مذكرات جندي مجهول

( فاصل ) حقائق مهمة

#مذكرات جندي مجهول
#للكاتب عبد الله محمود

__ طبعا الفترة الجاية المتمثلة ب ( ٣ اشهر ) كانت اشبه بالحرب الباردة على قاطعنة و جانت حامية كلش بالجنوب على الشريط الحدودي من جهة الكوت و العمارة و البصرة لان جيشنا بذيج الفترة جان ماخذ المحمرة ( بايران يسموهة خرمشهر ) و واصل لنهر الكارون و مسيطر ع ميناء المحمرة و حاصر عبادان و سيطر على اراضي متطرفة بيهة و اخذ الحويزة و الخفاجية ( سوسنكرد بالايراني ) و الشوش و سيطرنا ع اغلب القرى الايرانية هناك و صار جيشنا مطل ع الاهواز و حاصر مهران و دهلران !!! شي عجيب غريب و الصدمة عد الايرانيين متنوصف ممتوقعين هذا الانضباط و العقيدة و كفاءة التدريب عد الجيش العراقي !!! هو بصراحة جان تقدم مجنون من قواتنا !! انتة خلال ٦ اشهر اخذت هلكد !!! بس دائما تعلمو بالمستقبل حتى متوكعون بنفس الخطأ العسكري لقادتنة و بكل شي يخص حياتكم مو بس بالعسكرية ( لو تضل على تقدمك المجنون و متنطي فرصة للكدامك ياخذ نفس لو تستعمل طريقة المناورة و الدفاع و الكمائن و تبدي تستهلك الطاقة البشرية لقوات العدو لان اي جيش من يشوف خسائرة هواية بدون ما يحقق انتصار حاسم و قوي راح يبدي ينهار ، اهم شي متضل متخبط بقرارك و مرة تدافع و مرة تهاجم !!! ) .

__ المشكلة الي بدت تواجه العراق بعدين من اخذ كل هاي المناطق شنو هي؟ ماعندة القوة العسكرية الكافية الي تلزم الارض المحررة و تسد المساحات الشاسعة بين الجبهات !! تعداد شعبنة بذاك الوقت ١٥ مليون يعني شكد يريد يصير عندك رجال صالحين للتجنيد !! ١٠٠ لو ٢٠٠ الف بالزايد ٣٠٠ و جيشنا تعدادة ربع مليون ؟؟ تعداد ايران ٤٠ مليون يعني الطاقة البشرية عدهم اكبر بهواية يعني اكيد عندة اقل شي مليون رجل صالح للتجنيد و جيشهم جان ٧٠٠ الف عسكري يعني يكدر يقاومك ع الجبهة و يكدر يسد اي فراغ بالشريط حدودي الي مساحتة الف كيلو عادي !! بس انتة منين تجيب !!؟ كل جيشك ربع مليون و الاحتياطي مالتك ميتخطى الربع مليون يعني جيشك وية الاحتياطي و وية الجيش الشعبي الي تكون بالسبعينات و دخل بالحرب كلهم تعدادهم يعادل تعداد الجيش الايراني وحدة بدون الاحتياط و بدون قوات بدر !!

__ انجبر العراق ان يتجه الى تجنيد بعض عناصر الشرطة و يزيد تعداد الجيش الشعبي و صار بالجيش الشعبي ( معلمين و مدرسين و ناس اصحاب مهن مدنية شجابهم ع المعارك !! ) و لزموهم اراضي شاسعة بين الجبهات زين هذولي وين يكدر يصدون هجوم عسكري !!؟ همة عبارة عن شرطة داخلية اكثر شي شايفة هو المسدس و البندقية و اكثر شي مسوي لازملة واحد شايل سجينة !! و المعلم اقوى شي لازمة الطباشير !! وين يكدر يقاتل ع جبهة ! ترة احنة الاحتياط دخلنة دورة ضباط و مع ذلك البعض من عدنة اول ما تحمة المعركة يسلم نفسة لو يفلت الروح عزيزة عمي و تحس بمعزتها من يقترب الموت الك !! الحرب مو سهلة يا جماعة !! هاي قضية حياة او موت مو عركة بشارع !! جان عدنة مثل دائما نكولة بيناتنا احنا الضباط و الجنود ( يردس حيل الماشايفها ... و الشايفها يشد عمامة ) يعني الي مو ضايك الجبهة تلكا يدبج و حامي و يهوس و يريد يدخل للجبهة بس من يشوفهة و يضوكهة يرجع يشد عمامة و يصير شيخ حتى ميرجعلهة بعد ههههه .