بعيني كتير شباب ممكن تبيع بلدها تبيع اي حاجه منهم اللي معندوش نخوه وبيشغل بنات في حاجات غلط ومنهم اللي بيخطف طفل لعصابه بتاجر في الاعضاء ويدولوا شويه فلوس ومنهم اللي بيتاجر في المخدرات
واللي فالسلاح واللي بيخون بلده واللي بينضم لجماعات أرهابيه الشباب دي كلها بيتعملها غسيل مخ اغلبهم اللي ضايع واللي مش لاقي شغل واللي قوانين البلد منصفتوش يمكن ده مش مبرر ليهم بس تقدر تقول ان عندهم سبب او ثغره يقدر اي حد يدخلهم منها بس الغريب انت إيه مبررك او سببك إيه اللي يخلي واحد زيك في مركزك يعمل كل الجرايم دي مع بعض عندك المال والنفوذ وعندك كل حاجه تقدر تخليك عايش طول حياتك كويس عندك اطفال كانوا هيعيشوا طول حياتهم فخورين بيك لكن انت للاسف هتفضل ليهم وصمه عار حتي لو مت وهما كبروا هيفضلوا طول عمرهم بيتعاملوا علي انهم ولاد الخاين
الخاين لارضه وشباب وبنات واطفال بلده انت معندكش اي سبب يخليك تعمل كده يمكن النفوذ الخارجيه والوسايط او يمكن الفلوس بس مهما خدت فلوس ومهما بلغت ثروتك ونفوذك هتقدر تعيش ضميرك مرتاح هتقدر تعيش عادي وانت بتسهل دخول المخدرات لشباب بلدك وبتدمرهم وبدل ما واحد زيك بمركزه ومنصبه يكون قدوه لشباب كتير يبقي هو اللي بيسهل بايده ضياعهم هتقدر تعيش و بدل ما انت اللي بتحمي بنات بلدك
وتحافظ علي شرفهم انت بأيدك اللي بتجبلهم رجاله من بره ومن جوه مصر عشان ينهشوا في عرضهم
كام بنت ضيعتها وضيعت مستقبلها وكسرت اهلها عشان مصالحك ومصالح اللي وراك تمشي...كام ام نيمتها قلبها مخلوع علي ابنها اللي اتخطف واتاخدت اعضاءه ظلمت كام بيت في مصر يا سياده اللواء ضميرك مرتاح أو بلاش نقول ضميرك عشان الفلوس بتموت الضمير للاسف
اظن انا لو مكتوبلي اني اعيش بيتهيألي اني هكتب اهم واعظم مقال صحفي حصل في تاريخي المهني يمكن انا بغطي اخبار حوادث وجرايم كتير ويمكن اكون حاولت اوصل احساس الضحيه بس عمري ما كنت مكانها عشان اوصله بالطريقه الصح وانا انهارده مكانها وبصفتي صحفيه تخيل بقي المقال هيكون عامل ازاي
خالد....بإبتسامه عايزه تعملي مقال عن خالد حجازي..بصي يا زينه بما انها أعدت أعترافات خليني اكون كريم معاكي للاخر واقولك كلمتين واهو انا متأكد انهم هيفضلوا سر لانك مش هتكملي معايا كتير في حاجات كتير تايهه عنك اوعي تفكري ان البلد دي ادتني حاجه انا اللي ياما ادتها انا اللي ياما تعبت وشقيت وقدمت روحي اكتر من مره فدا ليها تفتكري خدت ايه اقولك خدت شهادات تقدير كلها متعلقه علي حيطه ملهاش اي لازمه في بيتي تقدري تقوليلي الشهادات دي ممكن تعمل ايه لولادي من غير نفوذ من غير علاقات من غير فلوس ولا اي حاجه ده حتي لو حاولوا يبيعوها مش هتجبلهم جنيه واحد انا شوفت في البلد دي اللي محدش يتوقعه يا زينه قبل ما اكون اللواء خالد حجازي كنت لسه طالب وبعدها ظابط صغير اللي ماسكين البلد دي يا زينه بيدوسوا علي الصغير بيدوسوا علي الضعيف اللي ملهوش ضهر يا زينه في بلدنا بيداس وانا عملت اسمي مش من فراغ عملت ضهر قدرت اكبر ومخليش حد يدوس عليا وبس اللي يحاول يضايقني بفعصصصه برجلي زي الصرصار
قدرت الاعب كبار كتير والكلمه تبقي بتاعتي اللي كان زمان يقدر يستهتر بيا الوقت يشوفني يضرب تعظيم سلام علاقاتي المشبوهه اللي انتي بتقولي عليها خلتني بس اشاور بصباعي اللي عايزه يتنفذ صدقيني القصه ابعد بكتير من الفلوس القصه كلها فالمعارف والنفوذ اللي بتقدر تخليكي فوق الكل
زينه...وللاسف حتي اللي بتقوله ده مش مبرر انت مفرقتش عن الكبار اللي انت شوفتهم بيدوسوا علي الضعيف وبيستقوا عليه عشان انت اول ما قويت قويت علي الضعيف اللي انت كنت في يوم من الايام مكانه بقيت زيك زيهم مع ان كان ممكن تكون احسن وتقدر تحارب الظلم اللي الكبار دول بيعملوه لكن انت بقيت ظالم اكتر منهم
خالد....افهميييي انا لو مكنتش دورت عالضهر مكنتش بقيت خالد حجازي كان زماني لسه بتداس
زينه...صدقني كان هيبقي اشرفلك
خالد....الشرف ميأكلش عيش في بلدنا يازينه للاسف
زينه....حلو طب وليه بقي ما تقولش الكلام ده للشباب ليه متنصحهمش انهم يخونوا بلدهم ويبيعوا عرضهم للي يدفع اكتر ليه بتحاول تبان كويس مثالي وتبان البطل الهمام اللي قدم لبلده كتير اللي كان بيضحي بحياته ليه ظاهر بوش الملاك ليه متكنش صريح عارف ليه عشان انت واثق ان اللي بتعمله ده غلط
خالد...يمكن انتي صح انا غلط بس خليني اقولك ان اوقات الغلط من وجهه نظرنا بيبقي هو الصح المثاليه مبتأكلش عيش يا زينه انا في يوم من الايام كنت زيك كده شايف الدنيا بوجهه نظر تانيه كنت بتكلم كتير بلسانك لكن خدت ايه جربي كده يا زينه تتكلمي بلساني هتتنقلي حته تانيه خالص
زينه...بسخريه ايه بتفكر تعفي عني وتجندني ليك
خالد....لو تحبي موافق
زينه....اقولك علي سر بما ان الاعده دي فيها اسرار وزي ما قولت انا كده كده رايحه وبعد الاعده دي هبقي مجرد ذكري في عقلك
خالد....قولي
زينه....يمكن السر ده اول مره في حياتي اقوله لاي حد انا مليش اهل ولا اعرفهم حتي امي وابويا اللي عشت معاهم عمري كله اكتشفت بعد سنين كتير إني مش بنتهم وإني اصلا من أصول مغربيه يمكن لحد من كام يوم قبل ما قعد قعدتي معاك دي كنت بفكر بطريقه تانيه خالص كنت ديما اقول لربنا ليه ليه جبتني لما انت هتفرقني عنهم وحتي مش هقدر اوصلهم ليه خلتني اعرف ان امي وابويا مش هما امي وابويا الحقيقين ليه لما انا مش هقدر اوصل لاهلي عرفتني الحقيقه اللي وجعتني يعني كنت ديما بتكلم مع ربنا وأقوله كلام مينفعش اني اقوله وكأني بلومه او أعاتبه أستغفر الله بس الوقت انا مش زعلانه ديما ربنا بيعمل حجات لينا بنشوفها من وجهه نظرنا احنا مش بوجهه نظره هو ديما مع اي حاجه وحشه بتمر في حياتنا اول كلمه بنقولها لييه؟؟ مع اننا المفروض نقول الحمد لله ...الحمد لله علي نعمه الوجع اللي كان ممكن يجي بدالها وجع اكبر الحمد لله علي نعمه المصيبه اللي كان ممكن يجي بدالها كارثه الحمد لله علي النعمه اللي شوفناها من وجهه نظرنا ظلم وهي فالاساس رحمه وعدل من ربنا الحمد لله علي نعمه الجهل بالغيب وربنا قالهالنا لو علمتم الغيب لا أختارتم الواقع وانا رضيت خلاص بالواقع لو اهلي فيهم حد زيك مش عيزاهم لو اهلي فيهم شر ليا انا خلاص رضيت بأهلي دول
كان ممكن الاول احسد ولادك انهم عندهم اب زيك لكن صدقني انا بشفق علي ولادك وبيتهيألي ادام شويه هما اللي ممكن يتمنوا ان ابوهم يكون حد تاني غيرك و يحسدوني اني مليش اهل.
بصلها خالد بسخريه مسكينه جهلك ضيعك للابد
زينه...اشرف ليا اني اموت جاهله احسن ما اعيش خاينه.
بصلها بغضب وقبل ما ينطق دخل بسرعه واحد من اللي شغالين معاه
خالد باشا جاتلنا اشاره من الجهاز ان حضرتك اتكشفت وان في قوه جايه علينا لازم نتحرك
بصلها خالد بغضب ورجع بصله بلغهم يحضرولي طياره خاصه بسرعه وبلغ الشباب يجيبوا المدام والولاد بسرعه لازم نسيب البلد خلال ساعه
ومسك موبايله بسرعه كلم شخص واضح انه من الكبار.
خالد....ايوه ياباشا جاتلي اشاره من الجهاز اني اتكشفت
خالد...المطلوب اني اسيب البلد في ظرف ساعه قبل ما يتقبض عليا
خالد...بصدمه وغضب يعني ايه مش فاهم هتتخلوا عني انت ناسي اللي انا اعرفه يا باشا
خالد....العفو مقدرش أهددك بس كمان انا مش هقع لوحدي والاهم ان اللي في الجهاز شغالين بأمري يعني من غيري انا وهما مش هتقدروا تعملوا اي حاجه
خالد....تمام يا باشا انا خلال ساعه هكون في الطياره الخاصه سلام.
ضحكت زينه بسخريه
بصلها خالد بغضب
زينه....عرفت بقي انك اسفه يعني غبي كنت فاكر ان الضهر والنفوذ اللي انت عملته هتفضل في ضهرك علي طول استغنيت عن منصبك عشان تسند علي ضهر مايل بمجرد ما امرك اتكشف بقيت بالنسبالهم كارت محروق
خالد...اسكتييي
زينه....انت مفكر ان تهديدك ليهم يهزهم دول اشاره منهم يخلصوا عليك واللي انت مفكر انك ممشيهم فالجهاز بمجرد ما يتقبض عليك هما اللي هيكونوا بدالك وانت ترجع تحت ومش بس هتداس لا انت حتي المنصب اللي اتخليت عنه عشان خاطرهم هيتسحب منك هيتحجز علي فلوسك كلها اي حد كان بيعمل اي حاجه باشاره منك هيديك ضهره
خالد...قولتلك اسكتيي
زينه...لعبتها غلط يا باشا بعت كل حاجه عشانهم واول ما وقعت الكل باعك مش بعيد واحد من رجالتك اللي بره اللي كانوا بيعملوا كل حاجه باشاره منك تجيلهم مكالمه انهم يخلصوا عليك ويبيعوك زي ما انت كنت بتبيع اي حاجه عشانهم ده كاس وداير يا باشا
ضربها خالد قلم بكل قوته من شدته وقعها من عالكرسي وقرب منها مسكها من شعرها.
خالد....هقتلك يا زينه هقتلك اللي بيحصلي ده بسببك لو حد وصلي فا وصلي عن طريقك قولتيلي محدش وراكي وانا عارف ان في حد وراكي صدقيني هتدفعي عمرك علي اللي عملتيه ده ومن هنا لحد ما اخرج من البلد دي هتفضلي معايا وبعد كده صدقيني هقتلك بايدي
دخل واحد من رجالته
العربيه جاهزه يا افندم المدام والولاد هيسبقونا علي مكان الطياره لازم نتحرك حالا
خالد...فكها بسرعه
جري بسرعه نفذ اللي اتأمر بيه وفك زينه
مسكها خالد من شعرها وهي بتصرخ من الوجع فضل يسحبها بسرعه وخرج بيها ركب العربيه في نفس التوقيت اللي القوه وصلت فيه المكان
عربيات شرطه وعربيات مصفحه وعربيات أمن مركزي المنظر كان يخض بجد ووراهم علي وماجد وفؤاد بعربياتهم علي كان سايق بأقصي سرعه وكأنه بيسابق عربيات الشرطه عشان يوصل لزينه
واحد من رجاله خالد
المكان اتقفل علينا يا باشا
خالد...بغضب نزل تاني من العربيه بسرعه وهو بيروح علي المكان اللي كان حابس فيه زينه من تاني
صرخت زينه بقوه من شدت الوجع
فاللحظه دي سمعها علي
علي....زيييييينه
زينه...من بعيد وهي بتعيط علييييي
سلم نفسك يا خالد المكان كله محاصر بلاش تورط نفسك اكتر من كده
خالد...لو حد قرب هقتلها سامعيييين هقتلها
اللي بتعمله ده مش في مصلحتك يا خالد سيبها وسلم نفسك
خالد...اللي عندي قولته اللي هيفكر يقرب هياخدها جثه انا مش هسيبها غير وانا في الطياره ومراتي وولادي معايا
تمام يا خالد هنعملك اللي انت عايزه
خالد...لواحد من رجالته طلع الموبايل
واتصل عليهم يجبولي الطياره هنا حالا
نفذ الشخص اللي معاه اوامره وفتح الاسبيكر
خالد....انا عايز الطياره تجيلي عالمخزن الكبير حالا المكان مقفول عليا ومش هعرف اطلع..
انا اسف يا افندم جاتلي اوامر الوقت اني متحركش ولا اساعدك
خالد ..بغضب انت بتقول ايه يا حيوان انت مش عارف انا ممكن اعمل فيك ايه نفذ الأوامر
اسف يا افندم الأوامر اللي عندي تمنعني من تنفيذ اوامر سعادتك واتقفل الخط مره واحده
خالد...بصوت جهوري ماليه الغضب كلاااااااب كلكم كلااااب
سحب زينه وفضل يمشي بضهره ومعاه رجالته بتأمنه وزينه بتصرخ
دخل بسرعه علي المخزن من تاني فالوقت ده ابتدت افراد الأمن تدخل المكان وتقرب
وفجأه سمعوا ضرب نار عليهم الكل خد ساتر بسرعه
وعلي واقف هيتجنن مش عارف يعمل إيه ولا يوصلها ازاي
ماجد...بصوت عالي يااااارب
علي...انا مش هقف متكتف كده كتير وزينه جوه
فؤاد....استني ياعلي متبوظش الدنيا وبدل ما يبقي واحد جوه تبقوا اتنين وتصعبوا المهمه اكتر
علي...وانا مش هأعد متكتف وحاطت ايدي علي خدي بصله بحزن دي زينه يا فؤاد زينه سابه علي وحاول يجري من مكان عكس المكان اللي قوات الأمن بيدخلوا فيه براحه وقبل ما ماجد يلحقه لمحه محمود ووقفوه ومخدوش بالهم من علي
وصل علي قرب المخزن من الجمب فضل يبص شمال ويمين المكان ملهوش اي باب غير باب واحد اللي دخلوا منه السور بتاعه عالي مش لاقي اي حاجه يقف عليها ويطلع للشباك حاسس إنه خلاص بيفقد عقله
وفجأه لمح ضرب نار من الدور التاني للمخزن بتتسدد لأفراد الأمن وسمع فؤاد بيصرخ باسم محمود اللي خد طلقه
فؤاد....محموووود اسعاف بسرعه
بص علي في زهول ورجع في ضهر المبني لمح باب حديد واقع عالارض حاول يوقفه وبعد محاولات من شيله ميله علي الحيطه بتاعت المبني رجع لورا شويه وجري مره واحده طلع عالباب بأقصي سرعه ومسك في حديد الشباك بسرعه ووقع الباب بص علي من الشباك المكان كان فاضي وسمع صريخ زينه جاي من فوق سطح المخزن فضل علي يحط رجله علي احجار المبني بصعوبه فضل يطلع واحده واحده وهو بيحاول يمسك ضرب النار شغال من الاتجاهين
قدرت الشرطه تصيب تلاته من رجاله خالد وفضل معاه واحد بس
بعد محاولات صعبه من علي قدر يوصل لسور الدور التاني بتاع المخزن لمح خالد وهو ماسك زينه والشخص التاني ادامهم بيتعامل مع الشرطه وكانوا بضهرهم مش شايفينه
حاول علي يطلع وسط صوت ضرب النار فضل يطلع بهدوء لحد ما دخل جوه السطح مسك حديده كانت مرميه عالسطح وقرب من خالد ضربه علي ايده وقع منه المسدس اللي موجهه في راس زينه صرخت زينه باسمه
وابتدا خالد يضرب هو وعلي بعض رغم ان علي كان صاحب جسم قوي ورياضي إلا ان خالد كان بيضربه بأحترافيه عاليه حاول علي يسدد ضربات قويه كتير ويحاول يردهاله وزينه واقفه تصرخ كل ده والشخص اللي مع خالد مش مركز بيحاول يتعامل مع الشرطه قدر يصيب افراد من الامن وفجأه حس بالحركه اللي وراه وبمجرد ما بص خد طلقه في ضهره وقعته فالوقت ده القوات أقتحمت المكان زينه كانت بتصرخ عشان علي وفجأه ضربه خالد براسه جامد حس علي انه فقد وعيه شويه مش شايف اي حاجه خالص ولا قادر يركز سمع خالد الزناد بتاع المسدس بيتسحب في ايد زينه بحركه سريعه منه سحب المسدس منها وهي صرخت قام علي وهو بيسند عالارض عشان يلحقها وجه خالد المسدس عليه وقبل مايضرب جريت زينه وهي بتبعده لكن خرجت الطلقه منه اتركزت في كتف زينه صرخ علي بأسمها..
زيننننننه.وجري وهو جواه غضب الدنيا علي خالد وقعه وفضل يضرب في وشه بعنف من غير ما يقف لحظه
دخلت افراد الامن واقتحموا المكان حاولوا يسحبوا علي من فوقيه لكن علي كان فاقد وعيه تماما ونازل ضرب فيه
لحد ما خالد كان خلاص هو كمان هيفقد وعيه بجد سحبوا علي من فوقيه بأعجوبه واتقبض علي خالد
جري فؤاد وماجد علي زينه اللي كانت فقدت وعيها
فاق علي وقدر يركز بص علي زينه اللي مرميه لقي المسعفيين بيحطوها علي سرير وبيربطوها عشان ينزلوا بيها بسرعه علي عربيه عالاسعاف
علي...جري علي مسك حرف السرير زينه زينه ردي عليا زينه انتي كويسه صح انتي مش هتسبينا يا زينه صح زييييينه
نزلوا بسرعه وراهم واتنقل كل رجاله خالد عالاسعاف اللي كانوا كلهم ميتين نتيجه الطلقات وسقوطهم من فوق المبني اما خالد فا كان عايش لكن مش باين ملامحه من كتر الضرب
ركبوا بسرعه عربياتهم وجريوا ورا عربيه الاسعاف
علي كان ماشي جمب عربيه الاسعاف بأقصي سرعه وعينه عالعربيه كأنه عايز يحسس زينه انه جمبها ملامحه كلها كان مرسوم عليها القلق بطريقه مش طبيعيه بعد وقت طويل أخيرا وصلوا المستشفي ركنوا عربياتهم ونزلوا جري ورا الدكاتره اللي خدوا زينه وجريوا بيها في طرقه طويله ركبوا الاسانسير عرف علي منهم الدور وطلع جري علي السلالم ووراه ماجد وفؤاد وصل علي قبل الاسانسير من سرعته خرجوا بيها بسرعه علي اوضه العمليات ومنعوهم يدخلوا ده كان اخر مكان يقدروا يقفوا فيه فضل علي رايح جاي بقلق وتوتر
فؤاد...خير ان شاء الله الدكتور بيقول ان الرصاصه في كتفها
ماجد...بس دي نزفت كتير اوي مش شايف منظر وشها عامل ازاي
فؤاد...أتفائل خير يا اخي الحمد لله انها في كتفها وكويس اوي انها اصلا جت علي رصاصه يا ماجد انت مش واخد بالك احنا كنا في ايه احنا كنا في حرب ربنا يستر علي محمود هو كمان الرصاصه في صدره
وانت يا علي عايزين نروح نشوف دكتور يشوف الجروح والكدمات اللي في وشك دي
سكت علي ومردش
ماجد....هو محمود باشا فين صحيح انا مخدتش بالي منه كنت مركز علي زينه
فؤاد....دخل هو كمان العمليات عربيه الاسعاف التانيه اللي كان فيها كانت سابقه اكيد دخل علي طول
يلا ياعلي تعالي نطمن عليك
علي...لما نطمن علي زينه الاول يا فؤاد انا كويس
بصله فؤاد بحزن عارف ان حالته الوقت متسمحش بأي جدال فا سابه براحته
عدي حوالي نص ساعه البنات وصلوا المستشفي القلق والرعب باين عليهم
دينا....زينه حصلها ايه يا ماجد
شمس....زينه فين ياعلي حصلها ايه يا فؤاد حد يطمنا
فؤاد....اهدوا بسيطه الحمد لله هي لسه في العمليات
ندا...يانهار اسود عمليات ليه
دينا...ماتنطق يا ماجد هي اتصابت
ماجد....خدت طلقه يا دينا
حطوا ايدهم علي بوئهم بفزع وابتدوا يفقدوا السيطره علي دموعهم
شمس....طلقه ازاي ازاي محدش عرف يحميها وانت ياعلي ايه اللي حصلك ده
فؤاد ..ياشمس الحمد لله دي في كتفها ونحمد ربنا انها جت علي اد كده انتوا لو كنتوا شوفتوا الحرب اللي احنا كنا فيها كنتوا حمدتوا ربنا انها جت علي اد طلقه في الكتف ادعولها انتوا بس والوقت تخرج بخير واخوكي يا ستي مش راضي يروح يشوف اللي في وشه ده
شمس...بدموع راحت علي علي حطت ايدها علي كتفه عشان كانت حاسه بيه
شمس...بدموع علي حبيبي انت كويس تعالي ياعلي نشوف دكتور لحد ما زينه تخرج
علي...بصلها بوجع انا السبب يا شمس
بصولوا كلهم
علي....انا السبب في كل ده اللعبه دي لو مكنتش فكرت فيها من الاول مكنش كل ده حصل
شمس....لا يا حبيبي لو في حد ممكن يشيل ذنب زينه يبقي انا مش انت انا اللي فكرتك باللعبه في العين السخنه وانا اللي شرحتهالهم وقولتلكم تعالوا نلعبها
ماجد....ايه الهبل اللي انت بتقوله انت وهي ده انت مش سبب ولا حاجه ياعلي اللعبه دي انت لعبتها وانت لسه عيل صغير وانتي يا شمس لما قولتي عليها مضربتيش زينه علي ايدها تلعبها اه لعبناها هناك مع بعض وهزرنا بس عملناها في حد نعرفه مكررناش اللي انتي وعلي عملتوه وانتوا صغيرين الدور والباقي عالكبيره اللي جريت عملتها اول مره عدت علي خير وأعتبرناها مساعده وقولنا يمكن ربنا وقعنا في طريق البنت دي عشان هي محتاجه مساعده فعلا مع اني مكنتش راضي عاللي بيحصل ده وخدت عهد علي زينه ادامكم انها متكررهاش لاني اكتر حد فيكم عارف زينه كويس
اللعبه عجبت زينه يا علي وده انا كنت حاسه وعارف انها هتعملها تاني طبيعه شغل زينه أثرت علي شخصيتها رغم اني شوفت انهارده هي كانت مرعوبه اد ايه واللي انت حكيته انت ومحمود باشا عالكاميرات وخوفها إلا ان فضولها اتحكم فيها
ياعلي وهو اللي خلاها تعمل ده يعني لا انت ولا شمس سبب في ده
علي...بردو مكانش لازم نسبها اكيد لما كلنا سافرنا هي حست بملل يا ماجد
ماجد ..لا ياعلي زينه لعبت اللعبه دي قبل ما نسافر واظن انت عارف اني روحت معاها قابلنا البنت اللي كلمتها هي وصحبتها
متحاولش تشيل الذنب ياعلي اما بقي زينه فا حسابها معايا بعد ما تفوق
فؤاد...اهدي شويه ياماجد خلينا نقول ان فالاول والاخر بردو زينه من غير ما تقصد عملت حاجه كويسه
ماجد...اديك قولت يا فؤاد من غير ما تقصد لو اللي حصل ده حصل في وقت شغل كنت قولتلك تمام وكل واحد فينا معرض ان يحصله اي قلق في شغله حتي لو هتوصل لموتنا فالاخر ده شغلنا
لكن زينه ماكنتش عارفه اللي بتعمله كانت بتلعب مع واحد اسهل حاجه عنده القتل والمصيبه انها لما حست بالخطر ماقالتش لاي حد فينا قال وايه خافت تقلقنا
دينا....ماجد انا عارفه انك معاك حق في كل ده وزينه فعلا غلطت عشان عرضت نفسها للخطر بس زينه الوقت تعبانه هي مش حمل كلام لا عشان العمليه ولا حتي عشان اللي مرت بيه الكام يوم اللي فاتوا
فؤاد...بالظبط يا دينا اتكلم معاها يا ماجد وبس تبقي كويسه قولها كل اللي انت عايزه بس سبها الوقت خالص زينه محتجانا كلنا جمبها
فالوقت ده رن تليفون زينه اللي مع علي طلعه كان فارس اخوها
بصلهم ده فارس دي تالت مره يرن الوقت رن مرتين واحنا فالطريق رايحين نجيب زينه والوقت اهو بيتصل تاني
خد رد عليه يا ماجد انا مش قادر اتكلم
ماجد....ولا انا هيحس اصلا من صوتي
فؤاد...هات الموبايل انا هكلمه
خد فؤاد الموبايل وبعد شويه رد عليه
فؤاد...الووو أزيك يا فارس
فارس...مين انت
فؤاد...انا فؤاد يا فارس
فارس...اااه ازيك يا فؤاد عامل ايه
فؤاد...الحمد لله بخير انت عامل ايه
فارس...بخير زينه فين كلمتها كذا مره هي ليه مش بترد هي كويسه
فؤاد...ااه اه هي بخير بس نسيت موبايلها في المكتب
فارس....اه طيب بقولك ايه هقولك حاجه ومتجبلهاش سيره
فؤاد...خير يا فارس
فارس....انا عامل لزينه مفجأه وجيت من امريكا انا الوقت في مطار شرم بقالي كام ساعه و المفروض عشر دقايق وتطلع الطياره وبصراحه كنت
عايز اضحك عليها واكلمها عادي عشان افاجئها لكن لما مردتش قلقت
فؤاد...اممم طيب بص يا فارس بما انك جاي فا انا بصراحه كدبت عليك زينه تعبانه شويه
فارس...ايه زينه تعبانه ليه
فؤاد...اهدي متخافش هي احسن بس تقدر تقول اصابه عمل مش اكتر بس صدقني والله هي بخير انا قولتلك عشان لما توصل ومش هتلاقيها هتقلق
فارس...طيب هو انا ينفع اكلمها
فؤاد...للاسف لأ هي نايمه المهم اوعي تعرف مامتك وبباك انت عارف مش هيستحملوا وهيقلقوا
فارس...اوك اوك اكيد مش هقول خلاص انا اول ما اوصل هكلمك علي طول تقولي انتوا فين
فؤاد...تمام مستنينك واكيد زينه هتفرح اوي لما تشوفك
فارس....يارب يلا اشوفك علي خير لازم اروح للطياره
فؤاد....توصل بالسلامه
قفل فؤاد ورجعلهم
ماجد....ايه اطمن
فؤاد....تقريبا قولتله انها تعبانه فارس جاي في مطار شرم وكان عاملها مفجأه
ماجد....نزل مصر
شمس...طيب الحمد لله زينه هتفرح اوي
ماجد...ربنا يستر ومايقولش لخالتي وجوز خالتي
فؤاد...اطمن نبهت عليه
فالوقت ده اتفتح باب العمليات وخرجت زينه علي ترولي جريوا عليها بسرعه
علي...زينه زينه سمعاني
الدكتور...اطمنوا الحمد لله هي بخير جت سليمه يمكن الرصاصه غلبتنا لكن الحمد لله انها في الكتف
فؤاد...يعني هي بخير
الدكتور ..اطمنوا هي احسن كتير وشويه وهتبدأ تفوق وانا شويه وهعدي أشوفها حمدالله علي سلامتها
فؤاد...الله يسلمك شكرا يا دكتور جريوا وراها عالاوضه
اتنقلت للسرير وعلقولها المحلول
وفضلوا اعدين حواليها لحد ما تفوق وراح فؤاد وماجد مع علي يطمنوا عليه كان عنده كدمات في وشه وجرح بسيط في جمب عينه وجرح في شفايفه الدكتور اتعامل مع الجروح وكتبله علي كريم ومسكن عشان قاله انه هيحس بالالم بعد شويه ورجعوا تاني عالاوضه
عدي حوالي ساعه كانت ابتدت زينه تتكلم وتخرف بالكلام شويه تفتح عينها وشويه وتقفلها وترجع تنام واخيرا فاقت واول حد نطقت أسمه كان علي
زينه...علي علي
انتظرونى...
